
马尔巴大师教言集MARPA41སྒྲ་བསྒྱུར་མར་པ་ལོ་ཙྪའི་རྣམ་པར་ཐར་པ་མཐོང་བ་དོན་ཡོད་བཞུགས་སོ། །
2-3-1a
༄༅། །སྒྲ་བསྒྱུར་མར་པ་ལོ་ཙྪའི་རྣམ་པར་ཐར་པ་མཐོང་བ་དོན་ཡོད་བཞུགས་སོ། །
༄། །བོད་ཡུལ་དུ་སྐུ་སྐྱེ་བ་བཞེས་ནས་སྤྱིར་དམ་པའི་ཆོས་དང་མཇལ་ཚུལ།
༄༅། །སྒྲ་བསྒྱུར་མར་པ་ལོ་ཙྪའི་རྣམ་པར་ཐར་པ་མཐོང་བ་དོན་ཡོད་བཞུགས་སོ། །
2-3-1b
༄༅། །ན་མོ་གུ་རུ་དེ་ཝ་ཌཱ་ཀི་ནི། སྔོན་སྦྱངས་ཐུགས་བསྐྱེད་སྨོན་ལམ་དུས་བབས་ལྷག་བསམ་གྲུ་གཟིངས་ནང་དུ་ལུས་སྲོག་མ་ཆགས་འགྲོ་དོན་སྦྱོར་བ་མཆོག་གིས་རབ་ཞུགས་ནས། །འཕགས་ནོར་མཐུན་རྐྱེན་ཡོ་བྱད་གཡོར་མོ་བརྩོན་འགྲུས་མཐུན་རླུང་གིས་བསྐྱོད་ཕུ་ལ་ཧ་རི་ལ་སོགས་འཕགས་ཡུལ་ཆུ་གཏེར་གླིང་ཕྱིན་ཏེ། །ནཱ་རོ་ལ་སོགས་མཆོག་གི་མཁས་གྲུབ་གདེང་ཅན་རྒྱལ་པོ་དཔལ་འབར་རྣམས་ལས་དམ་ཆོས་ནོར་བུ་དགོས་འདོད་ཆར་འབེབས་བླངས་ནས་ནི། །བོད་ཡུལ་འཛམ་གླིང་དབུལ་ཕོངས་ཀུན་གསལ་ཕྲལ་ཡུན་ཟག་མེད་དགེ་ལ་འགོད་མཛད་དེད་དཔོན་དགེ་དོན་མར་པའི་ཞབས་ལ་གུས་ཕྱག་འཚལ། །རྡོ་རྗེའི་སྐུ་ཡི་ངལ་དུབ་ཁྱད་བསད་
2-3-2a
ནས། །རྒྱ་གར་མཁས་གྲུབ་མཉེས་མཛད་རྒྱལ་ཚབ་འཛིན། །གངས་རིའི་ཁྲོད་འདིར་ཐུབ་བསྟན་རྒྱལ་མཚན་བཙུགས། སྒྲ་བསྒྱུར་མར་པའི་སྐུ་ལ་ཕྱག་འཚལ་བསྟོད། །རྒྱལ་བ་རྣམས་ཀྱི་གསུང་གི་བདུད་རྩི་ནི། །ཚིག་དོན་མ་ལུས་འཐུངས་འབྲས་མངོན་གྱུར་པའི། །སེང་གེའི་ང་རོས་ལོག་ལྟ་ཐེག་དམན་འཇོམས། །སྒྲ་སྒྱུར་མར་པའི་གསུང་ལ་ཕྱག་འཚལ་བསྟོད། །ཤེས་བྱའི་གནས་ཚུལ་ཇི་ལྟ་ཇི་སྙེད་མཁྱེན། །བདག་པས་གཞན་གཅེས་འགྲོ་ཀུན་བརྩེ་བས་སྐྱོངས། །མཁྱེན་བརྩེའི་འོད་ཀྱིས་སྐྱེ་དགུའི་བློ་མུན་སེལ། །སྒྲ་བསྒྱུར་མར་པའི་ཐུགས་ལ་ཕྱག་འཚལ་བསྟོད། །ཟག་མེད་བདེ་རྒྱས་གཞན་དོན་མཛད་པའི་སྐུ། །ཉམ་མྱོང་ཐེག་ཆེན་
2-3-2b
ཆོས་འཁོར་བསྐོར་བའི་གསུང་། །ཡེ་ཤེས་ལྔ་བདག་དོན་གཉིས་མཐར་ཕྱིན་ཐུགས། །སྐྱེས་མཆོག་སྒྲ་བསྒྱུར་རྗེ་བཙུན་མར་པ་ཡི། །སྐུ་གསུང་ཐུགས་ལ་གུས་པས་ཕྱག་འཚལ་བསྟོད། །རྒྱལ་སྲས་ཐུ་བོ་ཆོས་ཀྱི་བློ་གྲོས་ལ། །བདག་ནི་དད་པས་དབང་མེད་གུས་ཕྱག་འཚལ། །ཉིན་མཚན་འཁོར་ཡུག་སྒོ་གསུམ་རིམ་གཉིས་དང་། །གཞན་དོན་བསྒྲུབ་ལ་བརྩོན་པའི་མཆོད་པ་འབུལ། །ཐོག་མེད་དུས་ནས་ཉོན་མོངས་དབང་གྱུར་པའི། །སྒོ་གསུམ་ཉེས་ལྟུང་གནོང་འགྱོད་དྲག་པོས་བཤགས། །དམ་པ་ཁྱོད་ཀྱི་ཆོས་ཕྱིར་དཀའ་སྤྱད་སོགས། །མཛད་མཆོག་རྣམས་ལ་སྙིང་ནས་རྗེས་ཡི་རང་། །བདག་སོགས་འགྲོ་ཀུན་སྨིན་ཅིང་གྲོལ་བྱའི་ཕྱིར། །གང་ལ་གང་འདུལ་ཆོས་འཁོར་བསྐོར་བཞིན་དུ། །ཇི་སྲིད་སེམས་ཅན་སྡུག་བསྔལ་མ་བསྒྲལ་བར། སྐྱབས་མགོན་མྱ་ངན་མི་འདའ་བཞུགས་སུ་གསོལ། །དགེ་བས་འགྲོ་ཀུན་སངས་རྒྱས་ཐོབ་ཕྱིར་བསྔོ། །རྒྱལ་བ་སྲས་བཅས་ཐུགས་དགོངས་ཡོངས་རྫོགས་ཤོག །སྐྱེས་མཆོག་སྒྲ་བསྒྱུར་མར་པ་ལོ་ཙྪ་(ལོཙྪ་)ཡི། །ཡོན་ཏན་རྣམ་ཐར་ནམ་མཁའ་ལྟ་བུ་ལས། །ངོ་མཚར་མདོ་ཙམ་འགྲོ་ལ་ཕན་ཕྱིར་བཀོད། །བླ་མ་ཡི་དམ་མཁའ་འགྲོས་གནང་དུ་
2-3-3a
གསོལ། །བརྩེ་བས་གནང་ནས་བྱིན་གྱིས་བརླབ་པར་མཛོད། །དེ་ཡང་མ་རིག་པའི་འགྲོ་བ་མཐའ་དག་འདུལ་བའི་སླད་དུ་རྒྱལ་བ་གོང་མ་རྣམས་བཀའ་བགོས་(བགྲོས་)མཛད་ནས། ཐུགས་ཀྱི་སྲས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དེ་ཉིད་མངགས་པས། རྒྱ་གར་དུ་ཌོཾ་བྷི་ཧེ་རུ་ཀ་ཞེས་བྱ་བར་སྐྱེ་བ་བཞེས་ནས་འགྲོ་བ་མང་པོའི་དོན་མཛད་རྗེས། སླར་ཡང་གངས་ལྗོངས་ཀྱི་འགྲོ་བ་རྣམས་འདུལ་བ་ལ་མངགས་ཕྱིར་སྐྱེ་བ་བཞེས་ཏེ་བོད་གངས་ཅན་གྱི་སྐྱེ་འགྲོ་ཀུན་གྱི་དཔལ་དུ་ཤར་ནས་སངས་རྒྱས་ཀྱི་བསྟན་པ་ཉིན་མོར་མཛད་པའི་སྐྱེས་བུ་དམ་པ་སྒྲ་བསྒྱུར་མར་པ་ལོ་ཙྪ་(ལོཙྪ་)དེ་ཉིད་ཀྱི་ངོ་མཚར་བའི་མཛད་པ་རྣམ་ཐར་ལས་སྐུ་སྐྱེ་བ་བཞེས་ནས་སྤྱིར་གྱི་དམ་པའི་ཆོས་དང་མཇལ་ཚུལ། བྱེ་བྲག་ཏུ་རྒྱ་གར་ལ་བྱོན་ནས་ཆོས་ཕྱིར་དཀའ་བ་སྤྱད་ཅིང་མཁས་གྲུབ་ཀྱི་བླ་མ་རྣམས་ལས་དམ་ཆོས་ནོད་པ་བོད་ཡུལ་དུ་སྤྱན་དྲངས་ཚུལ། ཐུགས་ཉམས་སུ་བཞེས་པས་ཉམས་རྟོགས་ཐུགས་ལ་འཁྲུངས་ཚུལ། དེའི་སྒོ་ནས་བསྟན་པ་དང་སེམས་ཅན་ལ་ཕན་ཐོགས་མཛད་ཚུལ། བསྟན་པ་དང་སེམས་ཅན་གྱི་དོན་མཛད་ནས་གཟུགས་སྐུ་ཆོས་དབྱིངས་སུ་ཐིམ་ཚུལ་དང་
2-3-3b
ལྔའི་དང་པོ། བོད་ཡུལ་དུ་སྐུ་སྐྱེ་བ་བཞེས་ནས་སྤྱིར་གྱི་དམ་པའི་ཆོས་དང་མཇལ་ཚུལ་ནི། སྐྱེས་མཆོག་མར་པ་ལོ་ཙྪ་(ལོཙྪ་)དེ་ཉིད་ཀྱི་སྐུ་འཁྲུངས་པའི་ཡུལ་ལྷོ་བྲག་ཆུ་ཁྱེར་གྱི་གྲོ་བོ་ལུང་དཔེ་གསར་དུ། ཡབ་མར་པ་དབང་ཕྱུག་འོད་ཟེར་དང་། ཡུམ་རྒྱ་མོ་གཟའ་མདོ་སྡེ་ཞེས་བྱ་བ་ཡུལ་འབྲོག་གཉིས་ཀ་འཛིན་པས་ལོངས་སྤྱོད་ཤིན་ཏུ་ཆེ་བའི་ཡབ་ཡུམ་གཉིས་ལ་སྲས་ལྕམ་སྲིང་གསུམ་ཡོད་པའི་སྲས་པོ་ཆུང་བ་རྗེ་བཙུན་མར་པ་ཡིན་ལ། དེ་ཡང་སྐུ་གཞོན་ནུ་ནས་ཐུགས་ཤིན་ཏུ་གཏུམ་ཞིང་རྒོད་པས། ཡབ་ཀྱི་ཞལ་ནས་ངའི་བུ་འདི་བློ་ཕྱིར་མ་ལོག་ན་ཆོས་འཇིག་རྟེན་གང་བྱས་རུང་ཏོག་ཏུ་ཐོན་པའི་རང་གཞན་མང་པོ་ལ་ཕན་ཐོགས་ཆེན་པོ་འབྱུང་བ་ཞིག་ཡོང་བར་འདུག་སྟེ། རྒྱལ་བློ་ལོག་ན་རང་གཞན་ཀུན་ཕུང་ལ་སྦྱོར་བ་ཞིག་ཡོང་བར་འདུག་པས། ཁེ་ཉེན་ལ་བལྟས་ན་གདོད་ཆོས་སུ་བཅོལ་བ་ལེགས་འདུག་གསུངས་པ་ལྟར། སྔར་མཚན་དར་མ་དབང་ཕྱུག་ཟེར་བ་ལ་ལོ་བཅུ་གཉིས་ནས་ཡུལ་ན་སློབ་དཔོན་གཅིག་ཡོད་པ་དེའི་མཚན་ཆོས་ཀྱི་བློ་གྲོས་སུ་གསོལ་ནས་ཆོས་སྒོར་བཅུག་སྟེ་ཀློག་ཡིག་བསླབས་པ་ལས་ཐུགས་རབ་ཆེ་བའི་སྟོབས་ཀྱིས་མཐར་ཕྱིན་པ་ཤེས་རུང་། ཐུགས་རྒོད་པས་འཐབ་མོ་ལ་ཤིན་ཏུ་དགྱེས་ཕྱིར་ནང་མི་ཀུན་ན་རེ། འདིས་ཆེ་སྟེ་ཁོ་རང་ངམ། འོ་ཅག་གི་སྲོག་སྐྱེལ། ཆུང་
2-3-4a
སྟེ་ནོར་ཞིང་དང་བཅས་པ་སྐྱེལ་བར་འདུག་ཟེར། ཕྱི་ནང་གི་མི་ཀུན་གྱིས་སྐུར་བ་འདེབས་ཤིང་ཟུར་དུ་འབྱེད་པ་ཞིག་བྱུང་བ་ལས་ཐུགས་འབྱུང་བའི་ཚེ། ཡབ་ཀྱི་ཞལ་ནས། ཁྱོད་རང་ཐག་རིང་གི་བླ་མ་བཟང་ས་ཞིག་ཏུ་སློབ་གཉེར་ལ་ཕྱིན་པ་ལེགས་པ་འདུག་གསུངས་པ་ལྟར། ཡབ་ཀྱི་ཞལ་ལ་ཉན་ནས་སློབ་གཉེར་ལ་ཐུགས་ཐག་བཅད་དེ་ཡབ་ཡུམ་ལ་སློབ་གཉེར་གྱི་རྒྱགས་ཞུས་པས་རེ་ཞིག་འདི་དག་གྱིས་གསུངས་ཏེ་ཆོས་རྒྱགས་ལ་ཡུམ་བཅུ་དྲུག་དུམ་ཚར་གཅིག་གི་ཤོག་བུ་ཁལ་མ་གཉིས་དང་བཅས་པ་གསེར་སྲང་གང་། དངུལ་སྐྱོགས་གཅིག རྟ་བཟང་པོ་སེང་ལྡེང་གི་སྒ་དང་བཅས་པ། ཟ་འོག་ཡུག་གཅིག་རྣམས་ཁྱེར་ཏེ་བླ་མ་འབྲོག་མི་ལོ་ཙྪ་(ལོཙྪ་)བ་རྒྱ་གར་འཁོར་འཕྲལ་གྱི་སྙན་པ་ཤིན་ཏུ་ཆེ་བར་འདུག་པས་མང་མཁར་མྱུ་གུ་ལུང་གི་དགོན་པར་བྱོན་ནས། འབྲོག་མིའི་དྲུང་དུ་ཤོག་བུ་ཁལ་མ་གཉིས་དང་བཅས་པ་འབུལ་བར་ཕུལ་ཞབས་ལ་གཏུགས་ཏེ་ཆོས་བྱེད་པའི་ལོ་རྒྱུས་ཞུས། དབང་གདམས་ངག་གི་གསོལ་བ་བཏབ་པ་ལས། དབང་གདམས་ངག་ནི་མི་གནང་། རྒྱ་གར་གྱི་སྐད་ཐང་ཀློག་དང་འཕྲལ་སྐད་ཀྱི་ལོ་ཙྪ་(ལོཙྪ་)བསླབས་པས་ལོ་གསུམ་ལ་བརྡ་ཕྲོལ་ངེས་མཁྱེན་པར་གྱུར་ཏོ།། །།
༄། །བྱེ་བྲག་ཏུ་རྒྱ་གར་ལ་བྱོན་ནས་ཆོས་ཕྱིར་དཀའ་བ་སྤྱད་ཅིང་མཁས་གྲུབ་ཀྱི་བླ་མ་རྣམས་ལས་དམ་ཆོས་ནོད་པ་བོད་ཡུལ་དུ་སྤྱན་དྲངས་ཚུལ།
གཉིས་པ་བྱེ་བྲག་ཏུ་རྒྱ་གར་ལ་བྱོན་ནས་ཆོས་ཕྱིར་དཀའ་བ་སྤྱད་ཅིང་མཁས་
2-3-4b
གྲུབ་ཀྱི་བླ་མ་རྣམས་ལས་དམ་ཆོས་ནོད་པ་བོད་ཡུལ་དུ་སྤྱན་དྲངས་ཚུལ་ནི། རྒྱ་གར་ལ་ལན་གསུམ་བྱོན་པའི་དང་པ་(པོ་)ལ། རྒྱ་གར་དུ་འབྱོན་པ་ཐུགས་ལ་ཤར་ཏེ་མཐུན་རྐྱེན་བསྒྲུབས་ནས་ཆས་པས་གྲོགས་དང་མཇལ་ཏེ་རྒྱ་གར་ལ་བྱོན་ཚུལ། རྒྱ་གར་དུ་ཕེབས་ནས་མཁས་གྲུབ་ཀྱི་བླ་མ་རྣམས་དང་མཇལ་ཏེ་ཐེག་ཆེན་གྱི་སྙིང་པོ་དོན་གྱི་དམ་ཆོས་རྣམས་ཐོབ་ཚུལ། ཐོབ་ནས་སླར་བོད་དུ་བྱོན་ཚུལ་དང་གསུམ་གྱི་དང་པོ།
༄། །རྒྱ་གར་ལ་འབྱོན་ཐེངས་དང་པོ།
༈ རྒྱ་གར་དུ་འབྱོན་པ་ཐུགས་ལ་ཤར་ཏེ་མཐུན་རྐྱེན་བསྒྲུབས་ནས་ཆས་པས་གྲོགས་དང་མཇལ་ཏེ་རྒྱ་གར་ལ་བྱོན་ཚུལ།
རྒྱ་གར་ལ་འབྱོན་པ་ཐུགས་ལ་ཤར་ཏེ་མཐུན་རྐྱེན་བསྒྲུབས་ནས་ཆས་པས་གྲོགས་དང་མཇལ་ཏེ་རྒྱ་གར་ལ་བྱོན་ཚུལ་ནི། བླ་མ་འབྲོག་མིའི་དྲུང་དུ་ཕྲལ་སྐད་བརྡ་འཕྲོད་ཙམ་མཁྱེན་པའི་ཚེ། སྤྱིར་གྱིས་བླ་མ་འབྲོག་མི་དང་ཡུན་དུ་འགྲོགས་པའི་ལས་འབྲེལ་མེད་པ་དང་། པཎ་ཆེན་ནཱ་རོ་སོགས་རྒྱ་གར་གྱི་བླ་མ་རྣམས་དང་ལས་འབྲེལ་བཟང་པོ་ཡོད་པ་སད་པའི་དུས་ལ་བབ་པའི་ཕྱིར། རྗེ་བཙུན་རྡོ་རྗེ་རྣལ་འབྱོར་མས་ནཱ་རོ་པ་དང་སྤྲོད་ཕྱིར་ཐུགས་བརྒྱུད་བསྐུལ་བའི་སྟོབས་ཀྱིས་ཐུགས་ལ་ངས་བླ་མ་འདིའི་དྲུང་དུ་ཡུན་བསྲིངས་ནས་བསྡད་རུང་། བདག་མེད་མའི་དབང་བཞི་རྫོགས་རེ་ལ་འབྲི་བཅོ་ལྔ་རེ་དང་ལྷ་མོ་རལ་གཅིག་མའི་རྗེས་རེ་གནང་མའི་རྗེས་གནང་རེ་ལའང་འབྲི་གཡག་རེ་ཙམ་ངེས་པར་དགོས་ཤིང་འདུག་པས། འབུལ་བ་མེད་ན་ཆོས་རྫོགས་པ་བློ་ཁ་ཁེངས་པ་ཞིག་མི་ཐོབ་པ་འདུག །རྒྱ་ལ་
2-3-5a
འབུལ་བ་འབྱོར་ན་ཆོས་རྫོགས་པ་ཐོབ་རུང་། ངའི་བླ་མ་པཎ་ཆེན་འདི་སྐད་ཞེས་བྱས་པས་ཆོག་པ་ཞིག་ཀྱང་མི་ཡོང་བ་འདུག་ཅིང་། ཁྱད་པར་མཁའ་འགྲོ་མ་རྡོ་རྗེ་གུར་གྱི་རྒྱུད་ལ་ཡུད་ཙམ་ཞིག་བལྟ་བ་ལགས་པས་གཡར་པོ་གནང་བ་ཞུ་ཡང་ཡང་ཞུས་ཚེ་མ་གནང་བས། བླ་མ་འདི་ལ་ཅི་མཉེས་ཀྱི་འབུལ་བ་ཞིག་ཕུལ་ལ། དེ་ལྷག་གི་ནོར་རྣམས་གསེར་དུ་སྒྲིལ། ཕ་མ་ལ་ནོར་སྐལ་གང་ཡོད་བླངས་ནས་ང་རང་ཡང་རྒྱ་གར་ལ་ཆོས་སློབ་ཏུ་འགྲོ་དགོས་དགོངས་པ་ཐུགས་ལ་ཤར་ནས། བླ་མ་འབྲོག་མི་ལ་ལག་ན་གང་ཡོད་ཀྱི་ནོར་ཐོགས་ཏེ་ཐུགས་དང་མི་འགལ་བའི་འབུལ་བ་ཕུལ། དེ་ལྷག་རྣམས་རྟ་གཅིག་དང་སེང་ལྡེང་གི་སྒ་གཅིག་ཡོད་པ་ཁྱེར་ནས་ལ་སྟོད་བྱང་གི་སྟག་རྩེའི་ཕྱོགས་སུ་གསེར་བསྒྲུབ་པ་ལ་བྱོན་ཏེ། རྟ་དང་སྒ་གཉིས་ཀ་གསེར་དུ་བསྒྱུར། དེ་དུས་གཞིར་དགོན་པ་ན་གཙང་གྱིར་ཕུའི་ཀློག་སྐྱ་ཇོ་སྲས་སློབ་མ་གཅིག་གི་ཆོས་ལ་གདན་དྲངས། འབུལ་བ་བཟང་པོ་བྱས་ཏེ་ཚུར་བྱོན་པ་དང་དུས་མཚུངས་པས་ལམ་གྲོགས་ཞུས་པས་ཐུགས་གཉེར་ཆེན་པོ་མཛད་དེ་ལམ་རྒྱགས་དང་བྱ་ན་སོགས་གནང་། སྐབས་སུ་དྲེའུ་ལ་ཡང་ཞབས་བསངས་མཛད་དོ། །གྱེར་ཕུར་ཕེབས་པ་དང་མར་པས་དགེ་བཤེས་དེ་དམ་ཚིག་པར་མཁྱེན་ནས་ང་ལྷོ་བལ་དུ་ལོ་ཙྪ་(ལོཙྪ་)
2-3-5b
སློབ་ཏུ་འགྲོ་རྒྱུ་ཡིན་པས་ད་རེས་ཀྱང་ཁྱེད་ཀྱི་ཐུགས་ལ་བཏགས། བདག་ཚེ་ལ་བར་ཆད་མ་བྱུང་ན་དུས་ཕྱིས་ཀྱི་ཡང་སྣ་ལེན་དང་འབབ་ཐུགས་ལ་འགོངས་པར་ཞུ་ཞུས་པས། ཁོང་ན་རེ། ང་ན་སོ་རྒས་པས་ཕྱིས་ཁྱེད་དང་ཨེ་འཕྲང་མི་ཤེས་པས་བྱིས་པ་འདི་རྣམས་ཀྱིས་ཁྱེད་ཀྱི་འབབ་དང་སྣ་ལེན་བྱེད་དུ་འཇུག་པས་ཅིས་ཀྱང་འདིར་འབྱོན་པར་མཛོད་གསུངས་ནས་གསེར་སྲང་གང་དང་སྣམ་དཀར་བུབ་གཅིག་གི་རྫོང་བ་ཡང་བྱས་སོ། །དེ་ནས་མར་པས་ལྷོ་བྲག་ཏུ་ཕེབས་ཏེ་ཡབ་ཡུམ་ལ་རྒྱ་གར་ལ་ཆོས་སློབ་ཏུ་འགྲོ་བས་ང་རང་གི་ནོར་ཞིང་ཁང་གི་སྐལ་བ་ཚང་མར་དགོས་གསུངས་པས། ཡབ་ཡུམ་སྐུ་མཆེད་ཀུན་ཞལ་འཆམ་པར་ཁྱོད་རྒྱ་གར་དུ་ལོ་ཙྪས་(ལོཙྪ་)ཅི་བྱེད་ཆོས་ཀྱིས་གང་བྱེད། བོད་དུ་ཆོས་ནུས་ན་གྱིས། མི་ནུས་ན་སོ་ནམ་གྱིས་ལ་འདིར་སྡོད་ཟེར་བཤོལ་མང་པོ་འདེབས་སུ་བྱུང་བ་ལས། ཡབ་ལ། ང་དང་པོར་བང་ཐག་རིང་གི་བླ་མ་བཟང་ས་ཞིག་ཏུ་གཏོང་ཟེར་བ་ལ། ང་རྒྱ་གར་ལས་ཐག་རིང་བ་ཅི་ཙུག་བྱེད། བླ་མ་པཎྜི་ཏ་བཟང་པོ་བཙལ་ཡོང་གིས་བྱས། བཤོལ་ཅི་བཏབ་རུང་མ་གསན་པར་ཁང་ཞིང་ནོར་དང་བཅས་པའི་སྐུ་སྐལ་རྣམས་ཚང་མར་བཞེས་ཏེ། ཁང་ཞིང་མ་གཏོགས་གཞན་གང་ཡོད་ཐམས་ཅད་གསེར་དུ་བསྒྲིལ་བས་སྲང་བཅོ་བརྒྱད་བྱུང་བ་བསྣམས་ཏེ། གྲོགས་གཉིས་དང་བསྡེབས་ཏེ་
2-3-6a
ཆས་བྱོན་པ་ལ་གྲོགས་གཉིས་གཉེན་གྱིས་བཤོལ་བཏབ་ནས་མཐོན། མར་པ་རང་རྒྱ་གར་ལ་ཆས་ཏེ་བྱོན་པ་ལམ་གྲོགས་ཀྱིས་གདུངས་པའི་ཚེ། ཉང་སྟོད་རྩིས་གནས་གསར་དུ་ཁ་རག་གི་གཉོས་ལོ་ཙྪ་(ལོཙྪ་)བ་རྒྱ་གར་དུ་འབྱོན་པ་དང་འཛོམ་སྟེ། ཁོང་ན་རེ། ཁྱེད་གང་ནས་འོངས། གང་དུ་འགྲོ་གསུངས་པ་ལ། ང་ལྷོ་བྲག་ནས་འོངས། རྒྱ་གར་དུ་ཆོས་སློབ་པ་ལ་འགྲོ་བྱས་པས། འོ་ན་ཁྱོད་ལ་གསེར་མང་པོ་ཡོད་དམ་ཟེར་བ་ལ། ཞོ་རེ་ཞོ་དོ་ལས་མེད་ཅེས་རྫུན་བྱས་པས། དེ་འདྲས་གང་དུའང་མི་སླེབས་པ་འདུག རྒྱ་གར་དུ་འགྲོ་བ་ལ་གསེར་མང་པོ་མེད་ན་ཆོས་ཀ་ར་ཝ་ཏི་སྟོང་པ་ལ་ཆུ་འཐུངས་པ་དང་འདྲ། ང་ལ་གསེར་མང་པོ་ཡོད་པས་ཁྱོད་རང་ངའི་གཡོག་གྱིས་གསེར་མཉམ་པོར་བྱའོ་གསུངས་པ་ལ། མཐར་གར་འགྲོ་མ་ཤེས་སྙམ་ཆོས་ནི་མ་ཞུས། འཕྲལ་ཆས་ལ་ཕན་དུ་རེ་བས་འགྲོགས་ལམ་དཔོན་གཡོག་གི་ཚུལ་དུ་བྱས་ཏེ་བསྡེབས་ཏེ་བྱོན་པས་བལ་པོར་ཕེབས་པར་གྱུར་ཏོ།། །།
༈ རྒྱ་གར་དུ་ཕེབས་ནས་མཁས་གྲུབ་ཀྱི་བླ་མ་རྣམས་དང་མཇལ་ཏེ་ཐེག་ཆེན་གྱི་སྙིང་པོ་དོན་གྱི་དམ་ཆོས་རྣམས་ཐོབ་ཚུལ།
གཉིས་པ་རྒྱ་གར་དུ་ཕེབས་ནས་མཁས་གྲུབ་ཀྱི་བླ་མ་རྣམས་དང་མཇལ་ཏེ་ཐེག་ཆེན་སྙིང་པོ་དོན་གྱི་དམ་ཆོས་ཐོབ་ཚུལ་ནི། བལ་པོར་ཕེབས་ནས་ཉིན་གཅིག་རི་སུལ་གཅིག་ན་མི་མང་པོ་ལོང་ལོང་འདུག་པ་ལ་ཅི་ཡིན་དྲིས་པས། རྗེ་ནཱ་རོ་པའི་སློབ་མ་བལ་པོ་སྤྱི་ཐེར་
2-3-6b
བ་དང་པེན་ཏ་བ་གཉིས་ཡོད་པ་ལ། ཉ་མ་རྣམས་ཀྱིས་ཚོགས་འཁོར་བསྐོར་བར་འདུག་པས། ཁྱེད་རང་བོད་པ་རྣམས་ཀྱང་ཕྱིན་ན་བཟའ་བཏུང་འོང་ཟེར་བས། མར་པས་རྗེ་ནཱ་རོ་པའི་མཚན་གསན་པ་ཙམ་ལ་སྔོན་གྱི་བག་ཆགས་སད་ནས་མོས་པ་ཚད་མེད་པ་ཞིག་སྐྱེས་ཏེ་འགྲོ་བ་ལ་ཤིན་ཏུ་འཐད་ནས་ཅིས་ཀྱང་འགྲོ་བྱས། གཉིས་པོ་ལྟད་མོ་དང་ཚོགས་སྒྲུབ་ལ་བྱོན་པས། བལ་པོ་སྤྱི་ཐེར་བ་གསང་འདུས་གསུངས་གྱིན་འདུག་པ་ལ་ཉན་པས། སྤྱི་ཐེར་བ་ན་རེ། བོད་འདི་ཀུན་གྱིས་དབང་ཨེ་ཐོབ་མི་ཤེས་པས་གསང་སྒྲོགས་ཀྱི་ཉེས་པ་འོང་གསུངས་པ་ལ། པེན་ཏ་བ་ན་རེ། འོ་སྐོལ་བལ་པོའི་སྐད་མི་གོ །བོད་བ་གླང་དང་འདྲ་གསུངས་པ་ལ། གཉོས་ཀྱིས་བལ་སྐད་གོ་ཞིང་འདུག་པས་མ་དགའ་བར་ཆོས་ཉན་འཕྲོ་ལ་རྒྱབ་གཏད་ནས་སྔགས་འདྲེན་ཞིང་འདུག །སྲས་མར་པས། དེ་རིང་ཡང་ཚོགས་སྒྲུབ་དང་ཆོས་ཉན་པ་ལ་འགྲོ་བྱས་པས། གཉོས་ན་རེ། ཁྱོད་རང་འགྲོ་ན་སོང་། ང་བ་གླང་དང་འདྲ་ཟེར་ས་དེར་མི་འགྲོ། བ་གླང་བལ་པོ་རང་ཡིན་མོད་ཟེར་བསྡད་འདུག མར་པ་བྱོན་ཏེ་ཆོས་གསན་པས། སྤྱི་ཐེར་བའི་གསུང་ནས། ཁ་སང་གི་གྲོགས་དེ་གར་སོང་གསུངས། ཁོང་བལ་སྐད་གོ་བས། ཁ་སང་གི་བླ་མ་པེན་ཏ་བའི་གསུང་དེ་ལ་ཁྲོས་ནས་དེ་རིང་མེད་ཞུས་པས། ཁོ་དང་ང་ལས་
2-3-7a
འབྲེལ་མེད་པ་ཡིན། ཁྱོད་རང་ཡོང་པ་ལེགས་གསུངས་ནས། དཔལ་གདན་བཞི་དང་འཕོ་བའི་གདམས་པ། དུས་སོལ་ལྷ་མོའི་རྗེས་གནང་རྣམས་གནང་བའི་ཡོན་དང་། སྔར་བརྡ་འཇོལ་ཙམ་ཤེས་པའི་སྟེང་དུ་པེན་ཏ་བ་ལ་ལོ་ཙྪ་(ལོཙྪ་)བསླབས་པ་ལ་གསེར་མང་པོ་མེད་པའི་ལོ་རྒྱུས་བྱས། བླ་མ་གཉིས་ལ་གསེར་སྲང་རེ་རེ་ཕུལ་བ་ལ་མཉེས་པའི་ཞལ་སྔ་ནས། ཁྱོད་ལ་གསེར་མང་པོ་མེད་ན། གསེར་མེད་པར་ཆོས་གནང་བའི་བླ་མ་དང་པཎྜི་ཏ་རྗེ་ནཱ་རོ་པ་མིན་པ་མེད་གསུངས། རྗེ་ནཱ་རོ་པའི་སྐུ་ཆེ་བའི་ཡོན་ཏན་རྣམས་བརྗོད་ནས། ངེད་ཀྱི་བླ་མ་སངས་རྒྱས་གཉིས་པ་ལྟ་བུ་དེའི་སར་རྫོང་བ་ཡིན་པས་རེ་ཞིག་ཚད་པ་ལ་གོམས་སུ་ཆུག་གསུངས། ཐུགས་བརྩེ་བའི་ཞལ་ཏ་མཐིལ་ཕྱིན་པ་གནང་བྱུང་བས། བླ་མ་གཉིས་ལའང་དད་པ་ཚད་མེད་པ་ཞིག་སྐྱེས་ཤིང་། ངའི་ཆ་མི་འཆིའི་རེ་དོགས་སྤངས་ཏེ་ནཱ་རོ་པའི་དྲུང་དུ་འགྲོ་དགོས་དགོངས་པ་ཐུགས་ལ་ཤར་ནས་བླ་མ་གཉིས་ཀྱི་གསུང་ལྟར་ལོ་ངོ་གསུམ་གྱི་བར་དུ་འཕགས་པ་ཤིང་ཀུན་ཏུ་ཚད་པ་ལ་འདྲིས་སུ་བཅུག །དེའི་བར་ནཱ་རོ་པ་ནས་བརྒྱུད་པའི་ཆོས་ཁོ་ན་ལ་སློབ་གཉེར་དགོས་པ་རྣམས་ཅི་ཤེས་བྱས། ལོ་ངོ་གསུམ་སོང་བ་དང་བླ་མ་སྐུ་མཆེད་ཀྱིས་ནཱ་རོ་པའི་དགེ་ཚུལ་ཤེས་རབ་སེངྒེ་ལ་བོད་འདི་ལ་
2-3-7b
ཁྱེད་ཀྱིས་ཆོས་ཀྱང་ཤད་(བཤད་)ཅིང་། །རྗེ་ནཱ་རོ་པའི་དྲུང་དུ་འཕྲོད་ངེས་རང་ཅིག་(ཞིག་)གྱིས་ཞེས་པའི་ཡི་གེ་བསྐུར་བསླབ་བྱ་མཛད་ནས་གྲོགས་ཛོ་ཀི་གཅིག གཉོས་དང་གསུམ་གྱིས་དཀའ་སྤྱད་ཆེན་པོར་མཛད་ནས་བྱོན་པས། དཔལ་ནཱ་ལེན་ཏྲའི་གཙུག་ལག་ཁང་དུ་ཕེབས་པ་དང་། མར་པས་གཉོས་ལ་འདི་ན་བལ་པོ་སྤྱི་ཐེར་བའི་བླ་མ་ནཱ་རོ་པ་ཞེས་བྱ་བའི་པཎྜི་ཏ་མཁས་པ་དེ་ཡོད་པར་འདུག་པས། ཆོས་མི་ཞུའམ་བྱས་པས། ནཱ་རོ་པ་བྱ་བ་སྔར་པཎྜི་ཏ་མཁས་པ་ཡིན་ཏེ། ཕྱིས་ཏེ་ལོ་པའི་སར་ཕྱིན་མན་ངག་བཤད་པ་བོར་ནས་ཀུ་སུ་ལའི་སྒོམ་བྱེད་ཀྱིན་ཡོད་འདུག་པས། ང་ཁོང་ཅན་དུ་མི་འགྲོ། ཁྱེད་རང་ངའི་ཕྱི་ལ་འགྲོ་ན་གསེར་མཉམ་དུ་བྱེད། མི་འགྲོ་ན་ཁྱེད་ལ་གསེར་སེ་བ་གཅིག་ཀྱང་སྟེར་རྒྱུ་མེད། རྒྱ་གར་ཤར་ནུབ་ལྷོ་བྱང་རྣམས་ན་པཎྜི་ཏ་མཁས་པ་ཉི་ཟླ་ལྟར་གྲགས་པ་མང་པོ་ཡོད་པས་དེ་རྣམས་ཀྱི་དྲུང་དུ་འགྲོ་ཟེར། ཁོང་ནཱ་རོ་པ་དང་ལས་འབྲེལ་མེད་པས་མར་པ་ལ་གསེར་ཅིག་ཀྱང་མ་བྱིན་པར་རང་གང་མོས་ཀྱི་བླ་མའི་སར་ཐལ་ལོ། །དེར་མར་པས་དགེ་ཚུལ་ཤེས་རབ་སེང་གེ་རྩད་བཅད་པས་མཇལ་ཏེ། བལ་པོ་སྐུ་མཆེད་གཉིས་ཀྱི་གསུང་ཡིག་ཕུལ། ལོ་རྒྱུས་རྒྱས་པར་བྱས་པས། དགེ་ཚུལ་ན་རེ། བླ་མ་ནཱ་རོ་པ་ད་ལྟ་རྒྱ་གར་ནུབ་ཕྱོགས་ཀྱི་ལ་བར་ཞེས་བྱ་བ། ཕེབས་
2-3-8a
ནས་མེད་དེ། མྱུར་སྟབས་སུ་ཕེབས་འབྱོན། དེ་བར་ལ་ངའི་སར་སྡོད། ངས་ཀྱང་བལ་པོ་སྐུ་མཆེད་ཀྱི་གསུང་ལྟར། ཕན་ཅི་ཐོགས་བྱེད་གསུངས་པ་ལྟར། དེར་བཞུགས་རྩིས་མཛད་པས། དགེ་ཚུལ་བ་ཤེས་རབ་སེང་གེའི་དྲུང་ན་སློབ་མ་པཎྜི་ཏ་མངོན་ཤེས་མངའ་བ་ཞིག་འདུག་པ་དེ་ན་རེ། དེ་རིང་སང་མྱུར་སྟབས་སུ་རང་རེའི་སར་བང་ཆེན་པ་གཅིག་ཀྱང་ཡོད་ལ། ཕུ་ལ་ཧ་རིར་བླ་མས་ཀྱང་ཕེབས་པ་འདུག་ཟེར། ནམ་ལངས་པ་དང་། ཨ་ཙ་ར་གཅིག་བྱུང་ནས་ཁྱེད་ཀྱི་ས་ན་བོད་ཀྱི་བན་དྷེ་(བནྡེ་)གཅིག་ཡོད་འདུག་པ་ཁྲིད་ལ་ཤོག་ཟེར་ནས་སོང་། དེའི་ཚེ་ཤེས་རབ་སེང་གེ་དང་། བསྡེབས་ནས་བྱོན་ཏེ་ལྗོངས་མེ་ཏོག་བརྒྱན་པའི་གྲོང་ཁྱེར་རི་བོ་གསེར་གྱི་དགོན་པ་ཕུ་ལ་ཧ་རིར་དགེ་ཚུལ་བས་མཇལ་སྣ་བྱས། དཔལ་ནཱ་རོ་པཎ་ཆེན་དང་ཞལ་མཇལ་ནས་བརྐྱང་ཕྱག་མང་དུ་བཙལ། གསེར་གྱི་མེ་ཏོག་མང་དུ་ཕུལ་བས། རྗེ་ནཱ་རོ་པའི་ཞལ་ནས། བླ་མས་ལུང་བསྟན་བདག་གི་བུ། །སྣོད་ལྡན་མར་པ་བློ་གྲོས་ཀྱིས། །ཁ་བ་ཅན་ལྗོངས་བྱང་ཕྱོགས་ནས། །རྒྱལ་ཚབ་འཛིན་ཕྱིར་སླེབས་པ་ལེགས། །ཅེས་གསུངས་ཤིང་མཆོག་ཏུ་དགྱེས་པར་གྱུར་ཏོ། །དེ་ནས་མར་པས། རྗེ་ནཱ་རོ་པ་ལ་བདག་ལ་གྲོགས་པོ་གསེར་མང་པོ་ཡོད་
2-3-8b
པ་ཞིག་བལ་པོ་པཎ་ཏ་བའི་གསུང་སྨྲ་མ་མཁས་པ་ཙམ་ཞིག་ལ་བརྟེན། བླ་མ་གཞན་གྱི་དྲུང་དུ་སོང་ཞེས་ཞུས་པས། ཁོ་དང་ང་ཆོས་ཀྱི་འབྲེལ་བ་མེད་པ་ཡིན་གསུངས་ནས། རྗེ་ནཱ་རོ་པས། བླ་མ་མར་པ་ལ་དང་པོ་དཔལ་དགྱེས་པ་རྡོ་རྗེའི་དབང་བསྐུར་ནས་རྒྱུད་བརྟག་པ་གཉིས་པ། རྡོ་རྗེའི་གུར་དང་སམ་བྷུ་ཊི་རྣམས་རྫོགས་པར་གནང་། མར་པས་ལོ་གཅིག་གི་བར་དེ་རྣམས་བསླབས་ཤིང་ལོ་གཅིག་སོང་བ་དང་གྲོང་ཁྱེར་ན་མར་སྐྱོ་སངས་ལ་བྱོན་པས་གཉོས་དང་མཇལ། ཁོང་ན་རེ། ཁྱོད་ཀྱིས་སློབ་གཉེར་ཅི་ལ་བྱས་ཟེར་བ་ལ། ངས་དགྱེས་རྡོར་བསླབས་བྱས་པས། དེ་རིང་རང་རེ་གཉིས་བགྲོ་གླེང་བྱེད་ཟེར་བྱས་པས། དགྱེས་རྡོར་ལ་མར་པ་མཁས་པར་བྱུང་བས། གཉོས་ན་རེ། དགྱེས་པ་རྡོ་རྗེ་བོད་ན་ཡང་དར་ནས་ཡོད། དེ་བས་ཕ་རྒྱུད་གསང་བ་འདུས་པ་ཞེས་བྱ་བ་རླུང་ལག་སོར་ལ་ཁྲེམས་པ། སངས་རྒྱས་ལག་ཐོབ་ཏུ་བྱེད་པ་དེ་དགོས་པ་ལགས་ཟེར། གསང་འདུས་ཀྱི་ཆོས་སྐད་ལ་ལན་འདེབས་རྒྱུ་མ་བྱུང་བས། མར་པས། རྗེ་ནཱ་རོ་པའི་དྲུང་དུ་བྱོན་ནས། དེ་རིང་བདག་གྲོང་ཁྱེར་དུ་ཕྱིན་པས་གཉོས་དང་འཕྲད་ནས་དགྱེས་པ་རྡོ་རྗེ་ལ་བགྲོ་གླེང་བྱས་པས་བདག་རྒྱལ་ཏེ། གཉོས་ན་རེ། གསང་བ་འདུས་པ་བྱ་བ་དགོས་ཟེར་བས་གནང་བར་
2-3-9a
ཞུ་ཞུས་པས། ཕ་རྒྱུད་ཀྱི་བདག་པོ་གཅིག་ནུབ་དུ་ལ་ཀྵེ་ཏྲའི་དགོན་པའི་གཙུག་ལག་ཁང་ཟླ་བ་རྒྱས་པ་ན་པཎྜི་ཏ་ཡེ་ཤེས་སྙིང་པོ་བྱ་བ་དབུ་མ་རང་རྒྱུད་དུ་སྨྲ་བའི་སྐྱེས་བུ་དངོས་གྲུབ་བརྙེས་པ་གཅིག་ཡོད་པས་དེར་སོང་ལ་ཞུས་ཤིག །བར་ཆད་མི་འབྱུང་གི་གསུངས་ནས། མར་པས་དེར་བྱོན། དཔལ་ཡེ་ཤེས་སྙིང་པོའི་དྲུང་དུ་དཔལ་གསང་བ་འདུས་པའི་དབང་གདམས་ངག་དང་། གཞན་ཡང་ཀྲི་ཡ་དང་ཡོ་ག་ཕྱག་ལེན་ལས་ཚོགས་དང་བཅས་པ་ཞུས་པས་གསང་སྔགས་ཀྱི་དོན་ལ་རྟོགས་_པ་_ཡང་དག་པ་འཁྲུངས་ཏེ། ཡང་བསམས་པ། ངས་བོད་ནས་བལ་པོར་བསླེབས། རྗེ་བལ་པོ་རྣམ་གཉིས་དང་མཇལ། ལུང་བསྟན་གདམས་ངག་དང་བཅས་པ་ཐོབ་པ་ཡང་བླ་མ་ནཱ་རོ་པ་ཆེན་པོས་བྱིན་གྱིས་བརླབས་པ་ཡིན་ངེས་པར་འདུག་པའི་ངེས་ཤེས་སྐྱེས། ཐོ་རངས་ཁར་དགའ་བའི་ཉམས་རྡོ་རྗེའི་གླུའི་མཎྜལ་འདི་བླ་མ་ལ་ཕུལ་བར་གདའོ། །རྗེ་སངས་རྒྱས་ཀུན་དང་མཉམ་པའི་སྐུ། །བླ་མ་རྣམས་ལ་ཕྱག་འཚལ་ལོ། །ཞི་བདག་པ་ནཱ་རོ་པཎ་ཆེན་དང་། །དཔལ་ཡེ་ཤེས་སྙིང་པོའི་ཞབས་ལ་འདུད། །ང་ལྷོ་བྲག་བོད་དུ་ལས་དབང་གིས། །ཕ་མ་གཉིས་ཀྱིས་ལུས་བསྐྱེད་པའི། །མར་པ་བློ་གྲོས་བགྱི་བའང་། །ཆོས་ལ་བཀོད་པའི་
2-3-9b
བཀའ་དྲིན་ཅན། །ཡབ་ཡུམ་གཉིས་ལ་གུས་ཕྱག་འཚལ། །དྲིན་ཆོས་ཀྱི་འཁོར་བར་བྱིན་གྱིས་རློབས། །རང་བཞིན་སྐྱེ་མེད་ཀྱི་མཎྜལ་ལ། །སྣང་བ་སྣ་ཚོགས་ཀྱི་མེ་ཏོག་བཀོད། །བླ་མའི་སྐུ་ལ་མཆོད་པར་འབུལ། །བདག་གི་ལུས་ལ་བྱིན་གྱིས་རློབས། །ནམ་མཁའ་རྣམ་དག་གི་མཎྜལ་ལ། །འགག་མེད་རྟེན་འབྲེལ་གྱི་མེ་ཏོག་བཀོད། །བླ་མའི་གསུང་ལ་མཆོད་པར་འབུལ། །བདག་གི་ངག་ལ་བྱིན་གྱིས་རློབས། །རང་སེམས་བདེ་ཆེན་གྱི་མཎྜལ་ལ། །རྣམ་རྟོག་འཕྲལ་འཇོམས་ཀྱི་མེ་ཏོག་བཀོད། །བླ་མའི་ཐུགས་ལ་མཆོད་པར་འབུལ། །བདག་གི་ཡིད་ལ་བྱིན་གྱིས་རློབས། །རིན་ཆེན་ས་གཞིའི་མཎྜལ་ལ། །རི་རབ་གླིང་བཞིའི་མེ་ཏོག་བཀོད། །བླ་མའི་སྐུ་གསུང་ཐུགས་ལ་མཆོད་པར་འབུལ། །བདག་གི་ལུས་ངག་ཡིད་གསུམ་ལ་བྱིན་གྱིས་རློབས། །ཞིང་ཁམས་ས་གཞི་རབ་འབྱམས་ལ། །འབྱུང་བ་ལྔ་ལས་སྐྱེས་པ་ཡི། །མཆོད་ཡོན་མེ་ཏོག་བདུག་སྤོས་དང་། །སྣང་གསལ་དྲི་ཆབ་ཞལ་ཟས་དང་། །རོལ་མོ་ལ་སོགས་མཆོད་རྫས་རྣམས། །ལེགས་པར་གྲུབ་པ་ཇི་སྙེད་པ། །བླ་མ་རྗེ་ལ་མཆོད་པ་འབུལ། །བར་ཆད་མེད་པར་བྱིན་གྱིས་རློབས། །ནམ་མཁའི་མཐའ་དང་མཉམ་པ་ཡི། །གདུགས་དང་རྒྱལ་མཚན་རོལ་མོ་དང་། །བླ་བྲེས་ཡོལ་
2-3-10a
བ་ལ་སོགས་པ། །བློ་ཡིས་སྤྲུལ་ནས་མཆོད་པར་འབུལ། །རྟོགས་པ་འཕེལ་བར་བྱིན་གྱིས་རློབས། །སངས་རྒྱས་ཡེ་ཤེས་སྙིང་པོ་ལ། །རྒྱུད་ཆེན་གསང་བ་འདུས་པ་ཉན། །ཐབས་ཤེས་ཟུང་དུ་འཇུག་པར་གོ །ཆོས་ཀྱི་ལྡེ་མིག་ཡིན་པར་གོ །རྒྱུད་ཀྱི་རྒྱ་མཚོ་ཡིན་པར་གོ །ཆོས་དང་ཟང་ཟིང་སྦྱིན་པ་བྱུང་། །སྙིང་གི་ལྗོན་ཤིང་རྒྱས་བྱེད་ཅིང་། །ཚིག་ཚོགས་དྲི་མེད་ལོ་འདབ་རྒྱས། །ཡེ་ཤེས་ལྔ་ཡི་བདག་ཉིད་ཅན། །འགྲོ་བའི་དོན་རྣམས་མཐའ་དག་བྱུང་། །རིམ་ལྔའི་ལམ་མཆོག་བགྲོད་པས་བདེ། །འོད་གསལ་སྒྱུ་ལུས་རྨི་ལམ་གྱི། །གདམས་ངག་རིན་ཆེན་ཐུགས་ལ་བཏགས། །སྐུ་དྲིན་ཆེའོ་ཛྙཱ་ན་བ། །འདི་ནས་བཟུང་སྟེ་མཐར་ཐུག་གི །བླ་མེད་བྱང་ཆུབ་མ་ཐོབ་བར། །སྤྱི་གཙུག་བདེ་བ་ཆེན་པོའི་རྒྱན་དུ་བཞུགས། །སྙིང་གི་དཀྱིལ་དུ་འབྲལ་ཐབས་མེད། །སྐྱོ་འཇིགས་མེད་པར་སྐྱབས་སུ་མཆི། །ཐུགས་རྗེའི་ལྕགས་ཀྱུ་འོད་ཟེར་ཅན། །མ་རིག་མུན་པ་བསལ་ནས་ཀྱང་། །ལུས་ངག་ཡིད་གསུམ་བཟུང་དུ་གསོལ། །ཞེས་གསོལ་བ་བཏབ་པ་ལགས་ཤིང་། མར་པས་ཕ་རྒྱུད་ཀྱི་སློབ་གཉེར་ཚར་ནས་བླ་མ་ལ་དྲིན་ལན་གྱི་མཆོད་པ་ཕུལ། ལུས་ངག་ཡིད་གསུམ་གི་སྒྲུབ་པས་མཉེས་པར་མཛད། དེ་ནས་
2-3-10b
མར་པ་ཕུ་ལ་ཧ་རིར་བྱོན་པས་ལམ་གྱི་ལྷ་ཁང་ཞིག་ཏུ་གཉོས་ལོ་ཙཱ་བ་དང་ཕྲད་པས། ཁོང་ན་རེ། མར་པ་ཁྱེད་ཀྱིས་གནང་ནས་སློབ་གཉེར་ཅི་ལ་བྱས་ཟེར། ངས་ཕ་རྒྱུད་བསླབས་བྱས་པས། འོ་ན་བསྒྲོ་(བགྲོ་)གླེང་བྱེད་ཟེར། མཛད་པས། མར་པ་ཏོག་ཐོན་པས་གཉོས་ན་རེ། གནས་པ་ཙ་(རྩ།) གཡོ་བ་རླུང་། བཀོད་པ་བྱང་ཆུབ་སེམས་ཀྱི་གདམས་ངག་ཡོད་པ་མ་རྒྱུད་མ་ཧཱ་མཱ་ཡ་བྱ་བ་དགོས་པ་ཡིན། གསང་འདུས་ཡང་བོད་ན་དར་ཟེར། མ་ཧཱ་མཱ་ཡའི་ཆོས་སྐད་ལབ་ཏུ་བྱུང་བ་ལ། ལན་འདེབས་རྒྱུ་མ་བྱུང་བས། མར་པས། རྗེ་ནཱ་རོའི་དྲུང་དུ་ཕྱིན་ནས་ཕྱག་ཕུལ་བས། ནཱ་རོ་པའི་གསུང་ནས། གསང་འདུས་ཡིད་ཆེས་པར་ཐོབ་བམ་གསུངས་པ་ལ། གསང་འདུས་ཡིད་ཚིམ་པར་ཐོབ་ལགས་པས། ལམ་བར་དུ་བདག་རང་གི་གྲོགས་པོ་དང་འཕྲད། ཆོས་སྐད་བྱས་པས་གསང་འདུས་ལ་བདག་རྒྱལ་ཏེ། བདག་ལ་མ་ཧཱ་མཱ་ཡའི་ཆོས་གཏམ་ལབ་རྒྱུ་མ་བྱུང་བས། མ་ཧཱ་མཱ་ཡ་ཐུགས་ལ་འདོགས་པར་ཞུ་ཞུས་པས། ཁྱོད་ལ་གསང་བ་འདུས་པ་རང་གི་བཤད་ཀྱང་མཆོག་སྟེ། ད་ལྟ་དུས་ལ་མ་བབ་པས་ཡེ་ཤེས་སྙིང་པོའི་དྲུང་དུ་བཏང་བ་ཡིན། ང་རང་གིས་སང་དུས་ལ་བབ་ཚེ་བཤད། མ་ཧཱ་མཱ་ཡ་ང་རང་གིས་ཤེས་ཏེ་དུག་མཚོའི་གླིང་ན་དཔལ་ཞི་
2-3-11a
བ་བཟང་པོ་ཞེས་བྱ་བ། མ་རྒྱུད་ཀྱི་བདག་པོ་གཅིག་བཞུགས་ཤིང་ཡོད་པས་ཁྱོད་ཁོང་ཅན་བཏང་དགོས་གསུངས། ཚོགས་ཤིག་བཤམས་པའི་གྲལ་དུ་ནཱ་རོས་དུར་ཁྲོད་ལ་ཕྱག་སྡིགས་མཛུབ་གཏད་པས། སྐད་ཅིག་ལ་དུར་ཁྲོད་སོ་སོའི་གླིང་ནས་རྣལ་འབྱོར་པ་དུར་ཁྲོད་འཛིན་པ་གསུམ་བྱོན་ནས་ངའི་བུ་མར་པ་འདི་ལྷོ་དུག་མཚོའི་གླིང་དུ་བཏང་བ་ལ་ཁྱེད་གསུམ་གྱིས་བར་ཆད་མེད་པར་བྱིན་གྱིས་རློབས་ཤིག་གསུངས་པས། གཅིག་ན་རེ། བདག་གིས་དུག་སྦྲུལ་གྱི་འཇིགས་པ་ལས་སྐྱོབས་གསུངས། གཅིག་ན་རེ། བདག་གིས་གཅན་གཟན་གྱི་འཇིགས་པ་ལས་སྐྱོབས་གསུངས། གཅིག་ན་རེ། བདག་གིས་མི་མ་ཡིན་གྱི་འཇིགས་པ་ལས་སྐྱོབས་གསུངས། དེར་ནཱ་རོ་པའི་ཞལ་ནས། འདི་ནས་དུག་མཚོའི་གླིང་ལ་ཟླ་བ་ཕྱེད་ཀྱི་ལམ་ཡོད་པས། དུག་གི་ཆུ་ལ་དང་པོར་བོལ་ནུབ། དེ་ནས་རིམ་པ་བཞིན་པུས་ནུབ། བརླ་ཕྲ་སྤོམ་(སྦོམ།) ཐ་མ་རྐྱལ་ཏེ་སོང་། ཤིང་རེ་རེ་འདུག་པའི་རྩ་བ་ལ་འཁྲིས་ལ་སོང་། གཉིས་གཉིས་འདུག་པའི་བར་ལ་སོང་། ས་སྐྱ་ཐལ་ལེ་གང་འདུག་ཏུ་ཞག་སྡོད་གྱིས། ཀུ་ཀུ་རི་པ་དེ་ལུས་ལ་སྤུ་སྐྱེས་པ། ཁ་མཚུལ་སྤྲེའུ་འདྲ་བ། མདོག་མི་སྡུག་པ། ཅིར་ཡང་བརྫུ་བ་ཞིག་
2-3-11b
ཡོད་པས། དེ་ལ་ཐེ་ཚོམ་མི་བྱེད་པར་ང་ནཱ་རོ་པས་བཏང་བ་ཡིན་གྱི། མ་ཧཱ་མ་ཡ་གནང་བ་ཞུ་གྱིས་ལ་ཆོས་ཞུས་ཤིག་གསུངས། ལུང་བསྟན་ཕྱག་རྟགས་དང་བཅས་པ་མཛད་ནས་བརྫངས་ཏེ། བླ་མ་མར་པས་རྒྱ་གར་ལྷོ་ཕྱོགས་དུག་མཚོ་ཁོལ་མའི་དོ་རི་ལ་ཟླ་བ་ཕྱེད་ཀྱི་རྒྱགས་བཟུང་ནས་ལམ་བགྲོད་དཀའ་བའི་ཕྱིར་བླ་མའི་བཀའ་བཞིན་དུ་བྱོན་པས་ལམ་བར་བྱ་གཉིས་འཕུར་སོང་བ་མ་གཏོགས་སེམས་ཅན་གཞན་གྱི་རིགས་མ་མཐོང་བ་ལ། དུག་མཚོའི་དོ་རི་ལ་ཕེབས་པ་དང་། གཞི་བདག་མི་མ་ཡིན་གྱི་ཆོ་འཕྲུལ་གྱིས་ནམ་མཁའ་ལ་སྤྲིན་མཐུག་པོ་འཁྲིགས། གློག་དམར་འཁྱུག་ཅིང་འབྲུག་སྒྲ་དྲག་པོ་སྒྲོག་པ་དང་བཅས་པར་ཐོག་མང་པོ་དང་། ཁ་ཆར་བུ་ཡུག་ཆེན་པོ་བབས། ཉིན་གུང་ལ་མུན་ནག་སྨག་རུམ་འཐིབས་ཏེ། སྐྱེ་བ་སྔ་ཕྱི་དྲན་པ་ལྟ་བུའི་སྡུག་བསྔལ་མྱོང་བས། ནཱ་རོའི་དྲུང་དུ་རྣལ་འབྱོར་པ་གསུམ་གྱིས་མཁས་བླངས་པ་དྲན་ནས་པཎ་ཆེན་ནཱ་རོའི་མཚན་འབོད་ཏེ་གསོལ་བ་བཏབ་པས་ནམ་མཁའ་དྭངས་པར་གྱུར་ཏོ། །དེ་ནས་བླ་མ་གང་ན་ཡོད་དཾ་སྙམ་འཚོལ་དུ་བྱོན་པས། མི་ལུས་ལ་བྱའི་སྤུས་ཁེངས་པ་གཅིག་ཤིང་སྡོང་ཞིག་གི་དྲུང་ན་གདོང་པ་མཆན་དུ་བཅུག་ནས་འདུག་པས་ཡིན་ནམ། མིན་ནམ་སྙམ་པའི་ཐེ་ཚོམ་སྐྱེས་
2-3-12a
ཏེ། ཁྱེད་ཀྱིས་ཀུ་ཀུ་རི་པ་མཐོང་ངམ་བྱས་པས། ཐུགས་དང་སྤྱན་ཧུར་མཛད་ཅིང་། ཨ་བ་བོད་སྣ་ལེབ་པ་ལམ་གྱི་དཀའ་ལས་འདི་ཙམ་གྱིས་ཀྱང་མི་ཐུབ་པར་ཁྱོད་གང་ནས་འོངས། གང་དུ་འགྲོ། ཀུ་ཀུ་རི་པས་ཅི་བྱེད། ངས་འདིར་བསྡད་པས་ཀུ་ཀུ་རི་པའམ་དེ་མིག་གིས་ཀྱང་མ་མཐོང་སྟེ། རྣ་བས་ཀྱང་མ་ཐོས་གསུངས། ཡང་གདོང་པ་མཆན་དུ་བཅུག་ཐལ། གཞན་དུ་བཙལ་བས་མ་རྙེད་ཚེ། བླ་མའི་གསུང་དྲན་ནས་ད་ཅིའི་དེ་ཀ་ཡིན་པས་སྙམ་སླར་དེའི་དྲུང་དུ་འོངས་ནས་ཕྱག་བྱས་ཏེ། ང་པཎ་ཆེན་ནཱ་རོས་བཏང་བ་ཡིན། མ་ཧཱ་མཱ་ཡ་ཞུ་རུ་འོངས་པས་གནང་འཚལ་ཞུས་ནས་ཕྱག་རྟགས་ཕུལ་བས་གདོང་པ་མཆན་ནས་བཏོན་ཏེ། ཅི་ཟེར་ནཱ་རོ་པ་བྱ་བ་བསླབས་པའི་ཤེས་རྒྱ་མེད། བསྒོམས་པའི་ཉམས་མྱོང་མེད་པའི་པཎ་ཆེན་རྒོད་བྲོ། མ་ཧཱ་མཱ་ཡ་ཤེས་ནི་ཤེས། ཁོ་རང་གིས་བསླབས་པས་ཆོག་མོད། མི་སོད་དལ་དུ་མི་སྟེར་བ་ཞེས་སྐུར་འདེབས་ཀྱི་ཚུལ་དགྱེས་དགྱེས་འགའ་གསུངས་པའི་མཐར། ཨ་ཀྱ་བྲེ་མོ་བྱས་པ་ཡིན། ཁོང་པཎྜི་ཏ་མཁས་གྲུབ་བསམ་གྱིས་མི་ཁྱབ་པ་ཡིན་ཕྱིར་ངས་དག་སྣང་བྱས་པས། ངེད་གཉིས་ཕར་སློབ་ཚུར་སློབ་ཏུ་སོང་། མ་ཧཱ་མཱ་ཡ་ཁོང་རང་གིས་མཁྱེན་རུང་། བཀའ་ང་ལ་
2-3-12b
ལ་བབས་པ་དང་། དག་སྣང་གིས་ཁྱོད་ང་ལ་ཞུ་རུ་བཏང་འདུག་པས་མཐིལ་ཕྱིན་པ་ཞིག་སློབ་པ་ཡིན། ཕྱིས་ནཱ་རོའི་དྲུང་དུ་ཞུས་ལ་ཁྱད་ཅི་འདུག་ལྟོས་ཤིག །ཁྱོད་ཚུར་ཡོང་བའི་ལམ་བར་དུ་མི་གཉིས་དང་འཕྲད་དམ་གསུངས། མ་ཕྲད་ཞུས་པས། མིར་མ་མཐོང་བྱར་མཐོང་བ་ཡིན་གསུངས་ནས་དབང་བསྐུར་ཏེ་ལྐུག་(སྐུགས་)ཆེན་ལྐུག་(སྐུགས་)ཆུང་བརྒྱན་པ་དེང་(དང་)གསུམ་གྱི་ངས་ནས་རྣལ་འབྱོར་གསུམ་དུ་ངོ་སྤྲད་པ་ནི། དམན་པ་དབྱིབས་ཀྱི་རྣལ་འབྱོར་ལ་བརྟེན་ནས་ལམ་རྒྱས་བསྡུས་གསུམ་ལམ་དུ་སློང་བ་དང་། ཟབ་པ་སྔགས་ཀྱི་རྣལ་འབྱོར་ལ་བརྟེན་ནས་རིག་པ་གསུམ་རྣལ་འབྱོར་དུ་ཁྱེར་བ་དང་། མཐར་ཐུག་ཆོས་ཀྱི་རྣལ་འབྱོར་ལ་བརྟེན་ནས་གནས་ཀྱི་ཆིངས་ལྔ། རྩ་བའི་རྫོགས་རིམ་ཉི་ཤུ་རྩ་བཞི་ལ་སོགས་པའི་དོན་རྣམས་རྒྱས་པར་གནང་། བར་ཆད་མེད་པར་སློབ་གཉེར་ཚར་བ་དང་། བླ་མ་ལ་ཆོས་རྫོགས་པར་ཐོབ་པའི་གཏང་རག་གི་དགའ་སྟོན་བཤམས་པའི་ཚོགས་གྲལ་དུ། མར་པས་ཐུགས་སྤྲོ་བའི་ངང་ནས་བླ་མ་དང་མཆེད་ལྕམ་རྣམས་ཀྱི་དྲུང་དུ་གནང་བ་ཞུས་ནས་མགུར་འདི་ཕུལ་ལོ། །རྗེ་སངས་རྒྱས་ཀུན་གྱི་ཐུགས་ཀྱི་སྲས། །འགྲོ་བ་ཀུན་གྱི་རྡོ་རྗེ་འཆང་། །རྒྱུད་གཉན་པོ་རྣམས་ཀྱི་གཏེར་བདག་པོ། །དཔལ་ཞི་བ་བཟང་པོའི་ཞབས་ལ་འདུད། །སྐུ་མཐོང་བས་ང་རྒྱལ་རི་
2-3-13a
བོ་བསྙིལ། །གསུང་ཐོས་པས་ཐ་མལ་སེམས་རྒྱུད་གྲོལ། །ཐུགས་དྲན་པས་ཕྱི་ནང་མུན་པ་བསལ། །དེང་སང་དུས་ཀྱི་སྐལ་ལྡན་བདག །བོད་ནས་རྒྱ་གར་ཡུལ་དུ་མཆིས། །བཤུལ་ཐག་རིང་པོའི་མི་ཞིག་ཡིན། །དམ་ཆོས་པཎྜི་ཏ་ལ་ཞུས། །བརྒྱུད་པ་ཉེ་བའི་དམ་ཆོས་ཐོབ། །རྗེ་དངོས་གྲུབ་ཅན་གྱི་ཞབས་ལ་གཏུགས། །མི་དང་མི་མིན་བར་ཆད་ཞི། །གསང་སྔགས་ཕ་རྒྱུད་མ་རྒྱུད་ཐོབ། །གདམས་ངག་ཆེ་བའི་སྟོན་པ་ཡིན། །དཔལ་ཞི་བ་བཟང་པོ་ཐུགས་ལ་བཏགས། །བླ་མ་བཟང་པོའི་བུ་གཅིག་ཡིན། །བར་ཆད་མེད་པར་ལྷོ་བལ་བགྲོད། །ལས་འཕྲོ་ཅན་གྱི་བན་དྷེ་ཡིན། །བདེ་མཆོག་རྒྱུད་རྒྱལ་བདེ་བླག་ཁུམས། །སྒྲུབ་ཐག་ཉེ་བའི་དམ་ཆོས་ཡིན། །བཀྲ་ཤིས་ལུང་བསྟན་ཞལ་ཡང་ཐོས། །མི་ལུས་ཐོབ་པའི་དོན་གོ་ཡིན། །ལྷོ་བྲག་བོད་དུ་ལྟེ་བ་བཅད། །དཀར་པོའི་རྒྱ་ལ་ལས་འཕྲོ་སད། །གྲུབ་ཐོབ་མཁས་པ་རྣམས་དང་མཇལ། །དབང་བསྐུར་རྒྱུད་བཤད་མན་ངག་ཐོབ། །ལུས་ངག་ཡིད་གསུམ་བྱིན་གྱིས་བརླབས། །མཁའ་འགྲོའི་དབང་ཕྱུག་ཞབས་དྲུང་དུ། །རྣལ་འབྱོར་གསུམ་གྱི་དོན་ལ་བསླབས། །སྒྱུ་མ་ཆེན་པོའི་མ་དང་མཇལ། །ཀུན་ཏུ་བཟང་པོའི་ཕ་རྒན་བསྟེན། །ཆགས་ལམ་
2-3-13b
ཏིང་འཛིན་ཉམས་སུ་བདར། །ཤེས་རབ་གསུམ་གྱི་སྒྲོན་མེ་རྒྱས། །གཏི་མུག་གསུམ་གྱི་མུན་པ་གསལ། །སྒྲིབ་པ་གསུམ་གྱི་བུད་ཤིང་བསྲེགས། །ངན་སོང་གསུམ་གྱི་དུར་ས་སྟོངས། །བཀའ་དྲིན་ཆེའོ་བླ་མ་རྗེ། །སྐྱིད་དོ་ཆོས་ཀྱི་བློ་གྲོས་བདག །དགའ་འོ་འདིར་བཞུགས་མཆེད་ལྕམ་ཀུན། །ཞེས་པའི་གླུ་བོད་སྐད་དུ་བླངས་པས་བོད་ཀྱི་གྲོགས་དང་བོད་སྐད་གོ་བ་མེད་པའི་ཕྱིར། དྷཱ་ར་ཤྲཱི་ལ་སོགས་པའི་མཆེད་གྲོགས་རྣམས་ན་རེ། བོད་སྨྱོ་བ་མིན་ནམ་གསུངས་པ་ལ་བདག་རིགས་དང་ལས་འཕྲོ་ཁྱད་པར་ཅན་ཡོད་ཀྱང་། སྐྱེ་བ་འདིའི་བག་ཆགས་ཤས་མཐུག་པའི་སྟོབས་ཀྱིས་གླུ་བོད་སྐད་དུ་བྱུང་ཡིན་གསུངས་ནས། སླར་རྒྱ་གར་གྱི་སྐད་དུ་བསྒྱུར་བས་ཁོང་རྣམས་ངོ་མཚར་སྐྱེས་སོ། །ད་ནཱ་རོ་པའི་དྲུང་དུ་མྱུར་བ་འགྲོ་དགོས་དགོངས་པ་ལ། སྤྱིར་གྱིས་རྗེ་མར་པས་མངའ་བདག་མཻ་ཏྲི་པའི་སྙན་པ་ལ་བརྟེན་མི་ཕྱེད་པའི་དད་པའི་ངང་ནས་ཆོས་ཐོབ་པ་ཞིག་ཅིས་ཀྱང་བྱེད་དགོས་དགོངས་པ་རྒྱུན་ཆགས་སུ་ཡོད་པ་ལས། ཁྱད་པར་བླ་མས་རྫོང་(རྫོངས་)དང་ཚོགས་འཁོར་གནང་བའི་སྔ་ནུབ་མངོན་སུམ་དུ་ཡང་ཡང་དྲན་ཞིང་མཆོག་ཏུ་དད་པ་ཞིག་བྱུང་བས། ཡིད་ཀྱིས་མཎྜལ་དང་ཡན་ལག་བདུན་པ་ཕུལ་གསོལ་བ་བཏབ་པས་རྨི་ལམ་དུ་
2-3-14a
མཻ་ཏྲི་པའི་ཕོ་ཉ་ཡིན་ཟེར་བའི་བུད་མེད་མཛེས་མ་ལག་ཏུ་བུམ་པ་ཐོགས་པ་ཞིག་བྱུང་ནས་དེའི་བུམ་པ་དང་ཕྱག་མར་པའི་དབུ་ཐོག་ཏུ་བཞག་པ་ཞིག་རྨི་བ་ལས། མན་ལ་སད་པ་དང་དགའ་སྤྲོ་དཔག་ཏུ་མེད་པ་ཞིག་ཐོབ་པར་གྱུར་ཏོ། །དེ་ནས་རྗེ་བཙུན་མར་པ་འབྱོན་པར་ཆས་པ་ལ། དཔལ་ཞི་བ་བཟང་པོས་མར་པའི་རྫོངས་སུ་ཚོགས་འཁོར་མཛད་ནས་གནང་བའི་ཆོས་རྣམས་ཀྱི་དཔེ་ཆ་རྣམས་གནང་ཞི་ཕྱག་མར་པའི་དབུ་ཐོག་ཏུ་བཞག་སྟེ་ཞལ་ནས། ངེད་ཀྱི་འདུག་ས་འདི་ལམ་བགྲོད་དཀའ་བར་ཡོད་ཀྱང་། ཁྱོད་འདིར་སླེབས་པས་དོན་ཆེན་ཐོབ། ནཱ་རོ་པས་ཁྱོད་སྐལ་ལྡན་དུ་མཁྱེན་ནས་ངའི་སར་ཡང་བརྫངས། མེ་ཏྲི་པའི་སར་ཡང་རྫོང་བར་འདུག་ཅིང་། ནཱ་རོ་པ་རང་གིས་ཀྱང་བརྩེ་བས་རྗེས་སུ་བཟུང་སྟེ་ཅི་འདོད་ཀྱི་གདམས་པ་གནང་ནས། ཁ་བ་ཅན་འདུལ་བའི་རྒྱལ་ཚབ་ཏུ་མངའ་གསོལ་བར་འདུག་ཅིང་། དེ་བཞིན་དུ་ངས་ཀྱང་ཁྱོད་དང་པོ་ཡོང་བ་ཤེས་ནས་བསུ་བ་ལ་བསྲུང་མ་མིར་སྤྲུལ་ནས་བཏང་བ་ཡིན་ཏེ། མིར་མ་མཐོང་བྱར་མཐོང་འདུག ད་གདམས་ངག་དཔེ་ཆ་དང་བཅས་པ་བྱིན་ནས་བཀྲ་ཤིས་མངའ་གསོལ་བྱེད་པ་ཡིན་པས་དགའ་བར་གྱིས་ཤིག་
2-3-14b
གསུང་(གསུངས་)ནས་མཉེས་མཉེས་མཛད་པས་རྨི་ལམ་དང་ལུང་བསྟན་མཐུན་པར་བྱུང་སྟེ། རྗེ་མར་པས། བླ་མ་ལ་ཕྱིར་མི་ལྡོག་པའི་དད་པ་དང་དགའ་སྤྲོ་དཔག་ཏུ་མེད་པ་ཞིག་ཐོབ་ནས་མར་པས་ཕྱི་ཕྱག་གི་ཚུལ་དུ། བླ་མ་དང་ཆོས་གྲོགས་རྣམས་ལ་ཡང་རྟོགས་པ་འདི་མགུར་དུ་ཕུལ་ལོ།། །།འདི་ན་བཞུགས་པའི་རྗེ་བཙུན་དང་། །སྙིང་གྲོགས་སྤུན་རྣམས་སྙན་གསན་འཚལ། །མགོ་རྒོད་མར་པ་ལོ་ཙྪ་(ལོཙྪ་)ངས། །ལས་འབྲས་སད་པས་ལྷོ་བལ་ཕྱིན། །དངོས་གྲུབ་ཅན་གྱི་བལ་པོ་དང་། །ཡེ་ཤེས་སྙིང་པོ་ཞི་བཟང་ལ། །གདན་བཞི་གསང་འདུས་བདེ་མཆོག་སྐོར། །རྒྱུད་དང་མན་ངག་གཏེར་ཁ་ཕྱེས། །ད་ལྟ་སློབ་དཔོན་ཞལ་སྔ་ནས། །ཞུས་པ་གནང་བའི་དམ་ཆོས་ཚར། །ལུང་བསྟན་བཀྲ་ཤིས་དུས་གཅིག་ཐོབ། །མདང་སང་ཐལ་བའི་ཁར་ནུབ་ཏུ། །མཎྜལ་ཡིད་ཀྱིས་བཤམས་ནས་ཀྱང་། །མཻ་ཏྲི་པ་ལ་གསོལ་བཏབ་སྙམ། །འཁྲུལ་པའི་བག་ཆགས་རྨི་ལམ་དུ། །མངའ་བདག་མཻ་ཏྲིའི་ཕོ་ཉ་མོ། །བུད་མེད་ལུས་ལ་བཞིན་རྒྱས་མ། །ལག་ན་བུམ་པ་ཐོགས་པ་ཡིས། །མི་ཁོ་བོའི་མགོ་ལ་རེག་པ་རྨིས། །ཐུགས་རྗེས་བྱིན་གྱིས་རློབས་པ་འདྲ། །སྔོན་སྨོན་ལམ་ལས་ཀྱིས་འབྲེལ་ལམ་བསམ། །དེ་ཕྱིར་དད་འདུན་དྲག་པོ་ཡིས། །ཕ་རྒན་དེ་ཡི་སྤྱན་སྔར་མཆིས། །འདི་ནི་
2-3-15a
བཞུགས་པའི་རྗེ་བཙུན་ལ། །མོས་གུས་ལྟེམས་ཀྱང་མེད་པ་བྱུང་། །སྐྱབས་སུ་འདུ་འབྲལ་མེད་པར་མཆི། །ངན་སོང་མེད་པའི་བྱིན་གྱིས་རློབས། །ཚེ་འདི་དང་ཕྱི་མར་འགྲོགས་པ་ཡི། །རྡོ་རྗེ་སྤུན་གྱི་གྲོགས་པོ་ཀུན། །འཁོར་བའི་བསླུ་ཁྲིད་རྒྱབ་ཏུ་སྐྱུར། །དམ་པའི་གདམས་ངག་ཉམས་སུ་ལོངས། །དམ་ཚིག་ངོ་ལྐོག་མེད་པར་སྲུངས། །རྟག་ཏུ་བླ་མ་སྤྱི་བོར་སྒོམས། །དགེ་བ་བཅུ་ལ་ལོངས་སྤྱོད་མཛོད། །མི་དགེ་བཅུ་པོ་དུག་བཞིན་སྤོངས། །སྒྲུབ་པ་རྒྱུན་ཆད་མེད་པར་མཛོད། །ཅེས་ཕུལ་བ་དང་། བླ་མ་ཞི་བ་བཟང་པོས་མར་པའི་དབུ་ཐོག་ཏུ་ཕྱག་བཞག་ནས་བར་ཆད་མི་འབྱུང་བར་བྱིན་གྱི་བརླབས་སོ། །དེ་ནས་བླ་མ་མར་པས་སྒྱུ་མ་ཆེན་པོའི་སྐོར་རྣམས་མཁྱེན་ཏེ་ཚུར་བྱོན་པས་ཞག་གསུམ་ལ་ཕུ་ལ་ཧ་རིར་ཕེབས། རྗེ་ནཱ་རོ་པ་ཆེན་པོ་དེས་དགེ་ཚུལ་ཤེས་རབ་སེང་གེ་གཅིག་པུ་ལ་མན་ངག་ཅིག་གནང་གིན་འདུག་པས་མ་འོང་གསུང་བའི་ཕྱག་གིས་བརྡའ་གཅིག་བྱུང་བས། དེ་མ་གྲོལ་བར་ཕྱག་འཚལ་ཞིང་བསྡད། ཆོས་ཐོན་པ་དང་དྲུང་དུ་ཕྱིན། བྱིན་རླབས་ཞུས་པས། ཆོས་ཐོབ་བམ་གསུངས། ཐོབ་ལགས་ཞུས་པས། ཁོང་ང་ལ་གཤེ་ཞིང་མི་འདུག་གམ་གསུང་། བྲེ་མོ་གསུང་གིན་གདའ་ཞུས་
2-3-15b
པས། ཇི་སྐད་གསུང་གིན་འདུག་གསུང་། གསུངས་ཚུལ་ཞུས་པས། དེ་ཁོ་རང་ཡིན་མོད། ཡོན་ཏན་མེད་པས་དུག་མཚོའི་གླིང་མི་མེད་སར་སྡོད། མིའི་ལུས་ལ་སྤྲེའུའི་གདོང་པ་ཡོད་པས་ཕྱག་རྒྱ་མ་མི་འབྱོར་པར་ཁྱི་མོ་ལ་བྱེད་མཁན་ཀུ་ཀུ་རི་པ་མིན་པ་སུ་ཡོད་གསུངས་བཞད་ནས་ཨ་ཀྱང་དེ་ཀ་ཁོང་གི་ཆ་བ་ཡིན། དེ་ཁོང་མིན་པ་གཞན་གྱིས་མི་འོང་ཞིང་། ཁོང་གི་ང་ལ་དགྱེས་པ་རྡོ་རྗེ་གསན། ཁོང་མ་ཧཱ་མཱ་ཡའི་གྲུབ་ཐོབ་ཡིན་པས་ངས་ཞུས་པ་ཡིན་གསུང་། མ་ཧཱ་མཱ་ཡ་ཚར་གཅིག་ནཱ་རོ་པས་ཀྱང་གནང་བྱུང་བ་དོན་ལ་ཁྱད་མེད་པ་ལ་ཚིག་ནཱ་རོ་པས་གསུངས་པ་རྣམས་ཅུང་ཟད་རྒྱས་པ་དང་དོད་པ་ཞིག་བྱུང་བས། བླ་མ་རང་གིས་འདི་ལྟ་བུ་མཁྱེན་བཞིན་དུ་བདག་དུག་མཚོའི་གླིང་དུ་དཀའ་ལས་དེ་ཙམ་བྱེད་དུ་འཇུག་པ་ཅི་ལགས་ཞུས་པས། ཁོང་མ་རྒྱུད་ཀྱི་བདག་པོ་ཡིན་ཞིང་གདམས་ངག་ལ་ངེས་ཤེས་སྐྱེད་པ་དང་། ཁུངས་བཙུན་པའི་ཕྱིར་བཏང་བ་ཡིན་གསུངས། དེར་བླ་མ་མར་པས་ཤར་ཕྱོགས་བྷ་(བྷང་)ག་ལ་ན་ཁ་སརྤ་ཎི་རང་བྱོན་གྱི་ལྷ་ཁང་ཡོད་པ་གཟིགས་སུ་བྱོན། དེའི་ཚེ་མ་ཧཱ་མཱ་ཡའི་བགྲོ་གླེང་མཛད་པར་དགོངས་ཏེ་གཉོས་ནཱ་ལེནྡྲ་ན་བླ་མ་བི་ལམ་ཏ་པ་ལ་ཆོས་ཞུ་ཞིང་ཡོད་པའི་སར་བྱོན་ཏེ། ཚོང་
2-3-16a
འདུས་ནས་ཟས་ཆང་བཟང་པོ་ཉོས་ཏེ་གསོལ་བའི་ཚེ་མ་ཧཱ་མཱ་ཡའི་བགྲོ་གླེང་མཛད་པས་རྗེ་མར་པ་རྒྱལ་བ་དང་། གཉོས་ན་རེ། ཁྱོད་ལ་མ་རྒྱུད་སློབ་པའི་སློབ་དཔོན་དེ་སུ་ཡིན་ཟེར་བས། མར་པས་བླ་མ་གསང་སྟེ། ང་ཡི་བླ་མ་རྣལ་འབྱོར་གསུམ་དང་ལྡན། །དམན་པ་དབྱིབས་ལ་ཟབ་པ་སྔགས། །མཐར་ཐུག་ཆོས་ཀྱི་རྣལ་འབྱོར་པ། །བླ་མ་ཐར་པའི་ལམ་སྟོན་ཡིན། །ད་ལྟ་གྲོང་ཁྱེར་སེར་སྐྱ་ནའོ། །ཞེས་གསུངས་པས། གཉོས་ཀྱིས་སེར་སྐྱར་ཕྱིན་ནས། བླ་མ་ཐར་པའི་ལམ་སྟོན་གང་ན་བཞུགས་ཞེས་འདྲི་ཞིང་བཙལ་བས། བླ་མ་ཐམས་ཅད་ཐར་པའི་ལམ་སྟོན་ཡིན་པ་ལ། ཁྱོད་ལ་སུ་དགོས་པ་ཡིན་ཟེར་བྱུང་བས། བདེན་སྙམ། བླ་མ་གསང་བར་ཤེས་རུང་རྩད་བཅད་པས་དང་པོ་མ་ཆོད། ཕྱིས་ཆོད་རུང་དུག་མཚོའི་ལམ་མ་བགྲོད་པར་གཉོས་དཔལ་ཀུ་ཀུ་རི་པ་དང་མ་མཇལ་སྐད། དེ་ནས་རྗེ་མར་པ་དཔལ་ནཱ་རོ་པའི་དྲུང་དུ་བྱོན་ཏེ་བདག་གི་གྲོགས་པོ་དང་ཕྲད་ནས་མ་བརྒྱུད་ལ་བགྲོ་གླེང་བྱས་པས་བདག་རྒྱལ། ཁོང་ན་རེ། རྒྱུད་སློབ་པའི་སློབ་དཔོན་སུ་ཡིན་ཞེས་འདྲི་བ་ལ། བདག་གིས་མ་བཤད་ལགས་ཞུས་པས། བླ་མ་གསང་མི་དགོས་པ་ཡིན་ཏེ། ཁོང་གསེར་མང་ཡང་དེས་ཆོག་པ་ཡིན། བསོད་ནམས་
2-3-16b
དང་ལས་འཕྲོ་དགོས་པ་ཡིན་གསུང་། དེ་ནས་མར་པས་ནཱ་རོ་པ་ལ་མཻ་ཏྲི་བའི་དྲུང་དུ་འགྲོ་བའི་གསོལ་བ་བཏབ་པས། དགྱེས་བཞིན་གནང་བ་ལས། བླ་མ་ནཱ་རོ་པ་ལ་མཉེས་པའི་མཆོད་པ་དང་། དཔའ་བོ་མཁའ་འགྲོ་རྡོ་རྗེ་སྤུན་རྣམས་ལ་ཚོགས་གཏོར་ཕུལ་ནས་བར་ཆད་མེད་པར་གསོལ་བ་བཏབ་པས་ངོ་མཚར་བའི་ལྟས་དུ་མ་བྱུང་ངོ་། །དེ་ནས་ལམ་ལ་ཞུགས་ཏེ། མེཻ་ཏྲི་པ་གང་ན་བཞུགས་ཞེས་འདྲི་ཞིང་བྱོན་པས་རི་མེ་ལྟར་འབར་བའི་དགོན་པ་ན་བཞུགས་ཏེ་ལམ་བགྲོད་དཀའ་མོ་རང་ཡོད་པས་མ་ཕྱིན་ན་གྲགས་ཟེར་བ་དགའ་བྱུང་བས། ཚེ་འདིའི་ཕྱིར་ནོར་འཚོལ་བ་ནི་མིན། ཆོས་ཕྱིར་ཤི་ནའང་ཤི་འགྲོ་དགོས་དགོངས་པ་ཐུགས་ལ་ཤར་ནས་ཐེ་ཚོམ་མེད་པར་བྱོན་ཏེ། མཻ་ཏྲི་པའི་བཞུགས་སར་ཉི་མ་སྔ་ཕྱེད་ཙམ་ལ་ཕེབས་པས། ཤིང་ནྱ་གྲོ་དྷའི་གྲིབ་མ་ལ་བཞུགས་པ་དང་མཇལ་བས། བྱང་ཆུབ་སེམས་དཔའ་རྟག་ཏུ་ངུ་བྱང་ཆུབ་སེམས་དཔའ་ཆོས་འཕགས་དང་མཇལ་བ་ལྟ་བུའི་དགའ་བ་ཆེན་པོ་སྐྱེས་ནས་བརྐྱང་ཕྱག་ལན་བདུན་བཙལ། གསེར་ལ་སོགས་ཀྱི་འབུལ་བ་བགྱིས་ཏེ། བླ་མའི་སྐུ་གསུང་ཐུགས་ལ་བསྟོད་པའི་མགུར་འདི་ཕུལ་ལོ། །ཁྱེད་འགྲོ་བའི་དོན་དུ་འཛམ་གླིང་འདིར། །རྒྱལ་པོའི་རིགས་སུ་སྐྱེ་བ་
2-3-17a
བཞེས། །ཕྱི་ནང་སྒྲུབ་ཐབས་སྣ་ཚོགས་མཁྱེན། །མཻ་ཏྲི་པ་ལ་ཕྱག་འཚལ་ལོ། །རྗེ་བཙུན་སྒྲོལ་མས་ལུང་བསྟན་ནས། །བར་ཆད་མེད་པར་བྱིན་གྱིས་བརླབས། །རི་ཁྲོད་དབང་ཕྱུག་ཞབས་རྡུལ་རེག །ཨ་ཝ་དྷཱུ་ཏི་ཁྱོད་ལ་བསྟོད། །སྐུ་ནི་རིན་ཆེན་གསེར་གྱི་རི། །ཡེ་ཤེས་སྨོན་ལམ་རྣམ་དག་པ། །ཉོན་མོངས་ནད་རྣམས་འཇོམས་མཛད་པའི། །ཆོས་ཀྱི་ཉི་མ་ཁྱོད་ལ་བསྟོད། །ཐུགས་ནི་སྟོང་ཉིད་རྡོ་རྗེ་ཡིས། །བདག་ལྟའི་རི་བོ་ཆེན་པོ་འཇོམས། །ཆོས་རྣམས་མཉམ་པ་ཉིད་གཟིགས་པའི། །མཉམ་མེད་བླ་མ་རྗེ་ལ་བསྟོད། །སྤྲུལ་སྐུ་འཛམ་གླིང་ཀུན་གྱིས་རྒྱན། །རྡོ་རྗེ་སེམས་དཔའི་ངོ་བོ་ཉིད། །ཐུགས་རྗེའི་གཏེར་ལྡན་འགྲོ་བའི་མགོན། །གཙུག་གི་རྒྱན་གྱུར་ཁྱེད་ལ་བསྟོད། །མི་དང་མི་མིན་འབྱུང་པོའི་ཚོགས། །གང་ཞིག་དྲེགས་ཅན་མ་ལུས་པ། །བརྟུལ་ཞུགས་ནུས་པས་བཀའ་ཉན་མཛད། །རྡོ་རྗེ་འཛིན་པ་ཁྱེད་ལ་བསྟོད། །བདེ་གཤེགས་བླ་མ་ཐུགས་རྗེ་ཅན། །མངའ་འབངས་བོར་ནས་དམ་ཆོས་མཛད། །པཎ་ཆེན་ནཱ་རོ་ལ་སོགས་པའི། །བླ་མ་ཀུན་ལ་གདམས་ངག་ཞུས། །རྒྱུད་སྡེའི་སློབ་གཉེར་འགའ་རེ་ཚར། །ལྷོ་དུག་མཚོ་ཁོལ་མའི་དོ་རི་ལ། །དཔལ་ཞི་བ་བཟང་པོའི་ཞབས་དྲུང་དུ། །དམ་པ་ཁྱེད་ཀྱིས་ཐུགས་རྗེས་བཟུང་། །སྲོག་
2-3-17b
ཕངས་པ་མེད་པར་དྲུང་དུ་འོངས། །རི་བོ་མེ་འབར་གྱི་དགོན་པ་ན། །ཤིང་ནྱ་གྲོ་ཏ་(དྷ་)ཡི་བསིལ་གྲིབ་ལ། །མངའ་བདག་རྒྱལ་སྲས་མཻ་ཏྲི་པ། །ཕ་སངས་རྒྱས་ཁྱེད་དང་ད་ལྟ་མཇལ། །ཉི་མ་ཤར་འདྲའི་དད་པ་སྐྱེས། །ཤི་ཡང་ཕོད་པའི་དད་པ་ཡིས། །ཁ་གཏིང་མེད་པར་གསོལ་བ་བཏབ། རྒྱུན་ཆད་མེད་པར་བྱིན་གྱིས་རློབས། །བྲམ་ཟེ་ཆེན་པོའི་སྲོལ་འཛིན་ཅིང་། །སྤྲུལ་པའི་རི་ཁྲོད་དབང་ཕྱུག་དྲུང་། །ལེགས་པར་འོངས་པ་དམ་པའི་ཆོས། །ཐེག་པའི་ཡང་རྩེ་སྙིང་པོའི་དོན། །མཐའ་བྲལ་ཕྱག་རྒྱ་ཆེན་པོ་དེ། །ནམ་མཁའ་ལྟ་བུར་གནང་བ་ཞུ། །ཞེས་གསོལ་བ་བཏབ་པ་ལས། མངའ་བདག་གིས་རྗེས་སུ་བཟུང་སྟེ། དབང་བསྐུར་རྣམས་རྫོགས་པར་མཛད་ཅིང་། གསང་མཚན་ཐུགས་ཀྱི་རྡོ་རྗེར་བཏགས། དེའི་ཚེ་བླ་མ་མཉེས་པའི་མཆོད་པ། མཁའ་འགྲོ་མཉེས་པའི་ཚོགས་གཏོར་རྣམས་བཤམས་པས། ཡ་མཚན་པའི་ལྟས་མང་པོ་བྱུང་ཞིང་། བླ་མས་ཕྱག་རྒྱ་ཆེན་པོའི་གདམས་ངག་ངོ་སྤྲོད་དང་བཅས་པ། བརྒྱུད་བསྟོད་པ་གླུར་བླངས་འགྲེལ་པ་དང་བཅས་པ། དོ་ཧའི་བཤད་པ་དང་བཅས་པ་རྣམས་ཅིག་ཅར་དུ་སྒྲོ་འདོགས་ཆོད་པར་གནང་ཞིང་། ཉམས་སུ་བླངས་པས་ཉམས་རྟོགས་བཟང་པོ་ཐུགས་ལ་འཁྲུངས་པས་ཐུགས་དགྱེས་པར་གྱུར་ཚེ། བླ་མ་ལ་གཏང་རག་གི་མཆོད་པ་ཞིག་ཕུལ་བའི་ཚོགས་གྲལ་དུ། 
2-3-18a
ཉམས་མྱོང་གི་རྟོགས་པ་འདི་མགུར་དུ་ཕུལ་ལོ།། །།སྤྱི་བོ་བདེ་ཆེན་གཞལ་ཡས་སུ། །དྲི་མེད་པདྨ་ཉི་ཟླ་ལ། །བླ་མ་མངའ་བདག་བྱམས་མགོན་བཞུགས། །བདག་གི་སེམས་རྒྱུད་བྱིན་གྱིས་རློབས། །དུས་གསུམ་སངས་རྒྱས་ཐམས་ཅད་དང་། །ཡི་དམ་ལྷ་ཚོགས་ཇི་སྙེད་པ། །དབྱེར་མེད་དཔལ་ལྡན་དྷུ་(དྷཱུ་)ཏི་པ། །སྙིང་གི་པདྨར་བཞུགས་ནས་ཀྱང་། །བདག་གི་བདེན་པ་གྲུབ་ཏུ་གསོལ། །རྒྱ་གར་ཞིང་ཁམས་རྣམ་དག་ཏུ། །པཎ་ཆེན་ནཱ་རོ་ལ་སོགས་པའི། །གྲུབ་ཐོབ་རྣམས་ཀྱི་ཞབས་རྡུལ་དེ། །མི་བདག་གི་སྤྱི་བོའི་གཙུག་ཏུ་བླངས། །རྒྱུད་སྡེའི་ཚིག་རྣམས་མང་པོ་ཉན། །བདག་དེས་ཀྱང་ཆོག་ཤེས་མ་བྱུང་བས། །མངའ་བདག་རྗེ་བཙུན་དྲུང་དུ་འོངས། །བྱིན་རླབས་དམ་ཆོས་ཚུལ་བཞིན་ཞུས། །ཁྱད་པར་ཕྱག་རྒྱ་ཆེན་པོ་ཞུས། །ཆོས་ཤེས་པ་རྣམས་ཀྱི་སྒྲོ་འདོགས་བཅད། །མི་ཤེས་པ་རྣམས་སློབ་གཉེར་བྱས། །རྗེ་ས་ར་ཧ་ཡི་བཀའ་སྲོལ་གྱིས། །བྱིན་རླབས་དང་རྟོགས་པ་དུས་གཅིག་བྱུང་། །རྗེ་ལ་རྟོགས་འབུལ་གྱི་དབྱངས་ཤིག་ལེན། །ཕྱི་ནང་གྲུབ་མཐའ་སྣ་ཚོགས་ཀུན། །རྟོགས་ཤིང་ཕྱག་རྒྱ་ཆེན་པོར་འདུས། །སྣང་བ་བདེན་མེད་མཐའ་ཡས་ཀུན། །ཟུང་འཇུག་མཉམ་ཉིད་རོལ་པར་ཤར། །རྒྱུན་ཆད་མེད་པའི་ཆོས་ཉིད་བདེ། །རང་གསལ་རིག་
2-3-18b
པ་འགག་པ་མེད། །ཟུང་འཇུག་རིག་པ་གཉུག་མའི་ངང་། །ཡེ་ཤེས་ལྷུན་གྲུབ་ལྟ་བ་ལགས། །སྤྱོད་ལམ་བཞི་ཡི་མཉམ་རྗེས་སུ། །དུས་གསུམ་འབྲལ་མེད་ཆུ་བོའི་རྒྱུན། །རྣལ་འབྱོར་མངོན་གསལ་འགྲིབ་ཏུ་མེད། །ཡེངས་སུ་མེད་པ་སྒོམ་པ་ལགས། །དུས་གསུམ་ལུས་ངག་ཡིད་ཀྱི་ཆོས། །སྣ་ཚོགས་ངེས་མེད་རྒྱུན་གཅིག་ཏུ། །མ་འགགས་འབད་མེད་ངོ་བོར་མཉམ། །སྤྲུལ་པ་ལྟ་བུའི་སྤྱོད་པ་ལགས། །རྟོགས་པའི་ངོ་བོ་སྐད་ཅིག་མ། །ཅིག་ཆར་བ་ལ་ཕྲི་བསྣན་མེད། །རང་གྲོལ་གཉུག་མ་བདེ་བ་ཆེ། །རེ་དོགས་བྲལ་བ་འབྲས་བུ་ལགས། །ཚིག་ཚོགས་མ་ཉན་དགུ་ཉན་ཀྱང་། །གཞི་སེམས་ཉིད་ཆོས་སྐུར་ད་གཟོད་དོ། །མི་ཁོ་བོའི་ཐེ་ཚོམ་ད་གཟོད་ཟད། །འཁྲུལ་པའི་གཞི་རྩ་ད་གཟོད་ཅིག་(ཞིག །)ཐ་སྙད་ལ་སངས་རྒྱས་མི་རེ་བས། །རྗེ་མངའ་བདག་ཆེན་པོའི་ཞབས་དྲུང་དུ། །དོན་ཉམས་སུ་བླངས་པའི་འབྲས་བུ་དང་། །བརྒྱུད་པ་རྣམས་ཀྱི་བྱིན་རླབས་ཀྱིས། །གོ་བ་ཉམས་མྱོང་རྟོགས་པ་འདི། །ཕུལ་བས་བླ་མ་རྗེ་བཙུན་དང་། །མཆེད་གྲོགས་འདིར་བཞུགས་དགྱེས་པར་མཛོད། །ཅེས་ཕུལ་བས། ། མངའ་བདག་མཻ་ཏྲི་པས་མར་པ་ལ་ཞལ་གདམས་བཅུ་གཉིས་རྡོ་རྗེའི་མགུར་འདི་གསུངས་སོ། ། བུ་དད་པའི་རྩ་བ་མི་བརྟན་ན། །གཉིས་མེད་ཀྱི་རྩ་བ་བརྟན་མི་འགྱུར། །ཕྱོགས་མེད་ཀྱི་སྙིང་རྗེ་མ་སྐྱེས་ན། །
2-3-19a
གཟུགས་སྐུ་རྣམ་གཉིས་ཐོབ་མི་འགྱུར། །ཤེས་རབ་རྣམ་གསུམ་མ་སྐྱོངས་ན། །རྟོགས་པ་རྒྱུད་ལ་སྐྱེ་མི་འགྱུར། །བླ་མ་རྗེ་བཙུན་མ་བསྟེན་ན། །དངོས་གྲུབ་རྣམ་གཉིས་ཐོབ་མི་སྲིད། །སེམས་ཀྱི་རྩ་བ་མ་ཆོད་ན། །ཤེས་པ་གང་དགར་གཏང་མི་བྱ། །སྣང་བ་རྒྱ་ཡིས་མ་ཐེབས་ན། །བདེ་བ་ཆེན་པོར་དབེན་མི་གནས། །ཞེན་ཆགས་ཤེས་པ་སྐྱེས་གྱུར་ན། །གླང་ཆེན་རབ་དགའི་སྤྱོད་པ་བྱ། །སྐབས་སུ་ཉོན་མོངས་སྐྱེས་གྱུར་ན། །སེམས་ལ་ལྟོས་ལ་མ་ཡེངས་སྒོམས། །རྐྱེན་གྱིས་སེམས་ལ་གནོད་གྱུར་ན། །དབང་བཞིའི་ཉམས་ལེན་རྒྱུན་དུ་གྱིས། །ཉོན་མོངས་རང་རྒྱུད་ཤོར་གྱུར་ན། །བླ་མའི་གདམས་པ་དྲན་པར་གྱིས། །རྩེ་གཅིག་གསོལ་བ་མ་བཏབ་ན། །དམ་པའི་ཐུགས་དགོངས་ག་ལ་ལོངས། །ལྷ་བསྐྱེད་རྫོགས་ཟུང་འཇུག་མ་བསྒོམས་ན། །འཁོར་འདས་དབྱེར་མེད་ག་ལ་རྟོགས། །བཅུ་གཉིས་རྡོ་རྗེའི་མགུར་ལྡན་པ། །དྲན་པ་དང་བཅས་བཅུ་གསུམ་འདི། །རྣལ་འབྱོར་ཉམས་སུ་བླངས་པས་ན། །བཅུ་གསུམ་ས་ལ་གནས་པར་འགྱུར། །ཅེས་གསུངས་པས། མར་པའི་ཐུགས་ལ་ཤིན་ཏུ་འཐད་ཅིང་འཇགས་པར་གྱུར་ནས། མཻ་ཏྲི་པ་ལ་མི་ཕྱེད་པའི་དད་པའི་ངང་ནས་བྱོན་ཏེ་ཕུ་ལ་ཧ་རིར་ནཱ་རོ་པའི་དྲུང་དུ་ཕེབས་པས། ནཱ་རོ་པའི་ཞལ་ནས། 
2-3-19b
ལྷོ་དུག་མཚོའི་འགྲམ་གྱི་དུརས་ཁྲོད་སོ་ས་གླིང་ན་ཡེ་ཤེས་ཀྱི་མཁའ་འགྲོ་མ་འབྲེལ་ཚད་དོན་ལྡན་རུས་པའི་རྒྱན་དང་ལྡན་པ་ཞིག་བཞུགས་པ་དེའི་དྲུང་དུ་སོང་ལ་གདན་བཞི་ཞུས་ཤོག །གཞན་ཡང་རང་གང་མོས་ཀྱི་ཀུ་སུ་ལུ་རྣམས་ལ་ཆོས་ཅི་འདོད་ཞུས་ཤོག་གསུངས་པ་ལྟར། སོ་ས་གླིང་གི་དུར་ཁྲོད་དུ་ཕྱིན་པས་རྣལ་འབྱོར་མ་བཙལ་བས་རྩྭའི་སྤྱིལ་པོ་ཅིག་གི་ནང་ན་བཞུགས་པ་དང་མཇལ་ཏེ། གསེར་གྱི་མཎྜལ་ཕུལ་ནས་གསོལ་བ་བཏབ་པས། གདན་བཞིའི་དབང་གདམས་ངག་རྣམས་དགྱེས་བཞིན་རྫོགས་པར་གནང་། གཞན་ཡང་དཔལ་སིང་གྷ་གླིང་པ་ལ་སོགས་ཏེ་དུར་ཁྲོད་དང་ཤིང་དྲུང་ན་བཞུགས་པའི་ཀུ་སུ་ལུའི་རྣལ་འབྱོར་པ་མཚན་ལྡན་འགའ་དང་འགའ་ལ་བསྐྱེད་རྫོགས་ཀྱི་དབང་གདམས་ངག་དང་། འཕྲལ་དགོས་ཀྱི་གདམས་ངག་ཕྲན་ཚེགས་མང་པོ་སྐབས་སྐབས་སུ་ཞུས་པས། གདམས་ངག་གི་གཏེར་མཛོད་དུ་གྱུར་པ་ལགས་སོ། །དེ་ནས་ནཱ་རོ་པའི་དྲུང་དུ་ཕེབས། ཕྱག་ཕུལ་ནས་སྙུན་དྲིས་པས། ཁྱོད་དབང་གདམས་ངག་རྣམས་ཡིད་ཆེས་པོ་བྱུང་ངམ་གསུངས། ལོ་རྒྱུས་རྣམས་ཞུས་པས་ཤིན་ཏུ་མཉེས་པར་གྱུར་ཏོ། །དེ་ནས་རྗེ་མར་པས། དཔལ་ནཱ་རོ་པ་ལ་བདེ་མཆོག་གི་དབང་གདམས་ངག་རྒྱུད་
2-3-20a
འགྲེལ་བཤད་པ་རྣམས་དགོས་ཞེས་གསོལ་བ་བཏབ་པས། དབང་རྒྱས་པར་གནང་རྒྱུད་འགྲེལ་བཤད་ལུང་དུ་གནང་ནས། གལ་ཉམས་ལེན་ཆེ་བ་ཡིན་གསུངས། བཀའ་བབས་བཞིའི་གདམས་པར་གྲགས་པ་ནཱ་རོ་ཆོས་དྲུག་དང་། གཉུག་མ་ལྷན་ཅིག་སྐྱེས་པའི་ཡེ་ཤེས་སེམས་སུ་ངོ་སྤྲོད་པ་ཕྱག་རྒྱ་ཆེན་པོ་རྣམས་གནང་ནས་བསྒོམས་པས། སྤྱིར་གྱི་གསང་སྔགས་བླ་མེད་ཀྱི་ཉམས་རྟོགས་ཁྱད་པར་ཅན་མང་པོ་ཐུགས་ལ་འཁྲུངས་ཤིང་། ཁྱད་པར་དུ་གཏུམ་མོ་བསྒོམས་པས། བདེ་གསལ་མི་རྟོག་པའི་ཟུང་འཇུག་མངོན་དུ་གྱུར་པས། སྒོ་གསུམ་གཡོ་འགུལ་མི་ནུས་པའི་ངང་ལ་ཞག་བདུན་གྱི་བར་བརྟན་པ་ཐོབ་པ་དང་། རྟགས་བཅུ་རྣམས་བྱུང་བས། ཐུགས་སྤྲོ་བའི་ངང་ནས་ཉིན་མཚན་འདའ་བ་བྱུང་ངོ་། །དེ་ནས་མར་པའི་ཐུགས་ལ་ངས་བལ་པོ་དང་རྒྱ་གར་དུ་ལོ་བཅུ་གཉིས་ཙམ་སོང་འདུག་སྟེ། དབང་དང་གདམས་ངག་མང་པོ་ཡང་ཐོབ་པ་ཙམ་དུ་མ་བཞག་པར། ཚིག་དོན་གཉིས་ལ་སློབ་གཉེར་དང་ཉམས་ལེན་ལ་མི་འགྱོད་པ་བྱས་པས། སྨྲ་རྒྱུ་དང་སྒོམ་རྒྱུ་ཡང་གཞན་ལ་སྨོས་མི་དགོས་པ་བྱུང་། ད་གསེར་ཕལ་ཆེར་རྫོགས་འདུག་པས་རེ་ཞིག་བོད་ལ་ཕྱིན། གསེར་ཅི་
2-3-20b
མང་རང་གཅིག་བསྒྲུབས་ཏེ། སླར་ཡང་རྒྱ་གར་དུ་ཡོངས་ནས་བླ་མ་རྣམས་ལ་འབུལ་བས་མཉེས་པ་དང་། ཆོས་སྔར་ཐོབ་པ་རྣམས་ལ་དོགས་གཅོད་ནན་ཏན་བྱེད་པ་དང་མ་ཐོབ་པ་རྣམས་ཅི་ཐོབ་བྱས། བོད་དུ་སྤྱིར་སངས་རྒྱས་ཀྱི་བསྟན་པ། སྒོས་སྒྲུབ་བརྒྱུད་ཀྱི་བསྟན་པ་དར་བ་ཞིག་ཅིས་ཀྱང་བྱེད་དགོས་པ་ཤར་ནས། གསེར་ལྷག་མ་གང་ཡོད་ཀྱིས་ལམ་ཆས་ཙམ་ཞིག་མ་གཏོགས་ཀུན་གྱིས་ཡོ་བྱད་བསྒྲུབས་ཏེ། བྲམ་ཟེ་ཀུ་ས་ཀ་མུ་ཏོ་དང་། རྣལ་འབྱོར་མ་སུ་ཀ་དྷ་རི་ལ་སོགས་པ་རྣམས་བཀྲག་ནས། པཎ་ཆེན་ནཱ་རོ་པ་ལ་གཏང་རག་དང་། དགའ་སྟོན་ཚོགས་མཆོད་ཕུལ་བའི་གྲལ་དུ་མར་པའི་ཐུགས་དགོངས་ལ། ང་བོད་ནས་རྒྱ་གར་དུ་འོངས་པའི་དོན་ལ་བླ་མ་མཁས་ཤིང་གྲུབ་པ་བརྙེས་པ་མང་པོ་དང་མཇལ། རྒྱུད་འགྲེལ་པ་དང་བཅས་པ་མང་པོ་ཐོབ་ཅིང་སློབ་གཉེར་བྱས། སྒྲ་སྐད་ལོ་ཙྪ་(ལོཙྪ་)ནི་མཁས་པའི་ཚད་དུ་ཤེས། ཉམས་དང་རྟོགས་པ་ཕྱིན་ཅི་མ་ལོག་པ་ནི་རྒྱུད་ལ་སྐྱེས། ད་བར་ཆད་མེད་པར་བོད་དུ་ལོག་འགྲོ་བ་ཡིན་པས། དུས་དེ་རིང་ལས་དགའ་བ་མི་ཡོང་དགོངས་ནས་མགུར་ཆེན་བརྒྱད་ཀྱི་ཐོག་མ། དཔལ་ནཱ་རོ་པའི་དྲུང་དུ་དབྱངས་རིང་ཏི་བུའི་རིའི་ཁོང་རྒྱུད་ཀྱི་སྐད་ལ་རྟ་དྲངས་ཏེ་རྟོགས་པ་འདི་མགུར་དུ་ཕུལ་
2-3-21a
བ་ལགས་སོ།། །།རྗེ་མཚན་ལྡན་གྱི་བླ་མ་རིན་པོ་ཆེ། །ཁྱེད་སྔོན་སྦྱངས་བསོད་ནམས་བསགས་པའི་ཕྱིར། །སྤྲུལ་སྐུ་ཏཻ་ལོ་དངོས་དང་མཇལ། །སྤང་དཀའ་སྲིད་པའི་སྡུག་བསྔལ་ལ། །ཁྱད་དུ་གསད་པ་བཅུ་གཉིས་མཛད། །དཀའ་བ་སྤྱད་པའི་ཐུགས་དམ་དེ། །སྐད་ཅིག་ཉིད་ལ་བདེན་པ་གཟིགས། །ཤྲཱི་ཛྙ་ན་སིདྡྷིའི་ཞབས་ལ་འདུད། །སྒྲ་བསྒྱུར་བོད་ཀྱི་བན་ཆུང་ང་། །སྦྱངས་པ་སྔ་མའི་ལས་འབྲེལ་གྱིས། །ནཱ་རོ་པཎ་ཆེན་ཁྱེད་དང་མཇལ། །རྒྱུད་ཟབ་མོར་གྲགས་པའི་དགྱེས་རྡོར་བསླབས། །སྙིང་པོ་མ་ཧཱ་མཱ་ཡ་གནང་། །ཡང་སྙིང་བདེ་མཆོག་འཁོར་ལོ་ཞུས། །ལར་རྒྱུད་སྡེ་བཞི་ཡི་ཁོང་སྙིང་ཕྱུང་། །མ་སྐལ་བ་བཟང་མོས་རྗེས་གནང་བའི། །བྱིན་རླབས་ཀྱི་ཆུ་རྒྱུན་མ་ཆད་པ། །དབང་བཞིའི་དོན་ལ་ངོ་སྤྲོད་མཛད། །ཟག་པ་མེད་པའི་ཏིང་འཛིན་སྐྱེས། །ཞག་བདུན་བར་དུ་བརྟན་པ་ཐོབ། །སྲོག་རྩོལ་འཕོ་བ་ཉི་ཟླ་གཉིས། །གཡོ་མེད་ནམ་མཁའི་ཁྱིམ་དུ་ཚུད། །རང་བྱུང་ལྷན་ཅིག་སྐྱེས་པའི་ཉམས། །བདེ་གསལ་མི་རྟོག་ཁོང་ནས་ཤར། །བག་ཆགས་གཉིད་ཀྱི་འཁྲུལ་པ་དེ། །འོད་གསལ་ལམ་གྱི་ངོ་བོར་རྟོགས། །ཡིད་ཀྱི་གཡོ་བ་གཟུང་འཛིན་གཉིས། །སྤྲོས་བྲལ་ཆོས་ཀྱི་སྐུ་རུ་ཐིམ། །
2-3-21b
ཕྱི་སྣང་སྒྱུ་མའི་འཁྲུལ་འཁོར་འདི། །སྐྱེ་མེད་ཕྱག་རྒྱ་ཆེན་པོར་རྟོགས། །ནང་འཛིན་པ་ཡིད་གྱི་རྣམ་ཤེས་འདི། །སྔན་ཆད་མཛའ་བོ་འཕྲད་པ་བཞིན། །སེམས་ཉིད་རང་ངོ་རང་གིས་ཤེས། །ལྐུགས་པར་རྨི་ལམ་རྨིས་པ་བཞིན། །བརྗོད་དུ་མེད་པའི་ཉམས་ཤིག་ཤར། །གཞོན་ནུས་བདེ་བ་མྱོང་བ་བཞིན། །སྨྲ་རུ་མེད་པའི་དོན་ཞིག་རྟོགས། །རྗེ་སྐུ་དྲིན་ཆེའོ་ནཱ་རོ་པ། །སླར་ཡང་དབང་བསྐུར་བྱིན་གྱིས་བརླབས། །ད་དུང་བཀའ་དྲིན་བསྐྱབ་དུ་གསོལ། །ཞེས་ཕུལ་བས། ནཱ་རོའི་ཕྱག་མར་པའི་དབུ་ཐོག་ཏུ་བཞག་ནས་ཞལ་གདམས་ཀྱི་མགུར་འདི་གསུངས་སོ། །བོད་ཡུལ་གྱི་མར་པ་ལོ་ཙྪ་(ལོཙྪ་)ཁྱོད། །ཆོས་བརྒྱད་ཚེ་འདིའི་དོན་མ་སྒྲུབས། །གཟུང་འཛིན་ང་ཁྱོད་རེས་མ་གཅོད། །ཉེ་དུ་དགྲ་ལ་སྐུར་མ་འདེབས། །གཞན་གྱི་ཆོས་ལ་སྒྲོ་མ་འདོགས། །ཐོས་བསམ་མུན་གསལ་སྒྲོན་མེ་ཡིན། །ཐར་པའི་ལམ་མཆོག་འཕྲང་མ་བཅོད། །སྔར་ཡང་བླ་རྗེ་ཡིན་པས་ཆོག །ཕྱིས་ཀྱང་འཁུར་ཞིང་བློས་མ་སྤང་། །རང་སེམས་ནོར་བུ་རིན་ཆེན་འདི། །དྲེད་པོར་ཆུ་ལ་མ་བསྐུར་བར། །བག་ཟོན་ཡེངས་མེད་སྲུངས་ཤིག་དང་། །དགོས་འདོད་བསམ་པ་ཐམས་ཅད་འགྲུབ། །[ཅེས་དང་།] གཞན་ཡང་ཐུགས་བརྩེ་བའི་གསུང་
2-3-22a
མང་པོ་གནང་བ་རྣམས་ལ་དགྱེས་བཞིན། སླར་ཡང་སྐུ་དྲུང་དུ་ཡོང་བའི་དམ་བཅའ་ཕུལ་ནས་བོད་ལ་བྱོན་ནོ།། །།
༈ ཐོབ་ནས་སླར་བོད་དུ་བྱོན་ཚུལ
དེ་ནས་གསུམ་པ་དབང་དང་གདམས་ངག་སོགས་དམ་པའི་ཆོས་རྣམས་ཐོབ་ནས་སླར་བོད་དུ་བྱོན་ཚུལ་ནི། མར་པས་འཚོ་ཆས་རྣམས་རྫོགས་པ་དང་མཉམ་དུ་གཉོས་ཀྱི་ཆས་ཀྱང་ཟད་དེ། ཕན་ཚུན་དུས་བསྒྲིགས་ནས་ཚུར་ལམ་ཡང་ཡང་གཉོས་དང་སྡེབས་(བསྡེབས་)ནས་བྱོན་པ་ལས། གཉོས་ཀྱི་ཡིད་ལ། ངེད་གཉིས་གསེར་ང་མང་རུང་ཆོས་ཁོ་མཁས་རིགས་སུ་འདུག་སྙམ་པའི་ཕྲག་དོག་གི་བསམ་ངན་ཤར་ཏེ། གཉོས་ལ་གྲོགས་པཎྜི་ཏ་གཉིས། ཨ་ཙ་ར་གཅིག་དང་། གཞན་ཡང་ལམ་གྲོགས་འགའ་ཟུང་འདུག་པ་ལ་གཉོས་ཀྱི་དཔེ་ཆ་སོགས་ཆས་རྣམས་བསྐུར་འདུག །མར་པས་ཕྱག་དཔེའི་ཁྲེས་པོ་བྱས་བསྣམས་བྱོན་པས། གཉོས་ན་རེ། རང་རེ་ལོ་ཙྪ་བ་(ལོཙྪ་)ཆེན་པོ་ཁྲེས་པོ་ཁུར་བས་མི་འོང་བས། ཨ་ཙ་ར་འདི་ལ་བསྐུར་ཟེར་བ་སྟར་བསྐུར་བས། གཉོས་ཀྱིས་ཨ་ཙ་ར་ལ་ཕོ་བརྔན་(རྔན་)བྱིན་ནས། མར་པའི་དཔེ་ཆ་ཆུ་ལ་ཤོར་བ་ལྟར་གྱིས་ལ་བསྐུར་བྱས་ནས་ཁ་ལག་བསླབས་པ་བཞིན། ཨ་ཙ་རས་གྲུ་ཆུ་བོ་གངྒཱའི་དབུས་སུ་སླེབས་ཚེ། མར་པའི་ཕྱག་དཔེ་ཆུ་ལ་བསྐུར་བ་ལས། གཉོས་ཀྱིས་བྱས་པ་མཁྱེན་
2-3-22b
ཅིང་། བོད་དུ་གསེར་འཚོལ་བའི་དཀའ་ལས། རྒྱ་གར་དུ་བླ་མ་འཚོལ་བའི་དཀའ་ལས། ཆོས་དང་གདམས་པ་དེ་འདྲ་གཞན་ལ་དཀོན་པས། མེད་པར་སོང་བས། ཆུ་ལ་ལྕེབ་བམ་ལྕེབ་བམ་སྙམ་པའི་ཐུགས་ལད་ཆེན་པོ་བྱུང་ཚེ། བླ་མའི་གདམས་ངག་དྲན་ནས་ཐུགས་ལས་ཅུང་ཟད་ཆུང་བར་གྱུར་ཅིང་། གཉོས་ལ་ངན་ལན་བྱེད་པའི་ཐུགས་འདུན་མ་ཤར་རུང་། འདི་ཁྱོད་ཀྱིས་བྱས་པ་ཡིན་སྨྲས་པས། མ་བྱས་ཟེར། གྲུ་ཐོན་ཕྲལ་ཨ་ཙ་ར་བཟུང་ནས་རྒྱལ་པོ་ལ་ཞུ་བྱས་པས། ཨ་ཙ་རས་གཉོས་ཀྱིས་བསླབ་ཚུལ་རྣམས་རྒྱས་པར་བཤད་བྱུང་བས། ཐུགས་ལ་ཤར་བ་ལྟར་གཉོས་ལ་ཁྲེལ་འདེབས་ཀྱི་མགུར་འདི་གསུངས་སོ།། །།གསོན་དང་ལས་ཀྱིས་བསྡེབས་པའི་གྲོགས། །མཐུན་ནས་མཉམ་དུ་འགྲོགས་པའི་མི། །སྤྱིར་གྱི་ཆོས་སྒོར་ཞུགས་པ་དང་། །ཁྱད་པར་ལོ་པཎ་བླ་མར་གྲགས། །བསམ་ལོག་གཅིག་ཏུ་གྲུར་ཞུགས་ལ། །ཕན་འདོགས་ནུས་པ་མ་ཐོན་རུང་། །སྤྱིར་གྱི་གནོད་བྱེད་མི་རིགས་ཤིང་། །ཁྱད་པར་སངས་རྒྱས་བསྟན་པ་དང་། །བདག་དང་སེམས་ཅན་ཐམས་ཅད་ལ། །གནོད་པ་འདི་འདྲ་ག་ལ་རིགས། །ཉོན་མོངས་དུག་ལྔའི་བསམ་སྦྱོར་གྱིས། །མི་བདག་གི་དཔེ་དང་ལྷན་ཅིག་ཏུ། །མི་ཁྱོད་ཀྱིས་
2-3-23a
བསྒྲུབ་པའི་སྙན་གྲགས་དང་། །གསེར་དང་དམ་ཆོས་ཆུ་ལ་ཕོ། །ང་རང་མཐོང་ཆེ་མ་ཡིན་ཏེ། །གཞན་ལ་དཀོན་པའི་ཁྱད་ཆོས་དགའ། །གཞན་ཕན་མེད་པས་བློ་མ་བདེ། །འོན་ཀྱང་ནན་ཏན་ཞུ་དག་གིས། །ཆོས་དང་རང་གི་སེམས་རྒྱུད་འདྲེས། །ཚིག་དོན་མ་བརྗེད་ཝལ་ལེར་བདོག །སླར་ཡང་རྒྱ་གར་ཡུལ་དུ་ཡོང་། །པཎ་ཆེན་ནཱ་རོ་ལ་སོགས་པའི། །གྲུབ་ཐོབ་རྣམས་ལས་ཞུས་པས་ཆོག །མི་ཁྱེད་རང་དེང་ནས་བླ་མ་དང་། །ཆོས་བཤད་ལོ་ཙྪའི་(ལོཙྪའི་)ཁུར་བོར་ལ། །གནོང་འགྱོད་དང་བཅས་ཡུལ་ལ་བྱོན། །སྡིག་ལ་མཐོལ་བཤགས་དྲག་པོ་གྱིས། །བསམ་སྦྱོར་འདི་འདྲ་བྱེད་བཞིན་དུ། །བླ་མའི་རློམ་སེམས་བྱས་ལགས་ཀྱང་། །བླུན་པོ་འགའ་ཡི་མགོ་སྐོར་ལས། །སྐལ་ལྡན་སྨིན་གྲོལ་ག་ལ་འབྱུང་། །མི་ལུས་རིན་ཆེན་རྙེད་དཀའ་འདིས། །ངན་སོང་གསུམ་པོ་བསྒྲུབ་མི་འཚལ། །ཅེས་དེ་སྐད་གསུངས་པས། གཉོས་ན་རེ། ད་སེམས་ལས་མ་བྱེད་པར། ངའི་དཔེ་ཆ་མ་ཕྱིར་གཡར་ནས་བྲིས་པས་ཆོག་ཟེར་བས། ཁྱོད་ཀྱི་མ་ཕྱི་ཨེ་གཡར་ཡང་མི་ཤེས། གཡར་རུང་ཁྱོད་དང་ང་བླ་མ་དང་གདམས་ངག་མ་གཅིག་པས་ཕན་ཡང་མི་ཐོགས། ཁྱོད་ཀྱི་དཔེ་ཆ་བས་ང་རང་གི་བློ་ལ་ཡོད་པ་
2-3-23b
རྣམས་དགའ་སྟེ། འོན་ཀྱང་རྒྱ་གར་དུ་མྱུར་དུ་སླེབས་པ་ཞིག་བྱེད་དགོངས་པ་ཐུགས་ལ་ཤར་ཞིང་། ཞལ་ནས། དེ་ཀ་བྱེད་པས་མ་ཕྱི་གཡོར་ཞིག་གསུངས་སོ། །དེ་ནས་བལ་པོར་ཕེབས་པ་དང་། གཉོས་དང་བསྡེབས་རུང་སྡིག་གསོག་པ་འདུག་དགོངས་ནས་མི་འགྲོ་བའི་ལོ་རྒྱུས་བྱས་པས། གྱེས་འགྲོ་ཁར། གཉོས་ན་རེ། འོ་ན་དཔེ་ཆ་ཆུ་ལ་ཤོར་བའི་གཏམ་གང་དུ་སུ་ལའང་མ་གཏོང་བར་ངའི་སར་དཔེ་ཆ་འབྲི་བར་ཤོག་ཟེར་བ་ལྟར་གྱི་ཆད་མདོ་བྱས་ནས། གཉོས་རང་བལ་པོ་ནས་སྔོན་དུ་སོང་བ་ལ་བལ་བོད་མཚམས་སུ་སླེབ་པ་དང་། བསུ་མི་ཤོག་བྱས་ལན་བསྐུར་བས་འཕྲོད་དེ། བསུ་མི་དང་བཅས་ཁ་རག་ཏུ་སླེབ་པར་གདའ། མར་པས་བླ་མ་སྤྱི་ཐེར་བ་དང་མཇལ་བས་གྲོགས་ཧ་དུ་དཀར་པོས་དབུ་མཛད་པའི་མཆེད་གྲོགས་རྣམས་ཀྱིས་མར་པ་ལ་སྣེ་ལེན་བཟང་པོ་ཡང་དག་པ་བྱས་ཏེ། ད་རེས་གཉོས་ཀྱིས་ཁྱེད་ལ་ཕྲག་དོག་བྱས་དཔེ་ཆ་ཆུ་ལ་འཕོ་དུས། ཐུགས་སྤྲོ་མ་ལངས་པར་ཁོང་ལ་དབྱངས་གསུངས་པ་ཐོས་པས་ངོ་མཚར་ཆེ། དེ་ལྟ་བུའི་ཐུགས་དམ་གྱི་ཐོག་ཏུ་ཁེལ་བ་དེ་ལྟ་བ་བཟང་པོ་ཕྱིན་ཅི་མ་ལོག་པ་འཁྲུངས་པའི་རྟགས་ཡིན་པས། ལྟ་བ་མཐར་ཕྱིན་པ་གཞུང་གི་ཚིག་ལ་མ་བརྟེན་པར་ཁྱེད་རང་གི་ཐུགས་ལ་
2-3-24a
འཁྲུངས་པའི་མགུར་ཅིག་གསུང་བར་འཚལ་ཞུས་པ་ལ་འདི་གསུངས་སོ།། །།འདྲེན་པའི་བླ་མ་དམ་པ་དང་། །ཧ་དུ་དཀར་པོས་དབུ་མཛད་པའི། །ཁྱོད་མདོ་སྔགས་ཀྱི་སློབ་གཉེར་ཚང་བ་རྣམས། །ཡུད་ཙམ་ཞིག་བོད་ཀྱི་གླུ་ལ་ཉོན། །མཐར་ཐུག་གི་ལྟ་བ་ཁྱད་པར་ཅན། །ཟུང་འཇུག་རབ་ཏུ་མི་གནས་པ། །དུས་གསུམ་རྒྱལ་བའི་དགོངས་པ་ཡིན། །ཐབས་ཤེས་ཡ་བྲལ་འདོད་པ་གང་། །མཐའ་རུ་ལྷུང་བས་དགག་བྱའི་ཕྱི། །ཁྱེད་མཁྱེན་པའི་དྲུང་དུ་བརྗོད་དཀའ་ཡང་། །དབྱངས་སྔོན་ཆད་མ་བླངས་གདུགས་པར་འགྲོ། །བསྟན་ཆོས་དབྱངས་སུ་བླང་གི་གསན། །དངོས་པོར་འཛིན་པ་དགག་བྱའི་ཕྱིར། །བདུད་སྡེ་བཅོམ་པས་མེད་ཅེས་གསུངས། །དོན་དེ་འདྲ་བཞིན་དུ་གཟུང་བས་བསྒྲིབས། །འཁོར་མང་ཡོན་ཏན་འབྱུང་བའི་དཔལ། །ཁྱད་པར་ཐབས་ནི་གྱུར་པ་སྤངས། །རྨོངས་པ་སྟོང་པ་ཆད་པར་འདོད། །དགེ་ཚོགས་སུན་འབྱིན་ཆད་པའི་མཐའ། །ནམ་མཁའི་མེ་ཏོག་ཞེན་པ་རྣམས། །དཀར་པོའི་ལོ་ཏོག་འཇོམས་པ་ཡི། །སེར་བ་ལོག་པའི་ལྟ་བ་ཡིན། །ནམ་མཁའི་མཚན་ཉིད་ཤེས་པར་གྱིས། །སྟོང་པ་མི་ཤེས་སྐྱེས་བུ་ཀུན། །མེད་ལ་ཡོད་པར་སྒྲ་(སྒྲོ་)ཡིས་བཏགས། །ལོག་པ་མིག་(སྨིག་)རྒྱུ་ཆུ་འཛིན་
2-3-24b
ཅིང་། །དོན་ལ་རྨོངས་པ་འཁོར་བའི་རྒྱུ། །སེམས་ཙམ་མུ་སྟེགས་གྲངས་ཅན་སོགས། །ཐབས་དང་ཤེས་རབ་ཡ་བྲལ་འདོད། །སོ་སོ་རང་རང་གྲུབ་མཐའ་ཡང་། །ཤིང་སྐམ་མེ་ཏོག་འདོད་དང་མཚུངས། །ཁས་ལེན་ཐམས་ཅད་བྲལ་བ་ཡི། །དོན་དེ་རབ་ཏུ་མི་གནས་པའི། །རབ་ཏུ་ཤེས་པ་ཤེས་ཕྱིན་ཏེ། །མི་གནས་སྲིད་དང་ཞི་བའི་མཐའ། །སྙིང་རྗེ་སྟོང་པའི་སྙིང་པོ་ཅན། །ཐབས་དང་ཤེས་རབ་ཟུང་དུ་འཇུག །དེ་ནི་རང་འབྱུང་ལྷན་ཅིག་སྐྱེས། །ཇི་ལྟར་བདེ་དང་སྟོང་པ་དང་། །རིགས་པ་དང་ནི་སྟོང་པ་ཉིད། །ཐ་དད་མེད་པར་བདག་གིས་གོ །དམིགས་པ་མེད་པའི་སྙིང་རྗེ་དང་། །གདོད་ནས་རང་བཞིན་སྟོང་པ་ཉིད། །དབྱེར་མེད་རང་བཞིན་སྤྲོས་བྲལ་དུ། །ཆོས་རྣམས་དེ་ལྟར་གོ་བར་མཛོད། །ལྟ་བས་མཚོན་པའི་ཚིག་ཙམ་དུ། །ཞེན་པའི་ཕུལ་དུ་བདག་གིར་མཛོད། །འཇིག་རྟེན་པ་ཡི་ལྟ་བ་དེ། །རྒྱུ་འབྲས་ལས་ལ་ཡིད་ཆེས་བྱས། །བསྐལ་པ་བརྒྱར་ཡང་ཆུད་མི་ཟ། །མཁྱེན་པ་མཆོག་གིས་དེ་སྐད་གསུང་། །མི་གང་སྙིང་རྗེ་མེད་པ་རྣམས། །ཏིལ་འབྲས་མེ་ཡིས་ཚིག་པ་ལ། །དེ་ལ་འབྲས་བུ་ག་ལ་འབྱུང་། །གཞི་མེད་ཁྱད་པར་ག་ལ་ཡོད། །དེ་ལ་ཐེག་ཆེན་ཡོད་མ་ཡིན། །མཁྱེན་རབ་ན་ག་རྫུ་ནས་གསུངས། །དམིགས་ཡུལ་
2-3-25a
ལྟ་བ་མ་མཆིས་ན། །དམ་ཆོས་གནང་བ་དོན་མེད་ཡིན། །སྦུན་པ་འབྲས་བུ་མེད་དང་མཚུངས། །དེ་སྐད་མར་པ་ལོ་ཙྪ་(ལོཙྪ་)ཟེར། །ཁྱེད་མཁྱེན་པའི་དོན་ལ་ཐུགས་རྒྱས་རྣམས། །དོན་གོ་བར་གདའ་ན་བཟོད་པར་གསོལ། །ཞེས་པ་དེ་གསུངས་པས། བླ་མ་བལ་པོ་པ་དང་། གྲོགས་ཧ་དུ་དཀར་པོ་ལ་སོགས་པ་རྣམས་དགྱེས་པར་གདའོ། །དེ་ནས་མར་པ་བོད་ལ་ཆས་བྱོན་པ་ལས། ལི་ཤོ་ཀ་ར་ཞེས་བྱ་བ་བལ་བོད་མཚམས་ཀྱི་གྲོང་ཁྱེར་ཤོ་གམ་མང་པོ་ལེན་པ་ཞིག་ཡོད་པ་དེར་ཞག་ཤས་བཞུགས་དགོས་བྱུང་བ་ལས་ནུབ་ཐ་མའི་རྨི་ལམ་དུ་མཁའ་འགྲོས་རྡོ་ལི་ལ་བཏེགས་ནས་ལྷོ་ཕྱོགས་དཔལ་གྱི་རི་ལ་བྱོན་པས་བྲམ་ཟེ་ཆེན་པོ་ས་ར་ཧ་དང་མཇལ་ཏེ་ལུས་ངག་ཡིད་གསུམ་བྱིན་གྱིས་བརླབས་པས་སྙིང་པོ་དོན་གྱི་ཆོས་ཕྱག་རྒྱ་ཆེན་པོའི་བརྡ་དོན་རྣམས་གནང་བས་སྐུ་ལ་ཟག་མེད་ཀྱི་བདེ་བ་དང་ཐུགས་ལ་ཕྱིན་ཅི་མ་ལོག་པའི་རྟོགས་པ་ཤར་བས་དགའ་སྤྲོ་དཔག་ཏུ་མེད་པ་ཞིག་རྨིས་པ་ལས། མནལ་སད་ནས་གསུང་རྣམས་མ་བརྗེད་པར་འདུག་སྟེ། གླང་པོ་མཁར་དུ་ཟླ་བ་གཉིས་ཙམ་ཆོས་གསུངས་ཤིང་བཞུགས་པས། གཙང་གྱེར་ཕུའི་ཀློག་སྐྱ་ཇོ་སྲས་སྐུ་གཤེགས་ནས་གདན་ས་འཛིན་
2-3-25b
པའི་སྲས་པོ་ཆེ་བས་གསན་ཏེ་སྐྱིད་དྲུང་དུ་སྤྱན་འདྲེན་མི་བཏང་བར་འབྱོན་པར་ཞལ་གྱིས་བཞེས། དུས་བཏབ་ནས་བཏང་བས་དཔལ་ཁུད་ཀྱི་ལྷ་མཚོ་སྲིན་མཚོ་ནས་བསུ་བ་དང་བཅས། གྱེར་ཕུར་གདན་ཕེབས་པས་སྣ་ལེན་བཟང་པོ་བྱས། ཟླ་བ་གཅིག་གི་བར་དུ་ཆོས་གྲྭ་ཆེན་པོ་བཙུགས། ཟླ་བ་ཡར་གྱི་ངོའི་ཚེས་བཅུའི་ཉིན་དཔའ་བོ་དགའ་སྟོན་གྱི་ཚོགས་འཁོར་བསྐོར་བའི་གྲལ་དུ། ཇོ་སྲས་ཀྱི་བླ་མ་མར་པ་ལ། བླ་མ་ཁྱེད་ལ་ངེད་ཡབ་སྲས་ཀྱིས་སྔར་ཡང་སྣ་ལེན་བཟང་པོ་བྱས་པ་ལགས། ད་ཡང་བགྱིད་པ་ལགས་པས། དེ་རིང་ཚོགས་གྲལ་འདིར་སྔོན་ཆད་ཚིག་ཏུ་མ་བརྗོད་ཅིང་། ཚིག་དང་དོན་དུ་འདྲིལ་བའི་དབྱངས་ཤིག་གསུངས་འཚལ་ཞུས་པས། ཁོ་བོས་ཁ་སེང་དཔྱིད་ཀ་བལ་པོ་མཐིལ་ནས་ཡར་གྲོ་ལམ་ཅིག་ཡོད་པའི་ས་ན་ལི་ཤོ་ཀ་ར་བྱ་བ་མཐའ་འཁོབ་ཀྱི་གྲོང་ཁྱེར་ཤོ་གམ་ལེན་པ་ཞིག་འདུག་པ་དེར་ཁོ་བོས་ཞག་འགའ་བསྡད་པས། ནུབ་གཅིག་གི་རྨི་ལམ་ན་རིགས་ཀྱི་མཚན་ལྡན་མ་བྲམ་ཟེའི་བུ་མོའི་ཆ་བྱད་དུ་བྱས་ནས། ཁོ་བོ་ལ་ལྷོ་ཕྱོགས་དཔལ་གྱི་རི་ལ་འདོང་ཟེར་ནས་ཁྲིད་དེ། རྗེ་བྲམ་ཟེ་ཆེན་པོ་དང་དངོས་སུ་མཇལ་བའི་རྨི་ལམ་བྱུང་། དེའི་དུས་ཡིད་ལ་མི་བྱེད་པ་སྙིང་པོའི་དོན་བྲམ་ཟེ་ཆེན་པོའི་ཞལ་ནས། 
2-3-26a
འདི་ལྟ་བུ་ཐོས་གསུངས་ཏེ། ལྟ་བ་ཁྱུང་ཆེན་གྱི་གཤོག་རྒྱངས་ལྡིང་བའི་སྐད་ལ་རྟ་དྲངས་ཏེ་སེམས་གནད་དུ་བསྣུན་པ་དོ་ཧ་རྡོ་རྗེའི་མགུར་ཆེན་འདི་གསུངས་པ་ལགས་སོ།། །།དཔལ་དེ་རིང་བཀྲ་ཤིས་ཡར་གྱི་ངོ་། །དུས་ཁྱད་པར་ཅན་གྱི་ཚེས་བཅུ་ལ། །དཔའ་བོ་དགའ་སྟོན་གྱི་ཚོགས་གྲལ་དུ། །བུ་འགྱུར་བ་མེད་པའི་དམ་ཚིག་ཅན། །ཁྱེད་ཀློག་སྐྱ་ཇོ་སྲས་ཞུ་འབུལ་བ། །སྔར་མ་ཐོས་པ་ཡི་གླུ་ལོང་སྐད། །ང་བཤུལ་རིངས་ལམ་ལ་གཤར་བ་དེས། །ལུས་ངལ་དུབ་དབང་དུ་སོང་བའི་ཕྱིར། །གླུ་ཡིད་འཕྲོག་སྙན་པོ་མ་མཆིས་ཤིང་། །ཚིག་སྡེབ་སྦྱོར་མཁས་པོ་མི་ཤེས་ཀྱང་། །གྲོགས་ཁྱེད་བས་ངོ་ཆེ་མེད་པའི་ཕྱིར། །ངོ་ཆེ་བའི་དཔྲལ་བ་མི་ལྡོག་པས། །དོན་སྔར་མ་ཐོས་པའི་ཡ་མཚན་ཅན། །བྲམ་ཟེའི་བཞེད་དགོངས་གླུར་ལེན་པས། །ཁྱེད་གདན་གང་ཞུགས་པའི་མདོ་སྔགས་རྣམས། །སྙན་ལྷན་ནེར་གསན་ལ་ཐུགས་དགོངས་འཚལ། །དུས་ཁ་སང་དཔྱིད་ཟླ་ཐ་ཆུང་ལ། །གཞི་བལ་པོའི་མཐིལ་ནས་ཡར་འཕགས་པའི། །གདུགས་འགྲོ་ལམ་མཆིས་ཀྱི་ཤུལ་ཁ་ན། །བལ་པོ་ལིང་གི་ཤོ་གམ་རི། །གདོལ་པ་ཅན་གྱི་གྲོང་ཁྱེར་དུ། །མི་བརྡ་མི་འཇལ་གྱི་ཤོ་གམ་པས། །མགྲོན་ཁ་ཞན་པོ་ཡི་བོད་
2-3-26b
རྣམས་བསྐྱིལ། །མི་ངས་ཀྱང་དབང་མེད་ཞག་འགའ་བསྡད། །དགུང་ནུབ་གཅིག་ཐམ་ཐུམ་རྨི་ལམ་ན། །རིགས་ཀྱི་མཚན་ལྡན་ཚངས་སྐུད་ཅན། །བྲམ་ཟེའི་བུ་མོ་མཛེས་མ་གཉིས། །ཅུང་ཟད་འཛུམ་ཞིང་ཟུར་མིག་བལྟ། །མི་ཁོ་བོའི་དྲུང་དུ་འོངས་ནས་ཀྱང་། །ལྷོ་དཔལ་གྱི་རི་ལ་འགྲོ་དོགས་སྐད། །ཁོ་བོས་སྔོན་ཆད་ཕྱིན་མ་མྱོང་། །རྒྱུས་མེད་ལམ་ཡང་མི་ཤེས་སྨྲས། །བུ་མོ་གཉིས་ཀྱི་ཞལ་ན་རེ། །ཁྱེད་མིང་པོས་དཀའ་བ་སྤྱད་མི་དགོས། །ངེད་ཀྱི་ཕྲག་ལ་ཁུར་གྱིས་ཟེར། །འདོ་ལི་དར་ཀྱི་ལིང་ཁྲིར་བཅུག །གདུགས་བཞིན་མཁའ་ལ་བཏེག་ནས་ཀྱང་། །གློག་འགྱུ་སྐད་ཅིག་ཡུད་ཙམ་ལ། །ལྷོ་དཔལ་གྱི་རི་ལ་ཕྱིན་པ་རྨིས། །ཤིང་ཀླག་ཤ་ལྗོན་པའི་བསིལ་གྲིབ་ལ། །ཏི་ར་རོ་ཡི་གདན་སྟེང་ན། །རྗེ་བྲམ་ཟེ་ཆེན་པོ་ས་ར་ཧ། །ཞལ་སྔར་མ་མཐོང་བའི་གཟི་མདངས་ཅན། །བཙུན་མོ་གཉིས་ཀྱི་མཐའ་བསྟེན་ནས། །སྐུ་ལ་དུར་ཁྲོད་ཆས་ཀྱིས་བརྒྱན། །དགྱེས་པའི་ཞལ་རས་འཛུམ་མདངས་ཅན། །བུ་བདེ་བར་འོངས་སམ་ཞེས་ཀྱང་གསུངས། །རྗེ་མཐོང་བས་དགའ་བར་མ་བཟོད་པར། །ལུས་ཀྱི་སྤུ་གཡོས་མཆི་མ་འཁྲུགས། །ལན་བདུན་བསྐོར་ཞིང་བརྐྱང་ཕྱག་བཙལ། །ཞབས་མཐིལ་སྤྱི་བོར་བླངས་ནས་ཀྱང་། །ཕ་
2-3-27a
ཐུགས་རྗེས་བཟུང་ཞེས་གསོལ་བཏབ་པས། །ལུས་ལ་སྐུ་ཡིས་བྱིན་བརླབས་པ། །ཕྱག་དབང་སྤྱི་བོར་རེག་ཙམ་གྱིས། །ལུས་ཟག་མེད་བདེ་བས་ར་རོ་བ། །གླང་ཆེན་ཆང་གིས་མྱོས་པ་བཞིན། །གཡོ་འགུལ་མེད་པའི་ཉམས་ཅིག་ཤར། །ངག་ལ་གསུང་གིས་བྱིན་བརླབས་པ། །སྟོང་ཉིད་སེང་གེའི་ང་རོ་ཡིས། །ཡི་གེ་མེད་པའི་དོན་གསུངས་པ། །ལྐུགས་པར་རྨི་ལམ་རྨིས་པ་བཞིན། །བརྗོད་དུ་མེད་པའི་ཉམས་ཅིག་ཤར། །ཡིད་ལ་ཐུགས་ཀྱིས་བྱིན་བརླབས་པ། །ལྷན་ཅིག་སྐྱེས་པ་ཆོས་ཀྱི་སྐུ། །འགྲོ་འོང་མེད་པའི་དོན་རྟོགས་པས། །དུར་ཁྲོད་གནས་པའི་མི་རོ་བཞིན། །བསམ་དུ་མེད་པའི་ཉམས་ཤིག་ཤར། །དེ་རྗེས་བདེ་ཆེན་དག་པའི་གསུང་། །རིན་ཆེན་མགུར་གྱི་བུམ་པ་ནས། །ཚངས་པའི་དབྱངས་ཀྱི་བརྡ་སྐད་ཀྱིས། །སྤྲིན་བྲལ་ནམ་མཁའ་སྟོང་པའི་དོན། །གནས་ལུགས་མཚོན་པ་རྡོ་རྗེའི་མགུར། །སྐྱེ་མེད་རང་སྒྲ་འདི་སྐད་ཐོས། །ན་མོ་སྟོང་ཉིད་སྙིང་རྗེ་དབྱེར་མེད་པ། །རྒྱུན་ཆད་མེད་པ་གཉུག་མའི་སེམས། །གདོད་ནས་དག་པ་དེ་བཞིན་ཉིད། །ནམ་མཁས་ནམ་མཁའི་སྦྱོར་བ་མཐོང་། །རྩ་བ་ཁྱིམ་ན་གནས་པའི་ཕྱིར། །ཡིད་ཀྱི་རྣམ་ཤེས་བཙོན་དུ་བཟུང་། །སྒོམ་པ་ཤེས་པ་ཕྱི་མ་ཡིས། །སེམས་ལ་
2-3-27b
ལྷན་པ་གདབ་ཏུ་མེད། །སྣང་སྲིད་སེམས་ཀྱི་རང་བཞིན་ཤེས། །གཉེན་པོས་བཅོས་ཏེ་སྒོམ་དུ་མེད། །སེམས་ཀྱི་གནས་ལུགས་དྲན་དུ་མེད། །དེ་ཡང་མ་བཅོས་ངང་ལ་བཞག །དེ་དོན་མཐོང་ན་གྲོལ་བའི་ཕྱིར། །བུ་ཆུང་གདོལ་པའི་སྤྱོད་པར་ལྟོས། །ཤ་ཟ་སྨྱོན་པ་གང་དགར་ཐོངས། །སྙེམས་དང་བྲལ་བའི་སེང་གེ་བཞིན། །སེམས་ཀྱི་གླང་པོ་ཡན་དུ་ཆུག །བུང་བ་མེ་ཏོག་རྒྱུ་བ་ལྟོས། །འཁོར་བར་སྐྱོན་དུ་མི་ལྟ་བར། །མྱ་ངན་འདས་པ་ཐོབ་བྱར་མེད། །ཐ་མལ་ཤེས་པ་རང་ལུགས་དེ། །མ་བཅོས་སོ་མ་ཉིད་དུ་ཞོག །བྱ་བ་རྣམས་ལ་དཔྱོད་མ་རྟོགས། །ཕྱོགས་དང་ཆ་ལ་མི་གནས་ཤིང་། །སྤྲོས་བྲལ་ནམ་མཁའི་དཀྱིལ་དུ་ལྟོས། །ཆོས་ཟས་པར་འཁྱོལ་བ་སྙིང་པོའི་དོན། །ལྟ་བའི་ཡང་རྩེ་ཕྱག་རྒྱ་ཆེ། །སེམས་གནད་དུ་བསྣུན་པའི་བརྡ་དོན་ཞིག །བྲམ་ཟེ་ཆེན་པོའི་ཞལ་ནས་ཐོས། །སྐད་ཅིག་དེ་ལ་གཉིད་ཀྱང་སད། །དེ་མ་བརྗེད་དྲན་པའི་ལྕགས་ཀྱུས་ཟིན། །མ་རིག་གཉིད་ཀྱི་མུན་ཁུང་དུ། །རིག་པ་ཡེ་ཤེས་མཐོངས་ཕྱེ་ནས། །སྤྲིན་མེད་མཁའ་ལ་ཉི་ཤར་ལྟར། །འཁྲུལ་པའི་མུན་ནག་སངས་ནས་ཐལ། །དུས་གསུམ་སངས་རྒྱས་ཞལ་མཇལ་ཀྱང་། །ཕྱིན་ཆད་དྲི་རྒྱུ་མེད་དོ་སྙམས། །སེམས་ཁོ་ཐག་ཆོད་པའི་ཉམས་ཤིག་ཤར། །
2-3-28a
ཡིད་འགྱུ་བ་ཟད་པ་ངོ་མཚར་ཆེ། །ཨེ་མ་ཡི་དམ་མཁའ་འགྲོའི་ལུང་བསྟན་དང་། །བླ་མས་གསུངས་པ་ཟབ་མོའི་དོན། །ངག་སྨྲ་རུ་མི་བཏུབ་གསུངས་ན་ཡང་། །དགུང་དོ་ནུབ་མི་སྨྲའི་ཐབས་མ་བྱུང་། །དུས་ད་རེས་ཙམ་ཞིག་མ་གཏོགས་པ། །སྔོན་ཆད་ངག་ཏུ་བརྗོད་མ་མྱོང་། །ད་ཕྱིན་ཆད་བཟླས་སམ་རྣ་བས་ཉོན། །ད་སྔོན་ཆད་ཤུལ་རིང་རྒྱང་གི་མི། །མཛའ་བཤེས་གཉེན་མེད་གྲོགས་ཀྱང་མེད། །ལུས་ངལ་དུབ་བཀྲེས་པར་གྱུར་བའི་ཚེ། །བུ་ཁྱེད་ཀྱིས་གང་བྱས་སེམས་ལ་ཡོད། །དེ་མ་བརྗེད་སེམས་ལ་ཤིན་ཏུ་གཅགས། །དྲིན་འཁོར་བར་ཐལ་ལོ་སྙིང་གི་གྲོགས། །རྗེ་གོང་ན་བཞུགས་པའི་བླ་མ་དང་། །དངོས་གྲུབ་སྟེར་བའི་ཡི་དམ་ལྷ། །བར་ཆད་སེལ་བའི་ཆོས་སྐྱོང་རྣམས། །མི་བདག་ལ་བཀའ་བཀྱོན་མི་གནང་འཚལ། །དོན་འཁྲུལ་པར་གདའ་ན་བཟོད་པར་གསོལ། །ཞེས་པའི་མགུར་གསུངས་པ་དང་། ཀློག་སྐྱ་ཇོ་སྲས་ཀྱིས། བླ་མ་སངས་རྒྱས་དངོས་སུ་མཐོང་ངོ་། །དེ་ནས་རྗེ་མར་པས་ལྷོ་བྲག་ཏུ་འབྱོར་བའི་ཞར་ལ་ཕྱི་མོ་ཡོང་རིགས་སུ་མི་འདུག་ནའང་། ཚོད་ལྟར་རུང་དགོངས་ནས་ཁ་རག་ཏུ་གཉོས་ཀྱི་སར་བྱོན། དཔེ་ཆའི་ཕྱི་མོ་རྣམས་དགོས་གསུངས་པས། རྗེ་མར་པ་ལ་གཉོས་ཀྱི་
2-3-28b
གསེར་སྲང་གང་དང་མཎྜལ་ཅིག་ཕུལ་ནས། མ་ཧཱ་མ་ཡ་ལ་ཁྱེད་རང་འདྲིས་པར་འདུག་པས་དཔེ་མི་དགོས་པ་འདུག །ཁྱོད་ཀྱིས་མ་ཧཱ་མ་ཡ་སོགས་མ་རྒྱུད་ཀྱི་བདག་གྱིས་ལ་ཤོད། ངས་གསང་འདུས་སོགས་ཕ་རྒྱུད་ཀྱིས་བདག་བྱས་བཤད་ཀྱིས་ཟེར་ཕྱི་མ་མ་བྱུང་བས། རྒྱ་གར་ལ་མྱུར་དུ་འབྱོན་པའི་ཐུགས་འདུན་དྲག་པོ་དང་བཅས་ལྷོ་བྲག་ཏུ་ཕེབས་པ་ལས་ཡབ་ཡུམ་གཉིས་ནི་སྐུ་གཤེགས་འདུག །སློབ་དཔོན་དང་ཇོ་བོ་ཆེན་པོ་རྣམས་ཀྱིས་སྣ་ལེན་བཟང་པོ་བྱས། སྔར་སློབ་འབངས་སུ་སོང་བས་ཆོས་ནི་མ་ཞུས་ཏེ། ཆོས་མཐོང་ཆེན་པོ་བྱས། དེའི་སྟོབས་ཀྱིས་ཉེ་འཁོར་གྱི་ཡུལ་པས་ཀྱང་ཆོས་ཞུ་བ་དང་ཕྱག་འཚལ་མཁན་ནི་མེད། །ཞེ་ས་མཐོང་ཆ་འཇོག་ནི་དགའ་རབ་བྱས། ལྷོ་བྲག་གི་ཐག་རིང་ས་ནས་ཆོས་དབང་ཞུ་བ་ཡང་འགའ་རེ་བྱུང་ཞིང་། ཕྱག་དང་འབུལ་བ་ཕྲན་ཚེགས་བྱེད་པ་མང་དག་བྱུང་བར་གྱུར་ཏོ། །རྒྱ་གར་ལ་འབྱོན་ཐེངས་དང་པོའོ།། །།
༄། །རྒྱ་གར་ལ་འབྱོན་ཐེངས་གཉིས་པ།
༈ གསེར་འཚོལ་དུ་བྱོན་ཞིང་བུ་སློབ་རྣམས་དང་མཇལ་ཚུལ།
བར་པ་ལ་ཡང་སྔ་མ་ལྟར་དོན་གསུམ་ལས། དང་པོ་གསེར་འཚོལ་དུ་བྱོན་ཞིང་བུ་སློབ་རྣམས་དང་མཇལ་ཚུལ་ནི། གསེར་ཚོལ་བའི་ཕྱག་ཕྱི་ལ་འཁྲིད་དགོངས་ནས། ལྷོ་བྲག་གི་བན་བཙུན་ཆོས་ཞུས་པ་འགའ་ལ་ཆོ་ག་ཚིག་དོན་ལག་ལེན་དང་བཅས་
2-3-29a
པ་བསླབས་པ་རྣམས་ཞབས་ཏོག་ལ་འཁྲིད། དབང་རྫས་དང་མཆོད་ཆ་བཟང་པོ་བསྣམས། ཆིབས་པ་གཅིག་མཇལ་ནས་ཆིབས་བྱོན་ཏེ། དབུས་ཀྱི་གཙང་པོའི་ལྷོར་ཕེབས་ནས་ཆུ་ཁ་ཞིག་ཏུ་གསོལ་མཛད་ཅིང་བཞུགས་པར་སྔགས་བཙུན་དཔོན་སློབ་ཀྱི་རྣམ་པ་ཅན་གཉིས་བྱུང་བའི་དྲག་པ་དེ་ན་རེ། དྲུང་པ་རྣམས་གང་ནས་ཕེབས། གང་དུ་འབྱོན་ཟེར་བས། གྲྭ་པ་རྣམས་ཀྱི་ནང་ནས་སྨྲ་མཁས་པ་ཞིག་ཡོད་པ་དེས། དྲུང་པས་གསན་ལས་ཆེ་རྗེའི་ཞལ་སྔ་ནས། རྒྱ་གར་གྱི་མཁས་གྲུབ་ནཱ་རོ་པཎ་ཆེན་གྱི་དངོས་སློབ་སྒྲ་བསྒྱུར་མར་པ་ལོ་ཙྪ་(ལོཙྪ་)ཞེས་བྱ་བའི་བླ་མ་དེ་ཡིན། ངེད་དཔོན་སློབ་སྐལ་ལྡན་ལས་འཕྲོ་ཅན་རྣམས་སྨིན་གྲོལ་ལ་འགོད་པ་དང་། སྐལ་མེད་རྣམས་ལ་ཡང་རྣམ་དཀར་གྱི་ལས་འབྲེལ་འཇོག་པའི་ཕྱིར་དང་། སླར་ཡང་བསྟན་པ་དང་སེམས་ཅན་གྱི་དོན་དུ་རྒྱ་གར་ལ་འབྱོན་པའི་ཡོ་བྱད་གསེར་གྱི་འབུལ་སྡུད་ལ་འབྱོན་པ་ཡིན། ཞེས་སོགས་ལོ་རྒྱུས་ཞིབ་པར་བྱས་པས། དེ་ན་རེ། འོ་ན་བླ་མའི་སྙན་པ་སྔར་ནས་ཐོས་ཤིང་མཇལ་ན་སྙམ་པ་ཡོད་པས་དོ་ནུབ་ངའི་སར་འབྱོན་པར་ཞུ་ཞེས་གདན་དྲངས་ནས། གཞུང་རི་བོ་ཁྱུང་ལྡིང་གི་དགོན་པར་ཕེབས་ཏེ། སྔགས་བཙུན་དེ། བུ་
2-3-29b
སློབ་རྣམས་ཀྱི་ནང་ནས་ཐོག་མར་ཆེ་ཞིང་མཇལ་བ་གཞུང་གི་རྔོག་སྟོན་ཆོས་རྡོར་ཡིན་ནོ། །དེར་གཞུང་དུ་སྣ་ལེན་དང་ཞབས་ཏོག་བཟང་པོ་བྱས། ཆོས་ཞུ་བའི་གསོལ་བ་འདེབས་སུ་བྱུང་བ་ལ། བཅོམ་ལྡན་འདས་དགྱེས་པ་རྡོ་རྗེ་མཚོ་སྐྱེས་རྡོ་རྗེའི་ལུགས་སུ་དབང་བསྐུར་སྒྲུབ་ཐབས་གནང་བ་ལ། ན་བཟའ་བཟང་པོ་ལ་སོགས་པའི་འབུལ་བ་མང་པོ་བྱས། གཞན་ཡང་ཁོང་རང་གི་སློབ་མ་དང་། ཡོན་བདག་མང་པོ་ལ་ཆོས་ཞུས་བྱས་ཤིང་བསྐུལ། བླ་མ་ལ་གསོལ་བ་བཏབ་ནས་དབང་བསྐུར། ཟླ་བ་གཉིས་ཆོས་བཤད་པས་འབུལ་བ་མང་པོ་བྱུང་ཞིང་སྙན་གྲགས་འཕེལ་བར་གྱུར། དེ་ནས་འཕན་ཡུལ་གྱི་སྲས་ས་དམར་བྱ་བར་བཞུགས། ཀྲི་ཡའི་སྒོ་ནས་སྲིའུ་དགུ་ཙམ་གསོས་ཤིང་། སྲིའུ་རེ་ལ་གསེར་ཞོ་བཅུ་གཅིག་རེ་བླངས། ལྷ་མོ་རེ་མ་ཏིའི་རྗེས་གནང་དང་ལས་ཚོགས་རེ་ཙམ་ཡང་བྱས་ཤིང་བསླབས། ཆོས་ཐུན་རེ་ཙམ་ཡང་བཤད་པས་ཐམས་ཅད་ཤིན་ཏུ་མོས་པར་བྱུང་ངོ་། །དེར་མི་མང་པོ་ལ་དགྱེས་པ་རྡོ་རྗེའི་དབང་བསྐུར་ཚེ་བྱང་འདམ་ཤོད་སྙིང་དྲུང་གི་མར་པ་མགོ་ལེགས་ཀྱིས་བོད་དུ་ཚོང་ལ་ཡོངས་བ་དུས་མཚུངས་ནས། སྒང་རྒྱུད་ན་མི་མང་པོ་ལོང་ལོང་འདུག་པ་ལ་སུ་ཅི་བྱེད་པ་ཡིན་དྲིས་པས། རྗེ་ནཱ་རོ་པའི་སློབ་མ་མར་པ་ལོ་ཙཱ་(ལོཙྪ་)བྱ་བས་
2-3-30a
མི་རྣམས་ལ་དབང་བསྐུར་བའི་ཚོགས་འཁོར་བྱེད་པར་འདུག་ཟེར་བས། མར་པ་མགོ་ལེགས་ཀྱི་བསམ་པ་ལ་ང་དང་རུས་པའི་ཕ་ཚན་དུ་ཡང་འགྲོ་བ་འདུག་ཅིང་། བླ་མ་བཟང་པོ་ཞིག་འདུག་ན། ང་རང་ཡང་ཆོས་ཤིག་ཞུ་དགོས་སྙམ་ནས་ཤ་ཁོག་གཉིས་དང་། ཚྭ་ཡ་གཅིག་ཕུལ་ནས་གླེང་མོལ་འདྲ་བྱས་པས་མགོ་ལེགས་དད་པ་སྐྱེས་ཏེ་ཡིད་ལ་བླ་མ་འདི་ང་རང་གི་སར་སྤྱན་དྲངས་དགོས་པ་འདུག་སྙམ་ནས། ཁྱེད་རྒྱ་གར་དུ་བླ་མ་རྣམས་ལ་འབུལ་བའི་གསེར་ཚོལ་ན། འཕན་ཡུལ་ནས་གསེར་མི་རྙེད། ཁ་གཏམ་ལ་ཡང་། འཕན་ཡུལ་སྐྱ་མོ་ན། བྱེའུ་ལ་ལྷུ་ཐང་རྩི་(བརྩི།) བྱང་ཁ་སྣ་བརྒྱད་ན་འབྲོང་བུ་ལ་གཟུགས་ཐང་ཙི་(བརྩི་)བྱ་བ་ཡིན། འཕན་ཡུལ་བ་ནི་མི་ངན། དད་པ་ཆུང་། ས་རྩྭ། མགོ་མཁྲེགས། བྱང་ལ་ང་ཅན་དུ་གཤེགས་དང་། འགྲོ་ན་རྟ་ཞོན། བེར་གྱོན། སྡོད་ན་འབོལ་བཏིང་། ཤ་མར་ཐུད་གསུམ་ཟོས་པས་ཆོག་ཟེར་བ་ལ། འོ་ན་ཁྱེད་ཅན་དུ་འགྲོ་དགོས་གསུངས་པས། མགོ་ལེགས་ཀྱིས་ངེད་ཀྱི་གདན་འདྲེན་ཅིག་བྱུང་བ་དང་བྱོན་ཟེར། ཚོང་རྣམས་བྲིན་པ་དང་བྱང་ལ་སོང་ནས་ངེད་ཀྱི་བླ་མ་ཆིབས་པའི་རྟ། ཆས་འགེལ་བའི་མཛོ། ན་བཟའ་ལམ་རྒྱགས་དང་བཅས་པ་བསྐུར་
2-3-30b
ནས་སྔོན་ལ་བསུ་རུ་བཏང་བས་འབྱོན་པའི་སྐད་ཐོས་ཏེ། མགོ་ལེགས་རང་གིས་ཀྱང་རྟ་ཞོན་ནས་བསུ་རུ་ཕྱིན་པས་འདམ་གྱི་ཚུལ་ས་སྣ་རུ་བླ་མ་དང་མཇལ་བའི་ཚེ། མགོ་ལེགས་རང་གིས་ཕུལ་བའི་ན་བཟའ་སོ་མ་འགའ་རེ་བཞག་ནས། རྙིང་པ་འགའ་ཞིག་ཀྱང་གསོལ་འདུག་པ་ལ། ངེད་བྱང་སྦྲ་ཁྱིམ་པ་བྱ་བ་ཕྱི་འཆོར་ཆེ་བ་ཡིན་པས་ན་བཟའ་ཧྲུལ་པོ་དེ་རྣམས་བོར་ལ་སོ་མ་རྣམས་བཞེས་ཞུས་པས། སྤྱིར་གྱི་རང་ནོར་ལ་འདྲེས་མི་གནོད་བྱ་བ་ཡིན་ཞིང་། ཁྱད་པར་ངའི་གོས་འདི་རྣམས་ལ་དཔལ་ནཱ་རོ་ཆེན་པོས་བྱིན་རླབས་མཛད་པས་བོར་ན་ཕངས་ཤིང་ལྷོ་བྲག་ཏུ་སླེབས་པ་བྱེད་གསུངས། སྣོད་དུ་བཅུག་ནས་བསྣམས་བྱོན། ཁྱོད་དགའ་བ་ཡང་བྱེད་གསུངས་ནས་རྔོག་གིས་ཕུལ་བ་དང་། མགོ་ལེགས་རང་གིས་ཕུལ་བའི་ན་བཟའ་སོ་མ་རྣམས་བཞེས། མགོ་ལེགས་རང་གི་འོག་རྟ་ཆིབས་སུ་ཕུལ་ནས་འབྱོན་པའི་ལམ་བར་ལ། མགོ་ལེགས་ཀྱི་ཡིད་ལ་ངས་ཕུལ་བ་མ་ཟད། ན་བཟའ་སོ་མ་གཞན་ཡང་འགའ་འདུག་པ་ལ་མི་བཞེས་པ་འདི། ཕྱག་རྫས་ལ་སྲེད་པོ་རང་ཡོད་རིགས་སུ་འདུག་པས། སྤྱིར་གྱིས་སྐྱེས་བུ་དམ་པའི་མཛད་སྤྱོད་ཀྱི་ཕུགས་མི་རྟོགས་རུང་། ཕྲལ་རྫས་ལ་སྲེད་པ་རང་ཡིན་ན་སྐྱོན་ཆེ་ཕྱིར། དེ་ལུགས་ཤིག་བྱེད་པས་བླ་
2-3-31a
མ་བརྟག་དགོས་པར་འདུག་སྙམ། ན་བཟའ་སོ་མ་བདག་གིས་ཕུལ་བ་མ་གཏོགས་གཞན་ཡང་གདའ་བ་ལ། དང་པོ་ནས་མི་གསོལ་བ་ཅི་ལགས་ཞུས་པས། གོས་རྒྱ་གར་ལ་ཁྱེར་མི་བདེ་བས་རྙིང་ནས་གསེར་དུ་མི་འགྱུར། སོ་མ་གསེར་དུ་བསྒྱུར་ནས་དཔལ་ནཱ་རོ་པ་ལ་འབུལ་སྙམ་པ་ཡིན་ཏེ། ད་ཁྱོད་དགའ་བ་འདུག་པས་གྱོན་པ་ཡིན། རྒྱ་གར་དུ་གསེར་མེད་ན་ཆོས་མི་ཐོབ་གསུངས་པ་ལས། ཕྱག་རྫས་ལ་སྲེད་པ་ལྟ་བུ་དེ་སྐྱོན་དུ་མི་འདུག་ཡོན་ཏན་དུ་འདུག་སྙམ་ནས་མར་པ་མགོ་ལེགས་ལས་འབྲེལ་སད་པའི་ཕྱིར་ཕྱི་(མཆི་)མ་འཁྲུགས་ཤིང་བ་སྤུ་གཡོ་བའི་དད་པ་ཐུན་མོང་མ་ཡིན་པ་ཞིག་སྐྱེས་ཏེ། བླ་མ་འདིའི་དྲུང་དུ་ཆོས་ཤིག་བྱས་ནས་ཕྱག་ཕྱིར་རྒྱུན་དུ་འབྲེང་བའི་ཡིད་དམ་བཅས་སོ། །དེ་ནས་འདམ་ཤོད་སྙིང་དྲུང་དུ་ཕེབས་ཚེ་མགོ་ལེགས་འབྲོག་སྡེ་དེའི་དཔོན་དུ་འདུག་པས་གཡོག་རིགས་རྣམས་ལ་ཡང་བསྐུལ་ནས་སྣ་ལེན་བཟང་པོ་བྱས། མར་པ་མགོ་ལེགས་རང་དམ་བཅའ་ལྟར་ཆོས་སྒོར་ཞུགས་ནས་དབང་གདམས་ངག་རྣམས་ཞུས་ཏེ། གཡོག་རིགས་དང་ཉེ་རིགས་དགའ་ཤས་རྣམས་ལའང་ཡང་དགེ་བསྐུལ་བྱས། ཆོས་ཞུ་རུ་བཅུག དེར་ཡང་སྲིའུ་མང་པོ་གསོལ་པ་ལ་གསེར་མང་པོ་བླངས། མི་དགུ་བཅུ་ཙམ་
2-3-31b
གྱི་ཆོས་ཞུས་ནས་གསེར་དང་ནོར་མང་པོ་ཕུལ་བའི་གསེར་མ་ཡིན་པའི་དངོས་པོ་གཞན་རྣམས་ཀྱང་གསེར་དུ་བསྒྲིལ་ནས། སྤྱིར་གྱི་བྱང་སྨད་རའི་གསེར་རྡོལ་དང་ཐུག་པས་གསེར་མང་པོ་བྱུང་བ་དང་། ཁྱད་པར་མགོ་ལེགས་རང་གིས་གསེར་སྲང་བཅོ་བརྒྱད། རྟ་གཡུ་འབྲུག་མགོ་དཀར་གྱི་ཐོག་དྲངས་པའི་མཛོ་རྟ། གནག་ལུག་དང་གོ་ཁྲབ་མང་པོ་སོགས་གསེར་དང་འབུལ་བ་ཐུགས་ཚིམས་པའི་ཚེ། ད་རྒྱ་གར་ལ་བྱོན་དགོས་དགོངས་ནས། མགོ་ལེགས་རང་དང་། ཆོས་བྱེད་མི་འགའ་བླ་མའི་ཆག་ཕྱིར་འབྲངས་ཏེ་ལྷོ་བྲག་ལ་ཆས་བྱོན་པ་ལས། གཙང་པོ་བྱང་དུ་དོལ་གྱི་ཚུར་སྟོན་དབང་ངེས་ཀྱིས་གདན་འདྲེན་བྱུང་བ་ལྟར་དཔོན་སློབ་རྣམས་ཀྱིས་དོལ་དུ་ཕེབས་ནས་སྣ་ལེན་བྱས། གསང་འདུས་ཀྱི་དབང་གདམས་ངག་གསོལ་བ་བཏབ་པ་ལས། དེ་དུས་དབང་གནང་ནས་གདམས་ངག་ཕྱིས་ནས་བྱེད། ད་ལན་ང་རིངས་པ་ཡོད་གསུངས་པས། ཚུར་སྟོན་གྱིས་འབུལ་བ་མང་པོ་ཕུལ་ཏེ། གདམས་ངག་ཞུ་ཕྱིར་བླ་མའི་ཕྱག་ཕྱིར་འབྲེངས། དེ་དུས་ཡང་རྔོག་པས་གཞུང་དུ་སྤྱན་དྲངས་གསེར་སོགས་འབུལ་བ་མང་དག་ཕུལ་ཞིང་ཕྱག་ཕྱིར་བགྱིས་ཏེ་བྱོན་པས། དཔོན་སློབ་ཀུན་གྲོ་བོ་ལུང་དུ་ཕྱག་ཕེབས་ཕྲལ་ལྷོ་ལ་ཡག་ཏུ་བ་རང་
2-3-32a
ལྦ་བ་ཅན་གྱིས་སྤྱན་དྲངས་ནས་མ་ཧཱ་མཱ་ཡའི་དབང་ཞུས་ནས་འབུལ་བ་མང་པོ་ཕུལ། འབུལ་བ་རྣམས་སྐྱེལ་བ་དང་། ཆོས་ཞུ་བ་ལ་ཕྱག་ཕྱིར་ཕྱིན་པས། གྲོ་བོ་ལུང་དུ་བླ་མས་བུ་ཆེན་རྣམས་ལ་གདབས་ལན་གྱི་ཚུལ་དུ་དགྱེས་པ་རྡོ་རྗེའི་དབང་བསྐུར་ནས་རྔོག་པ་ལ་དགྱེས་རྡོར། ཚུར་སྟོན་དང་། མར་པ་མགོ་ལེགས་ལ་གསང་འདུས་རྒྱུད་རྐྱང་གི་ལུགས་དང་། རིམ་ལྔའི་དམར་ཁྲིད། བ་རང་ཝ་བ་ཅན་ལ་མ་ཧཱ་མཱ་ཡའི་བཤད་པ་རྣམས་མཛད་པ་ནས་ཐོན་སྟོན་ལ་ཇོ་བོ་ཡང་བོས་ནས་ཚོགས་འཁོར་བཟང་པོ་ཞིག་གནང་བའི་གྲལ་དུ་གྲྭ་པ་རྣམས་ཀྱི་བླ་མ་རིན་པོ་ཆེ་ལ་རྒྱ་གར་ན་བླ་མ་དུ་བཞུགས་དེ་རྣམས་ཀྱི་ནང་ནས་གྲུབ་རྟགས་ཀྱི་ཡོན་ཏན་ངོ་མཚར་ཅན་དང་ལྡན་པ་ཅི་འདྲ་མཆིས། དེ་རྣམས་ལས་དབང་དང་གདམས་ངག་ཆོས་ཅི་ཞུས། ཕར་ཚུར་བྱོན་པའི་ལམ་ལ་གྲོགས་ཇི་ལྟ་བུ་དང་བསྡེབས་ནས་བྱོན། ཞེས་ཞུས་པ་ལས། རྗེ་མར་པས་དེ་དག་གི་ལན་ཚིག་ལྷུག་པས་རྒྱས་པར་བཀྲོལ་རྗེས། མདོར་བསྡུས་ཚིགས་སུ་བཅད་པའི་མགུར་འདི་གསུངས་སོ།། །།རྗེ་རྩོད་ལྡན་དུས་ཀྱི་རྡོ་རྗེ་འཆང་། །དཀའ་བ་སྤྱད་པའི་སྐྱེས་བུ་མཆོག །ཀུན་གྱི་སྤྱི་བོར་ཐོད་བཞིན་ཁུར། །དཔལ་ནཱ་
2-3-32b
རོའི་ཞབས་ལ་གུས་པས་འདུད། །ང་ལྷོ་བྲག་མར་པ་ལོ་ཙྪ་(ལོཙྪ་)འདི། །ལོ་བཅུ་གཉིས་ལོན་ནས་ཆོས་དང་མཇལ། །དེ་སྔོན་སྦྱངས་ཀྱི་བག་ཆགས་སད་པར་ངེས། །དང་པོ་ཡིག་ཚང་ཀ་ཁ་བསླབས། །བར་དུ་སྒྲ་བསྒྱུར་ལོ་ཙྪ་(ལོཙྪ་)བསླབས། །ཐ་མ་ལྷོ་བལ་རྒྱ་ལ་ཕྱིན། །ལོ་གསུམ་བལ་པོའི་མཐིལ་དུ་བསྡད། །བྱིན་རླབས་ཅན་གྱི་བལ་པོ་ལ། །རྒྱུད་གཉེན་པོར་གྲགས་པའི་གདན་བཞི་ཉན། །ཆོས་སྐྱོང་དུད་སོལ་ལྷ་མོ་ཞུས། །དེས་ཀྱང་འདོད་པ་མ་ཚིམ་པར། །རྒྱ་གར་ཡུལ་དུ་ཆོས་ལ་ཕྱིན། །ཆུ་མི་ཟན་དུག་གི་ཆུ་ལ་བརྒལ། །ལུས་དུག་སྦྲུལ་བཞིན་དུ་ཤུན་པ་བརྗེས། །སྲོག་ཆོས་ཕྱིར་དོར་ཕོད་བསམ་པ་ཡིས། །གནས་ངོ་མཚར་མཁའ་འགྲོས་ལུང་བསྟན་པའི། །བྱང་ཕྱོགས་ཕུ་ལ་ཧ་རིར་བྱོན། །དངོས་གྲུབ་ཅན་གྱི་དགོན་པ་རུ། །སྒོ་བསྲུངས་ནཱ་རོ་པཎ་ཆེན་ལ། །རྒྱུད་ཟབ་མོར་གྲགས་པའི་དགྱེས་རྡོར་དང་། །བསྲེ་འཕོ་མཚམས་སྦྱོར་གྱི་གདམས་ངག་ཐོབ། །ཁྱད་པར་གཏུམ་མོའི་ལས་རྒྱ་ཞུས། །སྙན་བརྒྱུད་ཀྱི་དོན་ལ་ངོ་སྤྲོད་བྱས། །ནུབ་དུ་ལ་ཀྵེ་ཊའི་དགོན་པ་རུ། །དཔལ་ཡེ་ཤེས་སྙིང་པོའི་ཞབས་ལ་གཏུགས། །ཕ་རྒྱུད་གསང་བ་འདུས་པ་ཉན། །སྒྱུ་ལུས་འོད་གསལ་གྱི་གདམས་པ་ཐོབ། །ལམ་རིམ་པ་ལྔ་ཡི་དོན་ལ་བསླབས། །
2-3-33a
ལྷོ་དུག་མཚོ་ཁོལ་མའི་གླིང་དུ་ཕྱིན། །གདུགས་ཉི་མའི་དགུང་དུ་སྨག་ཏུ་སྲོས། །ལམ་ད་ལྟ་གསལ་བ་ད་ལྟ་སྟོར། །སྲོག་ཡལ་བར་དོར་ནས་རྗེ་བཙུན་བཙལ། །དཔལ་ཞི་བ་བཟང་པོ་དངོས་དང་མཇལ། །མ་རྒྱུད་མ་ཧཱ་མཱ་ཡ་གནང་། །དབྱིབས་རྣལ་འབྱོར་གསུམ་གྱི་དོན་ལ་བསླབས། །སྒྱུ་མ་གསུམ་རྒྱུད་ཀྱི་གདམས་པ་ཐོབ། །ཤར་དངོས་གྲུབ་ཀྱི་ཆུ་བོ་གངྒཱ་བརྒལ། །རི་རབ་ཏུ་འཁྲུགས་པའི་དགོན་པ་རུ། །རྗེ་མངའ་བདག་མཻ་ཏྲིའི་ཞབས་ལ་གཏུགས། །རྒྱུད་ཟབ་མོ་བསྟོད་པ་གླུར་བླངས་ཐོབ། །ཆོས་ཕྱག་རྒྱ་ཆེ་ལ་རྟོགས་པ་བསྐྱངས། །སེམས་དངོས་པོའི་བཞུགས་ཚུལ་གཏན་ལ་ཕབ། །གཞི་ཆོས་ཉིད་དོན་གྱི་ངོ་བོ་མཐོང་། །དེ་འཛམ་གླིང་ཡོངས་ལ་གྲགས་པ་ཡི། །ཕྱོགས་བཞི་བླ་མའི་བརྒྱུད་ཚུལ་ཡིན། །གཞན་དུར་ཁྲོད་ཉུལ་བའི་རྣལ་འབྱོར་དང་། །ཤིང་དྲུང་གནས་པའི་ཀུ་སུ་ལུ། །ཡོངས་སུ་མ་གྲགས་འགའ་ཡོད་དེ། །རྫོགས་རིམ་ཁ་འཐོར་མང་དུ་ཞུས། །ངོ་མཚར་ཅན་གྱི་སྒྲུབ་ཐབས་དང་། །ཕྲན་ཚེགས་ཀྱི་གདམས་ངག་རྩིས་ལས་འདས། །ལམ་ལ་ཁ་རག་གཉོས་དང་འགྲོགས། །ངེད་བལ་པོའི་མཐིལ་དུ་སླེབས་པའི་ཚེ། །ང་ལྷོ་བྲག་གི་མར་པ་ལོ་ཙྪ་དང་། །ཁ་རག་གཉོས་ཀྱི་
2-3-33b
ལོ་ཙྪ་(ལོཙྪ་)གཉིས། །ལོ་ཙྪ་(ལོཙྪ་)གང་མཁས་གང་མཁས་ཟེར། །གདམས་ངག་གང་ཆེ་ཟེར། །ཕར་བལ་བོད་མཚམས་ན་ཐོན་ཙ་ན། །ནོར་ཟང་ཟིང་གི་སྐུ་བསོད་ཁོང་ལ་རྒྱས། །ཡུལ་ལ་སྟོད་ཚོ་བཞིར་ཕྱིན་ཙ་ན། །སྒྲ་སྒྱུར་གྱི་གྲགས་པ་མཉམ་པོར་ཐོབ། །བོད་དབུས་གཙང་གི་མཐིལ་དུ་ཐོན་ཙ་ན། །གདམས་ངག་གི་སྙན་པ་ཁོ་བོས་ཐོབ། །བླ་མ་གྲུབ་ཐོབ་དང་མཇལ་ལགས་པས། །གདམས་ངག་མི་ཚེའི་དོགས་མ་མཆིས། །ཐ་སྙད་ལ་བྱང་ཆུབ་མི་རེ་བས། །གཞུང་བཤད་པ་ཀུན་ཇི་ལྟར་དགྱེས་དགྱེས་མཛོད། །ཅེས་གསུངས་པས། ཇོ་བོ་ཡང་མོས་གུས་ཆེན་པོ་སྐྱེས་ནས་བླ་མ་རང་ཐུགས་བཞེད་པའི་ས་ཆ་དང་ལུང་པ་ཕུལ་ཞིང་། གཞན་ཡང་སྙན་གྲགས་དང་སྐུ་བསོད་ཤིན་ཏུ་རྒྱས་ཏེ་འཁོར་དང་ལོངས་སྤྱོད་མང་པོ་འདུས་པའི་ཚེ། བདག་མེད་མ་ལ་སོགས་པའི་མཚན་ལྡན་གྱི་རིག་མ་འགའ་ཡང་བཞེས་པས་སྲས་དར་མ་མདོ་སྡེ་ལ་སོགས་པ་སྐུ་འཁྲུངས་པར་གྱུར་ཏོ།། །།
༈ རྒྱ་གར་ལ་བྱོན་ནས་བླ་མ་རྣམས་དང་མཇལ་ཏེ་ཆོས་ཞུས་ཚུལ།
དེ་ནས་གཉིས་པ་རྒྱ་གར་ལ་བྱོན་ནས་བླ་མ་རྣམས་དང་མཇལ་ཏེ་ཆོས་ཞུས་ཚུལ་ནི། བླ་མ་དང་ཡི་དམ་ཆོས་སྐྱོང་སྲུང་མ་ལ། སྔར་བཅོལ་ལེགས་པའི་གཏང་རག་དང་། ད་བཅོལ་ལས་ཀྱི་གསལ་འདེབས་དང་བྱ་དགའ་ལ་མཆོད་པ་དང་གཏོར་མ་རྒྱ་ཆེན་པོ་བཤམས། ཚོགས་ཀྱི་
2-3-34a
འཁོར་ལོ་བཟང་པོ་བསྐོར་ནས་གསེར་སྲང་ལྔ་བཅུ་ཙམ་བསྣམས་ནས་རྒྱ་གར་ལ་འབྱོན་པར་ཆས་པ་ལ། གྲྭ་པ་འགས་ཕྱག་ཕྱིར་འགྲོ་བར་གསོལ་བ་བཏབ་པ་ལས་མ་གནང་བར་གཅིག་པུར་འགྲོ་གསུངས་བྱོན་པས་བལ་པོར་ཕེབས་ནས་སྤྱི་ཐེར་བ་དང་། སེན་ཏ་བ་གཉིས་ལ་མཇལ་ནས་གསེར་གྱི་འབུལ་བས་མཉེས་པར་བྱས། བལ་པོ་སྐུ་མཆེད་ཀྱིས་ཀྱང་བློ་ཐུབ་ཀྱི་གྲོགས་བཟང་པོ་དང་བསྡེབས་ནས་རྒྱ་གར་དུ་བརྫངས་པ་ལས་བར་ཆད་མེད་པར་རྒྱ་གར་དུ་ཕེབས་ཏེ། ནཱ་རོ་པས་དབུ་མཛད་བླ་མ་རྣམས་ལ་བཀའ་དྲིན་གྱི་སྒོ་ནས་གསེར་གྱི་འབུལ་བས་མཉེས་པར་བྱས། སླར་ཡང་ཆོས་ཞུས་ཚུལ་ནི་དཔལ་ནཱ་རོ་པའི་དྲུང་དུ་དགྱེས་པ་རྡོ་རྗེའི་དབྱངས་རྒྱས་འབྲིང་བསྡུས་གསུམ། རྩ་རྒྱུད་རྟག་པ་གཉིས་པ། ཐུན་མོངས་མ་ཡིན་པའི་བཤད་རྒྱུད་མཁའ་འགྲོ་མ་རྡོ་རྗེའི་གུར་དང་། ཐུན་མོང་གི་བཤད་རྒྱུད་སཾ་བྷོ་ཊའི་འགྲོལ་བ་མན་ངག་དང་བཅས་པ་རྣམས་ཞུས་སོ། །དེ་རྗེས་ནཱ་རོ་པའི་ཞལ་ནས་སྔར་གྱི་བླ་མ་གཞན་རྣམས་དང་ཡང་མཇལ། སྔར་ཐོབ་པའི་ཆོས་རྣམས་ལ་ནན་ཏན་ཞུས་དག །ཕྱིས་ཐེ་ཚོམ་མི་ཟ་བ་དང་། སྔར་མ་ཐོབ་པ་རྣམས་ཞུར་ཕྱིན་པ་གྲག་པས་ཐོག་མར་གང་དུ་འགྲོ་གསུངས་པ་ལས། ཐོག་
2-3-34b
མར་མཻ་ཏྲི་པའི་དྲུང་དུ་འགྲོ་ཞུས་ནས་མཻ་ཏྲི་པའི་དྲུང་དུ་བྱོན་ཏེ་གསེར་གྱི་འབུལ་བས་མཉེས་པར་བྱས་ནས། སྔར་ཐོབ་པའི་ཆོས་རྣམས་ལ་ནན་ཏན། མ་ཐོབ་པ་གསང་འདུས་ཀྱི་དབང་དང་འགྲེལ་པ། ཕྱག་རྒྱ་ཆེན་པོ་ཐིག་ལེའི་རྒྱུད་རྣམས་ཞུས་ཤིང་། དེ་དག་གི་དཔེ་ཆ་བཞེངས་ཏེ། ཕུ་ལ་ཧ་རིར་ནཱ་རོ་པའི་དྲུང་དུ་ཆོས་གསན་ནས་ནཱ་ལེན་ཏྲར་བྱོན་པས། ཁ་ཆེའི་པཎྜི་ཏ་ཤྲཱི་བྷ་དྲ་དང་མཇལ་བས། སྣ་ལེན་གྱི་ཚོགས་འཁོར་ཞིག་བྱས་པའི་གྲལ་དུ་ཁོང་ན་རེ། ཁྱེད་ཀྱིས་མངའ་བདག་མཻ་ཏྲི་པ་ལས་སྙིང་པོ་དོན་གྱི་ཆོས་སྐོར་གསན་ཟེར་བས། རྗེ་བྲམ་ཟེ་ཆེན་པོའི་སློབ་མ་རི་ཁྲོད་དབང་ཕྱུག་གི་བརྒྱུད་པ་དེ་དང་། ཏཻ་ལོ་པའི་སློབ་མ། འོ་སྐོལ་རང་གི་བླ་མ་ནཱ་རོ་པའི་དགོངས་པ་གཉིས་གང་ཟབ་པ་འདུག་གསུངས་པས། མར་པའི་དགོངས་པ་ལ་ཚོགས་ཀྱི་འཁོར་ལོ་གླུ་གར་གྱིས་གྲུབ་པ་ཡིན་པས། མཻ་ཏྲི་པའི་དགོངས་བཞེད་ཟུར་ཙམ་ཞིག་དབྱངས་སུ་བླངས་པ་ལ་འགལ་མེད་དགོངས་ནས་མགུར་འདི་གསུངས་སོ།། །།གསོན་དང་སྙིང་གྲོགས་དཔལ་བཟང་པོ། །ང་མར་པ་བྱ་བའི་བན་དྷེ་ལ། །ནཱ་རོ་མཻ་ཏྲི་དགོངས་པ་གཉིས། །གང་ཟབ་གསུངས་པས་དབྱངས་འདི་ལེན། །སེངྒེ་ལྟ་བུའི་ནཱ་རོ་པ། །ཀུན་གྱི་ནང་ནས་རིན་པོ་ཆེ། །
2-3-35a
དགོས་འདོད་ཐམས་ཅད་སྐོང་མཛད་པའི། །དགོངས་པ་ཉིད་ཀྱི་ཐུགས་ལ་མངའ། །རྗེ་དྷ་རྨ་དྷ་རས་ཐུགས་རྗེས་བཟུང་། །པཎ་ཆེན་འདེ་ཡི་ཞབས་པད་ནི། །དེང་སང་བདག་གི་གཙུག་གི་རྒྱན། །ཁོང་གི་དགོངས་པ་འདི་ལྟར་གདའ། །སྙན་ལྷན་ནེར་གསོན་ལ་ཐུགས་གཏད་འཚལ། །ཆོས་སྐུའི་མཁའ་ལ་ཡེ་ཤེས་སྤྲིན་ཕུང་འཁྲིགས། །ཆར་རྒྱུན་སྤྲུལ་པས་འགྲོ་བ་ཡོངས་ལ་ཁྱབ། །བརྒྱུད་པ་མ་ཆད་སྐྱེས་བུའི་བླ་མ་མཆོག །དེ་ལ་སྒོ་གསུམ་གུས་པས་ཕྱག་འཚལ་ལོ། །ཆོས་སྐུ་ནམ་མཁའ་ལྟ་བུ་དེ། །སངས་རྒྱས་རྡོ་རྗེ་འཆང་ཆེན་ཡིན། །ཡེ་ཤེས་སྤྲིན་ཕུང་འཁྲུགས་པ་དེ། །བྱང་ཆུབ་སེམས་དཔའ་རྣམས་གཉིས་ཡིན། །ཕྲིན་ལས་བདུད་རྩིའི་ཆར་འབབ་པ། །རྗེ་བཙུན་བྲམ་ཟེ་ས་ར་ཧ། །སྤྲུལ་པས་འགྲོ་དོན་མཛད་པ་དེ། །རི་ཁྲོད་དབང་ཕྱུག་ཤ་བ་རི། །དེ་ཡི་བརྒྱུད་པ་མ་ཆད་པ། །མངའ་བདག་རྒྱལ་སྲས་མེ་(མཻ་)ཏྲི་ལགས། །དམ་པ་དེ་ལས་དོན་ཐོབ་པ། །གོ་ལུགས་དགོངས་པ་འདི་ལྟར་གདའ། །འགྱུར་མེད་རིག་པ་རང་གསལ་དེ། །ཆོས་སྐུ་སྐྱེ་བ་མེད་པར་བཞེད། །རང་བྱུང་ཡེ་ཤེས་འགག་མེད་ནི། །སྣ་ཚོགས་སྤྲུལ་པའི་སྐུ་རུ་བཞེད། །དེ་གཉིས་ཟུང་འཇུག་ལྷན་སྐྱེས་དེ། །ལོངས་སྤྱོད་རྫོགས་པའི་སྐུ་རུ་
2-3-35b
བཞེད། །དེ་གསུམ་གཞི་རྩ་མ་གྲུབ་པ། །ངོ་བོ་ཉིད་ཀྱི་སྐུ་རུ་བཞེད། །དེ་དག་ཟག་པ་མེད་པ་དེ། །བདེ་བ་ཆེན་པོའི་སྐུ་རུ་བཞེད། །དོན་གྱི་སྐུ་ལྔ་དེ་ལྟར་ལགས། །དེ་ཐུགས་ལ་བདེའམ་སྙིང་གི་གྲོགས། །ཞེས་པ་དེ་གསུངས་པ་དང་། སྐུ་ལྔའི་དགོངས་བཞེད་དེ་ལེགས། དོན་ལ་ལྟ་སྒོམ་སྤྱོད་འབྲས་ཇི་ལྟར་བཞེད་གསུངས་པ་ལ། ཡང་མགུར་འདི་གསུངས་སོ། །ཐུགས་གཞན་དུ་མ་གོལ་གསན་པར་ཞུ། །ཚིག་གི་སྡེབ་སྦྱོར་མི་མཁས་ཀྱང་། །དོན་གྱི་གདམས་ངག་གོ་ལུགས་འདི། །སྙན་ཚུད་བགྱིད་པས་མཇལ་བར་མཛོད། །སྲིད་གསུམ་ཡེ་ནས་རྣམ་པར་དག །དོན་དམ་ཡེ་ནས་གོ་རྒྱུ་མེད། །མེད་པ་མ་ཡིན་རྒྱུན་ཆད་མེད། །འཕོ་འགྱུར་མེད་པར་ལྟ་བར་བཞེད། །གཉུག་མའི་ངོ་བོ་ངང་གིས་གསལ། །ཟག་མེད་བསམ་གཏན་རྒྱུན་ཆད་མེད། །མེད་པ་མ་ཡིན་འདུ་འབྲལ་མེད། །ཞེན་ཆགས་མེད་པར་སྒོམ་པར་བཞེད། །སྣ་ཚོགས་རྟེན་འབྲེལ་ཤུགས་འབྱུང་ལ། །སྒྱུ་མའི་རོལ་པ་འགག་པ་མེད། །མེད་པ་མ་ཡིན་དངོས་པོ་ལ། །གློ་བུར་ངས་(ངེས་)མེད་སྤྱོད་པར་བཞེད། །སེམས་རྒྱུད་བྱང་ཆུབ་སྙིང་པོར་གསལ། །སྐུ་གསུམ་སངས་རྒྱས་ཐོབ་བྱར་མེད། །མེད་པ་མ་ཡིན་རེ་དོགས་བྲལ། །གཞི་མེད་རྩ་བྲལ་
2-3-36a
འབྲས་བུར་བཞེད། །ཅེས་གསུངས་པས། ཡང་དྲིས་པ། སྒོམ་ཉམས་སུ་ལེན་པའི་གང་ཟག་ལ་གདམས་ངག་ཅིག་ཅར་དུ་འདེབས་སམ། ཐབས་ལམ་ལ་བརྟེན་ནས་འཁྲིད་མཛད་པ་འདུག་གསུངས་པ་ལ། ཡང་མགུར་འདི་གསུངས་སོ།། །།ཁྱེད་ཅག་མཆེད་གྲོགས་གོང་མ་རྣམས། །ངེད་ཀྱི་རྗེ་བཙུན་མཻ་ཏྲི་པ། །སྤྱན་རས་གཟིགས་ཀྱིས་ལུང་བསྟན་པའི། །འགྲོ་མགོན་ཀླུ་སྒྲུབ་ཐུགས་ཀྱི་སྲས། །ཤ་བ་རི་པའི་ཞབས་ལ་གཏུགས། །གསུམ་ལྡན་ཚང་བར་རྗེས་གནང་མཛད། །གསང་མཚན་གཉིས་མེད་རྡོ་རྗེར་བཏགས། །ཁོང་རྒྱུད་སྡེ་ཀུན་གྱི་ལྡེ་མིག་འཛིན། །གསང་སྔགས་ཐབས་ལམ་མངོན་དུ་གྱུར། །ཆོས་ཀྱི་རྒྱལ་མཚན་ཆོས་ཀྱི་མཛོད། །ཆོས་ཀྱི་སེངྒེ་ཆོས་ཀྱི་རྒྱལ། །སྒྲ་དང་དབུས་ཚད་མཐའ་དག་མཁྱེན། །པཎྜི་ཏ་ཡི་དངོས་གྲུབ་བརྙེས། །དངོས་པོའི་གནས་ལུགས་དྲི་མེད་མཁྱེན། །རྒྱལ་སྲིད་རྩྭ་བཞིན་དོར་བྱས་ནས། །ཚེ་གཅིག་མཆོག་གི་གོ་འཕང་ཐོབ། །རྗེ་བཙུན་མཁའ་འགྲོས་ཞལ་བསྟན་ཞིང་། །ཐུན་མོང་བསྒྲུབས་པས་ཐམས་ཅད་ཐོབ། །དེ་ལྟར་ཡོན་ཏན་དཔག་མེད་བརྙེས། །ཕ་ཁོང་གི་དགོངས་པ་འདི་ལྟར་གདའ། །རིམ་པར་སྐྱེས་པའི་གང་
2-3-36b
ཟག་ལ། །སྲོག་རྩོལ་གཏུམ་མོའི་གདམས་ངག་དང་། །ཞེན་མེད་སྒྱུ་ལུས་ཀྱི་གདམ་ངག་དང་། །མུན་སེལ་འོད་གསལ་གྱི་ངོ་སྤྲོད་དང་། །སྲིད་པ་ལོངས་སྐུའི་ངོ་སྤྲོད་དང་། །སྐྱེ་བ་སྲིད་པའི་ངོ་སྤྲོད་སོགས། །ཐབས་མཆོག་གཞི་ལམ་འབྲས་བུར་ཁྲིད། །ཅིག་ཅར་བ་ཡི་གང་ཟག་ལ། །ཕྱག་ཆེན་གཅེར་མཐོང་ངོ་སྤྲོད་མཛད། །ཕ་ཁོང་མཐོང་སྒོ་གསུམ་དད་པ་སྐྱེས། །ཐོས་ན་ལས་ཀྱི་སྒྲིབ་པ་དག །མཇལ་ན་ངན་སོང་འཇིགས་ལས་གྲོལ། །ཞུས་ན་སངས་རྒྱས་ལག་བཅངས་གནང་། །དཔལ་རི་ཁྲོད་དབང་ཕྱུག་གི་བརྒྱུད་པ་འཛིན། །པཎ་ཆེན་ནཱ་རོའི་ཐུགས་ཀྱི་སྲས། །སངས་རྒྱས་གཉིས་པ་རིན་པོ་ཆེ། །རྗེ་མཻ་ཏྲི་པ་ཡི་ཡོན་ཏན་ལགས། །དེང་སང་སྐྱེ་བོ་ཕྲག་དོག་ཆེ། །སྤུན་ཁྱེད་ཉིད་མ་གཏོགས་བཟས་པ་ན། །ཡོན་ཏན་མི་འཕེལ་ཟག་པ་འཕེལ། །དེ་ཕྱིར་ཕལ་ལ་གསང་བ་ལགས། །བླ་མའི་མཛད་སྤྱོད་དེ་ལྟར་གདའ། །ལེགས་སམ་སྐལ་ལྡན་རྡོ་རྗེའི་སྤུན། །ཅེས་(ཞེས་)པ་དེ་སྐད་གསུངས་པས། པཎྜི་ཏ་ཤྲཱི་བྷ་དྲས་དབུ་མཛད་པ་རྣམས་དགྱེས་ནས་ལོ་ཙྪ་(ལོཙྪ་)བ་ཁྱེད་ཀྱི་འདུན་མ་གཤའ་མར་གྲུབ་གདའ་གསུངས་སོ། །དེ་ནས་རྗེ་མར་པས་དཔལ་ནཱ་རོ་པའི་དྲུང་དུ་ཕེབས་ཏེ། ཡང་ཡང་བཀའ་ལུང་ལྟར་བླ་མ་རྣམས་ལ་གསེར་གྱི་འབུལ་བ་དང་
2-3-37a
བཅས། ཐོག་མར་དུག་མཚོའི་དོ་ལ་བྱོན་ཏེ། ཀུ་ཀུ་རི་པ་དང་། རྣལ་འབྱོར་མ་རུས་པའི་རྒྱན་ཅན་དང་མཇལ། དེ་ནས་ནུབ་དུ་(ཏུ་)ལ་ཀྵེ་ཏྲར་ཕེབས་ཏེ་དཔལ་ཡེ་ཤེས་སྙིང་པོ་དང་། སིང་གྷ་གླིང་པ་དང་མཇལ་ནས་བླ་མ་ཀུན་ལ་གསེར་གྱི་འབུལ་བས་ཤིན་ཏུ་མཉེས་པར་གྱུར་པ་ལ། སླར་ཡང་སྔར་ཐོབ་པ་དང་མ་ཐོབ་པའི་དབང་ལུང་གདམས་ངག་རྣམས་ཐུགས་ཚིམ་པར་ཞུས་པ་ཀུན་ལ་ཞུས་དག་ནན་ཏན་དང་བཅས་པའི་སྒོ་ནས་ཆོས་གང་ཐོབ་པའི་དཔེ་ཆ་བསྒྱུར་ཞིང་བྲིས་ཏེ་བསྣམས་ནས་ཕུ་ལ་ཧ་རིར་ཕེབས་པ་དང་། དཔལ་ནཱ་རོ་པ་ལ་བདེ་མཆོག་རྒྱལ་པོ་ཨིནྡྲ་བོ་དྷི་ནས་བརྒྱུད་པ་དང་། སངས་རྒྱས་ཐོད་པའི་རྒྱུད་བཤད་སྲོལ་བྲམ་ཟེ་ཆེན་པོ་ས་ར་ཧའི་ལུགས་ཤིག་དྲིལ་གདམས་ངག་དང་བཅས་པ་ཐོབ་པ་དང་། སྔར་ཐོབ་པའི་ཆོས་རྣམས་ཀྱི་དཔེ་ཆ་བསྒྱུར་ནས་དྲི་ཞིང་ཡོད་པ་ལས། ལན་ཅིག་ནཱ་རོ་པ་གསོལ་མཛད་པའི་དྲུང་ན་མར་པ་བཞུགས་དུས་ཤིག །ཁ་ཆེ་ལ་བར་ནས་ཡིན་ཟེར་བའི་པཎྜི་ཏ་མཁས་པ་ཨ་ཀ་ར་སིདྡྷི་བྱ་བའི་དགེ་སློང་ཞི་དུལ་ཅན། ནཱ་རོ་པས་ཀྱང་ཞེ་ས་རྩེ་སྤྲོད་དུ་མཛད་པ་ཞིག་བྱུང་བ་དེ། གསང་འདུས་ཀྱི་དབང་ལུང་འགྲེལ་བཤད་མན་ངག་དང་བཅས་པ་གནང་དགོས་ཞེས་གསོལ་བ་འདེབས་ཤིང་
2-3-37b
འདུག་པ་ལ། རྗེ་མར་པས་ཀྱང་གསོལ་བ་བཏབ་པས། ད་དུས་ལ་བབ་ཕྱིར་ཅིས་ཀྱང་བྱེད་གསུངས། ཁོང་དང་མཉམ་དུ་གསང་འདུས་རིགས་རྒྱས་བསྡུས་གཉིས་ཀའི་དབང་དང་། རྒྱུད་བཤད་པ་ཆེན་མོ་དོན་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ཤོ་ལོ་སུམ་སྟོང་ལྔ་བརྒྱ་ཐམས་པ་དང་། འགྲེལ་པ་སྒྲོན་གསལ་རྣམས་གནང་ཞིང་། ཆོས་གྲོལ་བ་དང་ཁོང་འབྱོན་ཞིང་འདུག་པ་ལ། གཤེགས་སྐྱེལ་བྱས། ད་གང་དུ་འབྱོན་ཞུས་པས། ང་བོད་ལ་ལམ་བྱས་རྒྱ་ནག་རི་བོ་རྩེ་ལྔ་ལ་གནས་འབྲེལ་འགྲོ་གསུངས་པ་ལ། མར་པའི་ཐུགས་ལ་པཎྜི་ཏ་མཁས་པ་འདི་བོད་ལ་བྱོན་རྗེས། ང་ལ་གསང་འདུས་སོགས་ཆོས་ཞུ་མི་ཅུང་ཟད་ཉུང་བ་ཙམ་འོང་ངམ་དགོངས་པ་ཡུན་ཙམ་ཞིག་ཐུགས་ལ་ཤར་བས། དེ་པཎྜི་ཏའི་མངོན་མཁྱེན་གྱི་རིག་བཞིན་བོད་ལ་བྱོན་པས། ཁ་བ་གུང་ཐང་གི་ཡང་ཐོག་ན་ནག་ཚོ་ལོ་ཙཱ་(ལོཙྪ་)བས་སྒྲོན་གསལ་འཆད་ཅིང་འདུག་པའི་སར་ཕེབས་པ་ལས། ཁོང་ན་རེ། ཛོ་ཀི་ཁྱོད་གང་ནས་ཡིན། གང་དུ་འགྲོ་གསུངས་པ་ལ། ང་པཎྜི་ཏ་ཡིན། རྒྱ་ནག་རི་བོ་རྩེ་ལྔ་ལ་འགྲོ་བྱས་པས། ནག་ཚོས་ཁྲེལ་ནས། རྒྱ་གར་གྱི་པཎྜི་ཏ་འདི་རྣམས་གསེར་འཚོལ་བའི་ཕྱིར་དུ་རྐང་པ་སྔོ་རྗེན་རྗེན་འོང་ནུས་པ་རྒོད་བྲོ། ཁྱོད་ཀྱིས་
2-3-38a
པཎྜི་ཏ་ཨ་ཀ་ར་སིདྡྷི་ངོ་ཤེས་སམ་ཟེར་བ་ལ། ང་རང་ཡིན་བྱས་པས། དེ་ཡིན་ན་གསེར་ཚོལ་བ་མ་ཡིན་ངོ་མཚར་ཅན་ཡིན་ཟེར་ནང་དུ་གདན་དྲངས། བསྙེན་བཀུར་ཕུན་སུམ་ཚོགས་པ་བྱས། སྤྱིར་གྱི་མདོ་སྔགས་ཀྱི་ཆོས་ཟབ་ཅིང་རྒྱ་ཆེ་བ་མང་པོ་དང་། ཁྱད་པར་གསང་འདུས་ཞུས་ཤིང་གནང་བའི་བར་ལ། པཎྜི་ཏས་མངོན་མཁྱེན་གྱིས་དགོངས་པ་ལ། བོད་ལ་ཕྱིན་ཆོས་བཤད་རུང་། ང་རང་གི་འདུལ་སྐལ་ནི་འདི་བས་གཞན་མི་འདུག བོད་ཀྱི་ད་ལྟའི་སྔགས་ལ་དད་པ་ཀུན་ནི་ཌོཾ་བྷི་ཧེ་རུ་ཀའི་རྣམ་འཕྲུལ་མར་པ་ལོ་ཙྪའི་(ལོཙྪའི་)གདུལ་བྱར་འདུག་པས་ཁོང་རང་གི་(གིས་)ཐུལ་བར་འདུག་པས། རྒྱ་ནག་ལ་ཕྱིན་རུང་ཚེའི་བར་ཆད་དུ་འགྲོ་བ་དང་གདུལ་བྱའི་སྐལ་བ་ཨོ་རྒྱན་ན་ཡོད་པར་དགོངས་པའི་ཕྱིར། སླར་རྒྱ་གར་ལ་འབྱོན་པར་ཐུགས་ཐག་ཆོད་པ་ལས་ཆོས་གྲོལ་ཚེ། ནག་ཚོས་གསེར་གྱི་འབུལ་བ་མང་དག་ཕུལ་བའི་ཁར། བོད་དུ་མཁོ་བའི་ཡོ་བྱད་འགའ་ཕུལ་ནས། རྒྱ་ནག་ལ་འབྱོན་པའི་ཐོག་མར་བོད་ལ་འབྱོན་དགོངས་པ་གདའ་བས། ལྷ་ས་བར་གྱི་ས་སྣ་དང་ཞབས་ཏོག་པ་མི་དུ་དགོས་པ་གཏོང་ཞུས་པས། ཐུགས་ཞེན་ལོག་ཆེ་བ་དང་། སྔར་པཎྜི་ཏ་གསེར་ཚོལ་བ་ལ་རྐང་བཙུགས་བྱོན་པའི་གཏམ་དེས་ཐུགས་མཛངས་པས། 
2-3-38b
ང་རྒྱ་གར་ལ་འགྲོ་སྟེ་གསེར་དང་ཟླ་གྲོགས་ཡེ་མི་དགོས་གསུངས་མ་བཞེས་ཚེ། རྒྱུ་མཚན་ཅི་ལགས་ཞུས་པས། མངོན་མཁྱེན་གྱིས་དགོངས་ཚུལ་རྣམས་གསུངས་པ་ལས། རྒྱ་གར་ལ་འབྱོན་ན་བདག་ཚོགས་རྫོགས་ཕྱིར་གསེར་ཅིས་ཀྱང་བཞེས་དགོས་ཞེས། སྤྱན་ཆབ་བསིལ་ནས་ཞུ་བ་ནན་གྱིས་ཕུལ་བས། འོ་ན་ཁྱེད་ཚོགས་རྫོགས་ཕྱིར་ཅུང་ཟད་ཅིག་ཁྱེར་དགོས་གསུངས་ཏེ་སྲང་གང་བསྣམས་ནས་གཤེགས་པས་ནག་ཚོ་ལོ་ཙྪ་བ་(ལོཙྪ་)རྗེ་བཙུན་མར་པ་ལ་སར་གནས་ཀྱི་བྱང་ཆུབ་སེམས་དཔའ་ཆེན་པོར་ཐུགས་ཐག་ཆོད་པའི་དག་སྣང་ཤར་རོ། །དེ་ནས་པཎྜི་ཏས་རྒྱ་གར་དུ་ཕེབས་ཏེ། རྗེ་མར་པ་ལ། ངས་གྲོགས་པོ་དོགས་པ་བཞིན་མ་བྱས་པས། རེ་བ་བཞིན་གྱི་གདུལ་བྱ་ཕྲིན་ལས་ཡོད་པ་ཡོད་དོ། །གསུངས་པས། རྗེ་མར་པའི་ཐུགས་ལ་པཎྜི་ཏ་བཟང་པོ་འདིས་ངའི་ངན་རྟོགས་ཅུང་ཟད་དེ་མངོན་མཁྱེན་གྱིས་དགོངས་འདུག་སྟེ། ཞེ་ནས་རྒྱུན་ཆགས་སུ་མེད་པས་ཐུགས་གཏིང་ནས་ཁྲེལ་དོན་མེད། ལར་རང་རིག་པ་བསྒྲིམས། བསམ་རྟོག་ངན་པ་མ་བྱུང་བ་བྱེད་དགོས་དགོངས་པ་ཤར་ཞིང་། ཤར་བ་ལྟར་པཎྜི་ཏ་ལ་ཞུས་པས། ཨ་ཀྱང་བྲེ་མོ་ཡིན། ཁྱེད་སྐྱེ་བ་སྔོན་ནས་ལྷག་བསམ་དང་ལྡན་པའི་ཕྱིར། ད་ལྟ་
2-3-39a
བླ་མའི་ཐུགས་སུ་འབྱོན་ཅིང་། མ་འོངས་པ་ན་བསྟན་པ་དང་སེམས་ཅན་གྱི་དཔལ་དུ་གྱུར་པ་འདུག་གི་གསུངས་ཨོ་རྒྱན་ལ་གཤེགས་སོ། །དེ་ནས་རྗེ་མར་པས་བླ་མ་རྣམས་ཀྱི་དྲུང་དུ་དབང་ལུང་གདམས་ངག་རྫོགས་པར་ཞུས་པ་རྣམས་ཀྱི་ཕྱག་དཔེ་རྣམས་བསྒྱུར་ཞིང་བཞེངས་པ་རྣམས་བརྩོན་འགྲུས་བསྐྱེད་ནས་མཛད་པས་མྱུར་དུ་གྲུབ་པར་གྱུར་ཏོ། །
༈ བོད་ལ་བྱོན་ཚུལ།
གསུམ་པ་བོད་ལ་བྱོན་ཚུལ་ནི། བསྟན་པ་དང་སེམས་ཅན་གྱི་དོན་ལ་དགོངས་པའི་མཛད་ཕྲིན་རྣམས་བཞེད་པ་ལྟར་གྲུབ་པས་ཐུགས་ཚིམ་ནས་བོད་ལ་བྱོན་ཁར། ནཱ་རོ་པའི་དྲུང་དུ་གཏང་རག་གི་ཚོགས་འཁོར་ཞིག་ཕུལ་བའི་ཚེ། པཎ་ཆེན་ནཱ་རོའི་ཕྱག་རྗེ་བཙུན་མར་པའི་དབུ་ཐོག་ཏུ་བཞག་ནས་མགུར་འདི་གསུངས་སོ།། །།ནམ་མཁའི་མེ་ཏོག་སྐྱེས་བུ་ཡིས། །མོ་གཤམ་བུ་ཡི་རྟ་ཞོན་ནས། །རུས་སྦལ་སྤུ་ཡི་ཐུན་བྲབས་ཏེ། །རི་བོང་རྭ་ཡི་ཕུར་པ་ཡིས། །དགྲ་བོ་ཆོས་ཉིད་ཀློངས་(ཀློང་)དུ་བསད། །ལྐུགས་པ་སྨྲ་ཞིང་དམུ་(དམུས་)ལོང་བལྟ། །འོན་པ་ཉན་ཞིང་ཞ་བོ་རྒྱུག །ཉི་ཟླ་གར་མཁན་དུང་འབུད་ཅིང་། འཁོར་ལོ་བུ་ཆུང་སྐོར་བར་བྱེད། །ཅེས་དང་། གཞན་ཡང་གྲོང་འཇུག་དང་། སྙན་རྒྱུད་སོགས་གདམས་ངག་ཟབ་མོ་འགའ་ཡོད་པས་ལན་གཅིག་
2-3-39b
ཅིས་ཀྱང་ཤོག་ཅིག་ཅེས་ནན་ཆེར་གསུངས་པ་མ་གཏོགས་ནཱ་རོའི་ཞལ་ནས་འདི་ལྟར་ཡིན་གསུངས་པ་ནི་མི་འདུག མར་པས་གོ་བ་དང་ཇི་ལྟར་ལགས་ཞུ་བ་ནི་མ་བྱུང་། ཚིག་རྣམས་ནི་ཐུགས་ལ་སལ་ལེར་འཇགས་བཞིན་པའི་ངང་ནས་ད་དུང་ལན་ཅིག་ཅིས་ཀྱང་མཇལ་བའི་དམ་བཅའ་ཕུལ་ཞིང་སྨོན་ལམ་བཏབ་ནས་བྱོན་པ་ལས། བལ་པོར་ཕེབས་ཏེ་ཡུན་རིང་མ་བཞུགས་པར་བོད་ལ་བྱོན་ནས་གཙང་དུ་ཕེབས་པས། གཙང་རོང་གི་མེ་སྟོན་ཚོན་པོས་བདེ་མཆོག་གི་དབང་གདམས་ངག་རྣམས་ཞུས་ཏེ། གནང་ཞིང་བཞུགས་པའི་ཚེ། སྐུ་ཁམས་བཟང་ཞིང་སྙན་གྲགས་དང་བཅས་བོད་དུ་ཕེབས་པ་གྲོ་བོ་ལུང་དུ་ཐོས་པ་ལས། མར་པ་མགོ་ལེགས་སོགས་བུ་སློབ་འགས་བསུ་བ་ལ་བྱོན་པ་དང་། བླ་མ་གཙང་རོང་ནས་བྱོན་པ་གཉིས་ཉང་སྟོད་ར་ནང་དུ་མཇལ་ཏེ་ལྷོ་བྲག་ཏུ་ཕེབས་ནས་བཞུགས་པའི་དྲུང་དུ་རྗེ་བཙུན་མི་ལ་སོགས་པ་སྐལ་ལྡན་གྱི་གདུལ་བྱ་མང་པོ་འདུས་ཤིང་། སྐུ་བསོད་སྙན་གྲགས་གདུལ་བྱ་ཕྲིན་ལས་རྣམས་ཤིན་ཏུ་རྒྱས་པར་གྱུར་ཏོ། །དེ་ནས་རྗེ་བཙུན་མི་ལ་ཚར་གཅོད་ཀྱི་སྲས་མཁར་གྲུབ་ནས། སྲས་ཀྱི་ཆེ་འདོན་དང་རབ་གནས་མཛད་པའི་ཚོགས་གྲལ་དུ་རྗེ་མར་པ་དང་སྲས་དར་མ་མདོ་སྡེ་བགྲོ་གླེང་མཛད་པས་སྲས་རྒྱལ་ཏེ། སྲས་
2-3-40a
ཀྱི་ཞལ་ནས། དཀའ་ལས་རྐྱ་(སྐྱ་)བས་བྱས་རུང་། དངོས་གྲུབ་གཟར་བུས་ལེན་པ་ལྟར། དཀའ་ལས་ཕ་ཇོས་མཛད་རུང་། ཉམས་ལེན་བདག་གིས་བྱེད་དགོས་པ་གདའ། ཕ་ཇོ་རང་ཞལ་སྐྱོ་མ་ཁ་ལེར་བཞུགས་མཛོད། ཞེས་དགྱེས་ནས་བཞད་པས། ཡབ་ཀྱི་ཞལ་ནས། བུ་ང་རྒྱལ་གྱི་གང་བུ་ལ་ཡོན་ཏན་གྱི་ཆུ་མི་ཆགས་བྱ་བ་ཡིན་པས། བུ་མཁས་པ་དང་ཆེ་བ་དེ་ཕ་ཇོའི་བཀའ་དྲིན་ཡིན་ཞིང་། ད་ཡང་དེ་ཀ་འདོད་རུང་། ང་རྒྱལ་མ་ཆེ་བར་གླུ་འདི་ཉོན་ཅིག་གསུངས། སྲས་ལ་བཀའ་ནོན་གྱི་མགུར་འདི་གསུངས་སོ། །བུ་གསན་དང་ཇོ་སྲས་མདོ་སྡེ་འབུམ། །ང་ཆེ་དང་ང་མཁས་ཟེར་ལགས་ཀྱང་། །དེ་ཀུན་ཕ་ཇོའི་བཀའ་དྲིན་ཡིན། །ངས་ཚེ་སྔོན་ཡང་ཡང་ཚོགས་བསགས་པས། །ལོངས་སྤྱོད་སེར་པོ་གསེར་ལ་བྱས། །བླ་མ་མཉེས་པ་དེ་ལྟར་ལགས། །བུ་གསན་དང་ཇོ་སྲས་མདོ་སྡེ་འབུམ། །ནཱ་རོ་དང་མཻ་ཏྲི་ཐར་ལམ་གསུམ། །རྩ་བའི་བླ་མ་དམ་པ་ཡིན། །གདམས་ངག་ཟབ་པ་དེ་ལྟར་ལགས། །བུ་གསན་དང་ཇོ་སྲས་མདོ་སྡེ་འབུམ། །ངས་སྔོན་བླ་མ་ཐུགས་སུན་མ་ཕྱུང་པས། །མཁའ་འགྲོ་མཉེས་ཕྱིར་བུ་བཞིན་སྐྱོང་། །རྐྱེན་ངན་བར་ཆད་མེད་པ་དེ་ལྟར་ལགས། །ངས་ཆོས་ཐེག་པ་ཆེ་ལ་བློ་སྦྱངས་
2-3-40b
པས། །སེམས་བསྐྱེད་ཀྱིས་འགྲོ་བ་ཡོངས་ལ་ཁྱབ། །དམ་ཆོས་བོད་དུ་དར་བ་དེ་ལྟར་ལགས། །བུ་གསན་དང་ཇོ་སྲས་མདོ་སྡེ་འབུམ། །ངས་སྔོན་བླ་མ་བསུ་སྐྱེལ་བྱས་པ་ཡིས། །རྐང་པ་འཁོར་ལོའི་མཚན་དང་ལྡན། །ཡུལ་རྒྱ་གར་འཁོར་བ་དེ་ལྟར་ལགས། །བུ་གསན་དང་ཇོ་སྲས་མདོ་སྡེ་འབུལ། །ངས་རྒྱུད་དང་རྒྱུད་འགྲེལ་མན་ངག་གསུམ། །ཚིག་དོན་མ་ནོར་མཁས་པར་བསླབས། །བསྟན་པ་དར་བ་དེ་ལྟར་ལགས། །བུ་གསན་དང་ཇོ་སྲས་མདོ་སྡེ་འབུལ། །མེས་རྔོག་ཚུར་སྟོན་མགོ་ལེགས་བཞི། །སྙིང་དང་འདྲ་བའི་བུ་བཞི་ཡིན། །རྒྱུད་འགྲེལ་ཆད་པ་དེ་ལྟར་ལགས། །བུ་གསན་དང་ཇོ་སྲས་མདོ་སྡེ་འབུམ། །བླ་མས་ཅི་གསུངས་བསྒྲུབས་པ་དེ། །མི་ལ་རྡོ་རྗེ་རྒྱལ་མཚན་ཡིན། གདམས་ངག་སྟེར་བ་དེ་ལྟར་ལགས། །བུ་གསན་དང་ཇོ་སྲས་མདོ་སྡེ་འབུམ། །ཕ་ཇོ་ང་ན་སོ་རྒས་ནས་གདའ། །ཆོས་ཉིད་ཀྱང་ཟད་སར་འཁྱོལ་ནས་གདའ། །མདོ་སྡེའི་དུས་ལ་བབ་གདའ་བས། །ཆེ་མཁས་ཀྱི་བསྟན་པ་སྤེལ་མཛོད་ཅིག །མི་རྒན་གྱི་བསམ་པ་གྲུབ་པ་ལགས། །ཞེས་གསུངས་པས། ཀུན་རྗེ་མར་པ་ལ་མི་ཕྱེད་པའི་དད་པ་སྐྱེས་སོ། །དེ་ནས་རབ་གནས་དང་བཀྲ་ཤིས་མཛད་ཚེ། ཡང་རྗེ་བཙུན་མར་པས་བཀྲ་ཤིས་མངའ་གསོལ་གྱི་
2-3-41a
མགུར་འདི་གསུངས་སོ།། །།བླ་མ་བཀའ་དྲིན་ཅན་ལ་གསོལ་བ་འདེབས། །ང་ཡི་བརྒྱུད་པ་རིན་ཆེན་འདི་ཉིད་ལ། །ཉེས་ལྟུང་མེད་པའི་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །གདམས་ངག་ཟབ་མོའི་ཉེ་ལམ་ལ། །ནོར་འཁྲུལ་མེད་པའི་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །ང་རང་མར་པ་ལོ་ཙྪ་(ལོཙྪ་)ལ། །ཟབ་མོ་གནད་ཀྱི་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །བླ་མ་ཡི་དམ་མཁའ་འགྲོ་ལ། །བྱིན་རླབས་དངོས་གྲུབ་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །བུ་ཆེན་སློབ་མའི་འཁོར་ཚོགས་ལ། །དད་པ་དམ་ཚིག་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །ཡོན་བདག་ཡུལ་མི་ཉེ་རིང་ལ། །མཐུན་རྐྱེན་ཚོགས་བསོགས་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །ལས་དང་བྱ་བ་ཐམས་ཅད་ལ། །འགྲོ་དོན་བྱང་ཆུབ་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །སྣང་ཞིང་སྲིད་པའི་ལྷ་འདྲེ་ལ། །ཆད་མདོ་བཙན་པའི་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །འདིར་ཚོགས་ཁྲོམ་གྱི་ལྷ་མི་ལ། །བདེ་སྐྱིད་སྨོན་ལམ་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །ཅེས་
2-3-41b
གསུངས་པའི་རྗེས་སུ་བླ་མ་རྔོག་པ་ལ་སོགས་པའི་བུ་སློབ་དང་ཡོན་བདག་རྣམས་ཀྱི་འབུལ་བ་བཞེས་ནས་དགེ་བ་བྱང་ཆུབ་ཏུ་བསྔོ་བ་རྣམས་མཛད་པ་ལགས་སོ། །རྒྱ་གར་ལ་འབྱོན་ཐེངས་བར་པའོ།། །།
༄། །རྒྱ་གར་ལ་འབྱོན་ཐེངས་གསུམ་པ།
༈ གསེར་ལ་སོགས་པའི་ཡོ་བྱད་རྣམས་བསྒྲུབ་ཏུ་བྱོན་ཚུལ།
ཕྱི་མ་ལ་ཡང་སྔར་དང་འདྲ་བ་གསུམ་གྱི་དང་པོ། གསེར་ལ་སོགས་པའི་ཡོ་བྱད་རྣམས་བསྒྲུབ་ཏུ་བྱོན་ཚུལ་ནི། དེ་ནས་རྗེ་བཙུན་མི་ལ་ལ་རྗེས་འཛིན་ཀྱི་དབང་གདམས་ངག་རྣམས་གནང་ནས་ལྷོ་བྲག་སྟག་ཉལ་བསྒྲུབས་པ་ལ་བཞུགས་སུ་བཅུག རྗེ་བཙུན་མར་པ་དཔལ་ནཱ་རོ་པའི་དྲུང་དུ་དམ་བཅའ་ཕུལ་བ་ལྟར་བྱོན་པར་བཞེད་པས་མར་པ་མགོ་ལེགས་སོགས་བུ་སློབ་མང་པོ་དང་བཅས། སླར་ཡང་དབུ་རུ་བྱང་ཕྱོགས་ལ་གསེར་གྱི་འབུལ་སྡུད་ལ་བྱོན་པས། སྙན་གྲགས་ཀྱི་སྒོ་ནས་ཆོས་ཞུ་མཁན་མང་བའི་སྟབས་ཀྱིས་གསེར་གྱི་འབུལ་བ་མང་པོ་བྱུང་བའི་མཐར། མར་པ་མགོ་ལེགས་ཀྱི་སར་དབང་བསྐུར་ཅིག་མཛད་པའི་ཚེ། དབང་གི་དངོས་གཞི་ཟིན་ནས་རེས་ཆོ་ག་རྣམས་མཛད་དགོས་དགོངས་པའི་བར་དོ་ལ། རྗེ་མར་པ་མནལ་དང་འོད་འདྲེས་པའི་ངང་ལ་སོང་བའི་གཟིགས་སྣང་ལ། སྐུ་མདུན་དུ་ཚུར་དར་གྱི་གོས་དང་རུས་པའི་རྒྱན་གསོལ་བའི་བུད་མེད་མཛེས་མ་གསུམ་བསྒྲིགས་ནས། སྔར་
2-3-42a
པཎ་ཆེན་ནཱ་རོས་གསུངས་པའི་བརྡ་ཚིག་མ་གོ་བ་དེ་རྣམས་འགྲོལ་བའི་ཕྱིར། དབུས་མའི་རམ་གཡས་གཡོན་གཉིས་ཀྱིས་བཏེགས་ནས་དབྱངས་འདི་སྐད་དོ།། །།མཁའ་འགྲོ་ནམ་མཁའི་མེ་ཏོག་གིས། །སྙན་རྒྱུད་མོ་གཤམ་རྟ་ཞོན་ནས། །བརྗོད་མེད་རུས་སྦལ་སྤུས་བྲལ་(བྲབས་)ཏེ། །སྐྱེ་མེད་རི་བོང་ཕུར་པ་ཡིས། །ཏེ་ལོ་ཆོས་ཉིད་ཀློང་དུ་བསད། །ཏེ་ལོ་ལྐུགས་པའི་སྨྲ་བསམ་བརྗོད་མེད་ཀྱིས། །ནཱ་རོ་དམུས་ལོང་མཐོང་མེད་བདེན་མཐོང་གྲོལ། །ནཱ་རོ་འོན་པ་ཆོས་ཉིད་ཆོས་སྐུའི་རི་བོ་ལ། །བློ་གྲོས་ཞ་བོ་འོད་གསལ་འགྲོ་འོང་མེད་པར་རྒྱུག །ཉི་ཟླ་དགྱེས་པ་རྡོ་རྗེ་སྟེ། །གར་མཁན་དུ་མ་རོ་གཅིག་ཡིན། །དུང་ནི་སྙན་པ་ཕྱོགས་བཅུར་གྲགས། །འབུད་པ་སྣོད་ལྡན་དག་ལ་འབུད། །འཁོར་ལོ་བདེ་མཆོག་འཁོར་ལོ་སྟེ། །བསྐོར་བ་སྙན་བརྒྱུད་འཁོར་ལོ་ཉིད། །བུ་ཆུང་ཞེན་པ་མེད་པར་བསྐོར། །ཟེར་ཕྲལ་ཐུགས་དམ་སད་པ་དང་ཐལ་མོ་སྦྱར་ནས་སྤྱན་ཆབ་བསིལ་ཞིང་འདུག་པས། ཅི་ལགས་ཞུས་པས། ང་དཔལ་ནཱ་རོའི་དྲུང་དུ་མྱུར་བར་འགྲོ་དགོས་པ་འདུག་པས་སང་རང་འགྲོ་གསུངས་ནས་རྗེས་ཆོག་རྣམས་མཛད་དོ། །དེ་ནས་མར་པ་མགོ་ལེགས་ཀྱི་རྒྱུ་མཚན་རྣམས་ཞིབ་ཏུ་གསུང་ཞེས་གསོལ་བ་
2-3-42b
བཏབ་པས། རྒྱས་པར་གསུངས་པ་ལས། མར་པ་མགོ་ལེགས་ཀྱིས་འོ་ན་ད་ངེད་སློབ་མ་རྣམས་ཀྱི་འབུལ་བ་ཡང་གསེར་དུ་འབུལ། ཕྱག་རྫས་གཞན་རྣམས་ཀྱང་གསེར་དུ་བསྒྲིལ་བར་ཞུ་ཞུས་པ་ལྟར་གསེར་དུ་བསྒྲིལ་ནས། སླར་ཡང་མར་པ་མགོ་ལེགས་དང་བཅས་ལྷོ་བྲག་ཏུ་ཕེབས་ཏེ། རྒྱ་གར་ལ་འབྱོན་དགོས་དགོངས་བཞིན་པའི་ངང་ལ་ཞག་ཤས་ལུས་པའི་ཚེ། རྗེ་བཙུན་མི་ལ་ལྷོ་བྲག་སྟག་ཉ་ལ་སྒྲུབ་པའི་སྐུ་མཚམས་དམ་པོ་ལ་བཞུགས་ཡོད་པའི་མནལ་ལམ་དུ་བུད་མེད་སྔོ་བསངས་མ་དར་གྱི་ན་བཟའ་དང་རུས་པའི་རྒྱན་གྱིས་མཛེས་པ་སྨིན་མ་དང་སྨ་ར་སེར་ཁྱུག་གེ་བ་ཡོད་པ་ཞིག་བྱུང་ནས། ཁྱོད་ལ་ཡུན་དུ་བསྒོམས་པས་སངས་རྒྱ་བ་ཕྱག་ཆེན་དང་ཆོས་དྲུག་འདུག་སྟེ། ཚེགས་ཆུང་ངུ་བསྒོམས་པས་སངས་རྒྱ་བ་ཁྱད་པར་གྱི་འཕོ་བ་གྲོང་འཇུག་གི་གདམས་པ་དེ་མི་འདུག་པ་ཟེར་བྱུང་བས། དེ་ལུང་བསྟན་དང་བར་ཆད་གང་ཡིན་མི་ཤེས། ལུང་བསྟན་ཡིན་ན་ངའི་བླ་མ་དུས་གསུམ་སངས་རྒྱས་ལ་མེད་མི་སྲིད་སྙམ་བྱོན་ནས་ལོ་རྒྱུས་དང་བཅས་ཞུས་པས། དེ་མཁའ་འགྲོའི་ལུང་བསྟན་ཡིན་པ་འདུག་སྟེ། ང་རྒྱ་གར་ནས་ཚུར་འོང་དུས་པཎ་ཆེན་ནཱ་རོའི་ཞལ་ནས། གྲོང་འཇུག་དང་སྙན་བརྒྱུད་ཀྱི་གསུང་
2-3-43a
བགྲོས་ཤིག་བྱུང་སྟེ། ཞུས་སུ་ཚོར་བ་མི་འདུག་པས་དཔེ་རྣམས་ལྟ་གསུངས། དཔོན་སློབ་གཉིས་ཀས་རྒྱ་དཔེ་རྣམས་གཟིགས་པས་འཕོ་བའི་ཡིག་ཆ་མང་དག་འདུག་སྟེ། གྲོང་འཇུག་གི་དཔེ་མ་རྙེད་ནས་དབུ་རུ་བྱང་ཕྱོགས་སུ་བྱུང་བའི་བརྡ་འགྲོལ་དེ་རྣམས་ཀྱང་འདི་ཞུ་བ་ལ་བསྐུལ་བར་འདུག །གཞན་ཡང་སྙན་བརྒྱུད་ལ་སོགས་པའི་གདམས་ངག་ཅི་འདྲ་ཡོད་མི་ཤེས་པ་འདུག་པས། ང་རྒྱ་གར་ལ་མྱུར་དུ་འགྲོ་གསུང་པ་ལ། ཡུམ་བདག་མེད་མ་བུ་སློབ་དང་བཅས་པ་རྣམས་ཀྱིས་སྐུ་ན་བགྲེས་པ་ལ་སོགས་རྒྱུ་མཚན་དུ་མའི་སྒོ་ནས་བཤོལ་འདེབས་ཀྱི་ཞུ་བ་ནན་ཅན་ཕུལ་བ་ལ། ཁྱེད་རྣམས་ཅི་ཟེར་རུང་། ངས་ད་དུང་དཔལ་ནཱ་རོ་པའི་དྲུང་དུ་ལན་ཅིག་མཇལ་དུ་ཡོང་བའི་དམ་བཅའ་ཕུལ་ཞིང་། ནཱ་རོའི་ཞལ་ནས་ཀྱང་དེ་བཞིན་ཤོག་གསུང་པའི་ཞལ་ཏ་ཡོད་པས། ང་ཅི་ལ་ཐུག་རུང་རྒྱ་གར་ལ་འགྲོ་གསུངས་མི་གསན་པར་འདུག་པས་གཞན་བྱ་ཐབས་ནི་མ་བྱུང་། གསེར་ལ་སོགས་རྒྱ་གར་ལ་འབྱོན་པའི་ཕྱག་རྫས་རྣམས་སྦས་པ་ལས། ང་སྟོབས་ནུས་མ་ཐོན་ན་བྱ་ཐབས་མེད། ཐོན་བཞིན་བླ་མའི་དྲུང་དུ་དམ་བཅས་པ་ཉམས་པ་ལས་ཤི་བ་དགའ་གསུང་ནས་ཐུགས་རྒྱལ་བཞེངས་པའི་ངང་ལ་
2-3-43b
གཟིམས་བཞུགས། ནང་པར་གཟིམས་མལ་བུ་གུ་ཧ་རེ་གཤེགས་འདུག་པས། གྲྭ་པ་ཀུན་ཕྱོགས་བཅུར་ཁ་བཀྲམ་སྟེ་ཚོལ་དུ་རྒྱུགས་པས། རྗེ་བཙུན་མི་ལས་ཆག་ཕྱི་ཟིན། དེའི་སར་གཞན་རྣམས་ཀྱང་སླེབ་པ་རྣམས་ཀྱིས་ཞུ་བ་ཕུལ་བས། ང་འབུལ་བ་མེད་རུང་དམ་མ་ཉམས་པ་བྱེད། གསེར་མེད་རུང་རྒྱ་གར་ལ་འགྲོ་གསུངས་པ་ལ། འོ་ན་རེ་ཞིག་གྲོ་བོ་ལུང་དུ་ཅིས་ཀྱང་ཕེབས་དགོས། དེ་ནས་རྒྱ་གར་འབྱོན་པར་ཞུ་ཞེས་ཞུ་བ་ནན་གྱི་ཕུལ་བས་བྱོན་པའི་ཚེ། སླར་ཡང་སློབ་འབངས་ཀུན་གྱིས་ཕྱག་ཕུལ་ནས་ད་སྐུ་ན་བྱོན་པ་དང་། རྒྱ་གར་གྱི་འབྱོན་ལམ་ལ་དཔལ་མོ་དཔལ་ཐང་ཞེས་བྱ་བའི་ཐང་ཆེན་པོ་རྟ་ཡང་ངལ་དུབ་ཆད་པ་དང་། ཁ་ལ་བྱ་ལ་ཞེས་བྱ་བ་ཤིན་ཏུ་གྲང་བས་དབྱར་ཡང་འཁྱག་པ་དང་། རོང་དང་བལ་པོ་ཚད་པ་ཤིན་ཏུ་ཆེ་བ་དང་། ཆུ་བོ་གང་གཱ་ཆུ་ཆེན་པོ་འཇིགས་སུ་རུང་བ་དང་རྒྱ་གར་མཐའ་འཁོབ་དང་། ལམ་བར་གྱི་ཡུལ་ཕྲན་མུ་གེ་ཆེ་ཞིང་། སེར་ཇག་ལ་རྒོད་པ་རྣམས་ནི་བླ་མ་རང་གི་གསུང་ཚད་མ་ཡིན་པས་བདེན་ངེས་ཡིན། ད་དེ་ལྟ་བུའི་ཉེན་ལ་བདོས་ནས་རྒྱ་གར་ལ་བྱོན་རུང་སྐུ་ཚེའི་བར་ཆད་དུ་སོང་ན་རང་རེའི་གྲྭ་པ་བུ་སློབ་གདུལ་བྱར་གྱུར་པ་རྣམས་སུ་ལ་རེ་ཞིང་ཇི་སྐད་བྱེད། གང་ཟག་གིས་ཉམས་
2-3-44a
ལེན་ནུས་ན། ཆོས་སྔར་བོད་དུ་འགྱུར་བ་རྣམས་ཀྱིས་ཅི་དགོས་ཆོག །བླ་མ་ནི་ཐུགས་ཀྱི་དཀྱིལ་དུ་སྒོམ་ཞིང་བཞུགས་པ་ལ་གསོལ་བ་འབྲལ་མེད་བཏབ་པས་ཐུགས་རྗེའི་བྱིན་རླབས་ལ་ཐག་ཉེ་རིང་མེད་ཕྱིར། འདིར་བཞུགས་རུང་ཆོག་ལགས་མོད། ཅིས་ཀྱང་སྔར་བོད་དུ་སྤྱན་དྲངས་པའི་ཆོས་ཀྱི་མི་ཆོག་པར་ལེན་དགོས་ན། སྲས་དར་མ་མདོ་སྡེ་ཆག་ཕྱི་བ་དང་བཅས་པ་ལ་བསླབ་བྱ་ལམ་ཡིག་གནང་ནས་ཆོས་ཞུ་བ་ལ་བརྫངས་ཏེ། བླ་མ་རང་ད་ལན་བོད་ཀྱི་གདུལ་བྱ་རྣམས་ལ་དགོངས་ནས་ཅིས་ཀྱང་བཞུགས་པ་ཐུགས་རྗེས་འཛིན་པ་ཞུ་ཞེས་གསོལ་བ་བཏབ་པ་ལས། བླ་མའི་ཞལ་ནས། བླ་མའི་ཐུགས་རྗེ་ལ་ཉེ་རིང་མེད་རུང་། ངས་ད་དུང་ལན་ཅིག་མཇལ་དུ་འོང་བའི་དམ་བཅའ་ཕུལ་ཡོད། བོད་ཀྱི་གདུལ་བྱ་རྣམས་ལ་བརྩེ་བའི་ཕྱིར། སྔར་མ་ཐོབ་པའི་གདམས་ངག་ཁྱད་པར་ཅན་ཡོང་ཕྱིར་ལེན་པ་ལ་མཁའ་འགྲོས་བརྡ་བཀྲོལ་ནས་བསྐུལ་འདེད་རིམ་པར་བྱེད་པ་ལ་ངེས་ཤེས་འདྲོངས་པས་འགྲོ་བ་ཡིན། དེ་ལ་སྤྱིར་དར་མ་མདོ་སྡེ་བཏང་རུང་ན་གཞོན་པས་ཀུན་སེམས་ལས་ཆེ་བ་མིན་པ་མི་འོང་ཞིང་། ཁྱད་པར་ངས་བླ་མའི་དྲུང་དུ་ང་རང་འོང་བར་ཞུས་པ་མ་གཏོགས་བུ་གཏོང་
2-3-44b
བར་མ་ཞུས། ཚོང་པ་རྒས་པ་ལུས་ཟུངས་ངན་རུང་ལམ་རྒྱུས་བཟང་ཟེར་བ་ལྟར། ང་ལུས་ཅུང་ཟད་རྒས་རུང་རྒྱ་གར་མི་བགྲོད་པའི་རྒན་པོ་མིན། རྒྱ་གར་གྱི་རྒྱུས་ཀྱང་ང་རང་ཆེ་བས་ད་ལན་ལས་ཅི་ལ་ཐུག་རུང་ཆོས་ལེན་དུ་འགྲོ་བ་ཡིན། ལམ་བར་ལ་འཇིགས་པ་དེ་དག་ཡོད་ད་ཡོད་དེ། ང་ལ་དེ་དག་གིས་མི་བརྫི་བའི་གདེང་འདི་དག་ཡོད་པས། ད་ལན་འཆི་བ་སྲོག་ལ་བབ་ཀྱང་རྒྱ་གར་ལ་འགྲོ་གསུང་། རྒྱ་གར་ཕར་འབྱོན་གྱི་མགུར་འདི་གསུངས་སོ།། །།དཔའ་ནཱ་རོ་མཻ་ཏྲིའི་ཞབས་ལ་འདུད། །ངས་ནཱ་རོའི་དྲུང་དུ་དམ་བཅས་པའི། །དགོས་པ་མཆོག་ཅིག་ཡོད་པའི་ཕྱིར། །གསུང་མཁའ་འགྲོས་བརྡ་བཀྲོལ་བསྐུལ་མཛད་པས། །བླ་མ་དྲན་ཏེ་བཟོད་བརླག་མེད། །ང་ལས་ཅི་ལ་ཐུག་ཀྱང་རྒྱ་གར་ལ་འགྲོ། །འཆི་བ་སྲོག་ལ་བབ་ཀྱང་རྒྱ་གར་ལ་འགྲོ། །དཔལ་མོ་དཔལ་ཐང་ཐང་དུ་ཆེ་ལགས་ཀྱང་། །ང་ལ་རྣམ་ཤེས་རླུང་ཞོན་གྱི་གདམས་པ་ཡོད། །འདི་མདོ་ཕྲུག་ཕལ་གྱིས་དོ་ཟླ་མེན་(མེད། །)ལས་ཅི་ལ་ཐུག་ཀྱང་རྒྱ་གར་ལ་འགྲོ། །འཆི་བ་སྲོག་ལ་བབ་ཀྱང་རྒྱ་གར་ལ་འགྲོ། །ལ་ཁ་ལ་བྱ་བ་ཤིན་ཏུ་གྲང་ལགས་ཀྱང་། །ང་ལ་གཏུམ་མོ་མེ་འབར་གྱི་གདམས་ངག་ཡོད། །འདི་རྣལ་གོས་ཕལ་གྱི་དོ་ཟླ་མིན། །
2-3-45a
ལས་ཅི་ལ་ཐུག་ཀྱང་རྒྱ་གར་ལ་འགྲོ། །འཆི་བ་སྲོག་ལ་བབ་ཀྱང་རྒྱ་གར་ལ་འགྲོ། །བལ་པོ་ཤིན་ཏུ་ཚད་པ་ཆེ་ལགས་ཀྱང་། །ང་ལ་འབྱུང་བ་རོ་སྙོམས་ཀྱི་གདམས་ངག་ཡོད། །འདི་བཟང་དྲུག་ཕལ་གྱི་དོ་ཟླ་མིན། །ལས་ཅི་ལ་ཐུག་ཀྱང་རྒྱ་གར་ལ་འགྲོ། །འཆི་བ་སྲོག་ལ་བབ་ཀྱང་རྒྱ་གར་ལ་འགྲོ། །ཆུ་བོ་གངྒཱ་ཆུ་རུ་ཆེ་ལགས་ཀྱང་། །ང་ལ་རྣམ་ཤེས་མཁའ་ལྡིང་གི་གདམས་ངག་ཡོད། །འདི་གྲུ་གཟིངས་ཕལ་གྱི་དོ་ཟླ་མིན། །ལས་ཅི་ལ་ཐུག་ཀྱང་རྒྱ་གར་ལ་འགྲོ། །འཆི་བ་སྲོག་ལ་བབ་ཀྱང་རྒྱ་གར་ལ་འགྲོ། །རྒྱ་གར་མཐའ་འཁོབ་མུ་གེ་ཆེ་ལགས་ཀྱང་། །ང་ལ་དཀའ་ཐུབ་ཆུ་འཐུང་གི་གདམས་ངག་ཡོད། །འདི་བཟའ་བཏུང་ཕལ་གྱི་དོ་ཟླ་མིན། །ལས་ཅི་ལ་ཐུག་ཀྱང་རྒྱ་གར་ལ་འགྲོ། །འཆི་བ་སྲོག་ལ་བབ་ཀྱང་རྒྱ་གར་ལ་འགྲོ། །ལམ་བར་དང་ཡུལ་ཕྲན་འཇིགས་པ་ཆེ་ལགས་ཀྱང་། །ང་ལ་མ་མོ་ཇག་ཆིངས་ཀྱི་གདམས་ངག་ཡོད། །འདི་ཟླ་སྐྱེལ་ཕལ་གྱི་དོ་ཟླ་མིན། །ལས་ཅི་ལ་ཐུག་ཀྱང་རྒྱ་གར་ལ་འགྲོ། །འཆི་བ་སྲོག་ལ་བབ་ཀྱང་རྒྱ་གར་ལ་འགྲོ། །བླ་མ་ནཱ་རོ་དང་མཻ་ཏྲི་ཡང་རྒྱ་གར་ན་བཞུགས། །དཔལ་ཞི་བ་བཟང་པོ་ཡང་རྒྱ་གར་ན་བཞུགས། །རྟེན་མ་ཧཱ་བོ་དྷི་
2-3-45b
ཡང་རྒྱ་གར་ན་བཞུགས། ང་ལས་ཅི་ལ་ཐུག་ཀྱང་རྒྱ་གར་ལ་འགྲོ། །འཆི་བ་སྲོག་ལ་བབ་ཀྱང་རྒྱ་གར་ལ་འགྲོ། །ཞེས་གསུངས་ཤིང་ཐག་ཆོད་པའི་ཚེ། སྔར་འབུལ་སྡུད་ལས་བྱུང་བའི་གསེར་དང་། སློབ་མ་རྣམས་ཀྱི་འབུལ་བ་ཐམས་ཅད་གསེར་དུ་བསྒྲིལ་བས། གསེར་དཀར་ཡོལ་གང་བྱུང་བ་བསྣམས་ཏེ། གཞན་ཕྱག་ཕྱི་ལ་གཏོང་བའི་ཞུ་བ་ཕུལ་ཡང་མ་གནང་བར་གཅིག་པུ་རྒྱ་གར་ལ་བྱོན་ནོ།། །།
༈ བླ་མ་ནཱ་རོ་པ་བཙལ་ཞིང་ཆོས་གསན་ཚུལ།
གཉིས་པ་བླ་མ་ནཱ་རོ་པ་བཙལ་ཞིང་ཆོས་གསན་ཚུལ་ནི། རྗེ་མར་པས་འབྱོན་ལམ་ཉང་སྟོད་ལ་བྱོན་པས་བཞེངས་ཀྱི་གླང་པོ་སྔར་ཇོ་བོ་རྗེ་བོད་དུ་བྱོན་པ་དང་མཇལ་བས་སྔར་ནཱ་རོ་པའི་དྲུང་དུ་ནཱ་ལེན་ཏྲའི་ཆོས་ཁྲིམས་མཛད་པ་རྒྱལ་རིགས་ཀྱི་པཎྜི་ཏ་ཞི་དུལ་ཅན་ཞིག་ཆོས་ཞུ་བ་ལ་ཡང་ཡང་འབྱོན་ཞིང་འདུག་པ་དེ་ཡིན་པར་ཤེས་ནས། མངའ་བདག་མཻ་ཏྲི་པས་དམ་རྫས་བསྟེན་པ་ལ་ཐུགས་སུ་མ་ཤོང་བའི་རྣམ་པས་སྐུར་པ་ཅུང་ཟད་བཏབ་རུང་། དགེ་འདུན་སོ་ཐར་བ་སྤྱིའི་ཁྲིམས་ཡིན་ཕྱིར་ཁོང་རང་ལ་རང་འདོད་མེད་པ་དང་། ཞི་དུལ་ཆེ་ཞིང་བོད་དུ་སངས་རྒྱས་ཀྱི་བསྟན་པ་སྤེལ་བ་ལ་བྱོན་པས་ཐུགས་ལ་དགའ་སྤྲོ་དང་དག་སྣང་ཤར་ཏེ། དབང་རྡོ་རྗེ་ཕྲེང་བ་གནང་བའི་ཞོར་ཅིག་འདུག་
2-3-46a
པས། གསོལ་བ་བཏབ་པས་གནང་སྟེ། ནཱ་རོ་པ་གར་བཞུགས་ཀྱི་གསུང་གླེང་ཞུས་པས། ནཱ་རོ་པ་སྤྱོད་པ་ལ་གཤེགས་ནས་མི་མ་ཡིན་གྱི་ཚོགས་དཔོན་མཛད་པ་མ་གཏོགས་མི་དང་མི་མཇལ་བ་འདུག་ཟེར། ཁྱེད་དང་ཡང་ཨེ་མཇལ་མི་ཤེས་པས། རྒྱ་གར་ལ་བྱོན་པ་བས་ངའི་ལོ་ཙྪ་(ལོཙྪ་)ལ་ཕྱིན་པ་འགྲོ་དོན་ཆེ་གསུངས་པ་ལ། ཐུགས་ལ་མི་མཇལ་མི་སྲིད་སྙམ་པ་ཤར་རུང་། ཞལ་ནས། མི་མཇལ་རུང་ལན་ཅིང་རྒྱ་གར་ལ་ཅིས་ཀྱང་འགྲོ་ཞུས་ནས་བྱོན་ཏེ། བལ་པོར་ཕེབས་ཚེ་བླ་མ་པེན་ཏ་བ་དང་སྤྱི་ཐེར་བ་གཉིས་ལས། ཇོ་བོའི་གསུང་ལྟར་ནཱ་རོ་པ་སྤྱོད་པ་ལ་གཤེགས་པའི་གཏམ་ཐོས་པས་ཐུགས་ཐོན་འགྲོ་བ་ལྟ་བུའི་སྡུག་བསྔལ་བྱུང་། ད་མི་མཇལ་ལམ་ཞུས་པས། ཁྱེད་སློབ་མ་དམ་ཚིག་ཅན་ཡིན་ཅིང་། རྗེ་བཙུན་ཆོས་ཀྱི་སྤྱན་ཅན་ཡིན་ཕྱིར་མཇལ་ངེས་པས་ཚོགས་མཆོད་ཕུལ་བའི་གསོལ་བ་ཐོབ་ཟེར་བ་ལྟར་བྱེད་དགོས་དགོངས་ནས་རྒྱ་གར་ལ་བྱོན། དགེ་ཚུལ་ཤེས་རབ་སེང་གེ་དང་མཇལ་བས། དགེ་ཚུལ་བ་ན་རེ། ཁྱེད་འོང་བ་ཕྱིས། རྗེ་བཙུན་ན་ནིང་གི་ལོ་གསར་གྱི་ཉ་ལ་སྤྱོད་པ་ལ་གཤེགས། དེ་ཙམ་ཅི་བྱེད་ཅིང་བསྡད་ཟེར། གསེར་བསྒྲུབ་ཅིང་བསྡད་པའི་བར་ལ། 
2-3-46b
མཁའ་འགྲོས་སྙན་བརྒྱུད་ཞུ་བ་ལ་བསྐུལ་བའི་ལོ་རྒྱུས་རྣམས་རྒྱས་པར་བཤད་ནས། དེ་ཡང་བརྡ་བསྐུལ་འདི་དག་གིས་མྱུར་བར་བྱུང་བ་ཡིན་ཏེ། ད་བླ་མ་དང་མཇལ་བ་ཞིག་རང་བསོད་ནམས་ལ་མ་བཀོད་པ་འདྲ། རྗེ་བཙུན་མི་བཞུགས་སྟང་། ཁྱེད་ལ་སྙན་བརྒྱུད་ཀྱི་ཆོས་མངའམ་ཅི། བདག་གི་གསུང་སྒྲོས་སམ་ཞལ་ཏ་རེ་ཙམ་འདུག་གེ་བྱས། མཚན་ནས་བོས། མང་དུ་བཤུམས་པས། དགེ་ཚུལ་བ་ན་རེ། སྙན་བརྒྱུད་དམ་དེ་འདྲ་ཐོས་ཡང་མ་ཐོས། ཁོ་ཡོང་རྒྱུ་ཡིན་ཏེ་གསུངས། ཁྱེད་ལ་ཐུགས་བརྩེ་བའི་གསུང་མང་པོ་རང་ཡང་ཡང་འབྱོན་གྱིན་འདུག །འབྱོན་ཁར་ཁོ་ཡོང་ངེས་ཡིན་པས་འདི་རྣམས་སྤྲོད་གསུངས། ཕྱག་མཚན་རྡོ་རྗེ་དྲིལ་བུ་དང་། ཐུགས་དམ་ཐང་ཁ་གཉིས་བཞག་པ་ཡིན་ཏེ། རྡོ་རྗེ་དྲིལ་བུ་རྐུ་ལ་ཤོར་བས་འདི་ལུས་དང་འབྲལ་མེད་བྱས་པ་ཡིན་ཟེར། དགྱེས་རྡོར་གྱི་བྲིས་སྐུ་སྤྲད་བྱུང་བས་ཀྱང་བླ་མ་སྙིང་ལ་འདོད་པས་གདུངས་ཏེ་བཟོད་གླགས་མེད་པའི་སྤྱན་ཆབ་ཤོར་བ་དང་། དགེ་ཚུལ་བ་ན་རེ། ཁྱོད་ཀྱི་བླ་མ་མོས་པའི་གདུང་ཤུགས་འདི་དང་། རྗེ་བཙུན་ཆོས་ཀྱི་སྤྱན་ཅན་གྱི་ཐུགས་རྗེ་ནང་མཐུན་ཕྱིར་མཇལ་ངེས་པས། གསེར་གྱི་ཆ་རྐྱེན་འདི་དག་གིས་ཚོགས་མཆོད་
2-3-47a
ཕུལ་ལ་གསོལ་བ་ཐོབ། དེ་ཡང་ཐོག་མར་ཁྱེད་རང་གི་བླ་མ་ཡང་ཡིན། རྗེ་བཙུན་གྱི་སློབ་མ་ཡང་ཡིན་པས་མངའ་བདག་མཻ་ཏྲི་པའི་དྲུང་དུ་བྱོན་ལ་གསོལ་བ་ཐོབ་ཟེར་བ་ལྟར། མཻ་ཏྲི་པའི་སར་བྱོན་ཚོགས་མཆོད་ཟླ་བ་གཅིག་ཕུལ་བའི་མཐར། མཇལ་བར་ལུང་བསྟན་པ་ནི།། །།ནོར་བུ་རྒྱལ་མཚན་རྩེ་ལ་འཕྱར། །སྒེག་མོ་མེ་ལོང་ཟུར་མིག་བལྟ། །བྱ་འཕུར་སྟེང་ནས་རྒྱལ་མཚན་འཕྱར། །དེད་དཔོན་གྲུ་གཟིངས་གཏོང་བར་རྨི། །དཔལ་ནཱ་རོ་པ་དང་མཇལ་བར་ངེས། །གསུངས་སོ། །དེ་ནས་ཡང་ཁྱེད་རང་གི་སློབ་དཔོན་རྗེ་བཙུན་དང་ཕར་སློབ་ཚུར་སློབ་ཞི་བ་བཟང་པོ་ཅན་སོང་ལ་ཟླ་བ་གཅིག་གསོལ་བ་ཐོབ་ཟེར་ཕྱིན་པས་དུག་མཚོའི་གླིང་ནས་ཚུར་བྱོན་ཏེ་ཤིང་ཏིང་ཏིང་ཁུན་པའི་འགྲམ་ན་བཞུགས་པ་ལ་ཟླ་བ་གཅིག་གསོལ་བ་བཏབ་པས་ལུང་བསྟན་པ།། །།རྗེ་བཙུན་དཔལ་ལྡན་ནཱ་རོ་པ། །གླང་པོ་ཆེ་ཡི་ལྟ་སྟངས་ཀྱིས། །སྤྱན་མིག་གཉིས་ལ་ཉི་ཟླ་ཡི། །འོད་ཟེར་བོད་དུ་བཀྱེ་བ་རྨིས། །ནཱ་རོ་པ་དང་མཇལ་ཏེ་འོངས་། །གསུངས་སོ། །དེ་ནས་ནཱ་རོ་པའི་སློབ་མ་རྣལ་འབྱོར་མ་རུས་པའི་རྒྱན་ཅན་དུར་ཁྲོད་ན་བཞུགས་པའི་སར་སོང་ལ་གསོལ་བ་ཐོབ་གསུངས་ནས་ཕྱིན་ཏེ་གསོལ་
2-3-47b
བ་བཏབ་པས་ལུང་བསྟན་པ། །རི་གསུམ་རྩེ་ནས་དུང་འབུད་ཅིང་། །ལུང་གསུམ་མདོ་ནས་ལམ་སྣ་ཁྲིད། །བུམ་ནང་མར་མེ་འབར་བ་ཡིས། །འཛམ་གླིང་འོད་ཀྱིས་གང་བར་རྨི། །ནཱ་རོ་པ་དང་མཇལ་ཏེ་འོངས། །གསུངས་སོ། །དེ་ནས་དགེ་ཚུལ་བ་ཤེས་རབ་སེངྒེ་ན་རེ། ད་ཡང་རྗེ་བཙུན་ལ་ངོ་མི་ཆུང་བས་ཟླ་བ་གཅིག་གསོལ་བ་ཐོབ་གསུང་ནས་བཏབ་པས་ལུང་བསྟན་པ། བདག་གིས་མྱ་ངན་ཐང་ཆེན་ལ། །དམུས་ལོང་ཁྲིད་དེ་གཞན་ལ་སྤྲད། །དེ་ཡིས་མ་རིག་མིག་ཕྱེས་ནས། །སེམས་ཀྱི་མེ་ལོང་བལྟས་པ་རྨི། །ནཱ་རོ་པ་དང་མཇལ་ཏེ་འོངས་། །གསུངས་སོ། །དེ་ནས་ནཱ་རོ་པའི་རྡོ་རྗེ་སྤུན་རི་རི་པ་དང་། ཀ་སོ་རི་པ་ཅན་སོང་ལ་གསོལ་བ་ཐོབ་གསུངས་ནས། རི་རི་པ་ཅན་ལ་ཟླ་བ་གཅིག་ལ་གསོལ་བ་བཏབ་པས། ལུང་བསྟན་པ།། །།སྔོན་ཚེ་བྲམ་ཟེ་བཟང་ལྡན་ལ། །རིགས་ལྡན་ཆོས་ཀྱི་རྒྱལ་པོ་ཡིས། །དགེ་བཟང་དཔང་བཙུགས་གསོལ་བཏབ་པའི། །འབྲས་བུ་འདིར་འོང་མི་མཇལ་མེད། །དེའི་དོན་བླ་མ་ནཱ་རོ་པའི་ཐུགས་རྗེ་དང་། སློབ་མ་མོས་གུས་ཅན་ཁྱེད་ཀྱི་གདུང་ཤུགས་ནང་འཛོམ་པའི་ནུས་པས། ད་ནང་ང་ཡང་སྐྱེ་བ་ཡང་སྔ་མ་དྲན་ཞིང་ཤེས་པ་ཞིག་བྱུང་བ་ནི་ནཱ་རོ་པ་བྲམ་ཟེ་
2-3-48a
བཟང་ལྡན་ཞབས་བྱ་བར་གྱུར། ལོ་ཙྪ་(ལོཙྪ་)བ་ཁྱེད་བྱང་ཕྱོགས་ཀྱི་རིགས་ལྡན་ཆོས་ཀྱི་རྒྱལ་པོ་བྱ་བ་ཡིན། ང་དྲང་སྲོང་དགེ་བ། ཀ་སོ་རི་པ་བྲམ་ཟེ་བཟང་པོ། དེ་གཉིས་དཔང་པོར་བཞག་ནས། ཕྱི་མ་ལ་མཇལ་བར་གསོལ་བ་བཏབ་པས་ཞལ་གྱིས་བཞེས་པ་ཡིན་གསུངས། དེ་ནས་ཀ་སོ་རི་པ་ཅན་ཟླ་བ་གཅིག་གསོལ་བ་བཏབ་པས་ལུང་བསྟན་པ།། །།ཡོངས་དག་ཟླ་བའི་དཀྱིལ་འཁོར་ནི། །མི་གཡོ་ཕུ་ལ་ཧ་རི་རུ། །སེམས་ཉིད་ཆོས་སྐུའི་མེ་ལོང་ནི། །ནཱ་རོ་པ་ཡི་(ཡིས་)སྟོན་པར་འགྱུར། །ཅེས་གསུངས་པ་སོགས་མཇལ་བའི་ལུང་བསྟན་ཁོ་ན་བྱུང་བས་དགའ་སྤྲོའི་སྤོབས་པ་ཞིག་སྐྱེས། རྗེ་བཙུན་སྙིང་ལ་འདོད་པས་གདུངས་ཏེ་སྡོད་མ་ཟུག་པར་རེས་གྲོགས་དང་བཅས་ཏེ་བཙལ། རེས་གྲོགས་མེད་དུ་རི་སུལ་དང་། ནགས་ཁྲོད་དང་། གྲོང་ཁྱེར་རྣམས་ཉུལ་ཞིང་བཙལ་བས་ལམ་ལོག་སྟེ། ཤར་ཁྲི་སྒོ་རྩགས་(བརྩེགས་)པའི་གྲོང་དུ་སྡིག་སྤྱོད་རྒྱལ་པོས་གསེར་འདོད་པའི་ཕྱིར། བླ་མཆོད་གྱིས་ཟེར་བཙོན་དུ་བཟུང་བ་ལ། ང་བླ་མ་ནཱ་རོ་པ་ཚོལ་དུ་འགྲོ་བས་བསྡད་ལོང་མེད་ཅེས་གསུངས་ནས་འགྲོ་བར་ཆས་པས། ཁྱོད་སྙིང་རྗེ་བ་ཅིག་འདུག་པ། རྒྱགས་འདི་ཁྱེར་ལ་བཞུད་ཟེར་
2-3-48b
ནས། ཉ་ལྟང་དཀར་གྱི་ཁོང་པ་ཅིག་དང་། འབྲས་བྲེ་དྲུག་རྣམས་བསྐུར་ནས། འདི་ནས་ཤར་དྲང་པོ་ལ་བྱོན་ཟེར་བ་ལྟར་ཕྱིན་ཏེ་ཟླ་བ་བརྒྱད་བཙལ་བའི་དང་པོ་ལ། མར་པའི་མནལ་ལམ་དུ་རྗེ་ནཱ་རོ་པ་དེ་སེང་གེ་ལ་ཆིབས། ཛྙཱ་ན་མ་ཏི་དང་། གུ་ན་མ་སིང་དྷི་བྱ་བའི་ཕྱག་རྒྱ་མ་གཉིས་ཀྱིས་མཐའ་བརྟེན་ནས་ཉི་ཟླའི་སྟེང་དུ་གར་བསྒྱུར་གླུ་ལེན་པ་མཐོང་ངོ་། །དེ་ལ་གསོལ་བ་བཏབ་པས། རྣལ་འབྱོར་མ་དེ་གཉིས་ན་རེ། ནཱ་རོ་གཉིས་མེད་ཟུང་འཇུག་སྟེ། །ཕྱག་རྒྱ་གཉིས་ཀྱིས་མཐའ་བརྟེན་ཅིང་། །སེང་གེ་ཞོན་ནས་ཉི་ཟླ་ཡི། །སྟེང་ནས་གར་བསྒྱུར་གླུ་ལེན་པའི། །རྨི་ལམ་འཁྲུལ་པས་མི་བསླུའམ། །ཟེར་རོ། །དེ་ནས་ཟླ་བ་གཉིས་པ་ལ་བླ་མ་སེན་ཏ་པ་རྒྱ་གར་དུ་འབྱོན་པ་གྲོགས་སུ་ཁྲིད། རེས་བྲམ་ཟེའི་ཁྱེའུ་གསེར་ཕྲང་གྲོགས་སུ་ཁྲིད་ནས་བཙལ་བས་མ་རྙེད་ཅིང་ངལ་དུབ་སྒྱིད་ལུག་པའི་ཚེ། ནམ་མཁའ་ནས་སྒྲ་ཞིག་ན་རེ། དད་གུས་རྒྱུན་ཆད་མེད་ཀྱི་རྟ། །བརྩོན་འགྲུས་ལྕག་གིས་མ་བསྐུལ་ན། །གཟུང་འཛིན་རི་དྭགས་དངོས་པོ་ཡི། །རྒྱར་ཆུད་འཁོར་བ་མི་འཁྱམས་སམ། །ཟེར་རོ། །དེ་ནས་ཟླ་བ་གསུམ་པ་ལ། གྲོགས་བོར་ནས་གཅིག་པུར་ཚོལ་ཞིང་། ཕྱུགས་རྫི་འདྲ་ལ་དྲིས་པས་མཐོང་ཟེར་ནས་བརྔན་པ་བྱིན་ཏེ་བཙལ་བས། ནཱ་རོ་པའི་ཞབས་རྗེས་
2-3-49a
འདུག་པའི་ས་སྤྱི་བོར་བཞག་ནས་བཙལ་བས། སྒྲ་གཅིག་ན་རེ། རྗེས་ནི་བྱ་ལམ་ཇི་བཞིན་དུ། །ངོས་བཟུང་མེད་པར་མ་ཤེས་ན། །ཁྱི་ཡིས་བྱ་འཕུར་གྲིབ་སྙོགས་བཞིན། །དོན་མེད་གཡང་ལ་མི་འཁྱམ་མམ། །ཟེར་རོ། །དེ་ནས་ཟླ་བ་བཞི་པ་ལ་བཙལ་བས། རི་ལོགས་ཤིག་ན་ཕར་རྣལ་འབྱོར་པ་གོས་སེར་པོ་གྱོན་པ་ཞིག་སོང་བ་ལས། ཡིན་ནམ་མིན་ནམ་བསམ་ཞིང་བསྡད་པས། གང་ཡང་སྐྱེ་བ་མེད་པ་ཡི། །སེམས་ཉིད་ཆོས་ཉིད་ཆོས་སྐུ་རུ། །ཐེ་ཚོམ་སྦྲུལ་མདུད་མ་གློད་ན། །རྩེ་གཉིས་ཁབ་ཀྱིས་དོན་མི་གྲུབ། །ཅེས་གསུངས་ནས་གཤེགས་སོ། །དེ་ནས་ཟླ་བ་ལྔ་པ་ལ་བཙལ་བས། ཞལ་མཐོང་སྟེ་ཞེན་པ་སྐྱེས་པ་ལས། །འཇའ་ཚོན་ལྟ་བུ་ཞེན་མེད་ལུས། །ངོས་བཟུང་མེད་པར་མ་ཤེས་ན། །དམུས་ལོང་ལྟད་མོ་ལྟ་བ་བཞིན། །དེ་དོན་རིག་པར་ག་ལ་འགྱུར། །གསུངས་ནས་གཤེགས་སོ། །དེ་ནས་ཟླ་བ་དྲུག་པ་ལ་བཙལ་བས། ཉམས་ལ་བྱེ་སྟོངས་ཤིག་ན་བཞུགས་འདུག་པ་ལ་གསོལ་བ་བཏབ། གསེར་གྱི་མཎྜལ་ཕུལ་ནས་ཆོས་ཞུས་པས། སྣང་སྲིད་གདོད་ནས་དག་པ་ལ། །ཆོས་ཉིད་མཎྜལ་མ་ཕུལ་ན། །ཞེན་བཅས་རིན་ཆེན་མཎྜལ་གྱིས། །ཆོས་བརྒྱད་སྒྲོག་ཏུ་མ་ཆུད་དམ། །གསུངས་ནས་གཤེགས་
2-3-49b
སོ། །ཡང་ཟླ་བ་བདུན་པ་ལ་བཙལ་བས། ཉམས་ལ་བྲག་ཕུགས་གཅིག་ན་མི་རོ་ཅིག་གིས་ཁོག་པ་ཕྱེས། ཐོད་པ་ཕོག་ནས་ཀླད་པ་དང་རྒྱུ་མ་ལ་སོགས་པ་རྣམས་རྩིབ་མས་ཀྲུག་ནས་གསོལ་གྱིན་འདུག་པ་ལ་གསོལ་བ་བཏབ་གདམས་ངག་ཞུས་པས། རྩིབ་ཁྱིམ་གང་བྱིན་པ་སྐྱུག་དྲོ་ནས་མ་ཟོས་པས། བདེ་བ་ཆེན་པོའི་སྣོད་ཆེན་དུ། །བདེ་ཆེན་ལོངས་སྤྱོད་རོ་མཉམ་དག །བདེ་བ་ཆེན་པོར་མ་སྤྱད་ན། །བདེ་ཆེན་ལོངས་སྤྱོད་འབྱུང་མི་འགྱུར། །གསུངས་ཏེ་ཤར་སྤྲུགས་ནས་གཤེགས་སོ། །བལྟས་པས་རོ་ལ་སོགས་པ་ཅི་ཡང་མི་འདུག །ཐོར་མ་ཅིག་རྩིག་ལོགས་ལ་གོས་འདུག་པ་བལྡགས་པས། རོ་ཕུན་སུམ་ཚོགས་པ་ཅིག་བྱུང་སྟེ། ཏིང་འཛིན་བཟང་པོ་ཡང་སྐྱེས་སོ། །ཡང་ཟླ་བ་བརྒྱད་པ་ལ་བཙལ་བའི་ཉམས་ལ། རྗེ་བཙུན་མཐོང་ནས་དད་པས་མ་ཟིན། ཐང་ཆད་པའི་ངང་བཞུགས་འདུག་པ་ལ་གསོལ་བ་བཏབ་གདམས་ངག་ཞུས་པས། ཆོས་ཉིད་འོད་གསལ་བྱ་བྲལ་རྟ། །འགྲོ་འོང་མེད་པར་མ་རྒྱུགས་ན། ། རི་དྭགས་སྨིག་སྒྱུ་(རྒྱུ་)སྙོག་པ་བཞིན། །དོན་མེད་ཐང་ལ་མི་འཁྱམ་མམ། །ཞེས་གསུངས། གསུང་གླེང་འགའ་ཡང་བྱུང་བ་ཤར་ཏེ། དེ་ཡན་ཆད་ནི་ཐུགས་ཉམས་ལ་བྱུང་བ་ཁོ་ནའོ། ། ཟླ་བ་བརྒྱད་སོང་བའི་ཚེ། 
2-3-50a
ཐུགས་སྐྱོ་ནས་ཕྱག་དཔེ་ལ་གཟིགས་རྟོག་མཛད་ཅིང་བཞུགས་པས་པཎ་ཆེན་ནཱ་རོ་དྲན་ནས་མ་བཟོད་པར་དཔེ་ཆ་བལྟ་འཕྲོ་ལ་བོར་ཏེ། རི་མུན་པ་ཅན་ཞེས་བྱ་བའི་ནགས་ལ་འཚོལ་དུ་ཕྱིན་ནས་ཕྱུགས་རྫི་ཞིག་ལ་དྲིས་པས་བརྔན་པ་དགོས་ཟེར། གསེར་བྱིན་ནས་དྲིས་པས། ཤེལ་གྱི་ཕ་བོང་ལ་ནཱ་རོའི་ཞབས་རྗེས་ཡོད་པ་ཅིག་བསྟོན་པས། རྗེ་བཙུན་དང་མཇལ་སྙམ་བྱེད་པའི་དགའ་སྤྲོ་དཔག་ཏུ་མེད་པ་ཅིག་ཐོབ་སྟེ། གདུང་ཤུགས་དྲག་པོས་གསོལ་བ་བཏབ་པས། ནཱ་རོ་པའི་ཐུགས་ཀྱི་སྤྲུལ་པ་ཙན་དན་སྡོང་པོ་ཡལ་འདབ་ཤིན་ཏུ་རྒྱས་པ་ཞིག་གི་རྩེ་ལ་འཇའ་འོད་འཁྲིགས་པའི་གུར་ཁང་ཙན་དན་སྡོང་པོ་ལ་རེག་མ་རེག་ཞིག་གི་ནང་ན་བཅོམ་ལྡན་འདས་དགྱེས་པ་རྡོ་རྗེ་སྤྲུལ་པའི་ལྷ་དགུ་སྐུ་མདོག་ཕྱག་མཚན་རྒྱན་ཆ་ལུགས་རྣམས་གསལ་ཞིང་རྫོགས་པ་མཐོང་བས། དེ་བླ་མའི་སྤྲུལ་པར་ཤེས་ནས་ཕྱག་མཆོད་ཕུལ་གསོལ་བ་བཏབ་པས། ཡུམ་བདག་མེད་མའི་ཐུགས་ཀ་ནས་ཨཥྚའི་སྔགས་སྤུ་ཤད་ཀྱིས་བྲིས་པའི་རི་མོ་ལྟ་བུ་དེ་ལ་འོད་འཕྲོས་ཏེ། མར་པའི་ཐུགས་ཀར་ཐིམས་པས་སྐུའི་བྱིན་རླབས་དང་། གསུང་གི་རྗེས་གནང་ཐོབ་པར་གྱུར་ཏེ། པཎ་ཆེན་ནཱ་རོའི་ཐུགས་རྗེར་ཤེས་ནས། དགའ་
2-3-50b
བ་དང་བླ་མ་དྲན་དྲག་ངུ་འབོད་འོ་དོད་སྨྲེ་སྔགས་དང་བཅས་གསོལ་བ་བཏབ་པས། པཎ་ཆེན་ནཱ་རོ་དུར་ཁྲོད་ཀྱིས་བརྒྱན་པས་སྒེག་པ་ལ་སོགས་གར་དགུའི་ཉམས་དང་ལྡན་པ་ཞིག ཕ་བུའི་མདུན་ན་སླེབས་ཡོད་དོ་གསུང་། ཞལ་མངོན་སུམ་དུ་བསྟན་ཞིང་མཐོང་བས་ས་དང་པོ་ཐོབ་པ་ལྟ་བུའི་དགའ་སྤྲོ་བསམ་གྱིས་མི་ཁྱབ་པ་ཞིག་ཐོབ། ཁོང་ནས་ཡུས་པའི་ཚིག་དང་མཆི་མ་མང་པོ་ཤོར། ཞབས་སྤྱི་བོར་བླངས་པས་མ་ཚིམ་པར་སྐུ་ལ་འཁྱུད་དེ་བརྒྱལ་བ་ལས་སངས་པ་དང་། གསེར་ཕངས་མེད་མཎྜལ་དུ་བཀོད་ནས་ཕུལ་བས། ཁོ་བོ་གསེར་མི་འདོད་གསུང་བཞེས་སུ་མ་གནང་བས། རྗེ་ལ་མི་དགོས་རུང་། བདག་ལ་གསེར་འབུལ་མཁན་སོགས་སེམས་ཅན་ཐམས་ཅད་ཚོགས་རྫོགས་པའི་སླད་དུ་ཅིས་ཀྱང་བཞེས་དགོས་ཞེས་ཞུ་བ་ཡང་ཡང་ནན་གྱིས་ཕུལ་བས། འོ་ན་བླ་མ་དཀོན་མཆོག་མཆོད་ཅིག་གསུང་ནས་གསེར་ཐམས་ཅད་ནགས་གསེབ་ལ་གཏོར་སོང་བས། བླ་མ་དང་མཇལ་བའི་དགའ་སྤྲོའི་ངང་ནས་ཡང་བོད་དུ་དཀའ་ལས་བྱས་ཚུལ་རྣམས་དྲན་ནས་ཕངས་སེམས་ཤིག་ཤར་བ་ལས། ཕྱག་གཉིས་ཡབ་མཛད་དེ་ཐལ་མོ་སྦྱར་བའི་ཁ་ཕྱེས་སྟེ། གོད་ཉམས་མེད་པར་གནང་ནས་ཁྱོད་ཕངས་ན་
2-3-51a
སླར་ཡོད་དོ། །ང་ལ་གསེར་གྱི་དགོས་པ་མེད། དགོས་ན་འདི་དག་ཐམས་ཅད་གསེར་གླིང་ཡིན་གསུངས་ཞབས་ས་ལ་བརྡབ་པས་ས་གཞི་ཐམས་ཅད་གསེར་དུ་སོང་ངོ་། །དེ་ནས་བུ་ཆོས་ཀྱི་བློ་གྲོས་སླེབས་པ་ལ་སྣ་ལེན་བྱེད་གསུང་། ནམ་མཁའ་ལ་ལྟ་སྟངས་མཛད་གཟིགས་པས་ཉ་རོ་སོ་མ་ཆེ་ལ་ཡིད་དུ་འོང་བ་ཞིག་བབས་བྱུང་བས་འདི་ཁྱོད་ཀྱིས་བཤོས་ཤིག་གསུངས་། བཤས་པའི་ནང་ནས་ཤ་ལྔ་བདུད་རྩི་ལྔ་ལ་སོགས་ཏེ་ཚོགས་དང་མཆོད་པའི་ཡོ་བྱད་བཟང་ཞིང་གྱ་ནོམ་པ་དཔག་ཏུ་མེད་པ་དང་། ལྷའི་སྐུ་རྣམས་བྱུང་བས། བླ་མ་ཡི་དམ་མཁའ་འགྲོ་ཆོས་སྐྱོང་མཆོད་པས་མཉེས་པར་བྱས་དཔོན་སློབ་གཉིས་ཀྱིས་ཀྱང་ཐུགས་དགྱེས་བཞིན་རོལ་ཚེ། མར་པས་ཆོས་ཀྱི་གསོལ་བ་བཏབ་པས། ནཱ་རོ་པའི་ཞལ་ནས། ཁྱོད་འདིར་ཏཻ་ལོའི་ཐུགས་རྗེས་བཀུག་པ་ཡིན། ང་ལ་ཏཻ་ལོའི་ལུང་བསྟན་ཡོད་པས་གདམས་ངག་ཕུ་ལ་ཧ་རིར་བྱ་གསུང་། ལུང་བསྟན་གསུང་དུ་གསོལ་ཞུས་པས། རང་གྲོལ་ཡེ་ཤེས་ཉི་མ་ཡིས། །ཕུ་ལ་ཧ་རིའི་དགོན་པ་རུ། །མ་དྷིའི་མ་རིག་མུན་པ་སེལ། །ཡེ་ཤེས་སྣང་བས་ཁྱབ་པར་གྱིས། །གསུང་བ་ཡོད་གསུངས། དཔོན་སློབ་གཉིས་ཀྱིས་ཕུ་ལ་ཧ་རིར་བྱོན་
2-3-51b
པའི་ལམ་བར་ལ་མཁའ་འགྲོ་རྣམས་ཆོས་ལ་འཁྲེན་པའི་བགེགས་དང་ཆོ་འཕྲུལ་ཆེན་པོ་བྱུང་། སྤྱིར་གྱིས་མར་པ་བླ་མའི་སྔ་ཕྱི་གང་ལ་བྱོན་རུང་འཇིགས་སྣང་ཆེན་པོ་ཤར་ཞིང་། ཁྱད་པར་དུ་ཕུ་ལ་ཧ་རིར་ཕེབས་པ་དང་ཆེར་སོང་སྟེ། རྗེ་བཙུན་བདག་ལ་བསྐྱབ་ཏུ་གསོལ། །ཞེས་བསྐོར་བ་བྱས་གསོལ་བ་བཏབ་པས། མཁའ་འགྲོ་དང་བགེགས་རྣམས་ཀྱིས་འཇིགས་པའི་གཟུགས་དངོས་སུ་བསྟན་ནས་མར་པ་འཛིན་དུ་བྱུང་བ་ལ། མར་པས་ཀྱང་རི་བྲག་ལ་སྤྲིན་གྱི་གསེབ་ལ་བྱོན་པ་ལྟར། ཐོགས་རྡུགས་མེད་པར་རྗེས་ནར་མར་བྱོན་པའི་ཕྱི་བཞིན། བགེགས་རྣམས་ཀྱིས་ཀྱང་དེད་པའི་ཚེ། ནཱ་རོ་པ་རང་གི་སྐྱོབ་ནུས་རུང་། བླ་མས་ལུང་བསྟན་བདག་གི་བུ། །སྣོད་ལྡན་མར་པ་བློ་གྲོས་ལ། །མཁའ་འགྲོ་མིང་ཅན་བདུད་མོ་རྣམས། །བར་ཆད་རྩོམ་པས་བྱིན་གྱིས་རློབས། །ཞེས་ཏཻ་ལོ་པ་ལ་གསོལ་བ་བཏབ་པས། ཏཻ་ལོའི་སྤྲུལ་པ་མཚོན་ཆ་སྣ་ཚོགས་ཐོགས་པའི་ཁྲོ་བོ་དཔག་ཏུ་མེད་པ་བྱུང་མ་ཐག །བགེགས་རྣམས་ཀྱིས་མར་པའི་ཕྱི་བཞིན་མ་མཐར་ཞིང་། ཁྲོ་བོ་རྣམས་ཀྱི་གཟི་བརྗིད་མ་བཟོད་པར་ཕྱོགས་བཅུར་བྲོས་པའི་ཕྱི་བཞིན་ཁྲོ་བོ་རྣམས་ཀྱིས་ཀྱང་དེད་པའི་རྗེས་བྲག་གི་གསང་བར་ནར་མར་བྱུང་ཞིང་། དེ་
2-3-52a
དུས་མར་པས་ཀྱང་འོད་དང་སྤྲིན་ཕུང་གི་གསེབ་ནས་ཏཻ་ལོའི་སྐུ་ཕྱེད་ཙམ་གཟིགས། དེ་གཟིགས་པས་དགྱེས་ཏེ་བྲོ་ཁྲབ་པས། བྲག་གི་ཁོང་གསེང་དུ་རྗེ་མར་པའི་ཞབས་རྗེས་གཉིས་དང་། བགེགས་རྣམས་བྲོས་པའི་རྗེས་བྱུང་བ་ཡང་ཕུ་ལ་ཧ་རི་ན་མངོན་གྱུར་དུ་ཡོད་དོ། །ཁྲོ་བོ་རྣམས་ཀྱིས་བགེགས་བཏུལ་བའི་ཚེ་མཁའ་འགྲོ་རྣམས་སྐྲག་ནས་ཐལ་མོ་སྦྱར་ཏེ། འཇིགས་པའི་སྐུ་ལ་འཇིགས་པའི་གསུང་། །འཇིགས་པའི་མཚོན་ཆ་ལེགས་བསྣམས་པའི། །འཇིགས་ཆེན་སྐུ་ལ་སྐྱབས་སུ་མཆི། །བདག་ཅག་གནོད་སྐྱེས་མ་ལགས་ཀྱི། །ཟླ་བ་གཉིས་ཤར་ཚུལ་དུ་ནི། །ཤིང་རྟ་ཆེན་པོའི་རྟ་བསྐྱོན་ནས། །རྗེ་བཙུན་དཔལ་ལྡན་ནཱ་རོ་པ། །ལུང་བསྟན་རང་གྲོལ་མཁའ་སྤྱོད་བསུ། །ཟེར་མི་སྣང་བར་གྱུར་ཏོ། །དེ་ནས་ཇོ་བོ་ནཱ་རོ་པ་ལ། །རྗེ་མར་པས་སྤྱིར་གྱི་སྙན་བརྒྱུད་ཞུ། ཁྱད་པར་འཕོ་བ་གྲོང་འཇུག་ཞུ་ཞུས་པས། གྲོང་འཇུག་ཞུ་བ་ཁྱོད་རང་དྲན་ནམ། ཁྱོད་ལ་ལུང་བསྟན་བྱུང་གསུངས་པས། འདི་བདག་ལ་ལུང་བསྟན་བྱུང་བའང་མ་ལགས། བདག་རང་དྲན་པའང་མ་ལགས། བདག་ལ་ཐོས་པ་དགའ་ཞེས་བྱ་བའི་སློབ་མ་ཞིག་ཡོད་པ་དེ་ལ། 
2-3-52b
མཁའ་འགྲོའི་ལུང་བསྟན་བྱུང་བ་ལགས་ཞུས་པས། ངོ་མཚར་ཆེ། བོད་མུན་པའི་གླིང་ན་སྐྱེས་བུ་གངས་ལ་ཉི་མ་ཤར་བ་འདྲ་བ་ཡང་ཡོད་པ་འདུག་གསུང་། ཕྱག་གཉིས་དབུའི་གཙུག་ཏུ་ཐལ་མོ་སྦྱར་ནས། བྱང་ཕྱོགས་མུན་པའི་སྨག་རུམ་ན། །གངས་ལ་ཉི་མ་ཤར་འདྲ་བའི། །ཐོས་པ་དགའ་ཞེས་བྱ་བ་ཡི། །སྐྱེས་བུ་དེ་ལ་ཕྱག་འཚལ་ལོ། །ཞེས་གསུང་ཞིང་སྤྱན་བཙུམས་ནས་དབུ་གུག་གུག་པ་ལན་གསུམ་མཛད་པས། རྒྱ་གར་གྱི་རི་དང་། ཤིང་རྩི་རྣམས་ཀྱང་མགོ་གུག་གུག་པ་ལན་གསུམ་བྱུང་ཞིང་། དུས་ད་ལྟའི་བར་དུ་ཡང་ཕུ་ལ་ཧ་རིའི་རི་དང་ཤིང་རྣམས་བོད་ཀྱི་ཕྱོགས་སུ་མགོ་གུག་ཏེ་ཡོད་པར་གདའ། དེ་ནས་ཁྱོད་ལ་སྔར་སུ་ལའང་མ་གྲགས་པའི་ཁྱད་ཆོས་བདེ་མཆོག་མཁའ་འགྲོ་སྙན་བརྒྱུད་ཀྱི་ཆོས་སྟེར་བ་ཡིན་གསུང་ནས་བདེ་མཆོག་དྲུག་ཅུ་རྩ་གཉིས་དང་། བཅུ་གསུམ་མ། ལྷ་ལྔ་མ། ལྷན་སྐྱེས་རྣམས་ཀྱི་དབང་རྡུལ་ཚོན་གྱི་དཀྱིལ་འཁོར་ལ་བརྟེན་ནས་བསྐུར། །ཡུམ་རྡོ་རྗེ་ཕག་མོ་ལྷ་མོ་བཅོ་ལྔ་མ། བདུན་མ། ལྔ་མ། ལྷན་ཅིག་སྐྱེས་མ་རྣམས་ཀྱི་དབང་སིནྡྷུ་རའི་དཀྱིལ་འཁོར་ལ་བརྟེན་ནས་བསྐུར། བླ་མའི་སྐུ་གསུང་ཐུགས་ཀྱི་དཀྱིལ་འཁོར་
2-3-53a
ལ་བརྟེན་ནས་བརྡའི་དབང་དང་། གདམས་ངག་རྣམས་རྫོགས་པར་གནང་ནས་ཁྱད་ཆོས་གདམས་ངག་འདི་ལ་ལྟོས་ན་ཁྱོད་ལ་སྔར་བྱིན་པའི་གདམས་པ་རྣམས་ཕྱི་ཤུན་གྱི་ཚུལ་དུ་ཡོད་ཅིང་། ཡང་སྙིང་དུ་གྱུར་པའི་མཆོག་གི་གདམས་པ་འདི་བརྒྱུད་པ་བཅུ་གསུམ་མ་རྫོགས་བར་དུ་གཅིག་བརྒྱུད་ཀྱི་བཀའ་རྒྱས་ཐོབ་ལ་ཐོས་པ་དགའ་ཞེས་བྱ་བའི་གདུལ་བྱ་དེ་ལ་བྱིན་ཅིག །ཕྲིན་ལས་དར་རྒྱས་སུ་འགྱུར་བ་ཡིན། སྔར་དང་ཁྱད་འདུག་གམ་མི་འདུག་གསུངས་པས། མར་པའི་ཐུགས་ལ་སྤྱིར་གཤིས་ཀྱི་བཞུགས་ཚུལ་ཁྱད་མི་འདུག་སྟེ། དེ་མངོན་དུ་བྱེད་པའི་ཐབས་ཟབ་མི་ཟབ་དང་། ཡིད་ཆེས་དང་ཉམས་མྱོང་དཀའ་ཚེགས་མེད་པར་མངོན་དུ་བྱེད་པ་མྱུར་མི་མྱུར་ལ་ཡིན་མིན་གྱི་ཁྱད་འདུག་ཅིང་། ཁྱད་པར་བསྲེ་འཕོ་སྐོར་གསུམ་དང་། བསྲེ་བ་རོ་སྙོམས་གཉིས་ཀུན་ལ་མེད་པའི་ཁྱད་ཆོས་གཅིག་ཤེས་ཀུན་གྲོལ། གཅིག་ཆོག་རྒྱལ་པར་འདུག་པས། འདི་དང་པོ་ནས་གནང་བས་ཆོག་པ་ལ་སྙམ་པ་ཐུགས་ལ་ཤར་ཞིང་། ཤར་བ་ལྟར་ཞུས་པས། སྤྱིར་གྱིས་ཁྱོད་ཡོང་ཐེངས་སྔ་མ་གཉིས་ལ་འདི་སྟེར་བའི་དུས་ལ་མ་བབ་པས་མ་བྱིན་
2-3-53b
པ་ཡིན་ཅིང་། ཁྱད་པར་ཆོས་ཕྱིར་དཀའ་བ་མ་སྤྱད་ན་ཆོས་ལ་དཀོན་མཐོང་རྩིས་མེད་པས་ཉམས་སུ་ལེན་མི་ནུས། བརྒྱ་ལ་ཉམས་ལེན་བྱེད་བློ་བྱས་རུང་ཡོན་ཏན་རྒྱུད་ལ་མི་སྐྱེ་བ་ཡིན། ངས་སྔར་བཤད་པའིཏེ་(ཏཻ་)ལོའི་དྲུང་དུ་དཀའ་ཆེན་བཅུ་གཉིས། དཀའ་ཕྲན་བཅུ་གཉིས་རྣམས་ཆོས་འདིའི་ཕྱིར་ལུས་སྲོག་གི་ཐོག་ཏུ་སྤྱད་ནས་ཞུས་ཤིང་བསྒོམས་པས། ད་ལྟ་སྣང་བ་ལ་རང་དབང་ཐོབ་ཕྱིར་ཡུལ་ཉི་ཤུ་རྩ་བཞི་སོགས་སངས་རྒྱས་ཀྱི་ཞིང་གང་དུ་ཕྱིན་རུང་དཔའ་བོ་མཁའ་འགྲོ་ཚོགས་གྲལ་དུ་ཆུད་ཅིང་། རེས་འགའ་ཚོགས་ཀྱི་གཙོ་བོར་ཡང་གྱུར་པ་ཡིན། ཁྱོད་རང་གིས་ཀྱང་དཀའ་ཚེགས་ཆེན་པོས་གསེར་བསྒྲུབས་ནས། ལམ་བར་གྱི་འཇིགས་པ་ལ་མ་བསམ་པར་ཆོས་ཕྱིར་དཀའ་བ་སྤྱད་པས། ཏེ་(ཏཻ་)ལོའི་ཆོས་འདིའི་སྣོད་དང་སྐལ་བར་ལྡན་པ་གཟིགས་ནས། ང་ལ་ལུང་བསྟན་གནང་བ་ཡིན། ངས་ཁྱོད་ལ་བརྩེ་བས་མ་བཟོད་པར་ཆོས་འདི་སྟེར་དགོས་སྙམ། ད་ལན་འདིར་སླེབས་པའི་རྟེན་འབྲེལ་སྣ་ཚོགས་བསྒྲིགས། མཁའ་འགྲོ་ཆོས་སྐྱོང་ལ་བཅོལ་དམ་དང་བསྐུལ་མ་བྱས་ནས་སླབ་པ་ལ། བརྒྱུད་པ་ལ་བྱིན་རླབས་འཇུག་ཕྱིར་མྱུར་དུ་མ་འཕྲད་
2-3-54a
པར་དཀའ་བ་སྤྱོད་དུ་བཅུག་པ་ཡིན་གསུངས་། དེ་དུས་བདེ་མཆོག་གི་དབང་གདམས་ངག་རྣམས་གནང་བ་ཡིན་རུང་། མར་པའི་རྒྱུན་གྱི་ཡི་དམ་དགྱེས་པ་རྡོ་རྗེ་ཡིན་པས། དཔལ་ནཱ་རོ་པའི་ཐུགས་ལ་བོད་ཀྱི་མར་པ་ལོ་ཙྪ་(ལོཙྪ་)འདི་ང་ལ་ཤིན་ཏུ་མོས་ཕྱིར་གསེར་ཁྱེར་ནས་འདིར་ཡང་ཡང་བྱུང་བར་སྙིང་རྗེ་བས། འདི་ལ་རྒྱུད་འཛིན་སོགས་ཀྱི་རྟེན་འབྲེལ་ཅི་འདུག་བལྟས་མཐུན་པར་ལུང་བསྟན་བྱེད་དགོས་དགོངས་ནས་རྗེ་མར་པ་ལ། དཔལ་ནཱ་རོ་པས་ཚོགས་འཁོར་ཅིག་གནང་། དེའི་ནུབ་དྲུང་དུ་གཟིམས་པའི་ཐོ་རངས་པཎ་ཆེན་ནཱ་རོས་དགྱེས་པ་རྡོ་རྗེ་ལྷ་དགུའི་དཀྱིལ་འཁོར་རྟེན་དང་བརྟེན་པར་བཅས་པ་ནམ་མཁར་ཁྲ་ལྷམ་མེར་སྤྲུལ་ནས། བུ་མར་སྟོན་ཆོས་ཀྱི་བློ་གྲོས་མ་ཉལ་བར་ཡར་ལངས་དང་། ནམ་མཁའ་ལ་ཁྱོད་རང་གི་ཡི་དམ་དགྱེས་པ་རྡོ་རྗེ་སྤྲུལ་པའི་ལྷ་དགུ་ཡང་ཕེབས་འདུག་པས། ཁྱོད་ང་ལ་ཕྱག་འཚལ་ལམ། ཡི་དམ་ལ་ཕྱག་འཚལ་གསུངས་པས། མར་པས་ཡི་དམ་རྟེན་དང་བརྟེན་པར་བཅས་པ་ཁྲ་ལམ་མེ་འདུག་པ་ལ་ཕྱག་བཙལ་བས། ནཱ་རོའི་ཞལ་ནས། བླ་མ་མེད་པའི་གོང་རོལ་ན། །སངས་རྒྱས་བྱ་བའི་མིང་ཡང་མེད། །
2-3-54b
བསྐལ་པ་སྟོང་གི་སངས་རྒྱས་ཀྱང་། །བླ་མ་དག་ལ་བརྟེན་ཏེ་འབྱུང་། །བྱ་བ་ལགས། འདི་དག་ཁོ་བོའི་སྤྲུལ་པ་ཡིན་གསུང་། ཡི་དམ་བླ་མའི་ཐུགས་ཀར་ཐིམ་སྟེ་སོང་། དེའི་རྟེན་འབྲེལ་གྱི་གནད་ཀྱིས་ད་ཁྱོད་ལ་མི་བརྒྱུད་རིང་པོ་མི་ཡོང་ཞིང་། རྟེན་འབྲེལ་དེ་ཡང་སེམས་ཅན་གྱི་སྐལ་བ་ཡིན། ཆོས་བརྒྱུད་སངས་རྒྱས་ཀྱི་བསྟན་པ་ནམ་གནས་ཀྱི་བར་དུ་འོང་བས་དགའ་བར་གྱིས་ཤིག་གསུངས་པས། མར་པའི་ཐུགས་ལ་ངས་སྔར་ཐོས་བསམ་དེ་ཙམ་ཞིག་བྱས་པ་ལ། ཡི་དམ་པས་བླ་མ་མཆོག་ཏུ་བསྟེན་པ་ཁོ་ན་མཐོང་ཞིང་ཐོས། བསྒོམ་པའི་ཚེ་ཡང་བླ་མ་ཡི་དམ་གྱི་དབུ་གཙུག་ཏུ་བསྒོམ་ཞིང་ཡོད། ཁ་སང་བླ་མ་འཚོལ་བའི་ཚེ་ཡང་ཡི་དམ་དགྱེས་པ་རྡོ་རྗེ་ཙན་དན་སྡོང་པོའི་རྩེ་ལ་བཞུགས་པ་དང་མཇལ་རུང་། དེས་མ་ཚིམ་པར་བླ་མ་བཙལ་བ་ཡིན་པ་ལ། ད་ལན་དེ་ལྟར་ཡོང་བ་དེ་ངའི་སྔོན་ལས་ཡིན་དགོངས་ཐུགས་འབྱུང་ཞིང་སྐྱོ་བའི་ཉམས་ཆེན་པོ་ཡོད་པའི་ཚེ་མནལ་ལྟས་ངན་པ་ཡང་བྱུང་། དེ་དང་མཐུན་པར་སྐུ་ལ་རྒྱ་ཚད་ཀྱི་བྲོ་ཚལ་བས་འགྲོང་ལ་ཁད་པ་བཅུ་གསུམ་དང་། རླུང་གིས་ཁྱེར་ཏེ་གྲོངས་ཐེངས་ཡང་གསུམ་བྱུང་བའི་བར་
2-3-55a
ལ། དཔལ་ནཱ་རོ་པའི་ཞལ་ནས་སྙན་བརྒྱུད་ཀྱི་ཆོས་འདི་བཀའ་གཉན་པས་བདུད་ཀྱི་བར་ཆད་ཀྱི་རྣམ་པར་འདུག་སྟེ། ཁྱོད་ང་དང་སངས་རྒྱས་ཀྱི་བསྟན་པ་ལ་གཅེས་པས། ངས་ཀྱང་དཀོན་མཆོག་ལ་གསོལ་བ་འདེབས། ཁྱོད་ལ་བདུད་ཀྱི་གནོད་པ་ཙམ་ཞིག་གིས་ཀྱང་སྐྱོབ་པ་ལ་བརྩོན་པར་མཛད་པས་ཚེ་ལ་བར་ཆད་མི་འོང་པའི་ཁག་ངས་ཐེག། ཁྱོད་རང་མྱོང་འགྱུར་གྱི་ལས་ངན་མཛད་པའི་ཐབས་སུ་ནད་དཀོན་མཆོག་གི་ཐུགས་རྗེར་ཤེས་པ་གྱིས་ལ་སེམས་ཅན་ལ་བྱམས་སྙིང་རྗེ་དང་ཉམས་ལེན་གྱི་དྲན་པ་དང་མ་བྲལ་བ་གྱིས་གསུངས་ནས་ཐུགས་བརྩེ་བས་རྗེས་སུ་བཟུང་བའི་ཚེ། མར་པས་བདག་ལ་ཤི་རུང་གསོན་རུང་དཀོན་མཆོག་གི་ཐུགས་རྗེར་ཤེས་པ་ལས་གཞན་མ་མཆིས་པས། འགྲོ་བ་ཀུན་ལ་བདག་ལྟར་ཐུགས་རྗེས་བཟུང་དུ་གསོལ། ཞེས་ཞུས་པས། ནཱ་རོ་པ་མཉེས་སོ། །བསྙུང་བའི་བར་ལ་ཐུགས་མཉེས་པའི་མཆེད་ལྕམ་རྣམས་ཀྱིས་ཀྱང་ཐུགས་དམ་སྲུང་འཁོར་མཛད་ཅིང་ཡང་ཡང་བྱོན་ནས་གང་ཕན་གྱི་སྨན་དཔྱད་དང་རིམ་འགྲོ། དཀོན་མཆོག་ལ་གསོལ་གདབ་རྣམས་གང་བྱས་པ་དྲག་གསུངས་པ་ལ། རིམ་གྲོ་བྱེད་པ་ལ་ཡོ་བྱད་ཐམས་
2-3-55b
ཅད་བླ་མ་ལ་དམིགས་པ་མ་གཏོགས་ངས་བདག་ཏུ་བཟུང་བ་གཅིག་ཀྱང་མེད། བླ་མའི་ཕྱག་རྫས་ངའི་རིམ་གྲོར་བཏགས་ན་ཉེས་པར་འགྱུར་བས་མི་བྱེད། སྨན་དཔྱད་བོད་ཀྱི་སེམས་ཅན་རྣམས་ཀྱི་བསོད་ནམས་ཀྱིས་མ་ཐུབ་ན་ང་འཆི་སྟེ་འོང་། ཐུབ་ན་སྨན་དཔྱད་མེད་རུང་ནད་ལས་གྲོལ་ཏེ་འོང་བས་མི་བྱེད། དཀོན་མཆོག་གསོལ་གདབ་དཔལ་ནཱ་རོ་པས་བརྩེ་བས་སྐྱོང་བ་ལས་ལྷག་པ་ཞིག་འོང་རྒྱུ་མེད་ཅིང་། བླ་མ་ལ་ནི་རྒྱུན་དུ་གསོལ་བ་འདེབས་ཤིང་ཡོད། ཆོས་སྐྱོང་རྣམས་བསྟན་པ་བསྲུང་མི་བསྲུང་ལ་རག་ལས་གསུངས་། སྨན་དཔྱད་དང་རིམ་གྲོ་ཅི་ཡང་མ་བྱས་རུང་། བླ་མ་དང་མཆེད་ལྕམ་རྣམས་ཀྱིས་ཐུགས་རྗེས་བསྙུང་གཞི་ལས་གྲོལ་ལོ། །བསྙུང་བ་ལས་གྲོལ་ཕུང་། ཐུགས་སྐྱོ་བ་མ་སངས་པ་ལས། མཆེད་ལྕམ་རྣམས་ཀྱིས་བསྙུང་བ་ལས་གྲོལ་བའི་གཏང་རག་གིས་ཐུགས་གསོལ་ཤིང་། དཔལ་ནཱ་རོ་པས་ཀྱང་བསྙུང་བ་ལས་གྲོལ་བའི་གཏང་རག་གནང་ཞིང་། དེ་ཚེ་གདམས་ངག་ཉམས་ལེན་གྱི་སྒོ་ནས་ཐུགས་གསོ་བའི་ཕྱིར། རྗེ་མར་པ་ལ་ཆོས་དྲུག་དྲིལ་བ་རྡོ་རྗེའི་མགུར་འདི་གསུངས་སོ།། །།རྗེ་བཀའ་དྲིན་ཅན་གྱི་ཞབས་ལ་འདུད། །བོད་ཡུལ་གྱི་
2-3-56a
མར་པ་ལོ་ཙྪ་(ལོཙྪ་)ཁྱོད། །དལ་འབྱོར་ལུས་ཀྱི་ཕུང་པོའི་ཡིད། །དབྱར་སྐྱོ་ཚེ་ན་འདི་སྐད་ལོངས། །སེམས་ཀྱི་གནས་ཐབས་ལྟ་བའི་གདེངས། །ལུས་ཀྱི་གནས་ཐབས་སྒོམ་པའི་གནད། །ཕྱི་ན་སྒྱུ་མ་ལྷ་ཡི་སྐུ། །ནང་ན་རྩ་གསུམ་འཁོར་ལོ་བཞི། །འོག་ན་ཨ་ཤད་ཙནྜ་ལི། །སྟེང་ན་ཧཾ་ཡི་རྣམ་པ་ཅན། །སྟེང་འོག་རླུང་གི་འཁོར་ལོ་ནི། །སྲོག་རྩོལ་བུམ་ཅན་ཉམས་ལེན་གྱིས། །བར་ན་བདེ་སྟོང་གསལ་བའི་ཉམས། །མིང་ཡང་གཏུམ་མོའི་གདམས་ངག་ཟེར། །རླུང་གནད་དུ་ཆུད་དམ་ལོ་ཙྪ་(ལོཙྪ་)བ། །ཕྱི་ན་སྣང་བ་སྒྱུ་མ་ཙམ། ། ནང་ན་ཉམས་མྱོང་སྨྲ་མ་བཏུབ། ཉིན་མཚན་སྣང་བ་སྤྲུལ་པའི་སྐུ། །མིང་ཡང་སྒྱུ་ལུས་ཀྱི་གདམས་ངག་ཟེར། །ཞེན་པ་ལོག་གམ་ལོ་ཙྪ་(ལོཙྪ་)བ། །རྨི་ལམ་ཉམས་ཀྱི་འཁྲུལ་པའི་དུས། །མགྲིན་པར་ཨོཾ་ཡིག་འོད་ཟེར་ཅན། །དྲན་འདུན་བག་ཆགས་ཀྱི་མཚམས་སྦྱོར་ལས། །སྐྱེས་པ་རྨིས་ན་ཕོ་འདྲེ་ཟེར། །བུད་མེད་རྨིས་ན་མོ་འདྲེ་ཟེར། །བྱོལ་སོང་རྨིས་ན་ཀླུ་རུ་འཛིན། །དགའ་བ་རྨིས་ན་སེམས་དབངས་སྐྱེད། །མི་དགའ་རྨིས་ན་སྙིང་མི་དགའ། །འདྲེ་སེམས་ཀྱི་རྩ་བར་མ་ཤེས་ན། །རྣམ་རྟོག་གི་འདྲེ་ལ་ཟད་པ་མེད། །བཟང་ངན་རང་གྲོལ་སྟོན་
2-3-56b
པའི་དོན། །མིག་ཡང་རྨི་ལམ་གྱི་གདམས་པ་ཟེར། །རང་བཞིན་ཤེས་སམ་ལོ་ཙྪ་(ལོཙྪ་)བ། །གཉིད་དང་རྨི་ལམ་བར་ཞིག་ན། །གཏི་མུག་ཆོས་སྐུའི་ངོ་བོ་ཅན། །བརྗོད་མེད་འོད་གསལ་བདེ་བའི་ཉམས། །རྗེས་ལ་འོད་གསལ་རྒྱ་ཡིས་ཐེབས། །རྨི་ལམ་འོད་གསལ་འཐུག་པོ་ཉིད། །མིང་ཡང་འོད་གསལ་གྱི་གདམས་ངག་ཟེར། །སེམས་སྐྱེ་མེད་དུ་རྟོགས་སམ་ལོ་ཙྪ་(ལོཙྪ་)བ། །སྒོ་བརྒྱད་འཁོར་བའི་སྐར་ཁུང་ཅན། །སྒོ་གཅིག་ཕྱག་རྒྱ་ཆེན་པའི་ལམ། །སྒོ་བརྒྱད་བཅད་ནས་སྒོ་གཅིག་འབྱེད། །སེམས་ཀྱི་མདའ་ལ་རླུང་གི་གཞུ། །ཧིག་གི་རྒྱུད་ཀྱི་རབ་བསྐུལ་ནས། །རྣམ་ཤེས་ཚངས་པའི་ལམ་ནས་འཕེན། །མིང་ཡང་འཕོ་བའི་གདམས་ངག་ཟེར། །རླུང་དུས་སུ་ཁེགས་སམ་ལོ་ཙྪ་(ལོཙྪ་)བ། །རང་ལུས་དུས་ཀྱི་ཚད་ཕེབས་ལ། །གཞན་ལུས་མཚན་ལྡན་དམ་པའི་ཡུལ། །བར་ན་ཡིག་འབྲུ་རླུང་གི་རྟ། །རྟེན་འབྲེལ་རླུང་གི་འཁོར་ལོ་ཡིས། །རང་ལུས་ཁང་སྟོང་བཞིན་དུ་བོར། །གཞན་ལུས་སྤྲུལ་སྐུའི་ངོ་བོ་ཅན། །མིང་ཡང་གྲོང་འཇུག་གི་གདམས་ངག་ཟེར། །རླུང་ལས་སུ་རུང་ངམ་ལོ་ཙྪ་(ལོཙྪ་)བ། །རྨི་ལམ་དུས་ཀྱི་ཤེས་པ་དེ། །བར་དོའི་སེམས་དང་བསྲེ་དགོས་པས། །ལོངས་སྤྱོད་རྫོགས་སྐུའི་ངོ་བོ་ཅན། །དག་དང་མ་དག་གཟུགས་སྐུ་གཉིས། །བར་དོའི་དུས་སུ་ཟིན་ཡང་འཚལ། །རྨི་ལམ་བར་དོ་བསྲེ་འཕོའི་གནད། །མིང་ཡང་བར་དོའི་གདམས་ངག་ཟེར། །བར་དོ་འབྱོངས་སམ་ལོ་ཙྪ་(ལོཙྪ་)བ། །ལར་ཕྱི་ནང་གི་ཆོས་ལ་ཐོས་པ་དགོས། །གོ་བས་མཐའ་གཉིས་སྤོང་བ་
2-3-57a
ཡིན། །ཡིན་མིན་གྱི་སྒྲོ་འདོགས་ཆོད་ཙ་ན། །གོལ་ས་མེད་པའི་ལམ་གཅིག་ཡིན། །ལམ་དེ་ལ་སྐྱོ་བ་ག་ལ་ཡོད། །ཅེས་གསུང་པ་དེ་ཐུགས་ལ་ཤིན་ཏུ་འཇགས་པར་གྱུར་བས་སྐྱོ་བ་སངས་ཤིང་ཕྱིས་ཀྱང་བླ་མ་དྲན་པ་སོགས་ཐུགས་ནམ་ངེས་པར་འབྱུང་བའི་ཚེ་གསུངས་པར་གདའ། རྗེ་མར་པ་བསྙུང་བ་ལས་གྲོལ་ཞིང་ཐུགས་སྐྱོ་བ་སངས་པའི་ཚེ། ནཱ་རོའི་ཞལ་ནས་དམངས་ཀྱི་རྣལ་འབྱོར་བདུན་ལས། ཁྲུས་ཀྱི་རྣལ་འབྱོར་ལ་འགྲོ་གསུང་བའི་ཞབས་ཕྱིར་ཕྱིན། ཡན་ལག་བརྒྱད་ལྡན་གྱི་རྫིང་བུར་མར་པས་ཀྱང་ཁྲུས་མཛད་ཚེ། སྐུ་ལ་བསྲུང་བ་ཟབ་མོ་ཞིག་ཡོད་པ་དེ་བཀྲོལ་ནས་བཞག་པ་ཁྭ་ཏས་ཁྱེར་སོང་བ། ནཱ་རོ་པས་མི་མ་ཡིན་གྱི་བར་ཆོད་རྩོམ་པར་དགོངས་ནས་ལྟ་སྟངས་དང་བཅས་སྡིགས་མཛུབ་མཛད་པས། བྱ་རེངས་ཏེ་ནམ་མཁའ་ནས་ལྷུང་བྱུང་བ་ལས་བསྲུང་འཁོར་བཞེས་ཏེ་མར་པ་ལ་གནང་ནས། ད་ཕྱིན་བར་ཆད་བདུད་ལས་རྒྱལ་བ་ཡིན་ནོ་གསུང་། དེ་ནས་དཔལ་ནཱ་རོ་པ་ཆེན་པོས་མར་པ་ཆོས་ཀྱི་བློ་གྲོས་འདི་ངའི་རྒྱལ་ཚབ་ཏུ་བཀོད་པ་ཡིན་གསུང་། རྫོངས་ཀྱི་ཚོགས་མཆོད་བཤམས་པའི་གྲལ་དུ་བཀའ་ལུང་གནང་བ་ནི། ལོ་
2-3-57b
ཙྪ་བ་(ལོཙྪ་)ཁྱོད་ལ་ངས་སྔར་ངོ་སྤྲད་པ་ལྟར་ཕུང་པོ་ལྔ་རིགས་ལྔ། ཉོན་མོངས་པ་ལྔ་ཡེ་ཤེས་ལྔར་གདོད་ནས་གནས་པ་ངོ་འཕྲོད་ཕྱིར། ངོ་བོ་ལ་སྤང་བླང་མེད་པས་སྣང་སྲིད་ཀྱི་ཆོས་ཐམས་ཅད་རྒྱལ་བ་རིགས་ལྔའི་ངོ་བོར་གྱུར་ཅིང་། དེ་དག་ཆོས་ཉིད་འགག་མེད་དུ་ཤར་བའི་རང་རྩལ་དུ་ཤེས་པས་ཟུང་འཇུག་ཏུ་མ་གྱུར་བའི་ཆོས་གཅིག་ཀྱང་མེད་ཕྱིར། ཆོས་ཉིད་ཀྱི་ཀློང་དུ་ཉམས་སུ་ལེན་པ་ལ་ཐོགས་རྡུགས་མེད་པ་དཔེ་ནམ་མཁའ་ལ་བྱ་འཕུར་བ་ལྟ་བུ་ཡིན་ཞིང་། དེ་རྟོགས་པའི་ཆོས་འཁོར་གྱི་བསྟན་པ་འཁོར་ལོས་སྒྱུར་བའི་རྒྱལ་པོ་ལྟ་བུ་མངོན་དུ་གྱུར་པ་ཡིན་པས། ལུང་གི་ཆོས་འཁོར་གྱི་བསྟན་པ་རྒྱལ་སྲིད་རིན་ཆེན་སྣ་བདུན་ལྟ་བུ་ཤུགས་ལ་འཛིན་པར་གྱུར་བས་སྤྱིར་ཁྱོད་ཀྱི་སངས་རྒྱས་ཀྱི་བསྟན་པ་མདོ་སྔགས་གཉིས་ཀའི་ལུང་རྟོགས་ཀྱི་སྒོ་ནས་འཛིན་ཅིང་། བྱེ་བྲག་ཏུ་གསང་སྔགས་ཀྱི་བསྟན་པ་ལུང་རྟོགས་གཉིས་ཀ་ཉིན་མོར་བྱེད་པར་འགྱུར་ཞིང་། ཁྱོད་ཀྱི་ཚེ་འདིའི་རིག་བརྒྱུད་འཆད་དེ། ཆོས་བརྒྱུད་ཆུ་བོའི་གཞུང་ལྟར་སངས་རྒྱས་ཀྱི་བསྟན་པ་ནམ་གནས་ཀྱི་བར་དུ་གནས་པར་འགྱུར་ལ། མ་དག་པའི་གང་ཟག་འགའ་ཞིག་གི་སྣང་ངོར་ཁྱེད་ཚེ་འདིའི་འདོད་ཡོན་ལ་
2-3-58a
མངོན་ཞེན་རྡོ་ལ་རི་མོ་བྲིས་པ་བཞིན་དུ་འགྱུར་མི་སྲིད་ཅིང་བརྟན་བརྟན་དང་ཆེ་ཆེ་འདྲ་མར་ཞིག་སྣང་རུང་། ཁྱོད་རང་གི་ངོ་ཐོག་ན་ཆོས་ཉིད་དུ་ངོ་འཕྲོད་འདུག་པས། སྦྲུལ་ལ་མདུད་པ་བོར་བ་བཞིན་འཁོར་བ་རང་གྲོལ་འགྱུར་ལ། མ་འོངས་པའི་སློབ་བརྒྱུད་ཐམས་ཅད་ཀྱང་སེང་གེ་དང་ཁྱུང་གི་ཕྲུ་གུ་བཞིན་དུ་ཇེ་བཟང་ཇེ་བཟང་ལ་འགྲོ་བ་ཡིན་ཞིང་། རང་རེ་གཉིས་ཚེ་འདིར་རྩེ་གདུངས་(བརྩེ་གདུང་)ནང་མཐུན་པས་འོད་གསལ་གྱི་ངང་ལ་འདུ་འབྲལ་མེད་ལ། ཕྱི་མ་ཡང་དག་པ་མཁའ་སྤྱོད་ཀྱི་གནས་སུ་ངས་བསུ་སྟེ། འབྲལ་མེད་དུ་འགྲོགས་པར་འགྱུར་བས་དགའ་བར་གྱིས་ཤིག །ཅེས་གསུངས་པས། མར་པས་ཆོས་བརྒྱུད་ལ་དར་རྒྱས་ཡོང་བའི་ལུང་བསྟན་ཐུགས་རྗེས་བཟུང་། མཐར་ཐུག་མདོ་སྔགས་གཉིས་ཀྱི་ལྟ་བ་རྟོགས་པ་ལ་ཁྱད་མི་འདུག་པས་གཉིས་ཀའི་རྟོགས་པ་དང་ལུང་གི་བསྟན་པ་འཛིན་རུང་། རྣམ་པ་ཀུན་སྤྱོད་སོ་ཐར་ཉན་ཐོས་ཀྱི་ཆ་ལུགས་ཅན་དེ་མི་ཡོང་ལགས་སམ། བདག་ལ་དར་མ་མདོ་སྡེ་ཞེས་བྱ་བ་གཅིག་གིས་ཐོག་དྲངས་ཤ་ནས་ཆད་པའི་བུ་བདུན་ཡོད་རུང་། རིགས་བརྒྱུད་ཆད་ན། མི་ཆད་པའི་ཐབས་ཀྱི་བཀའ་ལུང་
2-3-58b
གནང་དུ་རུང་ལགས་སམ་ཞེས་ཞུས་པས། པཎ་ཆེན་ནཱ་རོའི་ཞལ་ནས། མ་འོང་པ་ལ་ཁྱོད་ཀྱི་ཆོས་བརྒྱུད་ལ། ཕྱི་ཉན་ཐོས་ཀྱི་རྣམ་པ་ཅན་ལ་ནང་ཐེག་ཆེན་གྱི་དོན་རྟོགས་པའི་སར་གནས་སེམས་དཔའ་འཁོར་བཅས་ཡང་མང་པོ་འབྱུང་ཞིང་། གཞན་ཆ་ལུགས་ངེས་མེད་ཀྱིས་སྒྲུབ་བརྒྱུད་ཀྱི་བསྟན་པ་དར་རྒྱས་སུ་བྱེད་པར་འགྱུར་ལ། བུ་བདུན་གྱི་མི་ཚད་སོགས་ཡོད་རུང་། རིགས་བརྒྱུད་ཡོང་རིགས་སུ་མི་འདུག་ནའང་། འགྱོད་མེད་ཀྱི་ཐབས་ལ་ཕ་བུ་ཀུན་ཡི་དམ་ལྷའི་བསྙེན་སྒྲུབ་ཀྱི་མཚམས་དམ་པོའི་ངང་ནས་མཁའ་འགྲོ་ཆོས་སྐྱོང་གི་ཚོགས་གཏོར་ལ་འབད་འབུངས་ཐོན་ཁྱོད་སྐྱེ་བ་སྔོན་ནས་སྦྱངས་པའི་ལས་འཕྲོ་ཅན་སར་གནས་ཀྱི་སེམས་དཔའ་ཆེན་པོ་ཡིན་ཕྱིར་འགྲོ་བ་མང་པོ་ལ་ཕན་ཐོགས་པ་འདུག་པས། བོད་གངས་ཅན་གྱི་གདུལ་བྱ་རྣམས་འདུལ་ཕྱིར་ངའི་རྒྱལ་ཚབ་ཏུ་མངའ་གསོལ་བ་ཡིན་ནོ་གསུང་། ཕྱག་གཡས་མར་པའི་དབུ་ཐོག་ཏུ་བཞག་ནས། མ་འོངས་ལུང་བསྟན་གྱི་མགུར་འདི་གསུངས་སོ།། །།སྔོན་ཚུལ་བཞིན་སྦྱངས་པའི་ལས་འཕྲོ་ཅན། །གཉུག་མའི་དོན་རྟོགས་རྣལ་འབྱོར་པ། །བོད་ཡུལ་གྱི་མར་པ་ལོ་ཙྪ་(ལོཙྪ་)
2-3-59a
ཁྱོད། །རིགས་ལྔ་བྱ་འཕུར་ཆོས་ཉིད་ཀློང་། །འཁོར་ལོས་སྒྱུར་རྒྱལ་རིན་ཆེན་འཛིན། །རིགས་བརྒྱུད་ནམ་མཁའི་མེ་ཏོག་ཡལ། །ཆོས་བརྒྱུད་ཆུ་བོའི་གཞུང་དང་ལྡན། །ཞེན་པ་རྡོ་ལ་རི་མོ་བཀྲ །འཁོར་བ་ཆུ་རིས་རང་ཡལ་འགྱུར། །བུ་སེང་གེ་ཁྱུང་གི་ཕྲུ་གུ་བཞིན། །སློབ་མ་བས་ཀྱང་ཡང་སློབ་བཟང་། །ཐེག་པ་ཆེན་པོའི་དོན་རྟོགས་ནས། །ལས་ཅན་སྨིན་དང་གྲོལ་གྱུར་པའི། །སྐལ་ལྡན་གདུལ་བྱའི་རྒྱལ་པོ་ཁྱོད། །ད་ནི་བོད་ཡུལ་དབུས་སུ་བྱོན། །བྱང་ཕྱོགས་ཁ་བ་ཅན་གྱི་ལྗོངས། །སྤོས་ཀྱི་ཤིང་རྣམས་རྒྱས་པའི་ས། །སྨན་སྣ་ཚོགས་སྐྱེ་བའི་རི་མགུལ་ན། །སྐལ་ལྡན་གདུལ་བྱ་སྣོད་ལྡན་ཡོད། །བུ་དེ་རུ་སོང་ལ་འགྲོ་དོན་མཛོད། །ཁྱོད་ཀྱི་འགྲོ་དོན་གྲུབ་པར་ངེས། །ཚེ་འདིར་བརྩེ་གདུངས་ནང་མཐུན་པས། །འོད་གསལ་ངང་ལ་འདུ་འབྲལ་མེད། །ཕྱི་མ་དག་པ་མཁའ་སྤྱོད་དུ། །ཁོ་བོས་བསུ་ནས་འབྲལ་མེད་དུ། །འགྲོགས་པར་འགྱུར་ལ་གདོན་མི་ཟ། །བུ་ཁྱོད་ཀྱི་སེམས་ལ་དེ་ལྟར་ཞོག །ཅེས་གསུང་ཞིང་། ད་ཁྱོད་འདི་ནས་མཻ་ཏྲི་པའི་སར་སོང་ལ། འདོད་ཆོས་རྣམས་ནན་ཏན་གྱི་སྒོ་ནས་ཞུས་ཤིག །སྔར་བས་ཀྱང་ངེས་ཤེས་
2-3-59b
འདྲོངས་པ་ཞིག་ཡོང་བ་འདུག་གམ་གསུངས་སོ། །དེ་ནས་མར་པས་བོད་ལ་འབྱོན་པར་ཐུགས་ཆས་པའི་ཚེ། ཕུ་ལ་ཧ་རིའི་ནུབ་ཕྱོགས་ཨ་མྲའི་ཚལ་གྱི་ཤིང་དྲུང་ཞིག་ཏུ་གཟིམས་པའི་ཐོ་རངས་ཤིག་གི་ཐུགས་དགོངས་ལ། ངས་ཚེ་འདིར་བོད་ནས་རྒྱ་གར་ལ་ལན་གསུམ་ཡོང་བའི་སྔ་མ་ལ་ལོ་བཅུ་གཉིས། བར་མ་ལ་དྲུག །ད་ལན་ལོ་གསུམ་སྟེ་ཉེར་གཅིག་སོང་བ་ལས། དཔལ་ནཱ་རོ་པ་རང་གི་དྲུང་དུ་ལོ་བཅུ་དྲུག་དང་། ཟླ་བ་བདུན་བསྡད་འདུག །ཆོས་བྱས་པ་ལ་གྲུབ་ཐོབ་ཀྱི་བླ་མ་རྣམས་དང་མཇལ། སྒྲ་སྐད་དང་སློབ་གཉེར་ནི་མཐར་ཕྱིན་པ་ཤེས་དགོངས་ཏེ་དགྱེས་བཞིན་བོད་དུ་འབྱོན་པ་ལ། བླ་མ་དང་མཆེད་གྲོགས་རྣམས་ཤུལ་དུ་ལུས་པ་ལ་ནི་ཐུགས་འཕྲེང་། ལམ་བར་གྱི་ཆུ་འཕྲང་ཨར་ཇག་ལ་སོགས་འཇིགས་པ་རྣམས་ལ་ནི་འཚེར། སློབ་གཉེར་གྱི་རྗེས་གདམས་ངག་ཁྱད་པར་ཅན་རྣམས་ཐོབ་ནས་བོད་དུ་འབྱོན་པ་ལ་ནི་ཟོད་པའི་ཐུགས་ཉམས་དྲག་པོ་ཞིག་ཤར་བ། པཎ་ཆེན་ནཱ་རོ་པ་ལ་ཕྱི་ཕྱག་གི་ཚུལ་དུ་ཚོགས་མཆོད་ཅིག་ཕུལ་བའི་གྲལ་དུ་ལོ་རྒྱུས་དང་བཀའ་གནང་ཞུས་ནས། བུང་བ་རྒྱང་རིང་དུ་འཕུར་འགྲོ་བའི་སྒྲ་ལ་རྟ་དྲངས་ནས། 
2-3-60a
ཡོངས་སུ་གྲགས་པའི་མགུར་ཆེན་ལམ་གླུ་རིང་མོ་འདི་བླ་མ་དང་མཆེད་ལྕམ་རྣམས་ལ་ཕུལ་ལོ།། །།རྗེ་འགྲོ་བ་འདྲེན་མཛད་སྐུ་དྲིན་ཅན། །གྲུབ་ཐོབ་བརྒྱུད་པའི་བླ་མ་རྣམས། །མི་ཁོ་བོའི་སྤྱི་གཙུག་རྒྱན་དུ་བཞུགས། །རྒྱ་གར་གྱི་ནཱ་རོ་པཎ་ཆེན་དང་། །བོད་ཡུལ་གྱི་མར་པ་ལོ་ཙྪ་(ལོཙྪ་)གཉིས། །སྔར་སྦྱངས་སྨོན་ལམ་གཅིག་པས་མཇལ། །ལོ་བཅུ་དྲུག་ཟླ་བ་བདུན་དུ་བསྟེན། །དུས་སྐད་ཅིག་མ་བྲལ་འགྲོགས་པའི་ཕྱིར། །ཐུགས་ལ་མི་འདོགས་སྐབས་མ་མཆིས། །དཔལ་མེ་ཏོག་མདངས་འཕྲོག་གི་དགོན་པ་འདིར། །དབང་བཞིའི་ཆུ་བོ་རྫོགས་པར་བསྐུར། །སྙན་བརྒྱུད་ཀྱི་གདམས་ངག་མཐར་ཐུག་གནང་། །བླ་མེད་ཐེག་པ་མཆོག་གི་དོན། །གཉིས་མེད་རྩེ་གཅིག་གཞིར་བཞག་ནས། །སེམས་སྟོང་པ་ཉིད་ལ་སྦར་ཟིན་བྱས། །ཁ་བ་ཅན་འདབ་བྱང་ཕྱོགས་སུ། །ལུང་བསྟན་རྒྱལ་ཚབ་བཀོད་པའི་ཕྱིར། །ད་ནི་བན་ཆུང་བོད་དུ་འགྲོ། །བན་ཆུང་བོད་དུ་འགྲོ་བ་ལ། །ཤུལ་ན་འཕྲེང་བ་རྣམས་གསུམ་ཡོད། །ཡིད་ལ་གཅགས་པ་རྣམས་གསུམ་ཡོད། །ལམ་ན་འཇིགས་པ་རྣམ་གསུམ་ཡོད། །བར་ན་འཚེར་བ་རྣམ་གསུམ་ཡོད། །གདོད་ན་བྲོད་པ་རྣམ་གསུམ་ཡོད། །ངོ་
2-3-60b
མཚར་ཆེ་བ་རྣམ་གསུམ་ཡོད། །གླུ་འདིའི་རྗེས་ཟློས་མ་བཤེད་ན། །ཚིག་དེས་དོན་གྱི་བརྡ་མི་མཇལ། །ཤུལ་དུ་འཕྲེང་བ་རྣམ་གསུམ་ནི། །རྗེ་ནཱ་རོ་དང་མཻ་ཏྲིས་དབུ་མཛད་ནས། །གྲུབ་ཐོབ་ཀྱི་བླ་མ་བརྒྱ་རྩ་གཅིག །ཤུལ་དུ་ལུས་ཏེ་མ་བས་འཕྲེང་། །དཔལ་འཇིགས་མེད་གྲགས་པས་དབུ་མཛད་ནས། །མཆེད་དང་ལྕམ་དྲལ་བརྒྱ་རྩ་གཅིག །ཤུལ་དུ་ལུས་ཏེ་མ་བས་འཕྲེང་། །གནས་ཕུ་ལ་ཧ་རིས་སྣ་དྲངས་པའི། །གྲུབ་ཐོབ་གནས་ཆེན་བརྒྱ་རྩ་གཅིག །ཤུལ་དུ་ལུས་ཏེ་མ་བས་འཕྲེང་། །ཡིད་ལ་གཅགས་པ་རྣམ་གསུམ་ནི། །ལྷོ་དྷ་རྨ་བོ་དྷི་ཨ་ཤོ་ཀ །དྲིན་ཅན་གནས་པོ་ཕོ་མོ་རྣམས། །འབྲལ་མི་ཕོད་དེ་ཡིད་ལ་གཅགས། །བྲམ་ཟེའི་ཁྱེའུ་གསེར་ཕྲེང་ཅན། །ཤི་སྲོག་གིས་མཐུད་པའི་གྲོགས་པོ་བྱས། །འབྲལ་མི་ཕོད་དེ་ཡིད་ལ་གཅགས། །དེད་དཔོན་གྱི་བུ་མོ་སྔོ་བསངས་མ། །མཚན་ལྡན་དེ་རིགས་མར་བསྟེན་བསྟེན་ནས། །འབྲལ་མི་ཕོད་དེ་ཡིད་ལ་གཅགས། །ལམ་གྱི་འཇིགས་པ་སྣམ་གསུམ་ནི། །མཚོ་དུག་མཚོ་ཁོལ་མས་སྣ་དྲངས་ནས། །ཤར་ཆུ་བོ་གང་ག་ད་གཟོད་རྒལ། །འདི་མ་མཐོང་གོང་ནས་ང་རེ་འཇིགས། །རི་ཨུ་ཤུ་རི་ཡི་ནགས་འདབ་
2-3-61a
ན། །ཆོམ་རྐུན་ཇག་པ་ལམ་ནས་སྒུགས། །འདི་མ་མཐོང་གོང་ན་ང་རེ་འཇིགས། །གྲོང་ཁྱེར་ཏི་ར་ཧུ་ཏི་ན། །ཁྲེ་མེད་ཤོ་གམ་ཆར་ལྟར་འབེབས། །འདི་མ་མཐོང་གོང་ནས་ང་རེ་འཇིགས། །བར་གྱི་འཚེར་བ་རྣམ་གསུམ་ནི། །འཕྲང་ས་ལ་ཧ་ཏི་མ་གཏོགས་པ། །བཅའ་འཕྲང་ཟམ་པ་བརྒྱ་བཅུ་གཅིག །ཨེ་མ་རྔུལ་ཆུ་བས་ཀྱང་འཚེར། །ལ་ཁ་ལ་བྱ་ལ་མ་གཏོགས་པ། །ལ་ཆེན་ལ་ཆུང་བརྒྱ་ཅུ་གཅིག །ཨེ་མ་དངུལ་ཆུ་བས་ཀྱང་འཚེར། །ཐང་དཔལ་མོ་དཔལ་ཐང་མ་གཏོགས་པ། །ཐང་ཆེན་ཐང་ཆུང་བརྒྱ་བཅུ་གཅིག །ཨེ་མ་དངུལ་ཆུ་བས་ཀྱང་འཚེར། །གདོང་གི་བྲོད་པ་རྣམ་གསུམ་ནི། །སྒྲ་ཀ་(ཀཱ་)ལ་ཙན་དྲས་སྣ་དྲངས་ནས། །སྐད་སྣ་བརྒྱ་དང་རྩ་བརྒྱད་ཤེས། །གྲོགས་ལོ་ཙྪ་(ལོཙྪ་)ཚོགས་ན་ང་རེ་བྲོད། །དགྱེས་རྡོར་གདན་བཞིས་སྣ་དྲངས་ནས། །རྒྱུད་འགྲེལ་བརྒྱ་དང་རྩ་བརྒྱད་ཤེས། །གྲོགས་སྟོན་ཆེན་ཚོགས་ན་ང་རེ་བྲོད། །བཀའ་བཞིའི་གདམས་པས་སྣ་དྲངས་ནས། །སྙན་བརྒྱུད་བརྒྱ་དང་རྩ་བརྒྱད་ཤེས། །གྲོགས་སྒོམ་ཆེན་ཚོགས་ན་ང་རེ་བྲོད། །ངོ་མཚར་ཆེ་བ་རྣམ་གསུམ་ནི། །བསྲེ་དང་འཕོ་བ་མ་གཏོགས་པ། །ཁྱད་ཆོས་བརྒྱ་དང་རྩ་བརྒྱད་ཤེས། །ཆེ་ན་ངོ་མཚར་དེ་ཆེ་མོད། །དུད་སོལ་ལྷ་མོ་
2-3-61b
མ་གཏོགས་པ། །བསྟན་སྲུང་བརྒྱ་དང་རྩ་བརྒྱད་ཤེས། །ཆེ་ན་ངོ་མཚར་དེ་ཆེ་མོད། །རིམ་ལྔ་དམར་ཁྲིད་མ་གཏོགས་པ། །རྫོགས་རིམ་བརྒྱ་དང་རྩ་བརྒྱད་ཤེས། །ཆེ་ན་ངོ་མཚར་དེ་ཆེ་མོད། །དེ་ཐམས་ཅད་བླ་མ་རྗེ་ཡི་དྲིན། །འབངས་དྲིན་ལན་གཞན་གྱིས་མི་མཐོར་བས། །རྗེ་མི་འབྲལ་སྤྱི་གཙུག་རྒྱན་དུ་བཞུགས། །དེ་འོག་མཆེད་དང་ལྕམ་དྲལ་རྣམས། །བན་ཆུང་བོད་དུ་འགྲོ་བ་ལ། །རྐྱེན་བར་ཆད་མེད་པའི་བྱིན་རླབས་ཞུ། །དུས་ད་ནི་མཇལ་བ་ཡོང་མི་མཆིས། །དཔལ་ཨུ་རྒྱན་ཡུལ་ལམ་མཁའ་སྤྱོད་དུ། །ཚེ་ཕྱི་མ་ཅིས་ཀྱང་མཇལ་བར་ཞུ། །ཞེས་བླ་མ་ལོ་ཙྪ་(ལོཙྪ་)བས་མགུར་དེ་བཞེས་པས། མཆེད་གྲོགས་གོང་མར་གྱུར་པ། བྲམ་ཟེ་མུ་ཏ་ཀ་ཀིརྟི་དང་། རྣལ་འབྱོར་མ་སུ་ཀ་དྷ་རི་ལ་སོགས་པ་བརྒྱད་ཀྱིས་སྤྱན་ཆབ་ཤོར་རོ། །དེ་ནས་བླ་མ་མར་པས། བླ་མའི་སྐུའི་དཀྱིལ་འཁོར་ལ་དབང་བཞི་ཞུས། སྨོན་ལམ་བཏབ་ནས་བྱོན་པ་ལ། མཆེད་ལྕམ་གཤེགས་སྐྱེལ་བ་རྣམས་ཀྱིས་སྐུ་ཆས་ཀུན་བསྣམས། རྗེ་མར་པ་རང་གིས་ཕུ་ལ་ཧ་རིའི་རྡོ་སྐས་ཀྱི་རྩ་བར་མ་ཕེབས་པར་ཕྱི་འགྲོས་ཀྱིས་བླ་མ་ལ་གོམ་པ་རེ་ལ་ཕྱག་རེ་དང་ཐེམ་རེའི་སྟེང་ནས་ཕྱག་རེ་འབུལ་ཞིང་། རྡོ་སྐས་རྫོགས་མཚམས་སུ་བླ་མ་ལ་གདུང་ཤུགས་
2-3-62a
དྲག་པོས་ཕྱག་མང་པོ་བཙལ་བའི་ས་དེར་ཡང་རྡོ་ལ་རྗེ་མར་པའི་ཞབས་རྗེས་ཤིག་བྱུང་བ་ད་ལྟ་ཡང་ཡོད་དོ། །དཔལ་ནཱ་རོ་པ་ཡང་སྐུ་ཚེ་འདི་ཉིད་ལ་མཁའ་འགྲོས་མཁའ་སྤྱོད་དུ་སྤྱན་དྲངས་པར་གདའ། རྗེ་མར་པ་ལ། བླ་མ་དང་མཆེད་ལྕམ་རྣམས་ཀྱིས་བྱིན་གྱིས་བརླབ་པ་མཛད་པས་བར་ཆད་མེད་པར་བོད་ཡུལ་ལྷོ་བྲག་ཏུ་ཕེབས་ནས་སྐུ་ཚེ་མཐར་འཁྱོལ་གྱི་བར་དུ་བསྟན་པ་དང་སེམས་ཅན་གྱི་དོན་རྒྱ་ཆེན་མཛད་ཅིང་། འདིའི་རེས་ལ་བླ་མའི་བཀའ་བཞིན་མངའ་བདག་མཻ་ཏྲི་པའི་དྲུང་དུ་བྱོན། སླར་དགྱེས་པ་རྡོ་རྗེའི་དབང་ཞུས་པའི་དུས་ནམ་མཁའ་ནས་ལྷའི་མེ་ཏོག་གི་ཆར་ཙན་དན་དང་ཨ་ཀ་རུ་ལ་སོགས་པའི་དྲི་བཟང་འཐུལ་བ་དང་། མར་མེ་ལ་སྒྲོན་ཤིང་མཛུབ་གང་སྦར་བ་ཌཱ་ཀིས་འཛིན་པའི་རྟགས་སུ་གཡོ་འགུལ་བྱེད་བཞིན་ཞག་བདུན་ཐུབ་པ། ལྷའི་རོལ་མོ་ཡིད་འཕྲོག་པའི་སྒྲ་སྣ་ཚོགས་སྒྲོག་པ་བྱུང་ཞིང་། བདེ་མཆོག་གི་དབང་ཞུས་པའི་ཚེ་ས་གསུམ་གྱི་དཔའ་བོ་མཁའ་འགྲོ་རྣམས་སྐུ་མི་མངོན་པར་སྔགས་ཀྱི་སྒྲ་སྒྲོགས་པ་དང་། གཏོར་མ་སྐྱོང་ཚེ་ཞིང་སྐྱོང་མཁའ་འགྲོའི་སྦྲུལ་པ་ལྕེ་སྤྱང་དམར་པོ་བདུན་གྱིས་གཏོར་མ་ལེན་པ་རྣམས་དངོས་སུ་མཐོང་བས། 
2-3-62b
རྗེ་མར་པ་ལ། འཇིག་རྟེན་འདི་མ་ཡིན་པ་འོག་མིན་ལྟ་བུ་ཞིག་ཏུ་ཕེབས་སྙམ་པའི་དགའ་སྦྲོའི་ཐུགས་ཉམས་དཔག་ཏུ་མེད་པ་ཞིག་ཤར་བས། མཻ་ཏྲི་པས། ལྟས་འདི་དག་རེ་ཞིག་རྒྱ་གར་དུ་གསང་བའི་བཀའ་རྒྱས་བཏབ་པ་ལྟར་བྱས་སོ། །ནཱ་རོ་མཻ་ཏྲི་གཉིས་ཀ་ལ་སངས་རྒྱས་བས་ཀྱང་ལྷག་པ་ལྟ་བུའི་ངེས་ཤེས་སྐྱེས་སོ།། །།
༈ བོད་ལ་བྱོན་ཚུལ།
གསུམ་པ་བོད་ལ་བྱོན་ཚུལ་ནི། དེ་ནས་མཻ་ཏྲི་པ་དང་། དཔལ་ཞི་བ་བཟང་པོ། ཡེ་ཤེས་སྙིང་པོ་ལ་སོགས་པའི་བཀའ་དྲིན་ཅན་གྱི་བླ་མ་རྣམས་ལ་ཕྱི་ཕྱག་ཕུལ་ནས། དགུན་བལ་པོར་བསྙེལ་གསོ་ཞིང་བཞུགས་པའི་ཐུགས་དགོངས་དང་བཅས་བོད་ལ་ཚུར་བྱོན་ཏེ། བལ་པོ་ཕམ་མཐིང་དུ་ཕེབས་པ་ལས། སྤྱི་ཐེར་བ་ཆོས་ཀྱི་སྤྱན་ཅན་དེ་ནི་སྐུ་ཡལ་འདུག སེན་ཏ་བས་ཐོག་དྲངས་པའི་མཆེད་ལྕམ་མང་པོས་སྣ་ལེན་དུ་ཚོགས་འཁོར་ཞིག་བཤམས་པའི་གྲལ་དུ་སན་ཏ་བའི་ཞལ་ནས་ལོ་ཙྪ་(ལོཙྪ་)བ་ཁྱོད་ལ་ངས་དང་པོ་ནས་ཁྱོད་དཔོན་སློབ་ཀྱི་ཐུགས་རྗེ་དང་མོས་གུས་ནང་མཐུན་པས་ཞལ་མཇལ་ངེས་བྱས་པ་ལྟར། ཞལ་མཇལ་པའི་སྙན་པ་ནི་སྔར་ནས་ཐོས། རང་རེ་གཉིས་སྡེབས་ནས་བཙལ་བ་མ་གཏོགས་གཞན་གང་དང་གང་དུ་བཙལ། བླ་མ་དང་ཞལ་གང་དུ་
2-3-63a
མཇལ། སྐུ་ཆེ་བའི་ཡོན་ཏན་དང་། ངོ་མཚར་བའི་ལྟས་ཅི་འདྲ་མཐོང་། ནཱ་རོ་མཻ་ཏྲི་གཉིས་མ་གཏོགས་པའི་བླ་མ་དུ་ཙམ་བསྟེན། ངེད་རྣམས་ཀྱི་ཚོགས་ཆུང་འདི་ཁྱོད་བར་ཆད་མེད་པར་འདིར་བྱོན་པའི་དགའ་སྟོན་ཡིན། ཁྱེད་ཀྱིས་ཀྱང་སྐྱེས་ཁ་ལ་དྲི་བ་དེ་དག་གི་ལན་དུ་གླུ་ཅིག་ལོང་མཛོད་གསུངས་པའི་ལན་དུ། ཡིད་གདུང་བས་སྐྱོ་བ་སངས་པར་བྱེད་པ་ཆོས་སྐྱོང་གི་ཤུགས་གླུའི་སྐད་ལ་རྟ་དྲངས་ཏེ། བླ་མ་དང་མཇལ་ཚུལ་ངོ་མཚར་ལྟས་བརྒྱད་ཀྱི་མགུར་ཆེན་འདི་བླ་མ་དང་མཆེད་ལྕམ་རྣམས་ལ་སྐྱེས་སུ་ཕུལ་ལོ། །དཔལ་ཀ་ན་ཀ་ཤྲིས་དབུ་མཛད་པའི། །འདིར་བཞུགས་གསན་ཅིག་མཆེད་ལྕམ་རྣམས། །མི་ང་རང་གང་ཡིན་ཟེར་ཙ་ན། །མཚན་སྙན་མར་པ་ལོ་ཙྪ་(ལོཙྪ་)ཡིན། །ལྟེ་བ་བོད་ཡུལ་དབུས་སུ་བཅད། །སྦྱངས་པ་ལྷོ་བལ་རྒྱ་རུ་བྱས། །རྒྱ་གར་ཡུལ་དུ་ལན་གསུམ་ཕྱིན། །དུས་ད་རེས་ནན་ཏན་ཞུས་ཏིག་བྱས། །ཞབས་པད་སྤྱི་བོས་རེག་མཛད་ཅིང་། །གསུང་དོན་བདུད་རྩིའི་རྗེས་གནང་བའི། །སྤྱིར་ཆོས་འབྲེལ་ཙམ་གྱི་བླ་མ་མང་། །དཔལ་སིང་གྷ་གླིང་པས་སྣ་དྲངས་པའི། །མངོན་ཤེས་རིག་པ་མངའ་བརྙེས་ཤིང་། །སྣང་བ་འགྱུར་ངེས་བཅུ་གསུམ་བཞུགས། །
2-3-63b
ཀུན་གྱི་ནང་ནས་མཆོད་སྡོང་བཞིན། །རྗེ་འགྲན་གྱི་དོ་མེད་ནཱ་རོ་པ། །རྡོ་རྗེ་འཆང་ཆེན་མི་གཟུགས་ཅན། །རྗེ་ཁོང་གི་དྲིན་ལ་འཁོར་ཐབས་མེད། །ཕ་ཡིད་ལ་གཅགས་སོ་སྦྲུལ་པའི་སྐུ། །མི་ཁོ་བོས་མ་བཅོལ་ས་ཕྱོགས་མེད། །ཞལ་ཡང་དེ་མཇལ་དེ་མ་མཇལ། །རི་མུན་པ་ཅན་གྱི་ནགས་འདབས་སུ། །ངོ་མཚར་ཤེལ་གྱི་ཕ་བོང་ལ། །རྒྱ་ཡི་འབུར་དུ་བཀོད་པ་བཞིན། །ཕ་རྗེ་བཙུན་གཤེགས་པའི་ཞབས་རྗེས་མཐོང་། །ལར་ངོ་མཚར་ཆེ་ན་དེ་ཆེ་མོད། །ཤིང་ཙན་དན་སྨན་གྱི་སྡོང་པོ་ལ། །ནཱ་རོའི་ཐུགས་རྗེའི་རྣམ་འཕྲུལ་གྱིས། །དགྱེས་རྡོར་སྤྲུལ་པའི་ལྷ་དགུ་ཡི། །ཡུམ་ལྷ་གཅིག་སྐྱེས་མའི་ཐུགས་ཀ་ནས། །ཨ་ཥྚ་སྔགས་ཀྱི་འཁོར་ལོ་དེ། །སྤུ་ཤད་རྩེ་མོས་བྲིས་འདྲ་ལས། །འོད་ཟེར་སྣ་ཚོགས་འཕྲོ་བ་ཡིས། །བདག་ལ་རྗེས་སུ་གནང་བར་མཛད། །ངོ་མཚར་ཆེ་ན་དེ་ཆེ་མོད། །ང་རང་དབང་མེད་པར་མཆི་མ་ཤོར། །ངུ་སྙིང་འདོད་པའི་གདུང་སེམས་སྐྱེས། །རབ་ཏུ་མ་བཟོད་སྨྲེ་སྔགས་བཏོན། །རྩེ་གཅིག་ཡིད་ཀྱིས་གསོལ་བ་བཏབ། །ཐུགས་རྗེས་གཟིགས་ནས་མདུན་དུ་བྱོན། །མཐོང་ལམ་ལྟ་བུའི་དགའ་བ་སྐྱེས། །ངོ་མཚར་ཆེ་ན་དེ་ཆེ་མོད། །ངས་དཀོན་པའི་རིན་ཆེན་གསེར་ཕྱེ་ཕུལ། །ང་ནི་དེ་ཀུན་མི་
2-3-64a
འདོད་གསུང་། །ཡང་ཡང་བསྐྱར་ཏེ་བཞེས་པར་ཞུས། །ཕ་བླ་མ་དཀོན་མཆོག་མཆོད་ཅིག་གསུངས་། །ལྟོས་མེད་ནགས་ཀྱི་གསེབ་ཏུ་གཏོར། །ཁོ་བོ་ཕངས་སེམས་སྐྱེས་པ་ལས། །ཁྱོད་འདོད་ན་སླར་ཡང་ཡོད་དོ་གསུངས། །ཕྱག་ཐལ་སྦྱར་སྙིམ་པ་ཁ་ཕྱེ་བས། །མ་གོད་མ་ཉམས་སྔ་མ་བཞིན། །ངོ་མཚར་ཆེ་ན་དེ་ཆེ་མོད། །ཞབས་མཐེ་བོང་ས་ལ་བརྡབས་པ་ལས། །རྡོ་དང་གསེག་མ་གསེར་དུ་གྱུར། །ཐམས་ཅད་གསེར་གླིང་ཡིན་ནོ་གསུམ། །ངོ་མཚར་ཆེ་ན་དེ་ཆེ་མོད། །སྤྱན་ལྟ་སྟངས་མཁའ་ལ་གཟིགས་པ་ཡིས། །ལྟང་དཀར་ཉ་ཡི་ཁོག་པ་ནས། །ཚོགས་ཀྱི་འཁོར་ལོའི་མཆོད་པ་བཤམས། །རོ་བརྒྱ་ལྡན་པའི་ཁ་ཟས་བྱུང་། །ངོ་མཚར་ཆེ་ན་དེ་ཆེ་མོད། །ཡན་ལག་བརྒྱད་ལྡན་རྫིང་བུ་རུ། །ཁྲུས་བྱས་སྲུང་འཁོར་ཁྭ་ཏས་ཁྱེར། །ལྟ་སྟངས་སྡིགས་མཛུབ་མཛད་མ་ཐག །ཁྭ་ཏ་རེངས་ནས་ས་ལ་ལྷུང་། །བར་ཆད་བདུད་ལས་རྒྱལ་ལོ་གསུང་། །ངོ་མཚར་ཆེ་ན་དེ་ཆེ་མོད། །ཁྱོད་འདི་རུ་མ་འདུག་བོད་ལ་སོང་། །ལྗོངས་བྱང་ཕྱོགས་ཁ་བ་ཅན་རྒྱུད་ན། །གདུལ་བྱ་སྣོད་ལྡན་ཡོད་དོ་ཞེས། །ལུང་བསྟན་རྗེས་སུ་གནང་བ་ཐོབ། །ངོ་མཚར་ཆེ་ན་
2-3-64b
དེ་ཆེ་མོད། །སྤྲུལ་སྐུ་ནཱ་རོ་པཎ་ཆེན་ལ། །ངོ་མཚར་ཅན་གྱི་མཐོང་ལུགས་བརྒྱད། །ཁྱོད་རྡོ་རྗེ་སྤུན་རྣམས་མ་གཏོགས་པ། །ཁོང་གཞན་ལ་བཟླས་ན་ཡིད་མི་ཆེས། །ད་དུས་བསྟན་པའི་སྙིགས་མ་ལ། །ལོག་རྟོག་སྐྱེ་བོ་ཕྲག་དོག་ཆེ། །ཡོན་ཏན་བརྗོད་ན་སྒྲོ་སྐུར་འདེབས། །དེ་ཕྱིར་རང་མིན་གཞན་རྣམས་ལ། །བཀའ་མཆིད་མི་སྤེལ་གསང་བར་ཞུ། །དབྱངས་མཆོད་པར་འབུལ་ལོ་བླ་མ་རྗེ། །ཐུགས་དགྱེས་པར་མཛོད་ཅིག་སྙིང་གྲོགས་རྣམས། །ཞེས་གསུངས་པས་ཀུན་ཐུགས་མཉེས་པར་གྱུར་ཏོ། །ཡང་དེའི་ཕྱི་ནུབ་སྤྱི་ཐེར་བའི་དུས་མཆོད་དང་། ཚེས་བཅུའི་མཆོད་པ་ལྷན་ཅིག་བྱེད་པའི་སར། དགེ་སློང་འཇིགས་མེད་གྲགས་པས་དབུ་མཛད་རྣལ་འབྱོར་ཕོ་མོ་ཉི་ཤུ་ཙམ་ཚོགས་པའི་གྲལ་དུ་དགེ་སློང་འཇིགས་མེད་གྲགས་པ་ན་རེ། སྤྱིར་ཡང་ཁྱེད་བོད་གླུ་མཁས་པ་ཡིན་ཞིང་། ཁྱད་པར་དུ་ལོ་ཙྪ་བ་ཁྱེད་རྒྱ་གར་དུ་ཡུན་རིང་དུ་བཞུགས་པ་ལ་སྲོག་ལ་བར་ཆད་མེད་པར་སློབ་གཉེར་མཐར་ཕྱིན་པར་འདུག་པས། བཀྲ་ཤིས་པའི་གླུ་ཞིག་ལེན་དགོས། ཁྱེད་ཀྱི་བླ་མ་མཻ་ཏྲི་པ་དེ་ལྟ་བ་གཙོ་བོར་སྨྲ་བ་ཡིན་ཟེར་བས། ཁོང་གི་དགོངས་པ་ཇི་ལྟར་བཞེད་འདྲིར་བྱུང་བ་ལ། 
2-3-65a
དེའི་ལན་དུ་མཻ་ཏྲི་པའི་བཞེད་གཞུང་གི་རྟོགས་པའི་མགུར་འདི་བཞེངས་པར་གདའ།། །།དཔལ་རི་ཁྲོད་ཞབས་ཀྱིས་བྱིན་བརླབས་ཤིང་། །དགོངས་པ་མཐར་ཐུག་གི་སྙིང་པོའི་དོན། །ཆོས་ཕྱག་རྒྱ་ཆེ་ལ་མངའ་བརྙེས་པ། །རྗེ་མངའ་བདག་ཆེན་པོའི་ཞབས་ལ་འདུད། །གྲོགས་སྙིང་དང་འདྲ་བའི་རྡོ་རྗེ་སྤུན། །འབྲལ་ཐབས་མེད་དོ་མཆེད་ལྕམ་རྣམས། །ཐ་དད་ལུས་ལ་སེམས་རྒྱུད་གཅིག །དཔལ་འཇིགས་མེད་གྲགས་པ་མ་ལགས་སམ། །ང་རྒྱ་གར་ཡུལ་ནས་ཡོང་བ་དང་། །ཁྱེད་བལ་ཡུལ་མཐིལ་ན་བཞུགས་པ་གཉིས། །ཚེ་འདུ་བྱེད་དབང་དུ་མ་ཐལ་བར། །ཁ་སང་དེ་རིང་དུས་བཟང་ལ། །མཁའ་འགྲོ་མཆོད་པའི་ཚོགས་གྲལ་དུ། །དུས་མཚུངས་ཞལ་ཡང་འཛོམ་པ་དེ། །དམ་ཚིག་ངོ་ལྐོག་མེད་པར་ངེས། །མི་ཁོ་བོ་ཤིན་ཏུ་སྤྲོ་བ་སྐྱེས། །ཁྱེད་དགའ་རུ་ཚོར་རམ་འདིར་བཞུགས་རྣམས། །ང་བློ་རྨོངས་བོད་ཀྱི་བན་ཆུང་ལ། །མི་ཁྱེད་ཀྱི་མཚན་སྙན་ལོ་ཙྪར་(ལོཙྪར་)བཏགས། །ཁྱོད་སྒྲ་སྒྱུར་བོད་ཀྱི་གླུ་ལོང་ཟེར། །ངག་འདྲེན་པའི་གྲེ་འགྱུར་མི་བདེ་ཡང་། །ཁྱེད་གོང་མ་རྣམས་ཀྱི་བཀའ་མ་ལྕོགས། །རྗེ་ནཱ་རོ་མཻ་ཏྲི་རྣམ་གཉིས་ལ། །སྐུ་དྲིན་རྗེས་
2-3-65b
སུ་དྲན་པའི་གླུ། །ངོ་མཚར་ཅན་གྱི་མཐོང་ལུགས་ཡོད། །སྙན་ལྷན་ནེར་གསན་ཅིག་མཆེད་གྲོགས་རྣམས། །རྗེ་རྟོགས་པ་ཅན་གྱི་མཻ་ཏྲི་པ། །མི་ཁོང་གི་སྙན་པ་རྒྱང་ནས་ཁུམས། །སྤྲུལ་སྐུའི་བཞུགས་གནས་རྒྱ་གར་ཡུལ། །ལྗོངས་ཡངས་པ་ཅན་གྱི་གྲོང་ཁྱེར་དུ། །ས་སྐྱོངས་རྒྱལ་པོའི་ཅོད་པཎ་གྱིས། །ཞབས་ཀྱི་ཟེའུ་འབྲུ་བསྟེན་མཛད་ཅིང་། །གནས་ལྔ་རིག་པའི་མཁས་པ་རྣམས། །མངའ་བདག་གཙུག་གི་རྒྱན་ཡིན་ཞེས། །སྙན་པའི་བ་དན་ཕྱོགས་བཅུར་གྲགས། །ཆོ་འཕྲུལ་བྱ་ཡི་ལོ་དུས་སུ། །བདེ་གཤེགས་མཆོད་པ་མངའ་མཛད་ཕྱིར། །མཚན་མངའ་བདག་ཞེས་བྱར་ཡོངས་སུ་གྲགས། །རྗེ་སངས་རྒྱས་དེ་ཡི་ཞལ་སྔ་ནས། །ཐེག་པའི་མཐར་ཐུག་སྙིང་པོའི་དོན། །ཆོས་ཕྱག་རྒྱ་ཆེ་ལ་ངོ་སྤྲོད་བགྱིས། །ཕྱི་གཟུང་བ་ཡུལ་གྱི་སྣང་བ་འདི། །བདེ་བ་ཆེན་པོར་རྒྱུན་ཆད་མེད། །སྐྱེ་མེད་ཆོས་ཀྱི་སྐུ་རུ་རྟོགས། །ནང་འཛིན་པ་སེམས་ཀྱི་རྣམ་ཤེས་འདི། །འགྱུ་བ་ངོས་བཟུང་མེད་པའི་ཕྱིར། །རིག་པ་རྟེན་མེད་གཅེར་བུར་མཐོང་། །སྤྱིར་སྣང་ཞིང་སྲིད་པའི་ཆོས་རྣམས་ཀུན། །གདོད་ནས་མ་གྲུབ་སྐྱེ་བ་མེད། །ངོ་བོ་སྤྲོས་དང་བྲལ་བར་རྟོགས། །འཁོར་བ་སྤང་བྱར་མི་འདོད་ཅིང་། །
2-3-66a
མྱ་ངན་འདས་པ་བསྒྲུབ་བྱར་མེད། །འཁོར་འདས་རང་གྲོལ་གཉུག་མའི་ངང་། ཟུང་འཇུག་བདེ་བ་ཆེན་པོར་རྟོགས། །དུས་གསུམ་སངས་རྒྱས་ཐུགས་ཕྱུང་ཡང་། །མཐར་ཐུག་དེ་ལས་མེད་དོ་གསུངས། །མི་ཁོ་བོའི་སྒྲོ་འདོགས་དེ་ནས་ཆོད། །རྗེ་མཻ་ཏྲི་ཆེན་པོའི་བཞེད་པ་ཡིན། །ཁྱེད་ད་ལྟ་བཞེད་ན་དེ་ལ་མཛོད། །དབྱངས་མཆོད་པར་འབུལ་ལོ་དཀོན་མཆོག་གསུམ། །ཐུགས་དགྱེས་པར་མཛོད་ཅིག་གདན་གང་རྣམས། །ཞེས་གསུངས་པས། ཁོང་རྣམས་རྗེ་མར་པ་ལ་ལྷག་པར་ངོ་མཚར་སྐྱེས་སོ། །དེ་ནས་མེ་ཛ་གླིང་ན་བླ་མ་མི་མཉམ་རྡོ་རྗེ་ཞེས་བྱ་བ་མངའ་བདག་མཻ་ཏྲི་པས་བསྡུས་པའི་མཆེད་གྲོགས་ཡིན་ཞིང་། རྗེ་རང་གིས་ཀྱང་ཏྲི་(ཀྲི་)ཡ་ཚར་གཅིག་གསན་པའི་སློབ་དཔོན་ཡང་ཡིན་པ་ཞིག་ཡོད་པ་དེའི་དྲུང་དུ་ཕྱག་སྐྱེལ་དུ་བྱོན་པས། ཁོང་གི་གྲོགས་པོ་ཁ་ཆེའི་ལྷ་བཟོ་བ་གཅིག་གིས་དཔལ་གསང་བ་འདུས་པའི་དཀྱིལ་འཁོར་ལ་རབ་གནས་མཛད་ཅིང་གདའ་བ་ལ། དེའི་ཚོགས་གྲལ་དུ་བྱོན་པས། ཁོང་རྣམས་ན་རེ། ལོ་ཙྪ་(ལོཙྪ་)བ་ཁྱེད་རྒྱ་གར་དུ་བྱོན། ཡུན་རིང་པོར་བཞུགས། ཁྱེད་ཀྱི་བླ་མ་ནཱ་རོ་པ་དེ་སྐུ་སྙན་པ་ཤིན་ཏུ་ཆེ་བར་
2-3-66b
གདའ་བ་ཁོང་གི་དྲུང་དུ་ཁྱེད་ཇི་ཙམ་བཞུགས། ཆོས་ནི་གང་གསན་ཁྱེད་རང་ལ་ཁོང་དུ་ཆུད་པའི་གདེངས་ཅི་ཡོད། ཁྱེད་རྒྱ་གར་ནས་བྱོན་པའི་སྐྱེས་བུ་གླུ་ཞིག་ལོང་ཟེར་བ་ལ་དེའི་ལན་དུ། ནཱ་རོ་པ་དང་མཇལ་ལུགས་ཀྱི་མགུར་འདི་བཞེས་སོ།། །།རྗེ་གྲུབ་ཐོབ་རྣམས་ལ་ཕྱག་འཚལ་ལོ། །སྐལ་ལྡན་བདག་ལ་བྱིན་གྱིས་རློབས། །ང་མོས་པའི་བུ་ཡི་ལམ་སྣ་དྲོངས། །ལར་མི་ང་གླུ་ལོང་མི་རིགས་ཏེ། །ཁྱེད་མཆེད་གྲོགས་གོང་མའི་གསུང་མ་ལྕོགས། །ང་ནི་འཆི་བྲོད་ཀྱི་དབྱངས་ཅིག་ལེན། །ཁྱེད་གདན་གང་གི་ཐུགས་ལ་འདི་བཞེས་ལ། །ཆོས་ཚུལ་བཞིན་ཉམས་སུ་ལེན་པར་ཞུ། །ང་བོད་ཡུལ་གྱི་མར་པ་ལོ་ཙྪ་དང་། །རྒྱ་གར་གྱི་ནཱ་རོ་པཎ་ཆེན་གཉིས། །ལྗོངས་མེ་ཏོག་རྒྱས་པའི་གྲོང་ཁྱེར་དང་། །རི་བོ་གསེར་གླིང་གི་དགོན་པར་མཇལ། །དེ་ཚེ་རབས་ཀྱི་སྨོན་ལམ་དག་པ་འདྲ། །གནས་བྱིན་རླབས་ཅན་དུ་གྲགས་པ་དེར། །སྐུ་སྙན་པ་ཅན་གྱི་རྗེ་བཙུན་དེ། །ལོ་བཅུ་དྲུག་ཟླ་བ་བདུན་དུ་བསྟེན། །དབང་བཞི་ཡོངས་རྫོགས་ལན་བདུན་ཞུས། །དཔལ་བདེ་མཆོག་འཁོར་ལོའི་བྱིན་རླབས་མཛད། །རྒྱུད་ཟབ་མོ་དགྱེས་པ་རྡོ་རྗེ་གསུངས། །
2-3-67a
ཡི་དམ་ལྷན་ཅིག་སྐྱེས་མ་གནང་། །གདམས་ངག་སྐོར་ཚོ་(ཚེ་)སྐོར་ཚོ་(ཚེ་)ཞུས། །ལམ་རྩ་དང་རླུང་ལ་སྦར་ཟིན་བྱས། །སངས་རྒྱས་ལག་པའི་མཐིལ་ན་གདའ། །དུས་ལན་ཅིག་འཆི་བའི་ཚུལ་སྟན་(སྟོན་)ཏེ། །རྣམ་སྨིན་གྱི་ལུས་རྒྱ་གྲོལ་བའི་ཚེ། །འདའ་ཀ་ཟབ་མོའི་གདེངས་ཡོད་དེ། །བསྲེ་འཕོ་གནད་ཀྱི་མཚམས་སྦྱར་ནས། །དཔའ་བོ་དཔའ་མོའི་བསུ་མ་ཡོད། །རྒྱན་མཚན་རོལ་མོའི་སྒྲ་དང་བཅས། །བདེ་ཆེན་མཁའ་སྤྱོད་གནས་སུ་འགྲོ། །དཔལ་ནཱ་རོ་པ་དང་མཇལ་བར་ངེས། །ད་ནི་འཆི་ཡང་ང་རེ་བྲོད། །ཁྱེད་འདིར་བཞུགས་ཀྱི་ཇོ་བོ་སྔགས་པ་ཀུན། །དོན་སྙན་བརྒྱུད་ཀྱི་ངོ་སྤྲོད་མི་མངའ་བར། །བཤད་རྒྱུད་ཚིག་གི་ཐ་སྙད་ལ། །ཚེ་གཅིག་གི་སངས་རྒྱས་མ་རེ་མཛོད། །ལར་སྙིང་ནས་དམ་ཆོས་མཛད་དགོངས་ན། །ནཱ་རོ་དང་མཻ་ཏྲིའི་བརྒྱུད་པ་ཟུངས། །བུ་སློབ་མ་བས་ཀྱང་ཡང་སློབ་བཟང་། །བདེ་ནས་བདེ་བར་འགྲོ་སྟེ་མཆི། །དབྱངས་སྙན་དུ་བྱོན་ནམ་འདིར་བཞུགས་རྣམས། །དོན་འཁྲུལ་པར་གདའ་ན་བཟོད་པར་བཞེས། །ཞེས་གསུངས་པས། ཡང་ཁོང་རྣམས་ན་རེ། ལོ་ཙྪ་(ལོཙྪ་)བ་ཁྱེད་ལ་སྤྱིར་བལ་པོ་ཕན་ཆད་ན་བླ་མ་དུ་བཞུགས། བླ་མ་གཙོ་བོ་རང་གང་ལ་
2-3-67b
བགྱིད། །མངའ་བདག་གི་ཞབས་དྲུང་དུ་བསྡད་པ་ལ་སྐུ་ཆེ་བའི་ཡོན་ཏན་ཇི་འདྲ་མཐོང་། གདམས་པའི་གཙོ་བོ་ནི་ཅི་ཞུས་འདྲིར་བྱུང་བས། ཡང་རྗེ་ལོ་ཙྪ་(ལོཙྪ་)བས་དེའི་དོན་དུ་མགུར་འདི་བཞེངས་སོ།། །།བྲམ་ཟེ་ཆེན་པོའི་གདུང་འཚོབ་པའི། །མཐའ་བྲལ་གཉུག་མའི་དོན་རྟོགས་ཕྱིར། །དཔེ་མེད་ནམ་མཁའི་རྣལ་འབྱོར་པ། །མཚན་མཻ་ཏྲི་ཞེས་བྱར་ཡོངས་སུ་གྲགས། །ཕ་རྗེ་བཙུན་དེ་ཡི་བཀའ་སྲོལ་འཛིན། །ལམ་འབྲལ་མེད་བསྒོམ་གྱི་རྣལ་འབྱོར་པ། །མི་ང་རང་མར་པ་ལོ་ཙྪ་(ལོཙྪ་)འདི། །སྐྱེ་ས་ཕམ་སྟེ་འགྲོ་ས་རྒྱལ། །རྒྱ་གར་ཡུལ་དུ་ལན་གསུམ་ཕྱིན། །ལུས་སྲོག་ལ་མ་བལྟས་དམ་ཆོས་བཙལ། །རྗེ་སྤྲུལ་སྐུ་སངས་རྒྱས་རྣམས་དང་མཇལ། །དབང་གདམས་ངག་བཅས་པ་ཐུགས་ལ་བཏགས། །དུས་ད་ལན་དྲིན་ལན་སྐྱེལ་དུ་མཆིས། །ལར་ཁྱེད་ལ་བླ་མ་དུ་ཡོད་གསུང་། །ཆོས་སྨོན་ལམ་གྱི་འབྲེལ་པ་བཅུ་གསུམ་གཞུགས། །ཁྱད་པར་གྲུབ་ཐོབ་ཞལ་ལྔ་བཞུགས། །རྗེ་འགྲན་གྱི་དོ་མེད་རྣམ་གཉིས་བཞུགས། །གཙོ་བོ་པཎ་ཆེན་ནཱ་རོ་པ། །དེ་འོག་རྒྱལ་སྲས་མཻ་ཏྲི་པ། །ཁོང་ལྷག་པར་མ་བས་བརྩེ་བའི་ཕྱིར། །ཡང་ཡང་ཡིད་ལ་འཕྲེང་ནས་ཀྱང་། །ཤར་ཆུ་བོ་གང་གའི་འགྲམ་དུ་ཕྱིན། །རི་མེ་ལྟར་འབར་བའི་དགོན་པ་རུ། །ཤིང་ནྱ་
2-3-68a
གྲོ་ཏ་ཡི་བསིལ་གྲིབ་ལ། །རྗེ་མངའ་བདག་ཆེན་པོ་བཞུགས་པ་མཐོང་། །ས་དང་པོ་ལྟ་བུའི་དགའ་བ་སྐྱེས། །ཌཱ་ཀི་མཉེས་པའི་མཆོད་པ་ཕུལ། །བླ་མ་མཉེས་པའི་མཎྜལ་ལ། །གུ་ལང་གསེར་གྱི་མེ་ཏོག་བཀོད། །ལུས་ཀྱི་ཐལ་སྦྱར་བརྐྱང་ཕྱག་འཚལ། །སེམས་རྩེ་གཅིག་གདུང་བས་གསོལ་བ་བཏབ། །རྒྱུད་ཟབ་མོ་བསྟོད་པ་གླུར་བླངས་དང་། །ཡིད་དམ་དགྱེས་པ་རྡོ་རྗེ་ཞུས། །དོན་མཐར་ཐུག་ཕྱག་རྒྱ་ཆེན་པོ་གནང་། །དཔལ་གཉིས་མེད་ཨ་ཝ་དྷཱུ་ཏཱི་པ། །རྗེ་བཙུན་དེ་ཡི་ཐུགས་རྗེས་བཟུང་། །ནང་ཟབ་མོ་བརྡ་ཡི་དབང་བཞི་བསྐུར། །རྒྱུད་ཡོངས་སུ་དག་པར་བྱིན་གྱིས་བརླབས། །གཞི་འདུན་པའི་ས་བོན་གཏིང་ནས་གཡོས། །ནང་རིག་པ་སེམས་ཀྱི་འདུག་ཚུལ་དེ། །འོད་གསལ་སྐྱེ་འགག་མེད་པའི་ཕྱིར། །མ་བཅོས་གཉུག་མའི་ངོ་བོར་བསྟན། །གློ་བུར་གྱི་རྣམ་རྟོག་དབྱིངས་སུ་ཐིམ། །ཟག་མེད་ཀྱི་བདེ་བ་ནང་ནས་ཤར། །གདོད་ནས་དག་པ་ཀུན་གཞིའི་རྒྱུད། །གཞི་ལ་སྐུ་གསུམ་གཏན་ལ་ཕབ། །སེམས་ཆོས་ཉིད་མ་དང་ཞལ་ཡང་མཇལ། །དུས་ད་རེས་ངོ་མཚར་ཆེ་བའི་ལྟས། །སྒྲོན་ཤིང་མར་མེ་མཛུབ་གང་ལ། །ཞག་བདུན་བར་དུ་སྣང་བ་བྱུང་། །
2-3-68b
བེམ་པོར་གྱུར་པའི་ལྗོན་ཤིང་དེས། །རབ་ཏུ་མ་བཟོད་གཡོ་འགུལ་བྱས། །སྤྲུལ་པའི་ལྕེ་སྤྱང་མ་མོ་བདུན། །དངོས་སུ་གཏོར་མ་ལེན་པ་མཐོང་། །ས་གསུམ་གནས་པའི་མཁའ་འགྲོ་རྣམས། །གཟུགས་མེད་སྔགས་ཀྱི་རང་སྒྲ་སྒྲོག །བར་སྣང་གང་བའི་ཞིང་སྐྱོང་རྣམས། །སྣ་ཚོགས་རོལ་མོ་སྒྲོགས་པ་ཐོས། །ཁྱེད་སྐྱེ་བ་གསུམ་གྱི་འོག་རོལ་དུ། །མཆོག་གི་དངོས་གྲུབ་ཐོབ་བོ་ཞེས། །རྗེ་མངའ་བདག་ཆེན་པོའི་ཞལ་ནས་ཐོས། །ལར་མི་རང་ངན་ཏེ་བླ་མ་བཟང་། །ཆོས་ལྟ་བའི་ཡང་རྩེ་ཕུ་ཐག་ཆོད། །ལམ་གྲུབ་མཐའ་དམའ་བའི་དོགས་མ་མཆིས། །དེ་རྗེ་མཻ་ཏྲི་ཆེན་པོའི་བཞེད་པ་ལགས། །མི་ཁྱེད་ཀྱི་ཐུགས་དགྱེས་དེ་ལ་མཛོད། །ཅེས་བླ་མ་མི་མཉམ་རྡོ་རྗེས་དབུ་མཛད་པའི་མཆེད་གྲོགས་རྣམས་ལ་སྐྱེས་སུ་ཕུལ་བར་གདའ། །དེའི་དགུན་རྗེ་མར་པས་ཐུགས་དགོངས་ལྟར་བར་པོར་བསྙེལ་བསོ་ཞིང་བཞུགས་པ་ལས། དུར་ཁྲོད་ར་མ་དོ་ལིར། བླ་མ་ཡེ་རངས་པས་དབང་བསྐུར་དང་ཚོགས་འཁོར་མཛད་ཅིང་འདུག་པའི་ཚོགས་གྲལ་དུ་མར་པ་ཡང་སྤྱན་དྲངས་ཏེ་བྱོན་པ་ལས། བླ་མ་ཡེ་རང་པ་ན་རེ། ལོ་ཙྪ་(ལོཙྪ་)བ་ཁྱེད་ཀྱིས་བླ་མ་ནཱ་རོ་པ་དང་མཇལ་ཚུལ་ལ་སོགས་པ་རྣམས་མདོར་བསྡུས་པ་ཞིག་
2-3-69a
གསུངས་དང་། ཞེས་འདྲིར་བྱུང་བའི་ལན་དུ་རྗེ་མར་པས་མགུར་འདི་བཞེངས་པར་གདའ།། །།རྗེ་གོང་མ་རྣམས་ཀྱི་བྱིན་བརླབས་པ། །བོད་ཀྱི་སྒྲ་སྒྱུར་ལོ་ཙྪ་(ལོཙྪ་)ང་། །སྐྱེས་པ་མོན་བོད་མཚམས་སུ་སྐྱེས། །ལས་འཕྲོ་མང་མཁར་ཕྱོགས་སུ་སད། །སྒྲ་སྒྱུ་འབྲོག་མི་ལོ་ཙྪ་ལ། །སྒྲ་ཐང་ཀློག་སྐད་ཀྱི་ཡིག་ཚང་བསླབས། །དམ་ཆོས་རྒྱ་གར་ཡུལ་ནས་བཙལ། །རྐང་པ་རླུང་གི་འཁོར་ལོ་འདིས། །ཡོང་བ་བོད་ཀྱི་ཡུལ་ནས་འོངས། །ཁོང་སངས་རྒྱས་ནཱ་རོ་པཎ་ཆེན་དང་། །ང་བོད་ཀྱི་མར་པ་ལོ་ཙྪ་(ལོཙྪ་)གཉིས། །སངས་རྒྱས་སེམས་ཅན་གཉིས་སུ་མཇལ། །དབང་ཡོངས་སུ་རྫོགས་པ་ལན་བདུན་ཞུས། །ལར་ནི་བླ་མ་བཅུ་གསུམ་ལ། །ནཱ་རོ་མཻ་ཏྲི་ཉི་ཟླ་འདྲ། །གཙོ་བོ་ནཱ་རོ་པཎ་ཆེན་བཞུགས། །ངོ་མཚར་ཆེ་བ་འདི་འདྲ་མཐོང་། །ཤིང་ཙན་དན་སྨན་གྱི་སྡོང་པོ་ལ། །དགྱེས་རྡོར་སྤྲུལ་པའི་ལྷ་དགུ་དང་། །ཡུམ་ལྷན་ཅིག་སྐྱེས་མའི་ཐུགས་ཀ་ནས། །ཨཥྚ་སྔགས་ཀྱི་འཁོར་ལོ་མཐོང་། །ལྟང་དཀར་ཉ་ཡི་ཁོག་པ་ནས། །རོ་བརྒྱ་ལྡན་པའི་ཁ་ཟས་དང་། །རང་བྱུང་ལོངས་སྤྱོད་རྫོགས་སྐུར་མཐོང་། །ནང་སེམས་ཉིད་ཆོས་ཀྱི་སྐུ་རུ་མཐོང་། །ཕྱི་སྣང་བ་སྤྲུལ་པའི་སྐུ་རུ་མཐོང་། །
2-3-69b
སངས་རྒྱས་ནཱ་རོའི་སྤྲུལ་པ་དེ། །བར་སྣང་ཀུན་ལ་གཤེགས་པ་མཐོང་། །རང་བྱུང་ཤེལ་གྱི་ཕ་བོང་ལ། །ནཱ་རོ་གཤེགས་པའི་ཞབས་རྗེས་མཐོང་། །ངོ་མཚར་དེ་ལས་ཆེ་བ་མེད། །མངའ་བདག་རྒྱལ་སྲས་མཻ་ཏྲི་པ། །ནགས་སུ་དབང་བསྐུར་མཛད་པའི་ཚེ། །དུར་ཁྲོད་རྒྱུ་བའི་ལྕེ་སྤྱང་རྣམས། །དངོས་སུ་གཏོར་མ་ལེན་པ་མཐོང་། །ས་གསུམ་གནས་པའི་ཌཱ་ཀི་རྣམས། །དངོས་སུ་མཛད་སྤྱོད་བྱེད་པ་མཐོང་། །ཕྱི་སྣང་བ་སྒྱུ་མའི་འཁྲུལ་འཁོར་འདིར། །གཡོ་མེད་ནམ་མཁའི་ཁྱིམ་དུ་ཚུད། །བག་ཆགས་རྨི་ལམ་སྣང་བ་དེ། །འོད་གསལ་ངང་དུ་ཡལ་ཏེ་ཐལ། །སྒྲོན་ཤིང་མར་མེ་མཛུབ་གང་ལ། །ཞག་བདུན་བར་དུ་སྣང་བ་བྱུང་། །ལམ་འབྲལ་མེད་སྒོམ་པའི་རྣལ་འབྱོར་པ། །མཻ་ཏྲི་ཆེན་པོའི་ཞབས་ལ་རེག །ང་བྲམ་ཟེ་ཆེན་པོའི་བརྒྱུད་པ་འཛིན། །ངོ་མཚར་ཆེ་བ་དེ་འདྲ་མཐོང་། །བདག་གི་རྟོགས་པ་བཤད་ན་ཡང་། །ཁྱེད་འགའི་ཐུགས་ལ་མི་ཤོང་སྟེ། །ཟུར་ཙམ་བཤད་ན་འདི་ལྟར་གདའ། །འོད་གསལ་གདེངས་དང་ལྡན་ལགས་པས། །ལྟ་བ་ལ་ཕྱོགས་རིས་མེད་དོ་ཨང་། །སྒོམ་རྒྱུད་ཆད་མེད་པ་ཆུ་བོའི་གཞུང་། །ཐུན་བཞིར་སྒོམ་དུ་མི་སྣང་གི །ཚུལ་འཆོས་རྟོག་པ་བོར་
2-3-70a
བ་ཡིས། །མཉམ་རྗེས་རྟོག་པ་མི་འདུག་གོ། །རླུང་སེམས་གཉིས་ལ་དབང་ཐོབ་པས། །འཁོར་བའི་འཇིགས་པ་ཡལ་ནས་ཐལ། །དེ་རྣམས་བདག་གི་རྟོགས་པ་ལགས། །ཞེས་གསུངས་པས། དེར་ཚོགས་པ་རྣམས་རྗེ་མར་པ་ལ་བླ་མ་ལྟ་བུའི་མཐོང་སྐྱེས་སོ། །དེ་ནས་དུར་ཁྲོད་དུ་ལྕེ་སྤྱང་གི་སྐད་དང་འུར་སྒྲ་ཞིག་བྱུང་བས་ཁོང་རྣམས་ན་རེ། ཚོགས་སྲོད་ལ་ཐོན་པ་བྱེད་དགོས། དུར་ཁྲོད་འདི་ཤིན་ཏུ་གཉན་པས་མི་མ་ཡིན་གྱི་བར་ཆད་བྱུང་ཉེན་ཡོད་ཟེར་འཇིགས་སྣང་ཆེན་པོ་བྱེད་ཅིང་འདུག་པས། རྗེ་མར་པའི་ཐུགས་དགོངས་ལ། ངའི་བླ་མ་ནཱ་རོ་མཻ་ཏྲི་ཡིན་ན་དུར་ཁྲོད་དུ་རོ་གདན་དང་། ཤ་ཆེན་དངོས་སུ་འབྱོར་ན་རབ། མ་འབྱོར་ན་ཏིང་ངེ་འཛིན་གྱིས་བསྐྱེད་ནས་ཀྱང་ལོངས་སྤྱོད་ཅིང་། ཞིང་སྐྱོང་གི་མཁའ་འགྲོ་རྣམས་མངོན་གསུམ་(སུམ་)དུ་གྲལ་ལ་བསྒྲིགས་ནས་གཏོར་མ་ལེན་པ་ལའང་མི་འཇིགས་པ་ཡིན་ཏེ། དོ་ནུབ་ཀྱི་འདི་ཀུན་ལུང་སྟོངས་ཀྱི་ལྕེ་སྤྱང་གི་སྐད་དང་། འབྱུང་བའི་རང་སྒྲ་ལ་ཡང་འཇིགས་སྣང་བྱེད་པ་འདུག་སྙམ་ནས། ནཱ་རོ་མཻ་ཏྲི་གཉིས་ཀྱི་ཡོན་ཏན་ཏུར་གྱི་དྲན་ཏེ། རྒྱ་གར་ནས་ཚུར་འོངས་པ་ལ་འགྱོད་ཅིང་། སླར་ཡང་རྒྱ་
2-3-70b
གར་དུ་འབྱོན་པར་ཐུགས་ཐག་བཅད་ནས་མང་པོ་བཤུམ་ཞིང་བཞུགས་པ་ལས། དེ་ནུབ་ཐོ་རངས་ཀྱི་མཚན་ལམ་དུ་གོས་ཤིང་ལོ་གྱོན་པའི་བུད་མེད་མཛེས་མ་ཞིག་གི་ཕྱག་མར་པའི་དབུ་ཐོག་ཏུ་བཞག་ནས། ཁྱོད་ད་རྒྱ་གར་དུ་འགྲོ་བ་བས་བོད་དུ་ལོག་ན་འགྲོ་དོན་ཆེ་སྟེ། གདུལ་བྱ་སྐལ་ལྡན་མང་པོ་ཡང་ཡོད་ཅིང་། བོད་དུ་མ་ཕྱིན་གྱི་བར་ལ་བར་ཆད་མི་འབྱུང་ངོ་ཞེས་ལུང་བསྟན་པ་ལས། མནལ་སད་པ་དང་ཞིང་སྐྱོང་གི་མཁའ་འགྲོ་ནཱ་རོ་མཻ་ཏྲིའི་ཐུགས་རྗེས་བསྐུལ་ནས་བཏང་བར་ཐག་ཆོད་པས་ཐུགས་སྤྲོ་བའི་ཉམས་ཤིག་ཀྱང་ཤར་ཅིང་། བོད་ལ་འབྱོན་པར་ཐུགས་ཐག་བཅད་དེ། བལ་ཡུལ་རིན་ཆེན་ཚུལ་གྱི་གཙུག་ལག་ཁང་ན་བླ་མ་སན་ཏ་བ་ལས་རལ་གཅིག་མའི་མངོན་རྟོགས་དང་། བདུད་རྩི་འོད་ལྡན་གྱི་སྒྲུབ་ཐབས་དང་། རྫོགས་རིམ་ཁ་འཐོར་བ་འགའ་གསན་ཅིང་བཞུགས་པ་ལས། ནུབ་གཅིག་གི་མནལ་ལམ་དུ་རྗེ་མངའ་བདག་མཻ་ཏྲི་པ་སེང་གེ་ལ་ཆིབས་ནས་ནམ་མཁའ་ལ་གཤེགས་པ་རྨིས། ཕ་རྗེ་ཙུན་ཐུགས་རྗེས་གཟུང་དུ་གསོལ། ཞེས་འོ་དོད་བོས་པ་ལས། མདུན་གྱི་ནམ་མཁའ་ལ་བྱོན་ནས་མཚོན་པའི་བརྡ་བསྟན། དཔེ་དང་བྲལ་
2-3-71a
བའི་ཆོས་གསུངས། མཐའ་ལས་འདས་པའི་དོན་རྟོགས། སྔར་མ་སྐྱེས་པའི་ཉམས་ཤར་བ་རྨིས། དེར་མནལ་སད་པ་དང་གནམ་ལངས་འདུག་པས། བླ་མ་དྲན་ནས་མང་དུ་བཤུམས། དེའི་ཕྱི་ནུབ་བླ་མ་སན་ཏ་བ་ལ་ཆོས་ཐོན་པའི་གཏང་རག་དང་། མཻ་ཏྲི་པ་ལ་གསོལ་བ་འདེབས་པའི་ཚོགས་མཆོད་བཟང་པོ་ཞིག་བཤམས་པའི་གྲལ་དུ་སེན་ཏ་བའི་ཞལ་ནས། དོ་ནུབ་ཀྱི་ཚོགས་གྲལ་འདིར། ཁྱེད་རང་གི་ཐུགས་ལ་འཁྲུངས་པའི་མགུར་ཅིག་ཅིས་ཀྱང་ལེན་དགོས་གསུངས་པས། རྗེ་མར་པས་མཚན་ལྟས་བཟློས་པའི་མགུར། ཡིད་བྱིང་བ་གསེང་བར་བྱེད་པ་ཆུ་ལྕགས་ཟིལ་པ་ཅན་གྱི་སྐད་ལ་རྟ་དྲངས་པའི་མགུར་ཆེན་འདི་གསུངས་སོ།། །།རྗེ་སྙིང་པོའི་དོན་རྟོགས་ཆོས་ཀྱི་སྐུ། །མཚན་ཡོངས་སུ་གྲགས་པའི་མཻ་ཏྲི་པ། །ཁོང་བསམས་ཤིང་སྐུ་དྲིན་ཆེ་བའི་ཕྱིར། །མི་ཁོ་བོས་ཡིད་ལ་ཤིན་ཏུ་གཅགས། །ང་རྩེ་གཅིག་གདུང་བ་རྒྱུན་མི་འཆད། །ཕ་བྱིན་གྱིས་རློབས་ཤིག་སྤྲུལ་པའི་སྐུ། །ཁྱེད་འདྲེན་པའི་བླ་མ་སྐུ་དྲིན་ཅན། །དཔལ་སེན་ཏ་པ་ཡིས་དབུ་མཛད་ནས། །ཁྱེད་འདིར་བཞུགས་ཀྱི་རྣལ་འབྱོར་ཕོ་མོ་རྣམས། །གླུ་འདི་ལ་དར་ཅིག་སྙན་གསོན་
2-3-71b
མཛོད། །དབྱངས་འདི་ལ་མཁའ་འགྲོའི་བྱིན་རླབས་ཆགས། །ང་མར་སྟོན་ཆོས་ཀྱི་བློ་གྲོས་འདི། །ཚེ་སུམ་ཆ་རྒྱ་གར་ཡུལ་དུ་བསྐྱལ། །ལོ་བཞི་བཅུའི་བར་དུ་ཐོས་བསམ་བྱས། །དུས་ན་ནིང་གདུག་པ་སྤྲུལ་གྱི་ལོ། །ཆོ་འཕྲུལ་ཁྲ་ཡི་ཟླ་བ་ལ། །མི་ཁོ་བོས་ལམ་ལ་ཞུགས་ནས་མཆིས། །ཆུ་འཇིགས་སུ་རུང་བའི་གང་ག་བརྒལ། །རིགས་ངན་ཤི་སྐྱིད་ཀྱི་ཇག་པ་གཉིས། །ཆུ་ལ་ཉ་ལྟར་འཛུལ་ཞིང་བྱུང་། །ཐང་ལ་རྟ་ལྟར་རྒྱུག་ཅིང་བྱུང་། །ཚེ་སྔ་ཕྱི་དྲན་པའི་ད-ང-ངས་སྐྲག་མྱོང་། །ཕ་རྗེ་བཙུན་སྤྱི་བོར་བསྒོམས་པ་ལས། །ཁོང་ཡང་ཡང་ལྟ་ཞིང་ལོག་ནས་ཐལ། །སྲོག་ཆུ་ནས་བཏོན་ནོ་སྐུ་དྲིན་ཅན། །ཕ་ཁྱེད་ཀྱི་དྲིན་ལ་འཁོར་ཐབས་མེད། །དུས་ཁ་སང་ཟླ་བ་སྔ་མ་ཡི། །ཁྱད་པར་ཡར་ངོའི་ཚེས་བཅུ་ལ། །དུར་ཁྲོད་ར་མ་དོ་ལེ་དེར། །བླ་མ་མཉེས་པའི་མཆོད་པ་ཕུལ། །མཁའ་འགྲོ་མཉེས་པའི་ཚོགས་འཁོར་བསྐོར། །ཁོང་འདིར་ཚོགས་ཀྱི་རྣལ་འབྱོར་མཐོང་བའི་ཚེ། །རྗེ་ནཱ་རོ་མཻ་ཏྲི་ཏུར་གྱིས་དྲན། །ཐུགས་བརྩེ་བས་འབྲལ་མེད་བསྐྱངས་པའི་ཕྱིར། །ཕ་ཡི་མཛད་སྤྱོད་བསམས་ཤིང་ཡིད་ལ་དྲན། །སེམས་གདུང་བས་མ་བཟོད་མཆི་མ་ཤོར། །སླར་རྒྱ་གར་ཡུལ་དུ་ལྡོག་གམ་བསམ། །
2-3-72a
ནམ་ཐོ་རངས་ཐམ་ཐུམ་རྨི་ལམ་ན། །གོས་ཤིང་ལོ་གྱོན་པའི་བུད་མེད་གཅིག །ཕྱག་གཡས་པ་བརྐྱང་མཛད་སོར་མོ་རྣམས། །མི་ཁོ་བོའི་མགོ་ལ་རེག་མཛད་དེ། །ཁྱོད་རྒྱ་གར་ཡུལ་དུ་མ་ལྡོག་པར། །སླར་བོད་ཡུལ་དབུས་སུ་སོང་ཤིག་གསུང་། །ལྗོངས་ཁ་བ་ཅན་དུ་མ་ཕྱིན་བར། །ཕྱི་ནང་གི་བར་ཆད་མི་འབྱུང་ཞིང་། །གདུལ་བྱ་སྣོད་ལྡན་ཡོད་དོ་ཞེས། །ལུང་བསྟན་བྱིན་གྱིས་བརླབས་པར་མཛད། །དེ་ཞིང་སྐྱོང་གི་མཁའ་འགྲོ་ཡིན་པར་ངེས། །དེ་ཡང་རྗེ་བཙུན་ཁྱེད་ཀྱི་དྲིན། །མདང་བག་ཆགས་གཉིད་ཀྱི་རྨི་ལམ་ན། །རྗེ་མངའ་བདག་རྒྱལ་སྲས་མཻ་ཏྲི་པ། །ཁོང་སེངྒེ་ཆིབས་ནས་མཁའ་ལ་གཤེགས། །མི་ཁོ་བོའི་མདུན་དུ་བྱོན་ནས་ཀྱང་། །སྐྱེ་མེད་མཚོན་པའི་བརྡ་གསུམ་བསྟན། །ཡི་གེ་མེད་པའི་ཆོས་གཅིག་གསུངས། །བརྗོད་དུ་མེད་པའི་དོན་གཅིག་རྟོགས། །སྔོན་ཆད་མེད་པའི་ཉམས་གཅིག་ཤར། །ནམ་ལངས་གཉིད་དེ་སད་ཙ་ན། །རྗེ་ཡང་ཡང་དྲན་ནོ་མཻ་ཏྲི་པ། །མི་ཁོ་བོའི་མིག་སྔར་འབྲལ་མ་ཕོད། །གདོང་མཆི་མས་གང་བའི་ངུ་འབོད་ཤོར། །དབུགས་ཁ་ནས་མ་ཐོན་བྱང་ཁོག་རྒྱངས། །ཕ་སྙིང་ལ་
2-3-72b
འདོད་དོ་སྐོམ་ཆུ་ལྟར། །མི་ཁོ་བོའི་གདུང་སེམས་མཁྱེན་ལགས་སམ། །ཕ་ཡིས་ལམ་སྣ་དྲོངས་ཤིག་སྤྲུལ་པའི་སྐུ། །ལར་རྨི་ལམ་བག་ཆགས་ཡིན་མོད་ཀྱང་། །ཕ་རྗེ་བཙུན་བྱོན་པ་ངོ་མཚར་ཆེ། །སེམས་དགའ་ལ་མི་དགའ་མཐོ་དམན་བྱུང་། །ཁྱེད་འདིར་བཞུགས་ཀྱི་སྙན་དུ་ཞུས་པ་ལགས། །ཞེས་གསུངས་པ་དང་། ཡང་བླ་མ་སེན་ཏ་བས། རྗེ་མར་པ་ལ་བྲོད་པ་བསྐྱེད་ཅིང་། བླ་མའི་ངོ་བོ་གཅིག་ལ་རང་རང་གི་མཐོང་སྣང་ལྟར་ལས་ཡོན་ཏན་ཐ་དད་དུ་འབྱུང་བ་དང་། རྨི་ལམ་དེ་རྣམས་ཇི་ལྟར་བྱུང་ཚུལ་དྲི་བའི་ཕྱིར་ལན་གསུངས་པ།། །།གྲོགས་སྙིང་དང་འདྲ་བའི་ལོ་ཙྪ་(ལོཙྪ་)བ། །བུ་ཁྱེད་ལ་དད་པ་གཏིང་ནས་ཡོད། །གཞི་རང་དབང་ཐོབ་པའི་འདུན་མ་ཡོད། །ཡིད་ལྷག་པར་བརྩེ་བའི་སྙིང་རྗེ་ཡོད། །རྒྱུད་ཡོངས་སུ་དག་པའི་སེམས་བསྐྱེད་ཡོད། །རིགས་ཁྱད་པར་ཅན་གྱི་སྐྱེས་བུ་ཁྱེད། །སྔོན་ཆད་བླ་མ་མ་བརྙས་པས། །ད་ལྟ་གྲུབ་ཐོབ་དངོས་དང་མཇལ། །དེ་ཡང་གྲོགས་པོ་ང་ཡི་དྲིན། །བྱས་པ་དྲིན་གཟོ་ཡོད་པའི་ཕྱིར། །མི་ང་ཡང་གཙུག་གི་ནོར་བུར་མཐོང་། །བུ་བྱས་པ་ཤེས་པ་ངོ་མཚར་ཆེ། །གསང་སྔགས་རྒྱལ་པོ་མཆོག་གི་ལམ། །བགྲོད་
2-3-73a
པ་ཀུན་གྱི་གཞིར་གྱུར་པ། །ལྷག་པའི་དམ་ཚིག་ཁྱེད་ལ་ཡོད། །ལྷ་དང་མཁའ་འགྲོས་རྗེས་གནང་ཞིང་། །བླ་མའི་མན་ངག་སྙིང་ལ་བཞུགས། །དུས་འདིར་བདེ་བ་ཐོབ་པར་རིགས། །དུས་གསུམ་སངས་རྒྱས་ཐམས་ཅད་ཀྱི། །དངོས་གྲུབ་ཀྱི་རྩ་བ་བླ་མ་རྗེ། །སྤྲུལ་སྐུ་མཆོག་གི་རྗེ་བཙུན་ལ། །ནམ་མཁའ་ལྟ་བུར་ངོ་ཤེས་ན། །སྐྱེ་བ་མེད་པའི་དོན་རྟོགས་འགྱུར། །ཉི་མ་ལྟ་བུར་ངོ་ཤེས་ན། །གདལ་བའི་སྙིང་རྗེ་ཆེན་པོ་འབྱུང་། །ཟླ་བ་ལྟ་བུར་ངོ་ཤེས་ན། །ཉོན་མོངས་གདུང་བ་སེལ་བར་བྱེད། །རྒྱ་མཚོ་ལྟ་བུར་ངོ་ཤེས་ན། །མི་གཡོ་མཆོག་གི་ཏིང་འཛིན་བརྙེས། །ནོར་བུ་ལྟ་བུར་ངོ་ཤེས་ན། །དགོས་འདོད་རེ་བ་ལྷུན་གྱི་གྲུབ། །དེད་དཔོན་ལྟ་བུར་ངོ་ཤེས་ན། །ཐར་པའི་རིན་ཆེན་གླིང་དུ་སྐྱེལ། །དམག་དཔོན་ལྟ་བུར་ངོ་ཤེས་ན། །ལོག་ལྟ་དགྲ་ཡི་གཡུལ་ངོ་འཇོམས། །རལ་གྲི་ལྟ་བུར་ངོ་ཤེས་ན། །དངོས་འཛིན་འཆིང་བ་གཅོད་པར་བྱེད། །འཁོར་ལོ་ལྟ་བུར་ངོ་ཤེས་ན། །མཐའ་ལ་མི་གནས་དོན་རྟོགས་འགྱུར། །སེངྒེ་ལྟ་བུར་ངོ་ཤེས་ན། །གཟུང་འཛིན་རི་དྭགས་ཟིལ་གྱི་གནོན། །གླང་པོ་ལྟ་བུར་ངོ་ཤེས་ན། །ཉམ་ངའི་བདུད་ལས་ཐར་བར་བྱེད། །རྟ་མཆོག་ལྟ་བུར་ངོ་ཤེས་ན། །མྱ་ངན་འདས་པའི་དབྱིངས་སུ་སྐྱེལ། །རྒྱལ་པོ་ལྟ་བུར་ངོ་ཤེས་ན། །ཀུན་གྱི་མཆོད་ཅིང་བཀུར་བར་བྱེད། །རིགས་ལྡན་ཁྱེད་ཀྱིས་གང་མཐོང་བ། །དྲིན་ཅན་ཕ་ལྟར་ངོ་ཤེས་པས། །ཆོས་ཀྱི་རྒྱལ་སྲིད་རྒྱུན་མི་འཆད། །བུ་ཁྱོད་ཀྱི་བག་ཆགས་རྨི་ལམ་ན། །
2-3-73b
རྗེ་མངའ་བདག་ཆེན་པོ་བྱོན་ནས་ཀྱང་། །སྐྱེ་མེད་མཚོན་པའི་བརྡ་བསྟན་ཞིང་། །ཡི་གེ་མེད་པའི་ཆོས་གསུངས་པས། །མཐའ་ལས་འདས་པའི་དོན་རྟོགས་ནས། །སྔར་མ་སྐྱེས་པ་ཡི་ཉམས་ཤར་བ། །དེ་དོན་གང་ལགས་སྨྲ་བར་རིགས། །ཅེས་གསུངས་པས། ཡང་རྗེ་མར་པས། རྨི་ལམ་དུ་གསན་ཞིང་ཐུགས་ཉམས་སུ་བྱོན་པ་རྣམས་བླ་མ་སེན་ཏ་པས་དབུ་མཛད་པའི་མཆེད་གྲོགས་རྣམས་ལ་རྟོགས་པར་ཕུལ་བ།། །།རྗེ་བརྟུལ་ཞུགས་སྤྱོད་པའི་སན་ཏ་བ། །མཚན་ལྷ་ཡིས་ལུང་བསྟན་ངོ་མཚར་ཆེ། །དཔལ་གཉིས་མེད་རོལ་པའི་ཕྱག་འོག་ན། །སེམས་ཐ་དད་མེད་པའི་རྡོ་རྗེའི་སྤུན། །ཤྲི་གུ་ན་མ་དྷིས་དབུ་མཛད་པའི། །གྲལ་གཡས་ལ་བཞུགས་པའི་དཔའ་བོ་གསོན། །དེ་འོག་སྦས་པའི་རྣལ་འབྱོར་མ། །ལྕམ་སུ་ཀ་བཛྲ་དབུ་མཛད་པའི། །གྲལ་གཡོན་ན་བཞུགས་པའི་དཔའ་མོ་གསོན། །སྤྱིར་ཆོས་རྣམས་ཐམས་ཅད་སྒྱུ་མ་སྟེ། །རྨི་ལམ་སྒྱུ་མ་ཁྱད་པར་འཕགས། །ནམ་སྲོད་ལ་བག་ཆགས་རྨི་ལམ་བྱུང་། །དེ་ལ་བཟའ་གཏད་ཅི་ཡང་མེད། །ནམ་གུང་བདུད་ཀྱི་སྤྲུལ་པ་སྟོན། །དེ་ལ་ཡིད་བརྟན་བྱར་མི་རུང་། །ཐོ་རངས་ལྷ་ཡིས་ལུང་བསྟན་པ། །ཆེ་ན་ངོ་མཚར་དེ་
2-3-74a
ཆེ་མོད། །དགུང་ད་ནང་སྐྱ་རེངས་ཤར་བ་ལ། །རྗེ་མངའ་བདག་ཆེན་པོ་བྱོན་ནས་ཀྱང་། །མཐར་ཐུག་སྟོན་པའི་ཆོས་གསུངས་པ། །དེ་མ་བརྗེད་དྲན་པ་འདི་ལྟར་གདའ། །སྤྱིར་ཆོས་རྣམས་ཐམས་ཅད་སེམས་ཉིད་དེ། །རང་སེམས་ཉིད་ལས་བླ་མ་བྱུང་། །སེམས་ལས་གུད་ན་གཞེན་མེད་པས། །ཅིར་སྣང་ཐམས་ཅད་སེམས་ཀྱི་ངང་། །དེ་ཡང་གདོད་ནས་མ་གྲུབ་པ། །མ་སྐྱེས་གཉུག་མའི་གནས་ལུགས་ལས། །རྣམ་རྟོག་རྩོལ་བས་སྤང་དུ་མེད། །མ་བཅིངས་རང་སོར་ལྷུག་པར་ཞོག །དེ་ཉིད་བརྡ་ཡིས་མཚོན་པའི་ཕྱིར། །མི་རོ་གདོལ་པ་ཁྱི་དང་ཕག །བུ་ཆུང་སྨྱོན་པ་གླང་ཆེན་དང་། །ནོར་བུ་རིན་ཆེན་ཨུ་པ་ལ། །རྔུལ་ཆུ་རི་དྭགས་སེང་གེ་དང་། །བྲམ་ཟེ་ཁྲི་སྙན་མཐོང་ངམ་གསུངས། །བརྡ་ཡིས་མཚོན་པའི་དོན་རྟོགས་པ། །འཁོར་འདས་གཉིས་སུ་མི་འཛིན་ཅིང་། །སྤང་བླང་རྒྱུད་ལ་མི་སྦྱོར་བ། །གཞན་ནས་འབྲས་བུ་མི་རེ་ཞིང་། །ཡིད་ལ་བྱར་མེད་སྤྲོས་དང་བྲལ། །མཐའ་གཞི་དག་ཏུ་ལྷུང་བ་མེད། །སྒོམ་དུ་མེད་ཅིང་ཡེངས་སུ་མེད། །དྲན་དུ་མེད་ཅིང་བརྗོད་དུའང་མེད། །གང་གིས་ཀྱང་ནི་མི་མཚོན་དུ་མེད། །བླ་མའི་དྲིན་གྱིས་དེ་ལྟར་རྟོགས། །དེ་དོན་རྟོགས་པའི་ཉམས་ཤར་
2-3-74b
བས། །སེམས་དང་སེམས་བྱུང་འགགས་པ་ཡི། །དབྱིངས་དང་རིག་པ་དབྱེར་མེད་དེ། །སྐྱོན་དང་ཡོན་ཏན་སྐྱེ་བྲི་མེད། །བདེ་སྟོང་གསལ་ལ་མ་འགགས་པ། །འོད་གསལ་འགྲོ་འོང་མེད་པར་ཤར། །གཉུག་མ་ངོ་སྤྲོད་ལྟ་བའི་གནད། །སྐྱེ་མེད་མཚོན་པའི་བརྡ་དོན་རྣམས། །རྗེ་མངའ་བདག་ཆེན་པོའི་ཞལ་ནས་ཐོས། །ངག་བརྗོད་པ་གླུ་རུ་མི་བླང་དུ། །རྗེ་གོང་དུ་བཀའ་ནན་ཆེས་པ་དང་། །མཆེད་གྲོགས་རྣམས་ཀྱི་ཞོལ་མ་ལྕོག །མཁའ་འགྲོས་ཀོ་ལོང་མི་མཛད་ཞུ། །ཞེས་སན་ཏ་པས་དབུ་མཛད་པའི་མཆེད་གྲོགས་རྣམས་ལ་བལ་ཡུལ་རིན་ཆེན་ཚུལ་གྱི་གཙུག་ལག་ཁང་དུ་མངའ་བདག་མཻ་ཏྲི་པ་རྨི་ལམ་དུ་བྱོན་ནས་ཕྱག་རྒྱ་ཆེན་པོ་བརྡའི་དོན་བསྟན་པ་རྣམས་མགུར་དུ་བཞེས་པའོ། །གསུང་མགུར་འདི་ཉིད་རྗེ་མར་པས་བོད་དུ་རྗེ་བཙུན་མི་ལ་དང་། མར་པ་མགོ་ལེགས་གཉིས་མ་གཏོགས་གཞན་ལ་མ་གནང་ཞིང་། རྗེ་མཆེད་གཉིས་ཀྱིས་ངན་རྫོང་སྟོན་པ་བྱང་ཆུབ་རྒྱལ་པོ་ལ་གནང་བ། སེམས་ཅན་གྱི་དོན་དུ་ཀུན་ལ་གྲགས་པ་བགྱི་པ་ལགས་སོ། །དེ་ནས་རྗེ་མར་པས་བལ་ཡུལ་གྱི་བླ་མ་རྣམས་ལ་ཕྱི་ཕྱག་ཕུལ་ནས་བོད་ལ་བྱོན་པར་གདའ། དེའི་ཚེ་ལྷོ་བྲག་གི་བུ་སློབ་རྣམས་བླ་མ་ཕེབས་སུ་རེ་
2-3-75a
བའི་ཐུགས་འདུན་དྲག་པོ་ལ་བརྟེན། བལ་པོར་མཇལ་བའང་སྲིད་དམ། མ་མཇལ་རུང་སྐད་བྱ་འདྲ་ཐོས་སུ་རེ་བས་མ་ཟུག་པར་མར་པ་མགོ་ལེགས་བལ་པོར་འབྱོན་དགོངས་ནས་བྱོན་པ་དང་། བླ་མ་ཚུར་བྱོན་པ་སྐྱིད་གྲོང་གི་མ་ཟད་མ་མ་ཞེས་བྱ་བའི་ཡུལ་དགོན་ཞིག་ཏུ་དཔོན་སློབ་གཉིས་མཇལ་ཏེ་ཕྱག་ཕྱི་བྱས་བྱོན་པ་ལས། མང་ཡུལ་གླང་པོ་མཁར་དུ་སྔར་གྱི་བུ་སློབ་རྣམས་ཀྱིས་སྣ་ལེན་བྱས་ཆོས་ཞུས། ཞག་ཤས་བསྙེལ་གསོ་མཛད་ཅིང་བཞུགས་པའི་བར་ལ་གཡུ་ལ་སོགས་པའི་འབུལ་བ་མང་དག་བྱུང་། དེ་ནས་གཙང་དུ་བྱོན་པས་ཉང་སྟོད་སྟག་ཚང་གི་མེ་སྟོན་ཚོན་པོའི་དགོན་པ་ཞིག་ཏུ་ཕེབས་པས། སྣ་ལེན་གྱི་ཚོགས་མཆོད་བཟང་པོ་ཞིག་བཤམས་པའི་ཚེ། མེས་སྟོན་གྱི་བླ་མ་ལགས། དོ་ནུབ་ཀྱི་ཚོགས་འཁོར་འདི་ལ་བླ་མ་འབྱོན་ལམ་ས་ཐག་རིང་པོ་ནས་བྱོན་པའི་སྟོབས་ཀྱིས་སྐུ་འོ་བརྒྱལ་ནའང་གསང་སྔགས་ཕྱག་ལེན་གྱིས་ཆེ་བ་ལགས་པས། ཆོ་གའི་ཕྱག་ལེན་དང་ཆོ་ག་རྒྱས་པ་ཕྱིས་ཀྱི་མིག་ལྟོས་ལ་ཕན་ཐོགས་པ་ཞིག་ཐུགས་རྗེས་འཛིན་པར་ཞུ། ཞེས་ཞུས་པས། རྗེ་མར་པས་ཀྱང་ཕྱག་ལེན་དང་ཆོ་ག་རྒྱས་པར་མཛད་པས། ཚོགས་གྲལ་དུ་
2-3-75b
མེ་སྟོན་སྔར་མོས་བཞིན་པའི་ཁར་སྣང་བ་འགྱུར་ནས་བླ་མ་ལགས། སླར་ཡང་ཚོགས་འཁོར་ཇི་ཙམ་ཞིག་མཛད་པ་ལས། བདག་ལ་དོ་ནུབ་ཀྱི་འདི་ཡིད་འགྱུར་སྟོབས་ཆེ་བ་ཞིག་བྱུང་། རྗེ་རིན་པོ་ཆེས་རྒྱ་གར་དུ་ཚོགས་འཁོར་མང་པོ་གཟིགས་ཤིང་མཛད་ཡོད་པ་གཞིར་བཞག་པས། ཚོགས་འཁོར་དགོས་པའི་དུས་དང་། ངོ་མཚར་ཆེ་བ་གང་གཟིགས་པ་རྣམས་གསུང་དུ་གསོལ། ཅེས་གསོལ་བ་བཏབ་པས། དེའི་ལན་དུ། རྗེ་མར་པས་ཚོགས་ཀྱི་དགོས་པ་དང་གཟིགས་ཚུལ་གྱི་མགུར་འདི་གསུངས་སོ།། །།ཚོགས་ཀྱི་འཁོར་ལོ་སྐད་པ་དེ། །སྨོན་ལམ་དབང་བཞི་བསྐུར་བའི་ཚེ། །ཚོགས་ཀྱི་འཁོར་ལོ་དགོས་པ་ཡིན། །རབ་ཏུ་གནས་པ་བྱེད་པའི་ཚེ། །ཚོགས་ཀྱི་འཁོར་ལོ་དགོས་པ་ཡིན། །མཁའ་འགྲོའི་བྱིན་རླབས་ཞུ་བའི་ཚེ། །ཚོགས་ཀྱི་འཁོར་ལོ་དགོས་པ་ཡིན། །རྒྱུད་སྡེའི་ཉན་བཤད་བྱེད་པའི་ཚེ། །ཚོགས་ཀྱི་འཁོར་ལོ་དགོས་པ་ཡིན། །གདམས་ངག་ཟབ་མོ་ཞུ་བའི་ཚེ། །ཚོགས་ཀྱི་འཁོར་ལོ་དགོས་པ་ཡིན། །ཁོ་བོ་མར་པ་ལོ་ཙྪ་(ལོཙྪ་)འདི། །རྒྱ་གར་ཡུལ་དུ་ལན་གསུམ་ཕྱིན། །སྤྱིར་ཚོགས་ཀྱི་འཁོར་ལོ་བསམ་མི་ཁྱབ། །གོས་ངོ་མཚར་ཆེ་བ་འདི་འདྲ་མཐོང་། །རྗེ་བཙུན་ནཱ་
2-3-76a
རོ་པཎ་ཆེན་ལ། །རྗེ་རིགས་ཀྱི་དེད་དཔོན་འཁོར་ལོ་དང་། །ཆང་འཚོང་གྱི་བུ་མོ་ཀུཎྜ་ལིས། །རིན་ཆེན་མཁར་བའི་མཎྜལ་ལ། །ཀར་ཤ་པ་ཎིའི་རྒྱན་བཀོད་ཕུལ། །ལོ་གཅིག་གོང་ནས་གསོལ་བ་བཏབ། །རྗེ་ནཱ་རོ་ཆེན་པོས་ཞལ་གྱིས་བཞེས། །སེང་ལྡེང་ནགས་ཀྱི་དུར་ཁྲོད་དུ། །ཚོགས་འཁོར་རིམ་པ་གསུམ་དུ་བསྐོར། །ལོངས་སྤྱོད་འབྱོར་པ་དཔག་མེད་པས། །ཚོགས་དང་གཏོར་མ་རྒྱ་ཆེན་བཤམས། །དཔལ་ལྡན་ནཱ་རོའི་བྱིན་རླབས་ཀྱིས། །དཔལ་བདེ་མཆོག་འཁོར་ལོའི་ལྷ་ཚོགས་དང་། །གྲངས་མཉམ་གསང་སྔགས་རྣལ་འབྱོར་པ། །ཕོ་མོ་དྲུག་ཅུ་རྩ་གཉིས་ཚོགས། །ཟབ་མོ་བརྡ་དང་སྐད་ཀྱིས་འདྲི། །རྗེ་ནཱ་རོ་ཆེན་པོའི་ཐུགས་ཀ་ནས། །བདེ་མཆོག་འཁོར་ལོའི་ལྷ་ཚོགས་རྣམས། །དཀྱིལ་འཁོར་གྱི་དབུས་སུ་ལེགས་པར་བཞུགས། །ཆོ་གའི་རིམ་པ་རྒྱས་པར་མཛད། །རྗེ་བཙུན་ནཱ་རོ་ཆེན་པོ་དེས། །རྡོ་རྗེ་དྲིལ་བུ་ཕྱག་ཏུ་བསྣམས། །རུས་པའི་རྒྱན་དྲུག་སྐུ་ལ་གསོལ། །ཁྲུ་གང་ཙམ་གྱི་ནམ་མཁའ་ལ། །གཡས་བརྐྱང་གར་གྱིས་རོལ་པས་བཞུགས། །རྣལ་འབྱོར་ཕོ་མོ་གཞན་རྣམས་ཀྱང་། །ཕྱག་གཡས་ཌཱ་མ་རུ་འཁྲོལ་ཞིང་། །གཡོན་པ་ཏིང་ཏིང་ཤགས་བསྣམས་
2-3-76b
ནས། །གར་གྱི་ཉམས་ཀྱི་རོལ་པར་མཐོང་། །ཁོ་བོ་མར་པ་ལོ་ཙྪ་(ལོ༙༙ཙྪ་)ངས། །ལྷན་ཅིག་སྐྱེས་པ་ཆོས་ཀྱི་སྐུ། །ཟབ་མོ་དབང་བཞིའི་ངོ་བོ་མཐོང་། །ང་དེ་འདྲའི་རྗེ་དང་མཇལ་བ་ཡིན། །ཚོགས་འཁོར་དེ་འདྲ་མཐོང་བ་ཡིན། །ཕལ་དང་ཕལ་གྱི་ཆོས་མ་ཡིན། །དེ་ངོ་མཚར་ཆེའམ་གཙང་སྟོན་པ། །ཞེས་གསུངས་པས་དད་པ་ལྷག་པར་སྐྱེས་ཏེ། བླ་མ་ལགས་ད་ལན་གྱི་འབྱོན་བསྐོར་འདི་ཡང་ཐོག་མར་བདག་རང་དང་མཇལ་བྱུང་བས། སྔར་མ་གསན་པའི་དབང་གདམས་པ་ཁྱད་པར་ཅན་ཡོད་ངེས་པས། བདག་ལ་ཐུགས་རྗེས་འཛིན་པར་ཞུ་ཞེས་ཞུས་པས། མཁའ་འགྲོ་སྙན་བརྒྱུད་ལ་ནི་བཀའ་རྒྱ་ཡོད་པས་མ་གནང་། གཞན་སྔར་མ་གནང་བའི་ཆོས་མང་དག་གནང་ཞིང་བཞུགས་ཏེ་ཐོན་པའི་ཚེ། རྗེ་མར་པས་རྒྱ་གར་ལན་གསུམ་པ་འཁོར་ནས། མེས་སྟོན་གྱིས་འབུལ་ཆེན་གསུམ་བྱས་པའི་དང་པོ་ལོངས་སྤྱོད་ཐུགས་སུ་བྱོན་པ་སྟོབས་ཆེ་བའི་འབུལ་བ་བགྱིས་ཏེ་ཞུ་བ་ཕུལ་བ་ནི། སྤྱན་ལམ་དུ་ཕེབས་པའི་འབུལ་བ་འདི་དག་ད་ལན་བདག་རང་ལ་ཆོས་གནང་བའི་ཡོན་དང་། རྗེ་རིན་པོ་ཆེ་སྐུ་ན་བགྲེས་རུང་བར་ཆད་མེད་པར་རྒྱ་གར་འཁོར་བས་བུ་སློབ་རྣམས་ཀྱི་བསམ་
2-3-77a
པ་མཐར་ཕྱིན་པའི་དགའ་སྟོན་དང་གཏང་རག་ལགས་པས། འདི་དག་བཞེས་ནས་བླ་མ་གོང་མ་རྣམས་ལ་བསྟོད་པ་དང་བཅས་པའི་མགུར་གཅིག་གསུང་བར་ཞུ། ཞེས་གསོལ་བ་བཏབ་པའི་ལན་དུ་རྗེ་མར་པས་བླ་མ་རྣམས་ལ་བསྟོད་པའི་མགུར་འདི་གསུངས་སོ།། །།རྗེ་མི་བསྐྱོད་བདེ་བ་ཆེན་པོའི་སྐུ། །རྡོ་རྗེ་མཁའ་འགྲོས་མཉམ་སྦྱོར་པ། །དཔའ་བོ་རྣམས་ཀྱི་གཙོར་གྱུར་པའི། །ཧེ་རུ་ཀ་དཔལ་ཕྱག་འཚལ་བསྟོད། །བཀའ་གསང་སྔགས་མ་ལུས་བསྡུས་པ་པོ། །གསང་བའི་བདག་པོ་ཉིད་དང་ནི། །དམ་ཆོས་མི་ཡུལ་རྒྱས་མཛད་པའི། །རྗེ་ཀླུ་སྒྲུབ་ཡབ་སྲས་རྣམས་ལ་བསྟོད། །མི་ཟད་རྡོ་རྗེའི་ལྕེ་འབབ་པ། །འཇིགས་ལས་སྐྱོབ་པའི་ཐུགས་རྗེ་ཅན། །ས་གསུམ་དབང་ཕྱུག་ཏེ་(ཏཻ་)ལོ་པ། །མཆོག་གི་དངོས་གྲུབ་བརྙེས་ལ་བསྟོད། །བཅུ་གཉིས་དཀའ་སྤྱད་བླ་མ་བསྟེན། །སྡེ་སྣོད་རྒྱུད་སྡེ་མ་ལུས་པ། །སྐད་ཅིག་ཉིད་ལ་ཐུགས་སུ་ཆུད། །རྗེ་སངས་རྒྱས་མི་གཟུགས་ཁྱོད་ལ་བསྟོད། །མི་ཕྱེད་ཕྱག་རྒྱ་ཆེན་པོའི་གཟུགས། །མ་བཅོས་གཉུག་མའི་ངོ་བོ་འཆང་། །སྤྲོས་བྲལ་བདེ་བའི་དོན་རྟོགས་པ། །རྗེ་རྒྱལ་སྲས་མཻ་ཏྲིའི་
2-3-77b
ཞབས་ལ་བསྟོད། །བསྟན་པ་བཀའ་ཡི་བརྒྱུད་པ་འཆང་། །གསང་འདུས་ཟབ་མོའི་དངོས་གྲུབ་བརྙེས། །མཁྱེན་པ་ཐུགས་རྗེར་ལྡན་པ་ཡི། །ཡེ་ཤེས་སྙིང་པོའི་ཞབས་ལ་བསྟོད། །དུར་ཁྲོད་དགོན་དང་ཤིང་དྲུང་ན། །རོ་བཅུད་གསོལ་བའི་ཀུ་སུ་ལུ། །མཁའ་ལ་གཤེགས་པའི་རྫུ་འཕྲུལ་ཅན། །ཀུ་ཀུ་རི་པའི་སྐུ་ལ་བསྟོད། །ཕུན་སུམ་ཚོགས་པའི་དོན་རྟོགས་པས། །ཟླ་བ་འོད་ཀྱི་བཅུད་དང་ལྡན། །མཐོང་བའི་བདེ་བས་ཚིམ་མཛད་པ། །རྣལ་འབྱོར་མ་ཡི་སྐུ་ལ་བསྟོད། །གསེར་གྱི་ཅོད་པཎ་རབ་མཛེས་པའི། །གདུགས་མཆོག་བསིལ་ན་བཞུགས་པ་ཡི། །མཁའ་གདན་ཉི་ཟླ་མངའ་བརྙེས་པའི། །རྗེ་བཙུན་བལ་པོའི་སྐུ་ལ་བསྟོད། །འཇིག་རྟེན་གཟུང་འཛིན་འཁྲི་བ་ཆོད། །བླ་མ་བསྟེན་པའི་ཕན་ཡོན་ཅན། །བྱང་ཆུབ་སྒྲུབ་ལ་གཙོར་ལྡན་པའི། །ཐེག་ཆེན་སློབ་གཉེར་མགོ་འདོན་དང་། །བགེགས་དང་ལོག་འདྲེན་བར་ཆད་སེལ། །བླ་མ་བཟང་དང་སྤྲོད་པའི་གྲོགས། །འདྲེན་པའི་སློབ་དཔོན་རྣམས་ལ་བསྟོད། །བླ་མ་བསྟོད་པའི་ཕན་ཡོན་ནི། །དུས་གསུམ་སངས་རྒྱས་མཆོད་དང་མཚུངས། །སློབ་དཔོན་བསྟོད་པའི་བསོད་ནམས་དེས། །འགྲོ་ཀུན་བཤེས་
2-3-78a
གཉེན་བསྟེན་པར་ཤོག །ཅེས་གསུངས་པས། མི་སྟེན་འཁོར་བཅས་མགའ་མགུ་ཡི་རངས་པར་གྱུར་ཏོ། །རྗེ་མར་པ་མེ་སྟོན་ལ་ཆོས་གནང་བའི་བར་ལ། མར་པ་མགོ་ལེགས་ཀྱིས་ལྷོ་བྲག་ཏུ་གཏམ་སྙན་ཁྱེར་ཏེ་སྔོན་ལ་ཕྱིན། མགོ་ལེགས་རང་གི་ལོངས་སྤྱོད་ཀྱི་ཐོག་ནས་སྣ་ལེན་གྱི་སྟ་གོན་བྱས། གཞན་གྲྭ་པ་མང་པོས་ཉང་སྟོད་ནས་བསུས་ཏེ། བར་ཆད་མེད་པར་ལྷོ་བྲག་ཏུ་ཕེབས་ཚེ། མར་པ་མགོ་ལེགས་ཀྱིས་གཏང་རག་གི་ཚོགས་མཆོད་བཟང་པོ་ཞིག་བཤམས་པའི་གྲལ་དུ། སྔ་ལམ་བར་ལ་ཞལ་ཏ་ཞིབ་རྒྱས་གནང་རུང་། ཚོགས་པ་སྤྱི་ཡིས་གོ་བར་བྱ་བའི་སླད་དུ། མར་པ་མགོ་ལེགས་ཀྱིས་རྗེ་མར་པ་ལ། བླ་མ་ལགས། རྗེ་བཙུན་ནཱ་རོ་པ་དེ་དང་མཇལ་ནས། བར་ཆད་མེད་པའི་ཕེབས་པ་འདི་ལས་ངོ་མཚར་ཆེ་རྒྱུ་གཞན་མེད་པས། ཐུགས་རྗེས་ཚད་མེད་པ་བཟུང་། བླ་མ་དང་མཇལ་རྟིང་། སྔར་དང་ད་རེས་ལ་གདམས་ངག་གི་ཁྱད་ཅི་གདའ། ངོ་མཚར་ཆེ་བའི་ལྟས་ཅི་འདྲ་གཟིགས། བདག་འདིར་ཚོགས་རྣམས་སྤྲོ་བ་བསྐྱེད་པའི་སླད་དུ་གསུང་དུ་གསོལ། ཞེས་ཞུས་པའི་ལན་དུ། རྗེ་མར་པས་དཔལ་ནཱ་རོ་པ་ཆེན་པོ་དང་
2-3-78b
མཇལ་ནས་གདམས་ངག་ལྷག་ལུས་མེད་པར་གནང་ཞིང་ཐོབ་ལུགས་རྣམས། སྣང་བ་ཟིལ་གྱིས་གནོད་པའི་དཔའ་བོ་སྣང་གླུ་བསྒྱུར་བའི་སྐད་ལ་རྟ་དྲངས་ཏེ། མཛད་སྤྱོད་རྫུ་འཕྲུལ་ཡོན་ཏན་ངོ་མཚར་ཅན་གྱི་མགུར་འདི་གསུངས་སོ།། །།རྗེ་སྤྲུལ་སྐུའི་བཞུགས་གནས་རྒྱ་གར་ཡིན། །ལྗོངས་ཡངས་པ་ཅན་གྱི་མ་གྷ་དྷར། །མུ་སྟེགས་རྒོལ་བ་ཚར་བཅད་དེ། །སྒོ་སྲུང་ཆེན་པོར་མཚན་གསོལ་བ། །རྗེ་ནཱ་རོ་ཞེས་བྱར་གྲགས་པ་ཡི། །ཕ་སྤྲུལ་སྐུ་དེ་ཡི་ཞབས་ལ་འདུད། །ཤར་ཁྲི་སྒོ་བརྩེགས་པའི་ཕོ་བྲང་ན། །རྒྱུད་ཟབ་མོ་དགྱེས་པ་རྡོ་རྗེ་ལ། །མི་ང་རང་ལྟ་རྟོགས་བྱེད་པའི་ཚེ། །སེམས་ཤིག་མ་བདེ་ཡིད་ཅིག་འཕྱོ། །སེམས་གཞུ་ལྟར་བཀུག་ཀྱང་མདའ་ལྟར་ཤོར། །པཎ་ཆེན་ནཱ་རོ་ཏུར་གྱིས་དྲན། །གདུངས་བའི་སེམས་ལ་བཟོད་གླགས་མེད། །ས་མཐའ་ནགས་ལ་ཚོལ་དུ་ཕྱིན། །རྒྱུས་མེད་རིགས་ངན་གྲོང་དུ་ཆུད། །རྒྱལ་པོ་དྲེགས་པས་བཙོན་དུ་བཟུང་། །དཔལ་མེ་ཏོག་སྤུངས་པའི་ཕོ་བྲང་དུ། །ཞག་གསུམ་རྒྱལ་བའི་མཆོད་གནས་བྱས། །འབར་བའི་སྦྱིན་སྲེག་ཐབ་ཁུང་དུ། །ཅི་འདོད་བཟའ་བཏུང་འབྱུང་བ་མཐོང་། །
2-3-79a
ཆེ་ན་ངོ་མཚར་དེ་ཆེ་སྙམ། །ཡང་ཅིག་བསྐྱར་ནས་འཚོལ་དུ་ཕྱིན། །འབྲས་དཀར་མོ་བྲེ་གསུམ་རྒྱགས་སུ་ཁྱེར། །ལྟངས་དཀར་ཉ་ལ་བྱ་ན་བྱས། །རྗེ་བརྟུལ་ཞུགས་སྤྱོད་པའི་སེན་ཏ་བ། །ས་མཁན་ལམ་གྱི་གྲོགས་སུ་འཁྲིད། །ཟླ་ཕྱེད་བར་དུ་ཕྱོགས་བཞིར་བསྐོར། །དུར་ཁྲོད་ནགས་ཚལ་ཁྱབ་པར་ཉུལ། །དེར་ཡང་རྗེ་བཙུན་ཅུང་མ་རྙེད། །པཎ་ཆེན་ནཱ་རོ་མ་རྙེད་ཀྱང་། །ངོ་མཚར་ཆེ་བའི་ལྟས་རྣམས་མཐོང་། །ཤིང་ཙན་དན་སྨན་གྱི་སྡོང་པོ་ལ། །དགྱེས་རྡོར་སྤྲུལ་པའི་ལྷ་དགུ་རྣམས། །ཅུང་ཟད་མ་རེག་རེག་ལ་ཁད། །འཇའ་ཡི་གུར་ཕུབ་ལྟ་བུར་མཐོང་། །ལྟས་མོ་ངོ་མཚར་དེ་ཆེ་མོད། །ཡུམ་ལྷན་ཅིག་སྐྱེས་མའི་ཐུགས་ཀ་ནས། །ཨཥྚ་སྔགས་ཀྱི་འཁོར་ལོ་དེ། །མེ་ལོང་ནང་གི་གཟུགས་བརྙན་བཞིན། །ཕྱི་སྐུ་ཡིས་མ་བསྒྲིབས་གསལ་བར་མཐོང་། །ལྟད་མོ་ཆེ་ན་དེ་ཆེ་མོད། །ཤིན་ཏུ་སྲ་མཁྲེགས་རྡོ་རྗེའི་བྲག །དཀར་གོང་ཤེལ་གྱི་ཕ་བོང་ལ། །རྗེ་ནཱ་རོ་ཆེན་པོའི་ཞབས་རྗེས་དེ། །སྤུ་ཤད་རི་མོ་རྫོགས་པར་མཐོང་། །ལྟད་མོ་ངོ་མཚར་དེ་ཆེ་མོད། །ད་ནི་རིང་པོར་མི་ཐོགས་སྙམ། །ཞག་བདུན་བར་དུ་གསོལ་བ་བཏབ། །ཕ་གཞན་རིག་མངོན་མཁྱེན་མངའ་བའི་ཕྱིར། །
2-3-79b
དེ་ནས་རྗེ་བཙུན་དངོས་སུ་བྱོན། །རབ་ཏུ་དགའ་ཆེད་ངུ་འབོད་ཤོར། །དམན་པས་ཞབས་མཐིལ་གཙུག་ཏུ་བླངས། །ཐུགས་རྗེ་ཆུང་ཞེས་སྨྲེ་སྔགས་བཏོན། །གདུང་བའི་མཆི་མ་ཁྲག་ལྟར་ཟགས། །ལྟད་མོ་ངོ་མཚར་དེ་ཆེ་མོད། །ལུས་བཙུན་མོ་ལྟ་བུར་སྐུ་ལ་འཁྱུད། །ཐུགས་ལ་སྙིང་གཏད་དཔྲལ་བ་གཏུགས། །དུས་དེར་དབང་རྫོགས་སེམས་ལ་བསྐུར། །ཆོས་རྫོགས་སེམས་ཀྱི་ཉིང་ཁུ་ཕྱུང་། །ལྟད་མོ་ངོ་མཚར་དེ་ཆེ་མོད། །ལར་རྒྱ་གར་གྱི་ནཱ་རོ་པཎ་ཆེན་དང་། །ང་བོད་ཀྱི་མར་སྟོན་བློ་གྲོས་གཉིས། །སངས་རྒྱས་དང་སེམས་ཅན་གཉིས་སུ་འཇལ། །གྲུབ་ཐོབ་མི་འབྱུང་གི་དོན་མ་མཆིས། །ལྟད་མོ་ངོ་མཚར་དེ་ཆེ་མོད། །བུ་སྙིང་དང་འདྲ་བའི་དམ་ཚིག་ཅན། །དུས་བཞི་ནིང་རྒྱ་གར་དུ་འགྲོ་བའི་ཚེ། །ལོངས་སྤྱོད་འབྱོར་པས་ཕོངས་དུས་སུ། །རིན་ཆེན་གསེར་གྱི་ཡོལ་མོ་བཀང་། །གཏམ་གྲགས་སུ་རུང་བས་ངོ་མཚར་ཆེ། །ཁྱེད་ལོངས་སྤྱོད་ལ་ཕངས་སེམས་མེད་པའི་ཕྱིར། །གོས་དང་ལམ་གྱིས་མཇུག་བསྡུས་ནས། །ཅི་འདོད་ཐམས་ཅད་རྫོངས་སུ་བཏབ། །ཚེ་ཕྱི་མའི་རྒྱགས་ཕྱེ་གཏེར་དུ་སྦས། །དེ་ཕྱིར་བསམ་ཞིང་ངོ་མཚར་ཆེ། །བུ་ཕ་བས་ལྷག་པའི་གདུང་སེམས་ཅན། །ཁྱེད་མར་པ་མགོ་
2-3-80a
ལེགས་མ་ལགས་སམ། །ནོར་སྒྱུ་མ་གཏོང་བ་སྨོས་ཅི་དགོས། །སྲོག་ཕོངས་པ་མེད་པ་ཁྱེད་ཀྱི་ལུགས། །ངོ་མཚར་དེ་ལས་ཆེ་ཐབས་མེད། །ལམ་ཤུལ་ཐག་རིག་བས་ག་ལ་བརྗེད། །ལྷོ་ཁ་ནགས་བལ་བོད་གཉིས་ཀྱི་མཚམས། །དགུང་ལོ་གསར་སྒང་ལ་མེ་ཏོག་སྐྱེ། །འབྲས་དཀར་སཱ་ལུ་འདེབས་པའི་ས། ། མོན་སྐད་རིགས་མི་གཅིག་ཡུལ་ཁམས་སུ། །ནད་འཚོ་བར་དཀའ་བའི་ཚད་པ་ལ། །ཤི་ཆད་ཀྱིས་མི་འཇིགས་སྲོག་ལ་བསྡོས། །བུ་དཀའ་བའི་དམ་ཚིག་བསྲུང་བའི་ཕྱིར། །ཕ་ངས་ཀྱང་མ་བརྗོད་སེམས་ལ་འཇོགས། །དུས་འདི་ལ་མི་འབྲལ་ཨ་ཅང་ཆེ། །ཚེ་ཕྱི་མ་མི་མཇལ་ཐབས་མེད་པས། །ཡི་དམ་མཁའ་འགྲོའི་སྤྱན་ལམ་དུ། །འོ་སྐོལ་ཕ་བུས་སྨོན་ལམ་བཏབ། །ང་བྱས་པ་དྲིན་དུ་གཟོ་བའི་ཕྱིར། །གླུ་དེ་ཀུན་ཁྱོད་ཀྱི་ངོ་རུ་བླངས། །ཁོང་གཞན་ལ་མ་སྒྲོགས་གསང་བར་ཞུ། །དྲིན་ལན་གྱི་ཆོས་སྐྱེས་ད་གཟོད་སྟེར། །སྙིང་གཏམ་ཡོད་པ་ཁད་ཀྱིས་བཟློ། །འོ་སྐོལ་སྔོན་ལ་ཕྲད་པ་གྲོགས་ཀྱི་མཆོག །ང་མ་ཤི་བར་དུ་འགྲོགས་པར་བྱ། །ཞེས་པ་སྐུ་གསུང་ཐུགས་ཀྱི་ཡོན་ཏན་ལྔའི་ལས་རྣམ་པ་ལྔའི་མཐོང་སྣང་ངོ་མཚར་ཅན་རྣམས་སྲས་
2-3-80b
ཀྱི་ཐུ་བོར་གྱུར་པ་མར་པ་གོ་ལེགས་ལ་བྱས་པ་དྲིན་ལན་བསབས་པའི་མགུར་དུ་གསུངས་པའོ། །དེར་མར་པ་མགོ་ལེགས་ལ། རྗེ་ནཱ་རོ་པ་ཆེན་པོའི་ཐུགས་དམ་པདྨ་དམར་པོའི་ཕྲེང་བ་བརྒྱ་རྩ་བརྒྱད་པ་དང་། མངའ་བདག་མཻ་ཏྲི་པའི་ཕྱག་སོར་གྱི་རྡོ་རྗེ་གུ་ཡ་ཟུང་གཅིག་གནང་ནས། བུ་ཁྱེད་ང་ལ་བྱས་པ་ཆེ་བ་ཡིན་པས། ང་མ་ཤི་བར་ལ་ལྷན་དུ་སྡོད་དགོས། ཚེ་ཕྱི་མར་མི་མཇལ་ཐབས་མེད་ཀྱི་སྨོན་ལམ་བཏབ། དམ་ཚིག་གནད་ཀྱིས་བསྡུས་པའི་ཕྱིར། །འོ་སྐོལ་ཕ་བུ་སྐྱེ་གནས་མཚུངས་ཏེ་མཆི། །ཞེས་གསུངས་པ་ལྟར། མར་པ་མགོ་ལེགས་ཀྱིས་ཀྱང་བླ་མའི་ཕྱི་བཞིན་འབྲེངས་སྟེ། བླ་མ་སྐུ་མ་གཤེགས་བར་ལ་ཞག་གཅིག་ཀྱང་མ་བྲལ་བར་ཞབས་ཏོག་བགྱིས་པ་ལགས་སོ། །ནཱ་རོ་པ་དང་མཇལ་ལུགས་ངོ་མཚར་བའི་ལྟས་རྣམས་ཀྱི་མགུར་འདི་དག་དོན་གཅིག་ལ་ཚིག་མི་འདྲ་བ་ལན་གསུམ་བསྐྱར་བ་ནི། དོན་གཅིག་ལ་ཞུ་མཁན་མི་འདྲ་བ་གསུམ་གྱི་ལན་དུ་གསུངས་པས་ཤེས་པར་བྱའོ། །དེ་ནས་བླ་མ་རྔོག་པ་དང་། ཚུར་སྟོན་ཡང་བུ་སློབ་མང་པོས་བསྐོར། བླ་མ་སྐུ་མ་ནོངས་པར་སྙན་གྲགས་དང་བཅས་ཕེབས་པའི་དགའ་སྟོན་གཏང་རག་འབུལ་བ་དང་། ཆོས་ཞུ་
2-3-81a
བ་ལ་བྱོན་ཏེ། ཁོང་གཉིས་ཀྱིས་འབུལ་བ་བགྱིས་པའི་ཚོགས་གྲལ་དུ། བླ་མ་ལགས། ད་ལན་རྗེའི་སྐུ་ཚེ་ལ་བར་ཆད་མེད་པར་ཕེབས་པས། བདག་སློབ་འབངས་རྣམས་ཀྱིས་བསེམ་བསམས་དོན་དུ་གྲུབ་ཅིང་སྐྱིད་པའི་ཉི་མ་ཤར། རྗེ་རིན་པོ་ཆེ་ལ་དཀའ་སྤྱད་དང་སྐུ་བསྙུང་བ་སོགས་འོ་བརྒྱལ་མང་པོ་རང་བྱུང་འདུག་ཟེར་བ་ཐོས་པས་ཡིད་གདུངས་པ་སྐྱེས་ལགས་པ། དཀའ་སྤྱད་ཇི་ལྟར་མཛད་པ་དང་བསྙུང་ཚུལ་རྣམས་དེ་རིང་བདག་ཅག་རྣམས་ལ་མགུར་དུ་གསུང་པར་ཞུ་ཞེས་ཞུས་པས། ངས་ད་རེས་ཇོ་བོ་ནཱ་རོ་པ་ཚོལ་བའི་ཕྱིར་དཀའ་བ་སྤྱན་ཚུལ་རྣམས་དང་། དང་པོ་ཆོས་སྒོར་ཞུགས་ནས་ད་བར་གྱི་ལོ་རྒྱུས་རྣམས་གླུ་རུ་ལེན་པས་ཉོན་ཅིག་གསུངས། མཉམ་གཞག་འཕྲོ་རྒོད་འཐོར་བ་བསྡུད་པར་བྱེད་པ་རིགས་པ་སེམས་ཀྱི་ལྕགས་ཀྱུ་མཁའ་འགྲོའི་སྨྲེ་སྔགས་ལ་རྟ་དྲངས་ནས། ཆོས་ཕྱིར་དཀའ་བ་སྤྱད་ཚུལ་གྱི་མགུར་ཆེན་འདི་གསུངས་སོ།། །།རྗེ་མི་བསྐྱོད་ཀྱི་ངོ་བོ་རྡོ་རྗེ་འཆང་། །མི་ཁོ་བོའི་སྤྱི་གཙུག་རྒྱན་དུ་བཞུགས། །མི་བདག་གི་དཀའ་ལས་ཀྱི་དཔེ་བཤད་ན། །ཁྱེད་འདིར་བཞུགས་ཀྱི་ཇོ་བོ་སྟོན་ཆེན་རྣམས། །ཆོས་སླ་བར་མ་དགོངས་ཚུལ་བཞིན་
2-3-81b
བསྒྲུབས། །ཁོ་བོ་མར་པ་ལོ་ཙཱ་(ལོཙྪ་)འདི། །སྐྱེས་པ་ལྷོ་བྲག་མཐིལ་དུ་སྐྱེས། །ལས་འཕྲོ་དཀར་པོའི་ཆོས་ལ་སད། །དཔལ་མྱུ་གུ་ལུང་གི་དགོན་པ་དེར། །སྒྲ་སྒྱུར་འབྲོག་མི་ལོ་ཙྪ་(ལོཙྪ་)ལ། །སྒྲ་ཐད་ཀློག་སྐད་ཀྱི་ཡིག་ཚང་བསླབས། །ཁོང་སྐུ་དྲིན་མི་ཆུང་ཆེ་བར་ཁུམས། །དམ་ཆོས་རྒྱ་གར་ཡུལ་ནས་བཙལ། །བདག་བལ་པོའི་ལམ་དུ་ཞུགས་ཙ་ན། །བཅའ་འཕྲང་དང་ཆུ་ལ་ཐར་དུས་མེད། །ནགས་འཐུག་པོ་གཅིག་ལ་ཐོན་དུས་མེད། །ལམ་རིང་པོ་གཅིག་ལ་བགྲོད་དུས་མེད། །ཤིང་སྡོང་པོ་མི་རོ་རེངས་པ་འདྲ། །ལམ་དེ་ཀུན་གྱི་སྡུག་བསྔལ་མཐོང་ཙ་ན། །བྱ་དགུང་ལ་འཕུར་བ་གཤོག་པ་འདར། །འོན་ཀྱང་ངལ་དུབ་བྱས་རིན་ཆོག །ཡུལ་ལྷ་ལས་བབས་པའི་བལ་པོ་མཐོང་། །ཕྱི་འདོད་ཡོན་བལྟ་བས་ཆོག་མི་ཤེས། །མི་འདོད་ཁམས་ཀྱི་ལྷ་ཕྲན་ཡིན་ནོ་སྙམ། །དུས་བསྐལ་པ་བཟང་པོར་འདུག་གོ་སྙམ། །ལམ་བགྲོད་པར་དཀའ་ཡང་ཕྱིན་པས་ལེགས། །ང་དེ་ནས་རྒྱ་གར་ཕྱིན་ཙ་ན། །མཐའ་འཁོབ་ཀྱི་ཇག་པ་ཤི་སྐྱིད་ལ། །སྲོག་ཅི་བདེར་ཐོན་པའི་རེ་མ་མཆིས། །གཅན་གཟན་གྱི་ངར་སྐད་ཐོས་ཙ་ན། །ལུས་གཙང་སར་ཐོན་པ་ཅུང་མ་བསམ། །སྦྲུལ་སྒྲམ་ཆེན་གྱི་ཁ་རླངས་མཐོང་བའི་ཚེ། །ཡིད་བརྟན་པར་
2-3-82a
ཕྱིན་ཡང་གོམ་ཚུགས་འཁྱོར། །ལམ་དེ་ཀུན་གྱི་འཇིགས་པ་མཐོང་བ་རྣམས། །དུས་ད་ལྟ་དྲན་ཡང་གློ་སྙིང་འདར། །ཆུ་གྲགས་པ་ཅན་གྱི་གངྒཱ་བརྒལ། །འོན་ཀྱང་དཀའ་བ་སྤྱད་རིན་ཆོག །ཡུལ་དབུས་འགྱུར་ཚལ་གྱི་བཀོད་པ་མཐོང་། །དཔལ་རྡོ་རྗེ་གདན་གྱིས་སྣ་དྲངས་པའི། །རྟེན་ངོ་མཚར་ཅན་ལ་མཆོད་པ་བྱས། །ཁོ་བོ་ཕྱིན་པ་འཕྱིས་སོ་སྙམ། །ཆོས་སྙིང་ནས་འཚོལ་བའི་གདུང་སེམས་ཀྱིས། །ཡུལ་རྒྱ་གར་ཤར་ནུབ་ཆུ་བཞིན་ཉུལ། །ཐང་ཆེན་པོ་ཅིག་ལ་ཆོད་དུས་མེད། །མེ་འོབས་ཀྱི་ཐང་ལ་ཕྱིན་ནོ་སྙམ། །ཡིད་ཆོས་ལ་བསམས་ཀྱང་སྙིང་རླུང་འཕྱོ། །ནད་འཚོ་བར་དཀའ་བའི་ཚད་པས་ཐེབས། །དོ་ཤི་དོ་ཆད་བཅུ་གསུམ་བྱུང་། །ཁ་ཆེམས་ཚིག་གསུམ་བཞག་ས་མེད། །དབུགས་འགྱུ་བ་ཆད་པ་ལན་གསུམ་མྱོང་། །དུས་དེ་ཀུན་གྱི་སྡུག་བསྔལ་མཐོང་ཙ་ན། །སྡང་དགྲའི་མིག་ནས་མཆི་མ་འཆོར། །འོན་ཀྱང་སྲོག་བདོས་བྱ་རིན་ཆོག །རྗེ་ན་རོ་པཎ་ཆེན་གྱིས་སྣ་དྲངས་པའི། །བླ་མ་གྲུབ་ཐོབ་ལྔ་དང་མཇལ། །སྤྱིར་རྒྱུད་སྡེ་བཞི་ལ་ཉན་བཤད་བྱས། །ཁྱད་པར་མ་རྒྱུད་མཐའ་དག་དང་། །ཕ་རྒྱུད་གསང་བ་འདུས་པ་བསླབས། །ཤར་ཆུ་བོ་གངྒཱའི་འགྲམ་དུ་
2-3-82b
ཕྱིན། །རྗེ་མཻ་ཏྲི་པ་ཡི་བྱིན་བརླབས་(རླབས་)ཀྱིས། །གཞི་ཆོས་ཉིད་སྐྱེ་བ་མེད་པར་རྟོགས། །སེམས་སྟོང་པ་ཉིད་ལ་སྦར་ཟིན་བྱས། །དོན་སྤྲོས་བྲལ་གཉུག་མའི་ངོ་བོ་མཐོང་། །སྐུ་གསུང་མ་དང་དངོས་སུ་མཇལ། །མི་ཁོ་བོའི་སྤྲོས་པ་དེ་ནས་ཆོད། །སླར་བོད་ཡུལ་དབུས་སུ་ལོག་ཙ་ན། །གདམས་ངག་ཀྱང་ང་རང་ཆེའོ་སྙམ། །གྲུབ་ཐོབ་ཀྱང་འགའ་རེ་འབྱུང་ངོ་སྙམ། །འགྲོ་དོན་ཀྱང་མང་པོ་གྲུབ་བོ་སྙམ། །དེ་ཀུན་ཁོ་བོའི་ཞེ་གདེང་ལགས། །དཀའ་བ་སྤྱད་པའི་སྤྱད་ལུགས་ལགས། །ཆོས་དེ་ཙམ་དུ་དཀའ་བར་ཐུགས་དགོངས་ལ། །ལེ་ལོ་མ་མཛད་བསྒྲུབ་པར་ཞུ། །ཞེས་གསུངས་པས། བུ་ཆེན་རྣམས་ཀྱིས་ཐོག་དྲངས་གྲལ་པ་མང་པོ་སྤྱན་ཆབ་ཤོར་རོ། །རྒྱ་གར་ལ་འབྱོན་ཐེངས་ཕྱི་མའོ།། །།
༄། །ཐུགས་ཉམས་སུ་བཞེས་པས་ཉམས་རྟོགས་ཐུགས་ལ་འཁྲུངས་ཚུལ།
གསུམ་པ་གདམས་ངག་ཐུགས་ཉམས་སུ་བཞེས་པ་ཐུགས་ལ་འཁྲུངས་ཚུལ་ནི། སྤྱིར་གྱི་གདམས་ངག་ཞུས་པ་ཇི་བཞིན་ཐུགས་ཉམས་སུ་བླངས་པས། ཉམས་དང་རྟོགས་པ་ཁྱད་པར་ཅན་ཐུགས་ལ་འཁྲུངས་ནས་རྟོགས་པའི་མགུར་དུ་མ་གསུངས་པ་རྣམས་ལགས་ཤིང་། བྱེ་བྲག་ཏུ་གྲོང་འཇུག་ཐུགས་ཉམས་སུ་བཞེས་པས་གདེངས་ཐོབ་ཚུལ་ནི། རྒྱང་རོ་ཞང་སྟོན་གྱིས་ཐོག་དྲངས་པའི་
2-3-83a
སློབ་མ་དང་། ཡོན་བདག་མང་པོས་གཏང་རག་གི་ཚོགས་མཆོད་བཟང་པོ་ཞིག་ཕུལ་བའི་ཚེ་གཟིམས་ཁང་གི་ཉེ་འཁོར་ན་ཕུག་རོན་གྱི་ཚང་ཡོད་པ། ཕྲུ་གུ་མའི་ཕྱི་བཞིན་འཕུར་སོང་བ་ཁྲས་དེད་པ་ཚང་དུ་བྲོས་རུང་། ཧལ་ནས་ཤི་བའི་རོ་གཅིག་བྱུང་བ་ལ། ངས་ཁྱེད་རྣམས་ལ་དེ་རིང་གྲོང་འཇུག་གི་ལྟད་མོ་བསྟན་ནམ་གསུང་པ་ལ། ཀུན་གྱིས་ཕྱག་ཕུལ་ནས་གསོལ་བ་བཏབ་པས། ཕུག་རོན་གྱི་རོའི་རྐང་པ་ལ་ཐི་གུ་བཏགས་ནས་གཏོང་བ་ལ་གྲོང་འཇུག་མཛད་པས། ཕུག་རོན་ལངས་ནས་ཐེབ་ཐེབ་འཕུར་གྲབས་བྱེད་པའི་མདུན་དུ་ཕྲུ་གུ་ཡང་མ་ལ་འཁོར་ནས་སྙིང་རྗེ་རྗེ་ལྟར་བྱེད་པའི་ཚེ། རྒྱང་རོ་ཞང་སྟོན་གྱིས་བླ་མའི་སྐུ་ལ་བལྟས་པས། སྤུར་གྱི་རྣམ་པ་ཞིག་བྱུང་བ་མ་བཟོད་པར་འཇིགས་པའི་རྣམ་པ་དང་། ངུ་ངག་གིས་སྐུ་དྲུང་དུ། བླ་མ་རིན་པོ་ཆེ་ང་འདི་འདྲ་མི་མཛད་པར་ཞུ་ཞུས་པས། ཕན་གནོད་མ་བྱུང་བས། དེ་བས་ཀྱང་འཇིགས་སུ་སོང་སྟེ་ཡང་ཕུག་རོན་གྱི་དྲུང་དུ་ཕྱིན་ནས་ཞུ་བ་ཕུལ་བས། ཕུག་རོན་འགྱེལ་འཕྲལ་བླ་མ་བཞེངས་ནས། རང་ལུས་ཁང་སྟོང་བཞིན་བོར་ནས། ཕུག་རོན་གཞན་ལུས་གྲོང་དུ་ཞུགས། །
2-3-83b
གཤོག་བརྐྱང་མཁའ་ལ་དོ་འཕུར་བྱས། །བྱ་མ་བུ་འཕྲད་ནས་བརྩེ་བ་དེ། །ཀུན་གྱིས་མཐོང་བ་ངོ་མཚར་ཆེ། །ཞེས་གསུངས་ཤིང་བཞད་པས། དེར་ཚོགས་པ་ཀུན་གྲོང་འཇུག་ལ་ངེས་ཤེས་འདྲོངས་པས་མཆོག་ཏུ་ངོ་མཚར་སྐྱེས་པར་གྱུར་ཏོ། །དེ་ལྟར་གྲོང་འཇུག་མཛད་པའི་ལོ་རྒྱུས་ཇོ་བོས་ཐོས་པས། ཟེར་ཟེར་མིན་པ་བདེན་རང་མི་བདེན་ནམ། བདེན་ན་ཡ་མཚན་དེ་འདྲ་བས་ཆེ་བ་མི་ཡོང་ཟེར་ཞིང་། ཡིད་ལ་ཡང་ནར་མར་གྲོང་འཇུག་བདེན་རྫུན་ང་རང་གིས་མཐོང་བ་ཞིག་བྱེད་དགོས་སྙམ་ཡོད་པའི་ཚེ། ནམ་ཞིག་ཇོ་བོའི་ཐ་ག་མ་ཞིག་གི་རྩར་ལུ་གུ་ལྟང་དཀར་ཞིག་ཞོ་ཡིས་བགྲངས་གྲགས་ཤི་བའི་རོ་གཅིག་འདུག་པས། རྗེ་མར་པ་ལ། ཇོ་བོ་ན་རེ། ཁྱེད་ཀྱིས་འདི་ལ་ཕུག་རོན་ལྟར་གྲོང་འཇུག་གྱིས་དང་ཟེར་བས། ངས་རྒྱ་གར་ནས་ཡུམ་རྡོ་རྗེ་ཕག་མོའི་བཅུད་ལེན་ཤི་སོས་ཀྱི་གདམས་ངག་ཡེ་ཤེས་ཀྱི་སྨན་སྦྱོར་ཅིག་ཡོད་དེ་བྱེད་པ་ཡིན་གསུངས། ཇོ་བོ་ལ་སོགས་བུ་སློབ་དང་། ཡོན་བདག་མང་པོར་འཛོམ་པར་རྗེ་མར་པའི་ཞལ་ནས། ངས་འདིར་བསྡད་ནས་འཇུག་པས། ལུ་གུ་ཅི་བྱེད་ཅིང་འདུག་ལྟོས་ཤིག་གསུང་པ་ལྟར། ཇོ་བོ་སོགས་མི་ཀུན་གྱིས་
2-3-84a
ལུ་གུའི་རོའི་སར་ཕྱིན། བླ་མ་ཏིང་ངེ་འཛིན་ལ་བཞུགས་ཚེ་ལུ་གུ་ཧར་ལངས་ཏེ་འཁྲབས་པས། ཐོག་མ་ཧ་ལས་ཏེ། གཡའ་འོ་ན། ཁོ་ཤི་ཚར་ཚར་བ་ལངས་ཏེ་འཁྲབ་པ་འདི་འདྲ་ཟེར། འོལ་ལུ་བརྡེག་གྲབས་བྱེད་ཅིང་འདུག་དུས། ལྟས་མི་རྣམས་ཀྱིས་སླེབ་ཏེ་མ་བརྡེག་ཅིག །བླ་མ་མར་པས་གྲོང་འཇུག་མཛད་པ་ཡིན་ནོ་བྱས་པས། མོ་ནཱ་རེ། སྔར་རྣ་བས་ཐོས་པ་དེ་རིང་མིག་གིས་མཐོང་བ་ཡ་མཚན་ལ་ཨང་ཟེར། ཐགས་བཀྲལ་ནས་ལུ་གུ་དང་། རྗེ་མར་པའི་ཕྱོགས་ལ་ཕྱག་ཕུལ་ལོ། །ཇོ་བོས་གྲྭ་པ་རྣམས་ལ་ལུ་གུ་སོས་པ་བླ་མ་ཡོད་སར་སླེབ་པའི་ཐབས་གྱིས་ཤིག་བྱས། ཇོ་བོ་རང་གིས་བླ་མའི་དྲུང་དུ་ཕྱིན་པས་གྲོངས་པའི་ཚུལ་དུ་འདུག །གྲྭ་པ་རྣམས་ཀྱིས་ལུ་གུ་སྐུ་ཡོད་སར་སླེབ་པར་མཛད་དགོས་པའི་གསོལ་བ་བཏབ་པས། སྐུ་ཡོད་སར་བྱོན་ནས་ཡང་འཁྲབ། དེ་ནས་སྐུ་བཞེངས་ཏེ། དུས་གསུམ་སངས་རྒྱས་བསྐྱེད་ཡུམ་གྱི། །བཅུད་ལེན་འཆི་མེད་ཡེ་ཤེས་ནི། །གྲོང་འཇུག་བདུད་རྩིའི་སྨན་སྦྱར་བས། །ལུ་གུ་ཤི་སོས་(གསོས་)གར་དང་ལྡན། །ཅེས་(ཞེས་)གསུངས་པས། ཇོ་བོ་དད་པ་ལྷག་པར་སྐྱེས་ཏེ། ཆོས་དབང་ཞུས་ཏེ་
2-3-84b
སློབ་འབངས་སུ་གྱུར་ཏོ། །དེ་ལྟར་གྱུར་པ་མར་པ་བྱ་ཟེ་ཞེས་བྱ་བ་རྗེ་མར་པ་རང་གི་གདུང་ཚན་ཤིན་ཏུ་མི་མོས་ཤིང་སྡང་བ་ཅིག་ཡོད་པ་དེ་ན་རེ། ཇོ་བོ་ལ་ཡང་ཀླད་པ་ཡེ་མི་འདུག །ཁོས་རྒྱ་གར་ལ་ཕྱིན་པ་སྐད་བྱས། མིག་འཁྲུལ་བསླབས་ནས་བྱས་པས་མགོ་འཁོར་འདུག་སྟེ། གྲོང་འཇུག་འམ་དེ་རྣམ་དག་ཞིག་ཡིན་ན། མར་པ་ཁོ། ད་ཉོན་མོངས་པ་གྲ་མ་ཆག་གྲུ་མ་ཉམས་པར་ཁྲ་ལམ་མེ་བའི་ངང་ནས་སངས་རྒྱས་ཀྱིས་སར་འགྲོ་བ་ཡིན་ཟེར། ཁ་སྐྱུར་དྲི་ཆིལ་ཆིལ། མདོམས་སྲེ་དྲི་ཆིལ་ཆིལ། དཀོར་འདི་ཙམ་ཟ་ཞིང་ཅི་སྡོད་དེ་ཙམ་སངས་རྒྱས་ཐོབ་ནས་རང་རེ་ཚོས་མིག་ལ་ཡང་རྫོགས་རྒྱུ་མིན་ཟེར་ཞིང་སྐུར་འདེབས་བྱས་པ། རྗེ་མར་པས་གསན་ཚེ། གྲོང་འཇུག་རྣམ་དག་ཡིན་པས་རྐང་དེ་བཞིན་བྱེད་པ་ཡིན། འདོད་ཡོན་མ་སྤངས་ལམ་དུ་མི་འཁྱེར་ན། གསང་སྔགས་ཐབས་མང་ཞིང་དཀའ་ཚེགས་ཆུང་ངུས་སངས་རྒྱས་ཐོབ་པའི་ཆེ་ཁྱད་དང་ཟབ་ཁྱད་མི་ཐོན་པས། གསང་སྔགས་གྱི་ཟབ་ཁྱད་ཤེས་བཞིན་འདོད་ཡོན་ལམ་དུ་མི་འཁྱེར་བར་སྤོང་ན་རང་ལ་སྡིག་ཅེས། གསང་སྔགས་ལམ་གྱི་ཆེ་ཁྱད་དུ་མགུར་འདི་གསུངས་སོ། །
2-3-85a
ཁོ་བོ་མར་པ་ལོ་ཙྪ་(ལོཙྪ་)ངས། །རྒྱུད་ཀྱི་རྒྱལ་པོ་དགྱེས་རྡོར་ཤེས། །ནཱ་རོ་པཎ་ཆེན་གྱི་གདམས་ངག་ཡོད། །དགོན་པར་མི་སྡོད་རང་ལ་སྡིག །རྒྱུད་ཀྱི་རྒྱལ་པོ་གདན་བཞི་ཤེས། །འཕོ་བ་གྲོང་འཇུག་གི་གདམས་ངག་ཡོད། །ཐ་མལ་དུ་ཤི་ན་རང་ལ་སྡིག །བསམ་གཏན་གཉིད་དང་བསྲེ་བ་ཤེས། །རྨི་ལམ་འོད་གསལ་གྱི་གདམས་ངག་ཡོད། །ཐ་མལ་དུ་ཉལ་ན་རང་ལ་སྡིག །སེམས་འཛིན་གྱི་རྒྱལ་པོ་གཏུམ་མོ་ཤེས། །སེམས་གནད་དུ་བསྣུན་པའི་གདམས་ངག་ཡོད། །དོན་ཉམས་སུ་མི་ལེན་རང་ལ་སྡིག །རླུང་གི་དེ་ཉིད་བདུན་ཅུ་ཤེས། །ན་ཚ་བོགས་འདོན་གྱི་གདམས་ངག་ཡོད། །སྨན་པ་འགུགས་ན་རང་ལ་སྡིག །རང་ལུས་རྒྱལ་བའི་དཀྱིལ་འཁོར་ཤེས། །རྩ་རླུང་ཐིག་ལེ་རྒྱས་བྱའི་ཕྱིར། །ཤ་ཆང་མི་བསྟེན་རང་ལ་སྡིག །གཞན་ལུས་ལམ་དུ་སློང་ཙ་ན། །ལས་ཀྱི་ཕྱག་རྒྱའི་གདམས་ངག་ཡོད། །ཕྱག་རྒྱ་མི་བསྟེན་རང་ལ་སྡིག །ཅེས་གསུངས་པས། བུ་སློབ་ཀུན་རྒྱུད་སྡེ་ཟབ་མོའི་དགོངས་པར་ཐག་ཆོད་པས་མོས་གུས་ཆེར་སྐྱེས་ཀྱང་། མར་པ་བྱ་ཟེ་ན་རེ། ཁོ་རང་དེ་ལྟར་བྱེད་པའི་རྒྱབ་ཆོས་ལ་དེ་
2-3-85b
སྐད་ལོས་ཟེར། གཞན་ཡིད་ཆེས་སུ་སྐྱེ་ཟེར་བ་དེ་གྲྭ་པ་འགས་ཐོས་པ་བློར་མ་འཐད་ནས། བླ་མ་རྔོག་པ་ལ་སོགས་པའི་བུ་སློབ་མང་དག་འཛོམ་པའི་ཚོགས་གྲལ་ཞིག་ཏུ། གྲྭ་པ་གཅིག་གིས། མར་པ་བྱ་ཟེའི་ཟེར་ལུགས་རྣམས་ཞུས་པས། བླ་མའི་ཞལ་ནས། རྔོག་པ་ལ་སོགས་པའི་ཆོས་གོ་བ་རྣམས་དེ་ཙམ་ལ་འཇིགས་མི་དགོས། སྐྱེ་བོ་ལོག་རྟོག་ཅན་སྡིག་པ་གསོག་པ་རྣམས་ཀྱི་བྱ་སྤྱོད་ལ་ཚད་བཟུང་མེད། དེའི་ནང་ནས་ཀྱང་རང་རང་གི་གྲུབ་མཐའི་ཁ་འཛིན་བྱེད་པ་རྣམས་ཚབས་ཆེ་ཞིང་། སེམས་ཅན་སྣང་བ་མ་དག་པ་རྣམས་ཀྱིས་སངས་རྒྱས་ལའང་སྐུར་འདེབས་ཚབས་ཆེན་བྱས་འདུག་ཅིང་། རང་གི་གྲིབ་མ་ལ་ཡང་གཤེ་ཞིང་རྨོད་མོ་བྱེད་མཁན་མང་དག་ཡོད་པས། དེ་དག་གི་རྗེས་སུ་རྟོགས་པ་མི་འཇུག་པར་སྙིང་རྗེ་དང་སྒྱུ་ལུས་ཀྱི་ངང་དུ་གང་འགར་བོར་ཞོག །རང་དག་ལ་སོང་ནས་སྡིག་པ་མི་གསོག་སྟེ། རྒྱུ་མཚན་འདི་ལྟར་ཡིན་གསུང་མགུར་འདི་གསུངས་སོ།། །།བཅོམ་ལྡན་རྡོ་རྗེ་འཆང་ཆེན་དེ། །ལྔ་བརྒྱ་ཕྲག་བཅུའི་སྙིགས་མ་ལ། །ལས་ཅན་སྨིན་གྲོལ་མཛད་པའི་ཕྱིར། །རྗེ་ནཱ་རོ་ཆེན་པོར་སྐུ་སྤྲུལ་པས། །མཁོས་ཆུང་མར་པ་ལོ་ཙྪ་(ལོཙྪ་)འདི། །གསན་ནམ་
2-3-86a
གཟིགས་སམ་ཐུགས་ཀྱིས་མཁྱེན། །ཕ་ཐུགས་རྗེས་བཟུང་དང་སྤྲུལ་པའི་སྐུ། །དྷུ་ཏི་བྱང་ཆུབ་གསུང་ལམ་དུ། །རླུང་སེམས་བདེ་དྲོད་ཟུང་དུ་ཆུད། །ཟག་མེད་བདེ་བ་ཆེན་པོར་འགྲོ། །སྒྲིབ་བྲལ་རིག་པའི་ཡེ་ཤེས་ཤར། །བླ་ན་མེད་དོ་བླ་མའི་གསུང་། །མ་རིག་མུན་པ་དབྱིངས་སུ་དག །གཟུང་དང་འཛིན་པའི་སྒྲིབ་གཉིས་བྲལ། །བདེ་གསལ་སྤྲོས་དང་བྲལ་བར་ཤར། །རྟེན་འབྲེལ་ཚོགས་པའི་སྣང་བ་འདི། །རང་བཞིན་མེད་པའི་གཟུགས་བརྙན་ཏེ། །དེ་ལྟར་རྟོགས་པའི་སྣང་བ་རྣམས། །རྨི་ལམ་སྣང་བ་ཇི་བཞིན་དུ། །ཆོས་རྣམས་སྒྱུ་མ་ལྟ་བུར་ཤར། །ལྷ་དང་ལྷ་མིན་མི་རྣམས་དང་། །དམྱལ་བ་ཡི་དྭགས་དུད་འགྲོ་དང་། །སྣ་ཚོགས་འཛིན་པའི་སྣང་བ་འདི། །སྒྱུ་མ་ལྟ་བུར་མེད་པར་རྟོགས། །ཡུལ་དང་ཡུལ་ཅན་དམིགས་པ་དང་། །འབྱུང་བའི་སྒོ་དང་རླུང་གནས་ཀྱིས། །གང་འདོད་ཀྱི་དོན་དུ་འགྱུར་འགྱུར་འདྲ། །བསྲེ་འཕོ་དྲི་མ་མེད་པར་ཤར། །སྐྱེ་བའི་དུས་སུ་མ་བཅོས་བཞག །རྨི་ལམ་དུས་སུ་མ་བསླད་དྲན། །བར་དོའི་དུས་སུ་མ་བཅིངས་རིག །འབྲས་བུའི་དུས་སུ་མ་བསྒྲིབས་ཤར། །ནཱ་རོའི་རྗེས་འབྲངས་སྐྱེས་བུ་རྣམས། །གདམས་
2-3-86b
ངག་ཟབ་པ་ཉམས་སུ་ལོང་། །རིགས་པ་ཡོད་ཀྱིས་ངེས་ཤེས་བསྐྱེད། །བློ་ཆུང་ལོག་པར་རྟགས་པ་རྣམས། །སངས་རྒྱས་ལ་ཡང་སྐུར་འདེབས་ཤིང་། །རང་གྲིབ་ལ་ཡང་གཤེ་བྱེད་པའི། །སྐྱེ་བོ་གཡམ་ལ་རྒྱུག་པ་ལ། །དོན་ལ་འདི་ཡིན་འདི་མིན་མེད། །བླུན་པོ་འབོད་རྒྱུག་བྱེད་པ་ལ། །མཁས་རྣམས་དེ་ཡི་རྗེས་མི་འབྲང་། །ཐ་སྙད་ཚིག་གི་ཆོས་རྣམས་སྟོང་། །ང་སྐུ་འདི་ལྷ་ཡི་འཁོར་ལོ་ཡིན། །གསུང་འདི་ཆོས་ཀྱི་རང་བཞིན་ཡིན། །ཐུགས་འདི་ཡེ་ཤེས་ངོ་བོ་ཡིན། །བུ་སུན་པ་མེད་པར་ཉམས་སུ་ལོངས། །ཐེ་ཚོམ་མེད་པར་བྱང་ཆུབ་འགྲུབ། །ཅེས་གསུངས་པས་ངེས་ཤེས་སྐྱེས་སོ། །ཡང་ལན་ཅིག རྗེ་མར་པ་ཕྱག་ཕྱི་བ་དང་བཅས་པ་ཆུ་འགྲམ་ཞིག་ན་ཕར་ཞབས་འཆག་ཏུ་བྱོན་པས། ཁྱི་ར་བའི་ཁྱིས་ཤྭ་བ་དེད་བྱུང་བ་ཆུ་ནང་དུ་ཤི་བ་ལ། ངས་གྲོང་འཇུག་བྱའོ། །ཁྱེད་འགའ་ཞིག་གིས་ཤྭ་བའི་ཕྱི་བཞིན་ཤོག་ལ་ཁྱིར་གསུངས། འགའ་ཞིག་ལུས་འདིའི་རྩ་རུ་སྡོད་གསུངས། ཤྭ་བ་ལ་གྲོང་འཇུག་མཛད་ནས་ཆུའི་རྗེས་ནར་མར་གཟིམས་ཁང་གི་བླ་གཡེའི་ཕྱི་རུ་ཤྭ་བའི་རོ་བསྐྱལ་ནས། བླ་མ་བཞེངས་བྱོན་ཏེ། བླ་མ་དང་བུ་སློབ་ཉེ་འཁོར་ཕྱི་མི་མང་པོ་ཤ་བའི་རོ་ལ་ལྟ་
2-3-87a
ཞིང་ཡོད་པའི་ཚེ། ཁྱི་ར་བ་རྣམས་ཀྱིས་སླེབས་ནས་བཤའ་གྲབས་བྱས་པས། བླ་མའི་ཞལ་ནས། ང་རང་གིས་ཆུའི་ཁང་ནས་རྙེད་པའི་ཤྭ་བའི་རོ་ཁྱེད་ཀྱིས་འཕྲོག་ཏུ་མི་འདོད་གསུངས་ནས་བྲེ་མོ་མཛད། གྲྭ་པ་དང་མི་མང་གིས། བླ་མས་གྲོང་འཇུག་མཛད་པའི་ལོ་རྒྱུས་བྱས་པས། ཁྱི་ར་བ་རྣམས་ལ་ན་རེ། འོ་ན་ངེད་ཀྱིས་མཐོང་སར་གྲོང་འཇུག་མཛད་པར་ཞུ། ཤྭ་བའི་རོ་ཕུལ་བས་ཆོག་ཟེར། ལ་ལ་ན་རེ། དེ་འདྲ་བྱུང་ཞིང་མཐོང་ན་དག་ཤྭ་བའི་རོར་མ་ཟད། གཞན་ཡང་ཕུལ་བས་ཆོག་ཟེར་བ་ལ། ཡང་རྗེ་མར་པས། ཤྭ་བ་ལ་གྲོང་འཇུག་མཛད་དེ། སྒོ་ལ་འཛུལ། བླ་དབྱེའི་ནང་དུ་བསྐྱལ་ནས་བཞེངས་ཏེ། བླ་མའི་བཀའ་དྲིན་གྲོང་འཇུག་གིས། །ཚོགས་ཀྱི་ཡོ་བྱད་དམ་ཚིག་རྫས། །དགོས་འདོད་ཐམས་ཅད་འབྱུང་བ་ཡི། །ཤྭ་བ་ཡིད་བཞིན་ནོར་བུ་རྙེད། །ཅེས་དང་། དུད་འགྲོའི་ལུས་ལ་སེམས་ཞུགས་པའི་བར་ལ་རང་ཡང་བློ་རྨོངས་པའི་སྣང་བ་འཆར་ཞིང་འདུག་གསུངས། དེ་ལྟར་མཛད་པས་སྤྱིར་དེར་ཚོགས་པ་ཀུན་ཡ་མཚན་དང་ངོ་མཚར་ཏུ་གྱུར་ཅིང་དགའ་མགུ་ཡི་རང་ནས། ཁྱི་ར་བ་རྣམས་ཀྱིས་ཤྭ་བའི་རོ་དང་བསྙེན་བཀུར་ཕུལ། གཞན་ཆོས་སྒོར་ཞུགས་
2-3-87b
པ་ཡང་མང་དག་བྱུང་ཞིང་། ཁྱད་པར་མར་པ་བྱ་ཟི་ཡོད་པ་ཡང་དད་པ་སྐྱེས་ཏེ། སྔར་ལོག་ལྟ་བྱས་པ་ལ་འགྱོད་པས་མཐོལ་བཤགས་བྱས། ཁྱེད་ཤ་ཆང་བུད་མེད་མ་བསྟེན་ན་རང་ལ་སྡིག་གསུངས་པ་དེ། ངེད་རྣམས་ཀྱི་སྣང་ངོར་ངེད་ཚོ་དང་ཁྱད་མེད་ཅིག་ལས་མི་འོང་བ་འདུག་སྟེ། ད་ཁྱེད་རང་ལ་གདེང་ཞིག་ཡོད་པར་འདུག་པ་དེ་གསུང་བ་ཞུ་དང་ཞུས་པས། ཁྱེད་རྣམས་ཀྱིས་ལྷ་ཡབ་ཡུམ་མཐོང་བ་ལ་ཡང་དེ་དང་ཀ་འདྲ་སྟེ། མ་གོ་བས་བདེན་ཡོང་། ངས་འདོད་ཡོན་ལ་སྤྱད་རུང་མི་འཆིང་བའི་གདེངས་འདི་འདྲ་ཡོད་གསུངས། རྟོགས་པ་ཀློང་དུ་གྱུར་ཅིང་ཆོས་ལ་རང་བྱན་ཆུད་པ་གདེངས་དང་ལྡན་པའི་མགུར་འདི་གསུངས་སོ།། །།ཕ་བླ་མ་རྣམས་ལ་ཕྱག་འཚལ་ལོ། །རྗེ་གོང་མ་རྣམས་ཀྱི་བཀའ་དྲིན་ནི། །ངས་སོས་དལ་དབེན་ཚེ་རྩ་རླུང་བསྒོམས། །ལུས་སེམས་གཅུན་ཞི་གཅུན་ཞིང་བསྒོམས། །འབྱུང་བ་འཁྲུགས་ཀྱང་ཉམ་ང་མེད། །བོགས་འདོན་དུ་ཤེས་པའི་གདེང་ཅིག་ཡོད། །གཉིད་ཀྱི་དུས་སུ་འོད་གསལ་བསྒོམས། །སྣང་བ་སྡུད་ཅིང་སྡུད་ཅིང་བསྒོམས། །གཏི་མུག་དུ་སོང་ཡང་ཉམ་ང་མེད། །ཟུང་འཇུག་ཏུ་ཤེས་པའི་གདེང་ཞིག་ཡོད། །རྨི་ལམ་གྱི་དུས་སུ་སྒྱུ་ལུས་བསྒོམས། །
2-3-88a
སྣང་བ་སྤྲོ་ཞིང་སྤྲོ་ཞིང་བསྒོམས། །རྣམ་རྟོག་ཏུ་སོང་ཡང་ཉམ་ང་མེད། །སྒྱུ་མར་ཤེས་པའི་གདེང་ཤིག་ཡོད། །འདོད་ཡོན་སྤྱད་ཚེ་ལྷ་སྐུར་བསྒོམས། །རོ་བྲོ་མྱང་ཞིང་མྱང་ཞིང་བསྒོམས། །བཟའ་བཏུང་དུ་མཐོང་རུང་ཉམ་ང་མེད། །ཚོགས་མཆོད་དུ་ཤེས་པའི་གདེངས་གཅིག་ཡོད། །ཐབས་ལམ་གྱི་སྐབས་སུ་གཞན་ལུས་བསྒོམས། །བདེ་བ་བསྐྱེད་ཅིང་བསྐྱེད་ཅིང་བསྒོམས། །ཐ་མལ་དུ་འདུག་ཀྱང་ཉམ་ང་མེད། །ལྷན་སྐྱེས་སུ་ཤེས་པའི་གདེངས་གཤིག་ཡོད། །འཆི་བའི་དུས་སུ་འཕོ་བ་བསྒོམས། །འཕོ་བ་སྦྱོང་ཞིང་སྦྱོང་ཞིང་བསྒོམས། །འཆི་ལྟས་བྱུང་ཡང་ཉམ་ང་མེད། །རྫོགས་རིམ་དུ་ཤེས་པའི་གདེངས་གཅིག་ཡོད། །ཤི་བའི་དུས་སུ་བར་དོ་འཛིན། །བར་དོ་སྤྲིན་དང་ན་བུན་འདྲ། །ཆགས་སྡང་སྐྱེས་ཀྱང་ཉམ་ང་མེད། །རང་གྲོལ་དུ་ཤེས་པའི་གདེང་གཅིག་ཡོད། །ཅེས་གསུངས་པས། བྱ་ཟེ་མི་ཕྱེད་པའི་དད་པ་སྐྱེས་ནས་ཆོས་དབང་ཞུས། ཕྱིས་ཞབས་ཏོག་ཕུལ་ཕྱིན་བགྱིད་པའི་ཡོན་བདག་གཅིག་བྱུང་བ་ལགས་སོ། །ཡང་སྟོན་ཞིག་གི་ཚེ་མི་མང་པོ་ཚོགས་པའི་སར། གཡག་གམ་ནས་ཤི་བའི་རོ་གཅིག་བྱུང་དུས་ལས་མི་ཀུན་གཡག་རོ་ལེན་པར་
2-3-88b
འགྲོ་བར་ཆས་པ་ལ། ངའི་ལས་སྐལ་ལ་གཡག་རོ་བླང་གི་གསུངས། གྲོང་འཇུག་མཛད་དེ་གཡག་རོ་བླ་དབྱེ་རུ་བསྐལ་ནས། མཁའ་འགྲོའི་སྐུ་གསུང་ཐུགས་ཀྱི་གསང་། །རྩ་རླུང་བྱང་ཆུབ་སེམས་ཀྱི་རྟ། །རོ་སྙོམས་ལྕགས་ཀྱིས་ཡོངས་བསྐུལ་ནས། །གཡག་རྒན་འཇིགས་པའི་འཕྲང་ལས་ཕྲལ། །ཅེས་གསུངས་པས། གྲོང་འཇུག་ལ་ངེས་ཤེས་འདྲོངས་པ་རང་གིས་ཀྱང་ཀུན་གྱིས་རྩོད་མེད་ཀྱི་གྲུབ་ཐོབ་ཏུ་ཡོངས་སུ་གྲགས་པར་གྱུར་ཏོ། །དེ་ལྟར་གྲོང་འཇུག་གི་གདམས་པ་ཟབ་པ་ཆིག་བརྒྱུད་ཁྱད་པར་ཅན་དེ་སྲས་དར་མ་མདོ་སྡེ་ལ་གནང་བ་ལགས་སོ།། །།
༄། །དེའི་སྒོ་ནས་བསྟན་པ་དང་སེམས་ཅན་ལ་ཕན་ཐོགས་མཛད་ཚུལ།
བཞི་པ་ཐུགས་དམ་མངོན་དུ་གྱུར་པའི་སྒོ་ནས། བསྟན་པ་དང་སེམས་ཅན་ལ་ཕན་ཐོགས་མཛད་ཚུལ་ནི། སྤྱིར་གྱིས་བླ་མ་རྔོག་པ་ལ་སོགས་པའི་སྐལ་ལྡན་གདུལ་བྱ་རྣམས་+བྱ་རྣམས་+འདུས་པ་ཇི་བཞིན་དབང་དང་གདམས་པས་སྨིན་གྲོལ་ལ་བཀོད་པ་རྣམས་ལགས་ཤིང་ཁྱད་པར་མདོར་བསྡུས་དམིགས་བསལ་དུ་བཀོད་པ་ལ། སྲས་སྐུ་ཡལ་བལ་(བ་ལ་)སྐྱོ་ཤས་དང་ངེས་འབྱུང་གི་སྒོ་ནས་ཀུན་གྱི་ཐུགས་དམ་པ་(ལ་)བོགས་ཐོན་ཚུལ། བསྟན་པ་ལ་དར་རྒྱས་འབྱུང་བར་ལུང་བསྟན་ནས་གདམས་ངག་དང་བྱིན་
2-3-89a
རླབས་ཀྱི་རྟེན་ཞལ་གདམས་དང་བཅས་ཏེ་གནང་ཚུལ། འགྲོ་ཀུན་དང་བ་འདྲེན་ཕྱིར་བཀོད་པ་སྐུའི་རྫུ་འཕྲུལ་བསྟན་ཚུལ་དང་གསུམ་གྱི་དང་པོ།
༄། །སྲས་སྐུ་ཡལ་བ་ལ་སྐྱོ་ཤས་དང་ངེས་འབྱུང་གི་སྒོ་ནས་ཀུན་གྱི་ཐུགས་དམ་ལ་བོགས་ཐོན་ཚུལ།
སྲས་སྐུ་ཡལ་བས་སྐྱོ་ཤས་དང་ངེས་འབྱུང་གི་སྒོ་ནས་ཀུན་གྱིས་ཐུགས་དམ་ལ་བོགས་ཐོན་ཚུལ་ནི། བླ་མས་རྒྱ་གར་འཁོར་བའི་གཏང་རག་རྣམས་གྲུབ་ནས་སློབ་འབངས་ཕལ་ཆེར་རང་རང་གི་གནས་སུ་ཕེབས་ཤིང་། བླ་མ་ཡབ་སྲས་ཀུན་ནཱ་རོ་པའི་བཀའ་ལུང་ལྟར་སྐུ་མཚམས་དམ་པོ་ལ་བཞུགས། དེ་ཡང་བླ་མ་སྲས་མཁར་གྱི་སྟེང་དུ་བཞུགས། དེའི་འོག་ཏུ་སྲས་དར་མ་མདོ་སྡེ་བཞུགས། དེའི་འོག་ཏུ་བུ་ཆེན་འགའ་བཞུགས་ཤིང་། སྲས་གཞན་རྣམས་ཀྱང་སྐུ་མཚམས་དམ་པོའི་ངང་ནས་བསྙེན་གྲུབ་ལ་བཞུགས། ཡུམ་དང་མར་པ་མགོ་ལེགས། བ་རང་ལྦ་བ་ཅན་རྣམས་ཀྱིས་ཕྱག་ཕྱི་བགྱིས་པ་ལས། ཡབ་ཀྱིས་སྲས་དར་མ་མདོ་སྡེ་ལ་འཕོ་བ་གྲོང་འཇུག་གི་གདམས་པ་གནང་ནས་གདམས་ངག་ལ་རང་བྱན་ཚུད་ཅིང་གདེང་ཐོབ་པའི་ཚེ། ཁྱི་སྒྲ་དང་བཅས་གཟིམས་ཁང་གི་སྒོ་བརྡུང་བ་ཞིག་བྱུང་བ་ལས། སྲས་ཀྱིས་རྒྱ་དཀར་ནས་གཟིགས་
2-3-89b
པས། མི་རང་དཀར་པོ་མདའ་གཞུ་ཁྱེར་བ་ཞིག་གི་རྩ་ན་ཡུམ་ཕེབས་འདུག་པ་ལ། མི་དེ་ན་རེ། རྔ་མོ་ཆུ་ཤུལ་གྱི་ལྟད་མོ་ལོ་རེ་ལ་ལན་རེ་འོང་བ་དེ་གནང་ས་ཡོད་པས། ཁྱེད་རང་གི་ཇོ་ཇོས་ཡོན་བདག་བྱས། ལྟད་མོ་དང་སྟོན་མོ་གཉིས་ཀ་བྱེད་པའི་གྲལ་དབུ་ལ་སྔར་སྙན་གཅིག་ཕུལ་བ་ལྟར། བླ་མ་ཡབ་སྲས་གཉིས་གང་རུང་ཅིག་གདན་འདྲེན་དུ་འོངས་པ་ཡིན་པས་ཅིས་ཀྱང་ཕེབས་དགོས་ཟེར་ནན་ཏན་ལབ་ཅིང་འདུག་པ་ལ། ཟས་ཆང་བཟང་པོ་གནང་བ་ཟ་བའི་བར་ལ་ཡུམ་གྱི་ཞལ་ནས། ཁྱེད་རྣམས་ལྟད་མོ་དང་སྟོན་མོ་གཉིས་ཀ་བྱེད་པ་ངོ་མཚར་ཆེ་སྟེ། སྔར་བྱས་པ་ལྟར་ངེད་ཀྱི་བླ་མ་མར་པ་ལ། ཇོ་བོ་ནཱ་རོ་པའི་བཀའ་ལུང་ཡིན་གསུང་ཡབ་སྲས་ཀུན་སྐུ་མཚམས་དམ་པོ་ལ་ལོ་གསུམ་བཞུགས་དགོས་པ་ལ། སྔར་ལོ་གཅིག་ལས་མ་སོང་བས། ཡབ་སྲས་གཉིས་འབྱོན་པ་མི་འོང་དེ་འོག་གི་བུ་ཆེན་དྲག་པ་ཅན་ཅིག་བཏང་གི་གསུངས། ཡུམ་གྱིས་ཀྱང་ཞལ་ཏ་ནན་ཅན་གནང་བ་ལ། ཁོ་བཟི་བའི་གཏམ་ལ། ཡབ་སྲས་གཉིས་དགོས་པ་མ་གཏོགས་གྲལ་དབུ་མ་འབྱོན་པ་མིན། བླ་མ་འབྱོན་ནམ་ཕྱག་ཕྱི་བྱས་ནས་འགྲོ་རྒྱུ་ཡིན་ཏེ། མི་
2-3-90a
འབྱོན་ན་ང་འགྲོ། ངས་འཕྲིན་འཁྱོལ་ཡོད་དོ། །མ་འཁྱོལ་མ་ཟེར་ཅིག་ཟེར་ཐུ་བ་སྤྲུགས་ནས་སོང་ངོ་། །དེར་སྲས་ཀྱི་ཐུགས་ལ་ང་ད་ལྟ་འཇིག་རྟེན་ཐང་ནས་ཕ་མ་བཟང་པོ་ནི་འཛོམས། ཕ་སྤུན་དང་ཉེ་འབྲེལ་གྲུང་གསུམ་གྱི་སྒོ་ནས་མྱ་ངན་དང་སེམས་ལས་ནི་མེད། ཆོས་ནི་མཁས། ད་ལམ་གྱི་ལྟད་མོ་ལ་ང་འགྲོ་བ་བཟང་བ་འདུག་སྟེ། ཡབ་ཡུམ་གཉིས་ལ་ཞུས་རུང་གནང་ནི་མི་གནང་། བྲོས་ནས་འགྲོ་དགོས་དགོངས་པ་ལ། དེའི་གནངས་ཉིན་དུ་སོང་ཚེ། ཕུའི་མི་ཐམས་ཅད་རྒྱན་གོས་གཟབས་པ་དང་བཅས་ལྟད་མོ་ལ་འགྲོ་ཞིང་འདུག་པ་ལ། སྲས་ཀྱང་ཡབ་ཡུམ་གཉིས་ཀྱིས་མ་ཚོར་བར་འབྱོན་དགོས་དགོངས་གཟིམས་མལ་ནས་བཞེངས་འབྱོན་གྲབས་མཛད་པས། ཡང་ཐུགས་དགོངས་ཕྱི་མ་གཅིག་ལ། རི་ཆེ་ས་ན་གཡང་ཆེ། ཁྱེ་ཆེ་ན་ཉེན་ཆེ། ཆོས་ཟབ་ན་བདུད་ཟབ་བྱ་བ་ཡིན། ཡབ་ཀྱི་བཀའ་བཀྱོན་ཡང་འོང་། བདུད་ཀྱི་བར་ཆད་བྱུང་ཉེན་ཡང་ཡོད་དགོངས་གཟིམས་མལ་དུ་བཞུགས་པ་ལས། རྒན་མོ་ཁ་ན་སོ་མེད་པ། མགོ་དུང་ལྟར་སོང་བ་གསུམ་ཡང་ལྷོ་བྲག་རྔ་མོ་ཆུ་ཤུལ་གྱི་ལྟད་མོ་ཆེན་པོ་འདི་སྔར་ཡང་ཡང་
2-3-90b
མཐོང་སྟེ། ཚིམ་པ་རང་མི་འདུག་ཅིང་། ད་ནམ་འཆི་ཆ་མེད་པས་ད་ལན་ལས་ཨེ་མཐོང་མི་ཤེས་ཟེར། འཁར་སྟབས་ལིང་ངེ་སྒྱིད་པ་གྱོ་ལེ་འགྲོ་བ་གཟིགས་ཏེ། རྒན་མོ་གསུམ་པོ་བདུད་ཀྱི་ཆོ་འཕྲུལ་ཡིན་པ་དེ་མ་དགོངས་པར། སྲས་ཀྱི་ཐུགས་ལ་རྒན་མོ་མ་གི་འདྲ་བ་ཚེ་ཡང་འགྲོ་ན། ང་གཞོན་པ་ཕ་མ་གཉིས་འཛོམ་གྱི་གཅེས་ཕྲུག་ཅིའི་ཕྱིར་མི་འགྲོ་དགོངས་ནས་མཚམས་ལ་ཧར་འདོན་བྱས། ན་བཟའ་བེར་དཀར་གཅིག་ཡོད་པ་དེ་ཕྲག་ལ་བཀལ་ནས་བྱོན་པ་དང་། ཡུམ་ཚ་བ་འདྲེན་དུ་བྱུང་བ་ཐུག་བྱུང་བས། ཡུམ་གྱི་ཞལ་ནས། བུ་མཚམས་ལ་ཧར་འདོན་བྱས་པའི་ཁྲིམས་མེད། གང་དུ་འགྲོ་བསམ་པ་ཡིན། ཡར་ལོག་ལ་སྒྲུབ་པ་ལ་སྡོད་གསུངས་པ་ལས། སྲས་ཡུམ་གྱིས་བཟུང་གིས་དོགས་པས་སྐས་ལ་ཕྱི་བབས་ཞོལ་ལེ་བྱོན་སོང་། ཡུམ་གྱིས་ཕྱག་གསོལ་ཆས་ཀྱིས་འགགས་པས་འཛིན་པ་མ་བྱུང་བར་སྲས་བྲོས་པས། སྲས་ཀྱི་ཐུགས་ལ་གར། ཡུམ་གྱིས་བསླབ་བྱ་མཛད་ན་ནི་ཉན་དགོས། སྡོད་གསུངས་ན་ནི་བྲོས་དགོས་དགོངས། སྒོའི་ཐེམ་པ་ལ་རྟ་ཞོན་ལོག་གེར་བཞུགས་དུས། ཡུམ་གྱི་ཐུགས་ལ། ངས་བུ་ཟིན་པ་དང་
2-3-91a
ཉན་པ་བྱུང་ན་ང་བསྐྱིལ་དགོས། མ་ཟིན་ཞིང་མི་ཉན་ན་བསླབ་བྱ་ཞིག་བྱེད་དགོས་དགོངས། བུ་ཨ་མ་ལ་གསན་ལ་ཡར་ལོག་བྱོན་དང་གསུངས་པས། སྲས་ཀྱི་ཞལ་ནས། ཡུམ་ལགས། བདག་ཟླ་བ་དཀར་བ་ཟླ་སྟོད་ཡིན། །ཕ་མ་ཚང་བ་ཚེ་སྟོད་ཡིན། །བྱ་བ་ལགས་པས། བདག་ལ་ན་ཚ་དང་སྡུག་བསྔལ་ནི་མེད། ལྟད་མོ་ལ་འགྲོ་འོས་སུ་བདག་བཟང་བ་གདའ་བས་ད་རེས་ཅིས་ཀྱང་འགྲོ་བ་ཞུ་ཞུས་པས། ཡུམ་གྱི་ཞལ་ནས། ཁྱོད་ཀྱིས་ཡབ་ལ་ཞུས་སམ་གསུངས་པས། མ་ཞུས་ལགས་ཏེ། ཡུམ་ལ་ཞུས་པས་ཁྱབ་མཆི་ཟེར། གཤེགས་གྲབས་མཛད་ཅིང་འདུག་པ་ལ། ཡུམ་གྱི་ཞལ་ནས། བུ་ཅིས་ཀྱང་མི་གསན་པ་འབྱོན་ན་འོ་ཅག་མ་བུ་གཉིས་དམ་བཅའ་ཞིག་བྱེད་པ་ཡིན་པས། འདི་དག་སྙིང་གི་དཀྱིལ་དུ་ཆོངས་ཤིག །དེ་རིང་གི་ཉིན་མོ་ལ་བུ་གྲལ་མགོ་རུ་མ་སྡོད། འབུལ་བ་བླ་སྡེར་མ་ཟན། བསྔོ་བ་ཡོན་བཤད་མ་བྱེད། ཆོས་གཏམ་མ་བྱེད། ཆང་མ་འཐུང་། རྟ་མ་རྒྱུག་ཉི་མ་ཕྱེད་ཚུན་ནས་ལོག་བྱོན་ཅིག བདུན་པོ་འདི་འུ་ཅག་མ་བུ་གཉིས་ཀྱི་དམ་ཚིག་ལགས་པས་ཐུགས་ལ་ཅིས་ཀྱང་དགོངས་འཚལ་ལོ་གསུངས་པས། སྲས་
2-3-91b
ཀྱིས་དེ་ལྟར་འཚལ་ལོ་ཞེས་གསུངས་ནས་བྲོས་མ་ཐབས་སུ་གཤེགས་སོ། །དེར་ཡུམ་གྱིས་སྲས་ཀྱི་ཕྱི་བཞིན་རྗེ་བཙུན་མི་ལ་དང་། མར་པ་མགོ་ལེགས་ཀྱི་གཙོ་བྱས་པའི་གྲྭ་པ་རགས་པ་བཞི་ལ་དམ་བཅའ་བདུན་པོ་རྣམས་ནན་ཆེ་བར་བསླབས་ནས་ཕྱག་ཕྱི་ལ་བརྫངས་ཏེ། ཡུམ་རང་གཅིག་པུར་བཞུགས་པས། སྔར་དང་མི་འདྲ་བའི་ཐུགས་ཆ་ཕྱོང་ང་བ་དང་། སྤྱན་ཆབ་མང་པོ་ཤོར་ཞིང་། ཐུགས་ལ་ངའི་བུ་འདི་སྔར་ཟླ་བ་རེ་ཙམ་གཞན་དོན་ལ་འགྲོ་བ་ལ་འདི་ལྟ་བུའི་སྙིང་མི་དགའ་བ་མ་བྱུང་སྟེ། ད་ལན་ཉིན་གཅིག་འགྲོ་བ་ལ་འདི་ལྟ་བུའི་སེམས་མི་དགའ་བ་ཡོང་ལུགས་ཀྱིས་བར་ཆད་ཡོང་བ་མིན་ཡོང་སྙམ་པ་ཐུགས་ལ་ཤར་བར་གདའ། སྲས་དཔོན་སློབ་རྣམས་ཀྱིས་རྔ་མོ་ཆུ་ཤུལ་དུ་ཕེབས་པ་ལས་གྲལ་པ་མང་པོ་ཚོགས་འདུག་པ་ལས། དཔོན་སློབ་རྣམས་ཀྱིས་བླ་མ་དགེ་བའི་བཤེས་གཉེན་རྣམས་ཀྱི་གྲལ་འོག སྐྱེ་བོ་མི་ནག་པ་རྣམས་ཀྱི་གྲལ་མགོ་ཞིག་ཏུ་བཞུགས་པ་ལས། གྲལ་མགོ་ན་ཡོད་པའི་བླ་མ་བགྲེས་ཤིང་ཐུགས་དགོངས་མཐོ་བ་རྣམས་སྲས་དར་མ་མདོ་སྡེ་ཡིན་མིན་གྱི་ཐེ་ཚོམ་ཞིག་ཟོས་ནས། ལྟར་བཏང་བས་སྲས་ཡིན་པར་ཤེས་ནས་གྲལ་དབུ་ལ་གདན་
2-3-92a
དྲངས་པ་འབྱོན་དུ་མ་འདོད་པས། གྲལ་མགོ་མ་རྣམས་ན་རེ། རྗེ་བཙུན་མར་པའི་སྲས་ཀྱི་གྲལ་མགོ་རུ་སྡོད་པ་འདི་གང་ནས་བལྟས་ཀྱང་མི་འཐད་ཟེར། བླ་མ་གྲལ་མགོ་མ་རྣམས་ཀྱིས་རང་རང་གི་གདན་ཁྱེར་ནས་སྲས་ཀྱི་གྲལ་འོག་ཏུ་བྱ་འཕུར་བསྐྱས་བྱས་བྱུང་བས། སྲས་གྲལ་མགོ་རུ་བྱུང་། དེ་སྟོབས་ཀྱིས་བླ་སྡེར་དང་འབུལ་བ་ལེན་དགོས་དང་། བསྔོ་བ་ཡོན་བཤད་དང་བླ་མ་དགེ་བའི་བཤེས་གཉེན་རྣམས་ཀྱིས་དྲི་བ་བྱས་པའི་ལན་དུ་ཆོས་གཏམ་མཛད་དགོས་བྱུང་བས་མཁས་པའི་ཐོག་ཆོད། དེར་མི་དྲག་པ་རྣམས་ཀྱིས་རིམ་པ་བཞིན་ཆང་དྲངས་པ་ནན་ཆེས་པས་ཅུང་ཟད་རེ་འཐུང་དགོས་བྱུང་། དེའི་ཚེ་ཉི་མ་ཡང་ཕྱེད་ཡོལ་དུ་སོང་བ་ལ། རྗེ་བཙུན་མི་ལས། བླ་མ་རིན་པོ་ཆེ། ལྟད་མོ་དང་སྟོན་མོ་ཆེ་གར་གྱེས། ཁྲོམ་བཞུགས་འཐབ་མོས་སྡུད་བྱ་བ་ལགས། ཡུམ་གྱི་བཀའ་གནང་ཕལ་ཆེར་ཐལ་གདའ། ད་ཉི་མ་ཡང་ཕྱེད་ཡོལ་ཙམ་དུ་སོང་གདའ་བས་ཅིས་ཀྱང་ཕེབས་པར་ཞུ་ཞུས་པས། སྲས་ཀྱི་ཞལ་ནས། ཨ་ཕོ་མཐུ་ཆེན་ཅིས་ཀྱང་བདེན་གསུང་འབྱོན་པར་ཆས་པ་ལས། སྲས་རང་གི་སྐུ་ཞང་ལྷོ་བྲག་ན་ནོར་ཕྱུག་པ་དང་རོ་བཙའ་བའི་ཐོག་ཆོད་ཅིང་
2-3-92b
བུ་མེད་པ་དེས། རྟ་ཕོ་རོག་དཔུང་དཀར་ཞེས་བྱ་བ་ལྷོ་བྲག་ན་མགྱོགས་པ་ཞིག་ཡོད་པ་དེ་ལ་སྒ་ཆས་ལེགས་པ་གཅིག་བྱས་ནས་སྲས་ཀྱི་དྲུང་དུ་ཁྲིད་སོང་སྟེ། ཚ་བོ་ཡར་བཞེངས་ཤིག །བསྔོ་བ་ཡོན་བཤད་སོགས་ཆོས་མཁས་པའི་ཐག་ཆོད། ད་རྟ་ལ་བདེ་བའི་ཐོག་ཆོད་པ་ཅིག་བྱེད་པས། རྟ་རྒྱུག་ཅིག་ཟེར་སྲབ་མདའ་ཕྱག་ཏུ་ཕུལ་བས། སྲས་ཀྱི་ཞལ་ནས། ཕྱིས་ནས་ཞང་པོས། གང་ཟེར་གྱི་ཁ་ལ་ཉན། ད་ལན་རྟ་རྒྱུགས་མི་གསུང་བར་ཞུ། བདག་ཡོང་དུས་ཡུམ་གྱི་ཞལ་ཏ་འགའ་ཡོད་པ་ལགས་ཏེ། ཕལ་ཆེར་ཤོར་ཐལ། ད་རྟ་རྒྱུག་ན་ཀུན་འཆོར་བ་འདུག་གསུངས་པས། ཞང་པོ་ན་རེ། ཡུམ་བདག་མེད་མ་དབང་ཆེ་ཡང་ངའི་སྲིང་མོ་ཡིན། ང་ཇི་ལྟར་ཞན་རུང་ཇོ་ཇོ་ཡིན། མོའི་ཁ་ལ་ཉན་ན་ངའི་ཁ་ལ་ཅི་ལ་མི་ཉན། གཏམ་དཔེ་ལ་ཡང་། ཞང་པོ་ཆུས་ཁྱེར་བའི་སྐྲ་ནས་མ་འཛིན་བྱ་བ། ཁ་དྲག་པོའི་དོན་ཡིན་པས། ཅིས་ཀྱང་རྟ་རྒྱུག་དགོས། རྒྱུག་སྟིང་སྒ་ཆ་དང་བཅས་པ་འབུལ་བར་འབུལ་ཟེར། ཕྱག་ནས་འཐེན་ཏེ་རྟ་ལ་བསྐྱོན་ནས་མི་རྒྱུག་པའི་དབང་མ་བྱུང་བར། རྟ་རྒྱུགས་པས། སྐུ་འབྲས་མཚར་བ་རྩལ་ཆེ་བ་ལ་སོགས་ཏེ། ཆོས་འཇིག་རྟེན་གཉིས་ཀའི་ཁྲོམ་ཐོག་ཀུན་
2-3-93a
ཆོད་དེ། དེ་ནས་སྲས་ལ་ཕུད་ཞུ་བ་མང་པོ་རུབ་རུབ་ལ་བྱུང་བས། ཅུང་ཟད་བདེ་བའི་ཉམས་ཡང་བྱུང་བའི་ཚེ། རྗེ་བཙུན་མི་ལས་སྲས་ལ། བླ་མ་ལགས། ད་ནང་ཡུམ་གྱིས་གནང་བའི་དམ་བཅའ་ནི་ཀུན་ཤོར་ཐལ། ད་ཁྲོམ་ཐོག་ཆོད་ཁར་རྟ་ཁ་འཐེན་བྱ་བ་ལགས་པས། ཁྲོམ་མཇུག་མ་བསྡུས་པར་ཅིས་ཀྱང་ཕེབས་པ་དྲག་ཞུས་ནས་ནན་གྱིས་སྤྱན་དྲངས་ཏེ། ཞང་པོས་ཕུལ་བའི་རྟ་ལ་ཆིབས། དཔོན་སློབ་རྣམས་ཀྱིས་བསྡེབས་ནས་རྗེ་བཙུན་མི་ལས་ཆིབས་འཐུར་བཟུང་བྱོན་པས། ང་རྒས་འཁོགས་དང་ནད་པ་རྟ་ལ་མི་ཆགས་པ་ནི་མིན། རྟ་འཐུར་ནས་བཟུང་མི་དགོས། ཁྱེད་རང་རྣམས་སྔོན་ལ་སོང་ཞིག་གསུངས། གྲྭ་པ་རྣམས་ཀྱི་སྔོན་ལ་རྒྱང་ངེ་བྱོན་པས། ལུང་པ་ཞན་ཞེས་བྱ་བའི་ནང་ན་མར་ཕེབས་པ་ལས། དེའི་ལམ་གྱི་ཕྱོགས་གཅིག་ན་བྲག་ལ་ཆུ་འཐབ་ཀྱི་འཕྲང་ཡོད་པ་ཕྱོགས་གཅིག་ལ་རྫ་བྲག་གི་གསེབ་ལ་བྲ་མའི་ནགས་ཡོད་པ། དེའི་གསེབ་ན་སྲེག་པའི་ཚང་ཡོད་པ་དེར་ཕེབས་པས་རྟའི་རྨིག་སྒྲས་སྲེག་པ་མ་བུ་བདུན་འགྲོགས་པའི་གཤོག་པའི་སྒྲ་དང་། ཙི་སྒྲས་ཆིབས་འགྲོགས་སྲས་ཆིབས་ཐོག་ནས་ཡར། ཞབས་ཀྱི་ཡོབ་བྱ་འདས་ནས་རྫ་གསེབ་ལ་སྲས་
2-3-93b
རྟ་ཡིས་མདའ་རྒྱང་གང་ཙམ་དྲུང་པས་དབུ་ཆག །དབུ་ཀླད་དང་ཁྲག་མང་པོ་འཐོར་ཞིང་རྟ་བང་རྒྱུག་པའི་ཚེ། རྗེ་བཙུན་མི་ལས། ཕྱི་མིག་གཟིགས་པས། མི་མེད་པའི་རྟ་དེ་རྒྱང་རྒྱང་རྒྱུག་པ་གཟིགས་པས། སྲས་ཆིབས་ཀྱིས་བསྐྱུར་བར་དགོངས་ཏེ། རླུང་བཟུང་ནས་རྒྱུགས་པས་ཆིབས་ཟིན་པ་ནགས་ལ་བཏགས། ཞབས་ཡོབ་ནང་ནས་བཏོན་ཏེ་ཐུགས་དྲན་མེད་དུ་སོང་བའི་དཔངས་དུ་སླངས་ནས་གཟིགས་པས་ཚད་པ་བརྒྱད་དུ་ཆག །དབུ་ཀླད་དང་མཚལ་ཁྲག་ཚབས་ཆེ་བ་འདུག་པས་གཞན་བྱ་ཐབས་ནི་མ་བྱུང་། སྤྱན་ཆབ་འདོན་གྱིན་བཞུགས་ཚེ། གཞན་བུ་ཆེན་རྣམས་ཀྱང་ཕེབས་བྱུང་སྟེ། ཕྱག་ཞབས་ནས་བཟུང་མཚན་ནས་བོས་ཏེ་མང་དུ་བཤུམས་པའི་མཐར། བཀའ་གྲོས་ལ་ཆིབས་ལ་ནི་མི་ཆགས་པ་འདུག་པས། འདོ་ལི་ལ་གདན་འདྲེན་རྩིས་ཀྱིས་འབུལ་བ་ལ་བྱུང་བའི་དར་ཡུག་དབུ་ལ་དཀྲིས་པ་དེ་ལ་འདོ་ལི་འཚེམ་ཞིང་ཡོད་ཚེ། བསེར་བུ་རྒྱུག་སྟབས་ཀྱིས་སྲས་ཀྱི་ཐུགས་དྲན་རྙེད་ནས་སྤྱན་ཧྲིག་གེ་བྱུང་བ་རྗེ་བཙུན་མི་ལ་ལ་གཟིགས་ནས་ཨ་ཕོ་མཐུ་ཆེན་སླེབས་པ་དེ་ལེགས་ཏེ། ང་རྟས་བསྐྱུར་ནས་མགོ་བསྣད་ཡོད་པ་འདྲ། ཁྱེད་རྣམས་ཅི་བྱེད་ཅིང་ཡོད་པ་ཡིན་གསུང་པ་ལ། བླ་མས་
2-3-94a
ཆིབས་པ་ལ་ནི་མི་ཆགས་ཤིང་འབྱོན་པ་ནི་མི་ཡོང་བ་འདུག་པས། འདོ་ལི་གཅིག་གྲབས་བྱེད་ཀྱི་ཡོད་ཞུས་པས། ཕོ་ལྟོགས་ཀྱང་ཁྱུང་རུ་དེང་ངེ་བྱ་བ་ཡིན་པས། ངས་རྟ་ལ་ཨེ་ཆགས་བལྟ་ཡིས། སྐེ་རགས་འདི་འཁྲོལ་ལ་ཕྱེད་མར་གཤོག་ཅིག་གསུང་། གསུངས་པ་ལྟར་བཀྲོལ་ནས་གཤགས་པའི་ཕྱེད་དབུ་ལ་བཅིངས། ཕྱེད་སྐུ་སྐེད་ལ་བཅིངས་ཏེ། ང་རྟ་ལ་བསྐྱོན་ཅིག་གསུང་། ཆིབས་པ་ལ་བསྐྱོན་པས་ཨ་ཁུ་མགོ་ལེགས་ན་འཐེན་པས་ངའི་རྟ་སྣ་འཁྲིད། གཞན་གཉིས་ཀྱིས་གཡས་གཡོན་བསྐྱོར། ཨ་ཕོ་མཐུ་ཆེན་སྔོན་ལ་སོང་ལ་ཡབ་ཡུམ་གཉིས་ལ་ང་ཅུང་ཟད་བསྣད་པའི་རྒྱུ་མཚན་དང་ལོ་རྒྱུས་ཞུས་ཤོག་ཅིག་གསུངས་པ་ལྟར་དཔོན་སློབ་རྣམས་ཀྱིས་ཕྱི་ནས་གུལ་ལོ་བྱོན། རྗེ་བཙུན་མི་ལས་སྔོན་ལ་བྱོན་ནས་སྐུ་མཁར་གྱི་རྩེ་མོར་བླ་མའི་དྲུང་དུ་ཕེབས་ཏེ། ཕྱག་བཙལ་ནས། བླ་མ་རིན་པོ་ཆེ། བདག་ལ་ཞུ་མི་སྤོབས་པའི་གཏམ་ཚིག་གསུམ་པ་གཅིག་ཞུ་རྒྱུ་མཆིས་ཞུས་པས། བླ་མའི་ཞལ་ནས། སྔར་ཡིན་ན་ཁྱོད་སླེབ་ཚེ་དགའ་བའི་ཉམས་ཤིག་ཡོད་པ་ཡིན་ཏེ། ད་ལན་སྙིང་མི་དགའ་ལྟར་བ་ཞིག་བྱུང་ཅི་ཡོད་དམ་ཤོད་ཅིག་
2-3-94b
གསུང་། དེར་རྗེ་བཙུན་མི་ལས། གསུང་མ་ཐོན་ཞིང་སྤྱན་ཆབ་ཤོར། དར་ཅིག་ནས་ལོ་རྒྱུས་རྣམས་ཞུས་པས། བུ་དེ་ད་ནང་ལྟད་མོ་ལ་ཕྱིན་ནམ་གསུངས། ཕྱིན་ལགས་ཞུས་པས། མགོ་གང་དུ་ཆག་གསུངས། ཞན་ལུང་པའི་ནང་དུ་ཆག་ཞུས་པས། ལུང་པ་ཞན་ཟེར་བ་རང་གིས་ཆག ད་ལྟ་ཤི་བ་མེད་དམ་གསུངས། མ་གྲོངས་པར་འབྱོན་ཞིང་ཡོད་ཞུས་པས། རྨ་བཅོས་ཇི་ལྟར་བྱས་གསུང་། སྐུ་ཆིངས་རྒྱ་མ་དེ་ཕྱེད་མར་གཤགས་ནས་ཕྱེད་ཀྱིས་དབུ་བསྡམས། ཕྱེད་སྐུ་ལ་བཅིངས་ཡོད་ཞུས་པས། རྟེན་འབྲེལ་རང་ཕ་བུ་འགྱེལ་དགོས་པ་འདུག །མདང་ངའི་རྨི་ལམ་དུ་ཡང་མི་ནག་པོ་གཅིག་བྱུང་སྟེ། ཁོ་ན་རེ། ནཱ་རོ་པའི་བཀའ་ཞལ་ལ། ཁྱོད་ཀྱི་སྙིང་ཐོན་ལ་ང་ལ་བསྐུར་གསུངས་པ་ཡིན་ཟེར་བ་ལ། ངས་ཀྱང་བླ་མའི་བཀའ་བསྒྲུབ་སྙམ། སྙིང་བཏོན་ནས་ཁོ་ལ་སྤྲད་པས། ཁོ་དགའ་ནས། ཐོད་པའི་ནང་དུ་བཅུག གྲི་གུག་གིས་ཁ་བཅད་ནས་སོང་བ་ཞིག་རྨིས། གཞན་ཡང་མཎྜལ་གྱི་དཀྱིལ་རྡོལ་བ། ཉི་ཟླ་ནམ་མཁའི་དབྱིངས་སུ་རྒས་པ། རཀྟའི་མཚོ་སྐམས་པ་རྣམས་རྨིས། ང་རང་ཕྱིན་རུང་ཕན་གནོད་ཅིག་མེད་པ་འདྲ། འོན་ཀྱང་ངས་མ་ཕྱིན་ན་ཕ་བུའི་དམ་ཚིག་
2-3-95a
ཡིན་པས་སྙིང་རྗེ་ཕྱིར་འགྲོ་དགོས་གསུངས་བྱོན་པ་དང་། སྲས་བླ་ཡེར་ཕེབས་པ་མཇལ་བ་ལས། སྲས་ཀྱི་ཞལ་ནས་བདག་གིས་ད་ནང་ལྟད་མོ་ལ་ཕྱིན་པ་ལགས་ཏེ། མགོ་བསྣད་གདའ་བས། སྐྱོན་མི་སྐྱོན་གཟིགས་པ་ཞུ། ཞེས་དབུ་ཡབ་ཀྱི་སྐུ་པང་དུ་ཕུལ་བས། ཡབ་ཀྱིས་དབུ་ཆིངས་ཀྱི་སྐེ་རགས་བཀྲོལ་ནས་གཟིགས་པས། དབུ་ཐོག་ཚལ་པ་བརྒྱད་དུ་ཆག དབུ་ཀླད་ཀྱི་རྒྱ་རལ་ཞིང་འཐོར་བ་གཟིགས་པས། དབུ་འདི་ཡུན་རིང་མི་འགོར་བ་འདུག་དགོངས་པའི་ཚེ། སླར་ཡང་སྲས་རླུང་གི་རྣམ་པས་ཐུགས་དྲན་ཉམས་པ་ལས། ཡབ་ཀྱི་སྐུ་པང་དུ་སྲས་ཀྱི་དབུ་བཞག གཞོགས་གཡས་འོག་ཏུ་བཅུག་པའི་སྙན་ཁུང་ན་མར། འཕོ་བ་གསལ་འདེབས་ཀྱི་མགུར་འདི་གསུངས་སོ། །བུ་གསན་ཅིག་ཇོ་སྲས་མདོ་སྡེ་འབུམ། །ཁོ་བོ་མར་པ་ལོ་ཙྪ་(ལོཙྪ་)ངས། །རྒྱ་གར་ཡུལ་དུ་ལན་གསུམ་ཕྱིན། །མཚན་ལྡན་བླ་མ་གུས་པས་བསྟེན། །རྗེ་ནཱ་རོ་མཻ་ཏྲི་རྣམ་གཉིས་ལ། །རྒྱུད་འགྲེལ་གདམས་པ་མང་དུ་ཞུས། །དབང་བཞིའི་གནད་ལ་ངོ་སྤྲོད་བྱས། །ཁྱད་པར་འཕོ་བ་གྲོང་འཇུག་ཞུས། །དེ་མ་གསང་གོང་དུ་བུ་ལ་བསྟན། །རྒྱུད་འགྲེལ་གདམས་པ་དྲན་ནམ་
2-3-95b
མདོ་སྡེ་འབུམ། །སྤྱིར་རང་འདུས་བྱས་ཀྱི་མཚན་ཉིད་འདི། །མི་རྟག་འཇིག་པའི་ཆོས་ཅན་ལས། །བུ་སྒྱུ་མ་ལུས་ཀྱི་(ཀྱིས་)རྟག་མ་ཐུབ། །གློ་བུར་བདུད་ཀྱིས་བར་ཆད་བྱུང་། །ཐོད་པ་དུང་དཀར་གྱི་འཁོར་ལོ་ཆག །ཀླད་རྒྱ་དར་དཀར་གྱི་ཡོལ་བ་རལ། །ཀླད་པ་བུདྡྷིའི་ལྷ་ཚོགས་མཐོར་(འཐོར། །)བུ་སྒྱུ་ལུས་འཇིག་པ་ཤིན་ཏུ་བདེན། །ཕ་ཇོ་ལྷ་ཡི་དཀྱིལ་འཁོར་ཡིན། །རྣམ་ཤེས་ཚངས་པའི་ལམ་ནས་ཐོན། །ད་ལན་ཕ་ཇོའི་ཐུགས་ཀར་འཕོས། །ཞེས་གསུངས་པ་དེ། ཡུམ་ནང་ན་བཞུགས་པས་གསན་ཏེ། བླ་མ་སྐུ་མཁར་རྩེ་ན་བསྒྲུབ་པ་ལ་བཞུགས་པ་ལ། ད་ལྟ་བླ་གཡེར་ན་འཕོ་བ་གསལ་འདེབས་ཀྱི་མགུར་གསུང་གི་བྲག ངའི་བུ་དེ་ལ་བར་ཆད་བྱུང་བ་ཡིན་ནམ་དགོངས། རིངས་སྟབས་སུ་བླ་གཡེར་བྱོན་པས། སྲས་ཀྱི་དབུ་ཁྲག་རལ་ཉིལ་ལེར་ཡབ་ཀྱི་པང་ན་འདུག་པ་གཟིགས་པས། རེ་ཞིག་ཐུགས་དྲན་མེད་དུ་རྒྱལ། སངས་པ་དང་ཡབ་ལ། སྨན་ཡན་ལག་བརྒྱད་པ་ལ་ནི་ཁྱེད་རང་མཁས། བུ་འདི་འཚོ་བ་གདའ་འམ། མི་འཆི་བ་གདའ་ཞུས་པས། བླ་མའི་ཞལ་ནས། སྨན་ཡན་ལག་བརྒྱད་པ་ལ་ང་མཁས་རུང་། རོ་མགོ་མེད་པ་ལ་གསོ་ཐབས་མི་འདུག ཁམས་གསུམ་སེམས་ཅན་གྱི་ལས་
2-3-96a
སླེབས་ཚེ། དུས་གསུམ་སངས་རྒྱས་ཀྱི་མཐོ་རྡུགས་བྱ་བ་ལྟར་ངས་གསོ་ཐབས་མི་འདུག ཤེས་ན་ཁྱོད་ཀྱིས་གསོས་དང་གསུངས་། སྲས་ཀྱི་དབུ་ཡུམ་གྱི་པང་དུ་གནང་སྟེ། ཆུ་ཟངས་གང་གི་ནང་ན་ཞག་ཉ་མིག་ཙམ་ཅིག་ཡོད་པ་དེ་རྩིག་ལོགས་ལ་གཏོར་ཚར་འདུག བུ་མཚམས་ཀྱི་སྒང་ལ་ལྟད་མོ་ལ་གཏོང་མཁན་ཁྱོད་མིན་པ་སུ་ཡོད། ལར་རང་བུད་མེད་ཀྱི་གྲོས་མགོ རའི་ལམ་སྣ། ཕྱི་བའི་བྱ་ར། ཐལ་བའི་ལ་རྫས། མར་གྱི་ཉི་འདེ་རྣམས་ལ་དགའ་མོ་བྱུང་བའི་དཔེ་མེད་གསུང་ཏེ་དབུ་བསྟུམས་ནས་བཞུགས་པར་གདའ། དེར་ཡུམ་གྱི་ཐུགས་ལ་ངས་ངག་མ་ཉེས་ཏེ། ད་ལམ་ཤགས་འབུལ་བའི་དུས་སུ་མི་འདུག་ཅིང་། བུ་འདིའི་མཚམས་སྦྱོར་ལ་ཡང་གནོད་པ་འདུག ཕ་ཇོ་ཁོང་སེམས་ངོ་སྤྲོད་པའི་བླ་མ་དང་ཡབ་ཡིན་པ་ལ་མ་འཕོས་རུང་། ང་ལུས་སེམས་བསྐྱེད་པའི་ཨ་མ་ཡིན་པས། སྙིང་བརྩེ་བས་འཕོས་ཏེ་འོང་སྙམ་ནས། ཡུམ་གྱིས་སྲས་ཀྱི་སྙན་ཁུང་ལ་ཞལ་གཏད་ནས་བཤུམ་ཞིང་འཕོ་བ་གསལ་འདེབས་ཀྱི་མགུར་འདི་གསུངས་སོ།། །།རྗེ་དུས་གསུམ་སངས་རྒྱས་ཐམས་ཅད་ཀྱི། །མཆོག་གི་སྤྲུལ་པ་རིན་པོ་ཆེ། །
2-3-96b
མཚན་ལྡན་མར་པ་ལོ་ཙྪ་(ལོཙྪ་)ཡི། །ཞབས་ལ་གུས་པས་ཕྱག་འཚལ་ལོ། །བུ་གསན་དང་ཇོ་སྲས་མདོ་སྡེ་འབུལ། །བུ་འདི་ནས་ཕ་རོལ་གཤེགས་པའི་ཕྱིར། །འདུས་བྱས་ཕུང་པོ་འཇིག་པ་ལ། །ཐུགས་ཁྲལ་ཅུང་ཟད་ཡོད་དེ་མཆི། །ཕ་ཇོ་མར་པ་ལོ་ཙྪ་(ལོཙྪ་)ཡིས། །རྒྱ་གར་ཡུལ་ལ་ལན་གསུམ་བྱོན། །སྐུ་སྲོག་ལ་མ་ལྟོས་དམ་ཆོས་བཙལ། །མཚན་ལྡན་བླ་མ་དུ་མ་བསྟེན། །ཁྱད་པར་ནཱ་རོ་པཎ་ཆེན་ལ། །སྙན་བརྒྱུད་ཀྱི་གདམས་པ་མ་ལུས་གསན། །ཕ་ཇོས་མ་གསང་བུ་ལ་གསུངས། །དུས་ད་ལྟ་ཐུགས་ལ་གསལ་མི་གསལ། །ནཱ་རོ་པཎ་ཆེན་གྱི་གདམས་ངག་རྣམས། །ད་ལྟ་གདེངས་དང་ལྡན་མི་ལྡན། །ཁྱད་ཆོས་བསྲེ་འཕོའི་གདམས་ངག་ལ། །ད་ལྟ་ངེས་ཤེས་སྐྱེས་མ་སྐྱེས། །སྐྱེ་མེད་ཕྱག་རྒྱ་ཆེན་པོ་ལ། །ད་ལྟ་མཉམ་གཞག་བརྟན་མི་བརྟན། །འཕོ་བ་གྲོང་འཇུག་གདམས་ངག་ལ། །ད་ལྟ་གདེངས་དང་ལྡན་མི་ལྡན། །འདུས་བྱས་ཤ་ཁྲག་ཕུང་པོ་འདི། །མི་རྟག་ནམ་མཁའི་འཇའ་ཚོན་འདྲ། །སྒྱུ་མ་ལུས་ཀྱིས་རྟག་མ་ཐུབ། །ཡུམ་ང་རང་ལྷ་མོ་བདག་མེད་མ། །དུས་གསུམ་སངས་རྒྱས་སྐྱེས་པའི་ཡུམ། །སྙིང་པདྨ་འདབ་བརྒྱད་སེང་གེའི་ཁྲི། །ཉི་ཟླ་པདྨའི་གདན་སྟེངས་ན། །སྐྱེས་
2-3-97a
མཆོག་མར་པ་ལོ་ཙྪ་(ལོཙྪ་)བཞུགས། །དགྱེས་རྡོར་སྤྲུལ་པའི་ལྷ་དགུ་ཡིན། །བུ་རྣམ་ཤེས་ཚངས་པའི་ལམ་ནས་ཐོན། །ད་ལན་ཨ་མའི་ཐུགས་ཀར་འཕོས། །ཞེས་ཡུམ་གྱིས་མགུར་དེ་ལྟར་གསུངས་པས་ཀྱང་། སྲས་དྲན་པ་ཉམས་པའི་སྟོབས་ཀྱིས་ཚིག་གཅིག་ཀྱང་མ་གསན་པར་འདུག་པ་ལས། ཡུམ་གྱི་སྤྱན་ཆབ་སྲན་མ་ཙམ་ཞིག་སྲས་ཀྱི་སྙན་ཁུང་ནས་མར་སོང་བས་རྒྱུ་དང་། ཉེ་བར་ལེན་པའི་རྐྱེན་གྱིས། སྲས་ཀྱིས་ཐུགས་དྲན་རྙེད་དེ་སྤྱན་ཁྲ་ཧྲིག་གེ་བྱུང་བ་ལ། ཡང་ཡུམ་གྱི་གོང་ལྟར་འཕོ་བ་གསལ་འདེབས་ཀྱི་མགུར་གསུངས་པ་དགོངས་ཏེ། སྲས་ཀྱི་ཞལ་ནས། ཨ་ཕོ་མཐུ་ཆེན་ང་ཡར་སློང་ཞིག་གསུངས་ནས་ཡར་བཞེངས་ཏེ། དབུ་ཚལ་པ་བརྒྱད་དུ་སོང་བ་དེ་སྲས་རང་གིས་བསྡམས་ནས། ཨ་ཕོ་མཐུ་ཆེན་ངའི་གདོང་པ་འདི་མ་བདེ་བས་ཕྱིས་དང་གསུངས་པས། རྗེ་བཙུན་གྱི་ན་བཟས་སྲས་ཀྱི་ཞལ་རས་ཕྱིས་ཚེ། སྲས་དེ་ཉིད་ཀྱི་ཞལ་ནས། ངས་སྐྱེ་བ་འདི་ལ་ཕ་མ་གཉིས་པོའི་དྲིན་ལན་འཇོལ་བ་ཅིག་འོང་ངམ་བསམ་སྟེ། དྲིན་ལན་མ་འཇོལ་བའི་ཁར། ཡབ་ཡུམ་གཉིས་ཐུགས་ཁྲལ་ལ་བཀོད་པ་འདི་འདྲ་ཞིག་བྱུང་བས། ཡབ་ཡུམ་གཉིས་
2-3-97b
ལ་ཐུགས་ཁྲལ་མི་བགྱིད་པར་ཞུ་ཟེར་བའི་ཞུ་དོན་ཚིག་གསུམ་པ་ཞིག་འབུལ་བས། ངའི་རམ་བུ་ཐེག་ཅིག་གསུང་། རྗེ་བཙུན་གྱིས་དེ་ལྟ་བུ་མི་གསུང་བ་ཞུ། སྐུ་ཚེའི་བར་ཆད་དུ་འགྲོ་ཞུས་པས། ཨ་པོ་མཐུ་ཆེན་ཚེའི་བར་ཆད་བྱ་བ་ཅི་ལ་ཟེར། འདི་ཀ་མིན་པ་འདུག་གེ སེམས་ཅན་སྤྱིའི་ལམ་པོ་ཆེ་འདི་ལ་ད་ང་ཡང་འགྲོ་བའི་དུས་ལ་བབ་འདུག་པས་འགྲོ་བ་ཡིན་ཕྱིན་ས་འཇུར་མིག་ལྟ་བུའི་འཕྲང་རིང་འཇིགས་པ་ཅན་སྲིད་པ་བར་དོ་བྱ་བ་དེར་སྐྱེ་འགྲོ་ཕལ་ཆེར་ལ་འཇིགས་སྐྲག་གི་སྡུག་བསྔལ་མྱོང་དགོས་ནའང་། ང་ལ་ཕ་ཇོ་མར་པའི་བཀའ་དྲིན་གྱིས་གར་སྐྱེའི་གནས་རང་དབང་ཡོད་པས། སྲིད་པ་བར་དོའི་སྡུག་བསྔལ་མྱོང་མི་དགོས་པ་འདུག་སྟེ། ལར་རང་མི་ལུས་ཐོབ་ནས་ཆོས་མི་བྱེད་པ་འདི་ཀུན་སྙིང་རྗེ་སྟེ་བྱ་ཐབས་མི་འདུག དེ་བས་ཡབ་ཡུམ་ཐུགས་ཁྲལ་དུ་མི་འགྲོ་བའི་ཞུ་བ་ཞིག་འབུལ་བས། ཨ་ཕོས་ངའི་རམ་ཐེག་ཅིག་གསུངས། ཞུ་དོན་གྱི་མགུར་འདི་ཕུལ་ལོ།། །།རྗེ་གསུམ་ལྡན་གྱི་བླ་མ་རིན་པོ་ཆེ། །དཔལ་རྡོ་རྗེ་འཆང་དང་དབྱེར་མེད་པའི། །ཡབ་དགྱེས་རྡོར་སྤྲུལ་པའི་ལྷ་དགུ་དང་། །ཡུམ་སངས་རྒྱས་སྐྱེད་བྱེད་བདག་མེད་མ། །ཡབ་ཡུམ་གཉིས་ལ་གུས་ཕྱག་འཚལ། །
2-3-98a
ཡབ་ཡུམ་གྱིས་དབང་བསྐུར་བྱིན་གྱིས་རློབས། །ང་འདི་ནས་ཕ་རོལ་འགྲོ་བ་ལ། །ཡ་ང་དང་བག་ཚ་མི་བདོག་སྟེ། །ཡབ་ཡུམ་དྲིན་ལན་མ་ཁྱེར་འཆི་བ་འདི། །ཅུང་ཙམ་སེམས་ལ་འཕྲེང་བར་གདའ། །འོན་ཀྱང་མ་ཕན་འཆི་བ་ལ། །ཡབ་ཡུམ་ཐུགས་ཁྲལ་མི་བགྱིད་འཚལ། །ཡབ་ཕ་ཇོས་གསུངས་པའི་རྒྱུད་འགྲེལ་རྣམས། །དུས་ད་ལྟ་སེམས་ལ་གསལ་བར་གདའ། །ཐབས་ལམ་ནཱ་རོ་ཆོས་དྲུག་ལ། །ད་ལྟ་གདེངས་དང་ལྡན་པར་གདའ། །ཁྱད་ཆོས་བསྲེ་འཕོའི་གདམས་ངག་ལ། །ད་ལྟ་ངེས་ཤེས་འདྲོངས་པར་གདའ། །སྐྱེ་མེད་ཕྱག་རྒྱ་ཆེན་པོ་ལ། །ད་ལྟ་མཉམ་གཞག་བརྟན་པར་གདའ། །ཁྱད་ཆོས་འཕོ་བ་གྲོང་འཇུག་ལ། །ད་ལྟ་གདེངས་དང་ལྡན་པར་གདའ། །ཡབ་ཡུམ་གཉིས་སྤྱན་ཆབ་མི་གཏོང་འཚལ། །སྐྱེ་མེད་སྤྲོས་བྲལ་ཕྱག་རྒྱ་ཆེ། །ཕུང་པོ་ཁམས་དང་སྐྱེ་མཆེད་རྣམས། །ལྷ་དང་ལྷ་མོའི་རང་བཞིན་གསལ། །སྤྱིར་འཕོ་བྱ་འཕོ་བྱེད་རྟེན་དང་བྲལ། །སྐྱེ་མེད་ཆོས་ཀྱི་དབྱིངས་སུ་འཕོ། །ཡབ་ཡུམ་གྱི་ཐུགས་ཀར་གཏད་མི་འཚལ། །རྣམ་ཤེས་གྱེན་ལ་འཕང་མི་འཚལ། །བླ་མ་ནཱ་རོ་དང་མཻ་ཏྲིའི་རྒྱུད་འགྲེལ་རྣམས། །རྔོག་སྟོན་མཐུ་ཆེན་ལ་སོགས་
2-3-98b
པའི། །ཁོང་བུ་ཆེན་རྣམས་ལ་གནང་མཛོད་ལ། །སངས་རྒྱས་ཀྱི་བསྟན་པ་སྤེལ་བར་ཞུ། །བདག་གསོན་ཡང་བྱེད་རྒྱུ་དེ་ལས་མེད། །ཤི་ཡང་ཞུ་རྒྱུ་དེ་ལས་མེད། །འོ་སྐོལ་ཡབ་ཡུམ་སྲས་བཅས་རྣམས། །སྐྱེ་བ་འདི་ལ་མཇལ་སྙམ་མི་གདའ་སྟེ། །ཨུ་རྒྱན་ཡུལ་ལམ་མཁའ་སྤྱོད་དུ། །ཕྱི་མ་ཅིས་ཀྱང་མཇལ་བར་ཞུ། །ཞེས་པའི་ལན་སྲས་ཀྱི་ཕུལ་བས། ཡབ་ཀྱི་ཞལ་ནས། ངའི་བུ་འདི་བཞུགས་ན་ཕྱོགས་ཐམས་ཅད་དུ་ལོ་ཕྱུགས་རྟག་ཏུ་ལེགས་པ། ཆར་ཆུ་དུས་སུ་བབས་པ། མི་ནད་ཕྱུགས་ནད་རྒྱུན་ཆད་པ་དང་། ཁྱད་པར་དུ་མ་བསྒོམ་པར་སངས་རྒྱ་བ་འཕོ་གྲོང་འཇུག་གི་གདམས་པ་འདི་བོད་ཡུལ་དུ་དར་བ་ཞིག་ཡོད་ཅིང་། སེམས་ཅན་ལ་བདེ་སྐྱིད་ཕུན་སུམ་ཚོགས་པ་ཐོབ་པའི་ཕན་ཐོགས་པ་ཞིག་ཡོང་བ་ཡོད་དེ། གློ་བུར་བདུད་ཀྱིས་བར་ཆད་བྱུང་གསུངས། དེ་ནས་སྲས་ནང་དུ་གདན་དྲངས། ཡབ་ཡུམ་བུ་སློབ་རྣམས་ཀྱིས་མཐའ་བསྐོར་ནས་བཞུགས་པ་ལ། ཉ་མ་དཔལ་མོ་ལ་སོགས་པ་དད་ཅན་འགས། སེམས་ཅན་གྱི་དོན་དུ་གྲོང་འཇུག་མཛད་པར་ཞུ་ཞུས་པས། སྲས་ཀྱི་ཞལ་ནས། འོ་ན་མ་བསྒོམ་(བསྒོམས་)པར་སངས་རྒྱ་བ་འཕོ་བ་གྲོང་འཇུག་གི་གདམས་པ་འདི་བོད་དུ་དར་བ་ཅིག་འདོད་ན། 
2-3-99a
ཁྱེའུ་གཙང་མའི་རོ་ལ་རྨ་མེད་པ་གཅིག་ཚོལ་གསུངས་པས། དེར་བུ་སློབ་རྣམས་ཀྱིས་ཕྱོགས་བཞིར་ཁ་བཀྲམ་སྟེ་བཙལ་བས། མ་བསྒོམས་པར་སངས་རྒྱ་བ་འཕོ་བ་གྲོང་འཇུག་གི་ཆོས་བོད་དུ་དར་བའི་སྐལ་བ་མེད་པ་ལ་བརྟེན་ནས། སྐྱེས་པ་ཁྱོ་ཀའི་རོ་རྨ་མེད་པ་ནི་གཅིག་ཀྱང་མ་རྙེད། སློབ་མ་སྔགས་པ་ཅིག་གིས་རྒན་མོ་ལྦ་བ་ལོག་ནས་ཤི་བའི་རོ་གཅིག་ཁུར་བྱུང་སྟེ། འདི་ལ་འཕོ་བ་ཞུ་ཞུས་པས། འགྲོ་དོན་མི་ནུས་པས་མི་འཕོ་གསུངས། མ་འཕོས་པས། ཡང་སློབ་མ་ལུག་རྫི་གཅིག་གིས་ལྷ་ཁང་གོག་པོ་ཅིག་གིས་ནང་ནས་ཕུག་རོན་ཁྲས་དེད་དེ་ཧར་ནས་ཤི་བའི་རོ་ཅིག་རྙེད་པ་ཁྱེར་བྱུང་སྟེ། འདི་ལ་འཕོ་བ་ཞུ་ཞུས་པས། དུད་འགྲོ་ལ་འཕོས་ཀྱང་འགྲོ་དོན་མི་འོང་། ང་སྐྱེ་བ་ཇེ་དམའ་ལ་བཏང་བ་ལ་ཁྱེད་ལ་དགོས་པ་ཡོད་དམ། ང་ཕུག་རོན་ལ་མི་འཕོ་གསུངས། འཕོ་རུ་མ་འདོད་པས། དེར་སློབ་མ་འགའ་དང་ལུག་རྫི་ལོག་ལྟ་སྐྱེས་ཏེ། སྐྱེས་མཆོག་མར་པ་ལོ་ཙྪ་(ལོཙྪ་)ལ་ཚེ་གཅིག་ལུས་གཅིག་ལ་སངས་རྒྱ་བའི་གདམས་ངག་ཡོད་ཟེར་ཏེ་མི་བདེན་པར་འདུག་གོ །སྔར་བླ་མ་རང་གིས་མཛད་པ་དེ་རྣམས་ཀྱང་མིག་འཕྲུལ་ཡིན་
2-3-99b
པ་འདུག་ཟེར་བྱུང་བས། དེར་སྲས་ཀྱི་ཞལ་ནས། སྤྱིར་གྱིས་རྒྱ་གར་ནས་བསྒྱུར་བའི་ཆོས་ལ་མི་བདེན་པ་ག་ལ་སྲིད། སྒོས་སུ་ཡང་ཕ་ཇོས་གསུངས་པའི་ཆོས་ལ་མི་བདེན་པ་ག་ལ་སྲིད། བླ་མ་ལ་ལོག་ལྟ་མ་བྱེད། བླ་མ་ལ་ལོག་པར་བལྟས་ན་ངན་སོང་འཁོར་བའི་རྒྱུ་ཡིན་ནོ། །ད་སྤྱིར་གྱི་སངས་རྒྱས་ཀྱི་བསྟན་པ་དར་བའི་ཕྱིར་དང་། སྒོས་སུ་ཡང་ཕ་ཇོས་གསུངས་པའི་ཆོས་རྣམས་བཀའ་བཙན་པའི་ཕྱིར་དང་། ཡང་སྒོས་སུ་ཡང་ལུག་རྫི་ཁྱོད་སོགས་ངན་སོང་དུ་མི་ལྟུང་བའི་ཕྱིར་དུ་ངས་ཕུག་རོན་ལ་འཕོ་བར་བྱའོ། །དེ་ལ་ད་ལྟ་ང་བསྐྱེད་རིམ་ལ་ཡོད། རྫོགས་རིམ་དུ་བསྡུས་ནས་འཕོ་བ་ཡིན། བསྐྱེད་རིམ་གྱི་ངང་ནས་འཕོས་ན་ཡི་དམ་གྱི་ལྷ་བསད་པའི་ལྟུང་བ་འོང་བ་ཡིན་པས། ངས་རྫོགས་རིམ་དུ་བསྡུས་ཀྱིས། ཕུག་རོན་དེ་ངའི་སྔས་མགོར་ཞོག་ལ་མཆོད་པ་ཤོམས་ཤིག་གསུང་པ་ལྟར་མཆོད་པ་བཤམས་ནས། སྲས་ཀྱིས་བསྐྱེད་རིམ་གསལ་བཏབ་ཚེ། དགྱེས་པ་རྡོ་རྗེ་སྤྲུལ་པའི་ལྷ་དགུ་ཁྲ་ལམ་མེ་ཡོད་པ་ཐ་མལ་པ་ཀུན་གྱིས་ཀྱང་མཐོང་བར་བྱུང་ངོ་། །རྫོགས་རིམ་དུ་བསྡུས་ནས་འཕོ་བ་མཛད་ཚེ་སྐུའི་མདངས་ཡལ་སང་(སངས་)བ་དང་ཕུག་རོན་ཅུང་ཟད་འགུལ་
2-3-100a
བ་བྱུང་། སྲས་སྐུ་ཡལ་བ་དང་ཕུག་རོན་ཧར་ལངས་ནས་སྤྲུག་ཅིང་། ཡབ་ཡུམ་གཉིས་ལ་ཕྱག་འཚལ་བའི་ཚུལ་དང་། བསྐོར་བ་གསུམ་བྱས་ནས། གྲོ་བོ་ལུང་གི་ཕུ་ན་ཡར་འཕུར་སོང་བ་ལས། ཡབ་ཀྱི་ཞལ་ནས། བུ་ཚུར་ལོག་ཤོག་ཅིག་གསུངས་པ་དང་། འགྲོ་བའི་འཕྲོ་ལ་ལོག་བྱུང་སྟེ། སྲས་མཁར་ལ་བསྐོར་བ་བྱས་ནས། ཡབ་ཀྱི་སྐུ་དཔུང་གཡས་པའི་སྟེང་དུ་བབས་ནས་བཞུགས་པར་གདའ། དེར་ཡབ་ཀྱི་ཞལ་ནས། བདག་མེད་མ་འོ་སྐོལ་ལ་བུ་ཕུག་རོན་ལ་རེ་བའི་དུས་བྱུང་བས། ད་མཆོད་ཁང་དུ་གདན་དྲོངས་ལ་མཆོད་པ་ཕུལ་ཅིག་གསུངས་། དབུ་རྩེར་གདན་དྲངས་མཆོད་པ་ཕུལ་ཏེ་བཞུགས་སུ་བཅུག །སྤུར་དང་གཤེགས་རྫོངས་དུས་གཅིག་མཛད་པ་ལས། སྲས་ཀྱིས་པུར་ཁང་རྩིགས་ནས་ཡབ་དང་བུ་ཆེན་རྣམས་ཀྱི-ས-་མེ་མཆོད་མཛད་པས། ཕྱོགས་བཞི་མཚམས་བརྒྱད་ནས་འོད་ཟེར་མི་འདྲ་བ་སྣ་བརྒྱད་ཟུག །ལྷ་དང་ལྷ་མ་ཡིན་གྱི་སྒྲ་དང་། རོལ་མོ་སྣ་ཚོགས་དང་། མེ་ཏོག་སྣ་ཚོགས་ཀྱི་ཆར་བབ་པ་མིས་མངོན་སུམ་དུ་མཐོང་བ་བྱུང་། དེའི་ཚེ་འཕོ་བ་མཛད་པའི་ཕུག་རོན་དེ་དར་ལམ་ལ་གདན་དྲངས་པ་ལ། ཡབ་ཀྱི་ཞལ་
2-3-100b
ནས། བུ་སྤུར་ཁང་ལ་བསྐོར་བ་གྱིས་ཤིག་གསུང་པ་ལྟར། ཕུག་རོན་གྱིས་སྤུར་ཁང་ལ་བསྐོར་བ་མཛད་པས། དེར་ཚོགས་པའི་སྐྱེ་བོ་རྣམས་ཡ་མཚན་ཞིང་ངོ་མཚར་ཆེ་བས། བླ་མ་ཡབ་སྲས་ལ་སངས་རྒྱས་ཀྱི་འདུ་ཤེས་སྐྱེས་པར་གྱུར་ཏོ། །དེའི་ཚེ་ཡུམ་བདག་མེད་མ་གང་ནས་བྱུང་ཆ་མེད་ལ་ཕེབས་ཏེ། སྤུར་ཁང་ལ་ཆོངས་གྲབ་(མཆོང་གྲབས་)མཛད་པ་གྲྭ་པ་རྣམས་ཀྱིས་བཟུང་བའི་ཚེ། ང་མེ་ལ་མཆོང་དུ་མི་འཇུག་རུང་། བུའི་སྤུར་ལ་བསྐོར་བ་བྱེད་དུ་ཆུག་གསུང་བཤུམས་པ་དང་བཅས་ཐུགས་འབྱུང་བའི་གསུང་སྣ་ཚོགས་འདོན་ཞིང་། བུ་ཆེན་རྣམས་ཀྱིས་སྐུ་སྐྱོར་ཏེ་པུར་ཁང་ལ་བསྐོར་བ་མཛད་པས། དེ་ལ་རྟེན་ལྷོ་བྲག་གི་མི་དེར་འདུས་པ་ཐམས་ཅད་མཆི་མ་མ་ཤོར་བ་གཅིག་ཀྱང་མེད་དོ། །དེའི་ཚེ་རྗེ་མར་པས་ཀྱང་ཐུགས་ཁྲལ་གྱི་རྣམ་པ་ཅུང་ཟད་མཛད་པ་ལས། སྔར་རྒན་རྒོན་གཉིས་ལ་བུ་གཅིག་ཡོད་པ་དེ་ཤི་བའི་ཚེ། བླ་མས། ཕ་མ་གཉིས་མྱ་ངན་ཆུང་བ་ལ་དགོངས། སྤྱིར་ཆོས་བཤད་མང་པོ་མཛད། ཁྱད་པར་ཁྱེད་གཉིས་ལ་རྨི་ལམ་དུ་བུ་གཅིག་བྱུང་བ་དེ་ཤི་ན་དེ་ལ་སྡུག་བསྔལ་འབྱུང་སྟེ། མ་སྐྱེས་པ་ལ་ཤི་བའི་སྡུག་བསྔལ་བྱེད་པ་ཡིན། དེ་དང་ད་ལྟའི་བུ་ལ་ཁྱད་མེད་
2-3-101a
པས། རྨི་ལམ་ཡིན་སྒྱུ་མ་ཡིན་སྙམ་པ་གྱིས་ལ་སེམས་ཁྲལ་མ་བྱེད། ཅེས་གསུངས་པའི་རྒན་རྒོན་དེ་གཉིས་བྱུང་སྟེ། བླ་མ་ལགས། བདག་ཅག་གཉིས་ཀྱི་བུ་གཅིག་པོ་ཤི་བའི་ཚེ། རྨི་ལམ་ཡིན་སྒྱུ་མ་ཡིན་པས་སེམས་ཁྲལ་མ་བྱེད་གསུང་གི་གདའ་བ། བླ་མ་ལ་ནི་ད་དུང་ཡང་། སྲས་དར་མ་བསམ་གཏན་གྱིས་ཐོག་དྲངས་པའི་སྲས་པོ་དྲུག་ཙམ་གདའ་བས། སྲས་དར་མ་མདོ་སྡེ་གྲོངས་པ་ཡང་། རྨི་ལམ་ལགས་མོད་སྒྱུ་མ་ལགས་མོད། ཐུགས་ཁྲལ་མི་མཛད་པར་ཞུ་ཟེར་བྱུང་བས། བླ་མའི་ཞལ་ནས། ངའི་དེ་ཁྱེད་གཉིས་ལ་ཡིན་ལུགས་ཀྱི་ཆོས་བཤད་པ་ཡིན། ང་ལ་བདེན་བདེན་མོ་དངོས་པོར་འཛིན་པའི་སྡུག་བསྔལ་མེད། ཁྱེད་གཉིས་ཀྱི་བུས། དང་པོ་ལུས་ཀྱི་མདངས་དང་ཁའི་ཟས་འཕྲོག བར་དུ་ལག་གི་ནོར་དང་ཁང་གཞིས་འཕྲོག མཐར་ངན་སོང་གསུམ་དུ་སྐྱུར་བར་བྱེད་པ་དེ་དང་ངའི་བུ་མི་འདྲ། ངའི་བུ་དེ་མ་ཤི་ན་སངས་རྒྱས་ཀྱི་བསྟན་པ་དང་། སེམས་ཅན་ལ་ཕན་ཐོགས་པ་ཅིག་ཡོང་བ་ཡོད་པས། རྨི་ལམ་གྱི་ནང་ནས་རྨི་རྒོད། སྒྱུ་མའི་ནང་ནས་སྒྱུ་རྒོད་ཅིག ཡོང་བ་ཡོད་པ་ཡིན་ཏེ་གསུང་། དེ་ནས་མཆོད་འབུལ་རྣམས་
2-3-101b
གྲུབ་པའི་ཚེ། རྗེ་མར་པ་དགོངས་པ་ལ་བཞུགས་ཏེ། སྲས་ཀྱི་འགྲོ་དོན་གང་ན་ཡོད་གཟིགས་པས་རྒྱ་གར་ན་ཡོད་པ་མཁྱེན་ཏེ། ཕུག་རོན་ལ་མཆོད་པ་ཕུལ་ཞལ་བཀོད་མཛད་ནས། ཁྲོམ་ཀུན་གྱིས་མཐོང་སར་རྒྱ་གར་ལ་འཕུར་བཏང་སྟེ། དགོངས་པ་ལ་བཞུགས་པ་ལས། བླ་མའི་ཞལ་ནས། བདག་མེད་མ་མཆོད་པ་རྙིང་པ་རྣམས་བསྡུས་ལ་གསར་པ་ཤོམས་ཤིག ངའི་བུའི་ལམ་ནོར་སོང་གསུངས། ཕྱག་ཐལ་མོ་བརྡབ་དབུ་གཏུམས་ནས་དགོངས་པ་ལ་བཞུགས་པས་ཉི་མ་དགོང་མོར་སོང་བ་དང་། ཕུག་རོན་དེ་ཐང་ཆད་པའི་ཚུལ་དང་བཅས་ཡབ་ཀྱི་པང་དུ་བཙངས་བྱུང་བས། དོ་ནུབ་ཕུག་རོན་མཆོད་ཁང་དུ་གདན་དྲོངས་ལ་མཆོད་པ་ཕུལ་གསུངས་པ་ལྟར་མཆོད་པ་ཕུལ་བས། ནང་པར་ཡང་མི་མང་པོ་ཚོགས་པའི་སར་ཕུག་རོན་དེ་གདན་དྲངས་ཏེ། ཡབ་ཀྱི་ཞལ་ནས། བུ་ཁྱོད་ཀྱི་ཁ་སང་གི་ལམ་དེ་ནོར་བ་ཡིན་ནོ། །ད་དུང་ཡང་གཡོན་རི་དུག་སྤྲུལ་མཐུར་དུ་རྒྱུགས་པ་འདྲ་བ་འདི་ལ་ཕྱིན་ན་སླར་ཡང་མུ་སྟེགས་ཀྱི་གླིང་དུ་སླེབ་ཡོད་པས་དེ་ལ་མ་འགྲོ་བར། གཡས་རི་གླང་པོ་ཆེ་གྲེས་ན་ཉལ་བ་འདྲ་བ་འདིའི་རྒྱུད་ཟུང་ལ་སོང་ཤིག །འདིའི་རི་རྒྱུད་རྫོགས་
2-3-102a
མཚམས་སུ་ཡི་དམ་གྱིས་འོད་ཀྱི་ལམ་སྣ་ཞིག་ཡོད། དེའི་ཕྱི་བཞིན་བྱོན་པས། བསིལ་བ་ཚལ་ཀྱི་དུར་ཁྲོད་ན། བྲམ་ཟེའི་ཁྱེའུ་ལོ་བཅུ་གསུམ་ཙམ་ལོན་པའི་རོ་བསྐྱེལ་བ་དང་འཕྲད་ཡོང་བར་འདུག་པས། དེ་ལ་གྲོང་འཇུག་མཛོད་ལ་སེམས་ཅན་གྱི་དོན་མཛོད་ཅིག་གསུངས་པས། ཕུག་རོན་དེས་ཡབ་ཡུམ་ལ་བསྐོར་བ་ལན་གསུམ་དང་། ཕྱི་ཕྱག་གི་ཚུལ་དུ་དབུ་གུག་གུག་པ་ལན་གསུམ་མཛད་ནས། ཡབ་ཀྱི་བཀའ་བཞིན་འཕུར་སོང་བས། མི་ཀུན་མཆི་མ་ཤོར་ཞིང་། གྲོང་འཇུག་ལ་ངེས་ཤེས་འགྲོངས་པས། རྗེ་བཙུན་མར་པ་ལ་ཀུན་སངས་རྒྱས་དངོས་སུ་མཐོང་བར་གྱུར་ཏོ། །དེ་ནས་ཕུག་རོན་དེས་ཡབ་ཀྱི་བཀའ་བཞིན་བྱོན་པས། བར་ཆད་མེད་པར་བསིལ་བ་ཚལ་གྱི་དུར་ཁྲོད་དུ། བྲམ་ཟེ་བཟའ་མི་གཉིས་ལ་བུ་གཅིག་ཡོད་པ་དེ་ཤི་བའི་རོ་སྐྱེལ་བ་དང་ཐུག་སྟེ། སྐྱེལ་མི་རྣམས་རོ་ཚོགས་བྱེད་ཚེ་ཕེབས་པ། དེ་མ་ཐག་རོ་ལ་གྲོང་འཇུག་མཛད་ནས། བཞེངས་པས། རོ་བསྐྱེལ་མི་རྣམས་འཇིགས་པ་ལས། སྔར་ཡབ་ཀྱི་ཐུགས་རྗེས་རྒྱ་སྐད་བརྡ་འཕྲོད་ཙམ་མཁྱེན་པས། ང་རོ་ལངས་མིན་ང་རང་སོས་པ་ཡིན། ཁྱིམ་དུ་འགྲོ་གསུངས་པས་ཁོང་
2-3-102b
རྣམས་དགའ་དྲག་ཧ་ལས་ངོ་མཚར་དུ་གྱུར་པ་དང་བསྡེབས་བྱོན་པས། སྔར་གྱི་བྱིས་པ་རྩེད་གྲོགས་རྣམས་ན་རེ་ཁོ་མ་ཤི་བར་འདུག་ཟེར་མདུན་དུ་བྱུང་། ཡུལ་མི་རྣམས་ན་རེ། རིམ་གྲོ་ལ་དུར་ཁྲོད་དུ་ཕྱིན་པར་འདུག་ཟེར། ཕ་མ་གཉིས་དང་ཕྲད་པས་འཆངས་ཏེ་བརྒྱལ་བ་ལས་སངས་པ་དང་། ཤི་བ་སོས་པ་ལས་དགའ་ལུགས་ཇི་ལྟར་ཡོད་པ་ལྟར་དགའ་སྟེ། རོ་སྐྱེལ་མི་རྣམས་ལ་སོས་ལུགས་ཇི་ལྟར་བྱུང་དྲིས་པས། བུའི་རོའི་གམ་དུ་ཕུག་རོན་ཅིག་འཕུར་བྱུང་བ་དེ་མགོ་གུག་གུག་བྱས་ཤི་སོས་བ་དང་། བུ་སོས་བྱུང་ཟེར་རོ། །ཕ་མས་སྔར་ལྟར་བརྩེ་བས་སྐྱོང་ཞིང་འགྲོགས་པ་ལས། སྔར་གྱི་བུ་དེ་བས་ཤེས་རྒྱུད་དལ་ཞིང་ཆོས་ལ་དཀར་བ། ཕ་མ་ལ་གུས་ཤིང་དབུལ་ཕོངས་ལ་བྱམས་པ། དཀོན་མཆོག་ལ་མོས་ཤིང་དགེ་བ་ལ་བརྩོན་པ་ཞིག་འདུག་པས། སྔར་གྱི་བུ་དེ་མིན་པར་ཤེས་ཏེ་ཇི་ལྟར་ཡིན་དྲིས་པས། ཕུག་རོན་གྱི་གྲོང་འཇུག་བྱས་པ་སོགས་ལོ་རྒྱུས་རྒྱས་པར་བཤད་པས། རྒྱ་གར་གྱི་ཡུལ་དེའི་སྐད་དུ། ཕུག་རོན་ལ་ཏི་ཕུ་ཟེར་བས། དེ་ལ་ཡ་མཚན་པར་བྱས། མཚན་ཏེ་ཕུར་ཆགས་པ་ལས། བུའི་འདུ་
2-3-103a
ཤེས་མེད་པར་བླ་མ་ཟེར་ཏེ། རྒན་རྒོན་གཉིས་པོས་ཞབས་ཏོག་བྱས་པ་ལས། ཚེ་འདིར་ཡང་བུ་དང་འདྲ་བའི་ཕན་ཐོགས་བྱུང་ཤིང་། མཐར་རབ་ཏུ་བྱུང་ནས་ཐོས་བསམ་བསྒོམ་གསུམ་མཛད་པ་མཁས་གྲུབ་ཀྱི་སྐྱེས་ཆེན་ཏེ་ཕུ་གསང་སྔགས་ཀྱི་སྡོང་པོ་ཞེས་བྱ་བ་དེ་བྱུང་བར་གདའ། རྒྱ་གར་གྱི་ལོ་རྒྱུས་འདི་དག་ཕྱིས་རས་ཆུང་བ་(པ་)ལ་ཏེ་ཕུ་བས་གནང་བ་ལགས་སོ། །དེ་ནས་སྲས་ཀྱི་པུར་ཁང་ཞལ་ཕྱེ་བས། དབུ་ཐོད་ཀྱི་དུམ་བུ་ལ་བདེ་མཆོག་ལྷ་ལྔ་བྱོན་པ་སོགས་སྐུ་གསུང་ཐུགས་ཀྱི་རྟེན་རིང་བསྲེལ་མང་པོ་བྱུང་བ་ལས། སེམས་ལས་མེད་པའི་མི་འགའ་ཞིག་ན་རེ། བླ་མ་མར་པ་ལ་གདུང་བརྒྱུད་འཛིན་པ་ལ་ནི་ད་དུང་ཇོ་སྲས་དྲུག་ཙམ་འདུག །ཆོས་བརྒྱུད་འཛིན་པ་ལ་ནི་བུ་ཆེན་བཟང་ལ་མང་བ་འདུག །གྲོང་འཇུག་གི་ངོ་མཚར་ཡིད་ཆེས་པ་དེའང་། རྟེན་རིང་བསྲེལ་ངོ་མཚར་ཅན་འདི་དག་ལ་བསམ་ན་སྲས་དར་མ་མདོ་སྡེ་བཞུགས་པ་བས། སྐུ་ཡལ་བ་སེམས་ཅན་གྱི་དོན་ཆེ་བ་འདུག་ཟེར་བ་ཡང་བྱུང་ངོ་། །དེ་ནས་ཕྱོགས་ཕྱོགས་ཀྱི་བུ་ཆེན་སྔར་མ་ཕེབས་པ་རྣམས་ཕེབས། འབུལ་བ་རྣམས་མཛད་ཐུགས་སོས་རུང་། 
2-3-103b
ཡུམ་བདག་མེད་མ་ཐུགས་ཁྲལ་ཤིན་ཏུ་ཆེ་བ་ལས། བུ་ཆེན་རྣམས་འཛོམ་ཚེ། སྲས་ཀྱི་དུས་མཆོད་ཅིག་མཛད་པའི་ཚོགས་གྲལ་དུ་བླ་མའི་ཞལ་ནས། བདག་མེད་མ་ཕྱོགས་ཕྱོགས་ཀྱི་གྲྭ་པ་རྣམས་ཀྱང་སེམས་ཚབས་པ་ལས་མི་ཡོང་བ་འདུག སྤྱིར་འདུས་བྱས་ཐམས་ཅད་ཀྱི་མཚན་ཉིད་འདི་ཀ་ཡིན་ཞིང་། རང་རེ་ལ་སྒོས་སུ་བྱུང་བ་ནི་མིན་ལ། བླ་མའི་ལུང་བསྟན་དང་ཡང་མཐུན་པར་འདུག་པས། བུ་ལ་ཕན་རྒྱུ་མེད་པའི་ཁར་ཁྱེད་རང་སྡུག་པ་དང་། གཞན་ལ་ཆོས་བཤོད་པ་ལ་གནོད་པ་རྒན་རྒོན་གཉིས་ཀྱི་དཔེ་དང་མཚུངས་པས། ད་མྱ་ངན་མ་བྱེད་ཅིག་གསུང་། མྱ་ངན་སང་བྱེད་ཀྱི་མགུར་འདི་གསུངས་སོ།། །།རྗེ་བླ་མ་རྣམས་ལ་ཕྱག་འཚལ་ལོ། །ཆོས་བཤད་ཅིང་གོ་བའི་ཤེས་རབ་མ། །བདག་མེད་མ་ལ་གྲོས་གཅིག་འདེབས། །ཐ་མལ་དང་མ་བསྲེས་དྲན་པ་བསྟེན། །ངེས་ཤེས་བསྐྱེད་ལ་མྱ་ངན་སྤོངས། །བུ་གཅེས་པར་བསྐྱངས་པའི་མདོ་སྡེ་འབུམ། །འོད་གསལ་དབྱིངས་སུ་གཤེགས་པ་དེ། །རྗེ་དང་བཀའ་དྲིན་མཉམ་པ་བྱུང་། །དྲན་བདུན་(འདུན་)སྒྱུ་མའི་གསལ་ཐེབས་ཕྱིར། །མྱ་ངན་ལ་བྱ་ཡུལ་མིན་འདུག་ཅིང་། །སེམས་ཅན་ལ་ཉེ་རིང་མི་འདུག་
2-3-104a
པས། །འགྲོ་ཀུན་བརྩེ་བས་སྐྱོངས་ཤིག་བདག་མེད་མ། །བུའི་མྱ་ངན་སངས་སོ་བདག་མེད་མ། །གསེར་ལས་བཞེངས་པའི་མདོ་མང་སོགས། །སྐུ་གསུང་ཐུགས་ཀྱི་རྟེན་མཆོད་རྣམས། །བུ་མདོ་སྡེའི་དོན་དུ་བཞེངས་ལགས་ཀྱང་། །མདོ་སྡེ་འོད་གསལ་གྱི་དབྱིངས་སུ་གཤེགས། །རྟེན་བདག་མེད་ནམ་མཁའི་འཇའ་ཚོན་འདྲ། །སྣང་ཞིང་སྟོང་པར་རྟོགས་པ་དེས། །ཞབས་ཏོག་ལ་བྱ་ཡུལ་མ་རྙེད་རུང་། །ཀུན་གྱི་མཆོད་གནས་ཞུས་ཤིག་བདག་མེད་མ། །བུའི་མྱ་ངན་སངས་སོ་བདག་མེད་མ། །དཀའ་བ་སྤྱད་པའི་རྒྱུད་འགྲེལ་དང་། །ཐུགས་བཅུད་བསྡུས་པའི་མན་ངག་གནད། །ཟབ་དགུ་འདུས་པའི་སྙིང་པོ་དང་། །སྒྲ་ཐང་ཀློག་སྐད་ཀྱི་ལོ་ཙྪ་(ལོཙྪ་)རྣམས། །བུ་མདོ་སྡེའི་དོན་དུ་བསླབ་ལགས་ཀྱང་། །མདོ་སྡེ་འོད་གསལ་གྱི་དབྱིངས་སུ་གཤེགས། །ཆོས་བདག་མེད་གཏེར་གྱི་ཁ་བྱང་འདྲ། །ཆོས་མཉམ་པ་ཉིད་དུ་རྟོགས་པ་དེས། །ཀུན་ལ་སྟེར་རོ་བདག་མེད་མ། །བུའི་མྱ་ངན་སངས་སོ་བདག་མེད་མ། །སེར་སྣས་བསགས་པའི་ཟས་ནོར་དང་། །གྲྭ་པས་ཕུལ་བའི་གནག་ལུག་རྣམས། །བུ་མདོ་སྡེའི་དོན་དུ་སྤེལ་ལགས་ཀྱང་། །མདོ་སྡེ་འོད་གསལ་
2-3-104b
གྱི་དབྱིངས་སུ་གཤེགས། །ནོར་བདག་མེད་ས་འོག་གི་གཏེར་དང་འདྲ། །ཕྱུགས་བདག་མེད་སྤང་ཁའི་རི་དྭགས་འདྲ། །ནོར་ཕྱག་རྒྱ་ཆེན་པོར་རྟོགས་པ་དེས། །འཚོ་སྐྱོང་ལ་བྱེད་དོན་མི་འདུག་པས། །ཀུན་སྦྱིན་པར་མཐོང་ཞིག་བདག་མེད་མ། །བུའི་མྱ་ངན་སངས་སོ་བདག་མེད་མ། །ཕ་ཡུལ་སྤེ་གསར་གྱི་མཁར་ཞིང་དང་། །མི་ལས་བརྩིགས་པའི་ས་མཁར་རྣམས། །བུ་མདོ་སྡེའི་དོན་དུ་བགྱིས་ལགས་ཀྱང་། །མཁར་བདག་མེད་དྲི་ཟའི་གྲོང་ཁྱེར་འདྲ། །ཡུལ་སྣང་སྟོང་སྒྱུ་མར་རྟོགས་པ་དེས། །འཛིན་སྦས་ལ་བྱེད་དོན་མི་འདུག་པས། །མཁར་གྱི་འཛིན་སྦས་བོར་ཅིག་བདག་མེད་མ། །བུའི་མྱ་ངན་སངས་སོ་བདག་མེད་མ། །ཕ་སྤུན་མར་ཚོའི་ངོ་འཛིན་དང་། །དགྲ་སུན་སྐྱེ་བོ་རྒྱབ་བསྐྱུར་ཚུལ། །བུ་མདོ་སྡེའི་དོན་དུ་བྱས་ལགས་ཀྱང་། །མདོ་སྡེ་འོད་གསལ་གྱི་དབྱིངས་སུ་གཤེགས། །སྣང་བ་སེམས་སུ་རྟོགས་པ་དེས། །དགྲ་གཉེན་ལ་ཁྱད་པར་མི་འདུག་པས། །ཐམས་ཅད་ཆོས་སྐུར་སྒོམས་ཤིག་བདག་མེད་མ། །བུའི་མྱ་ངན་སངས་སོ་བདག་མེད་མ། །སྤྱིར་འདུས་བྱས་ཆོས་ཀྱི་མཚན་ཉིད་ལ། །མཐར་ཐུག་རྟག་པ་ཀུན་ལ་མེད། །སྒོས་འོ་སྐོལ་དང་དར་མ་མདོ་སྡེ་ཡི། །གནས་
2-3-105a
སྐབས་ཀྱི་འབྲེལ་བ་རྫོགས་ནས་ཐལ། །བྱ་ཐབས་མེད་པའི་ལས་སྐལ་ལ། །མྱ་ངན་མ་བྱེད་བདག་མེད་མ། །བུའི་མྱ་ངན་སངས་སོ་བདག་མེད་མ། །རང་ལ་བྱ་རྒྱུ་ཆོས་ལས་མེད། །བརྩེ་བས་དབུལ་ཕོངས་ཀྱི་འགྲོ་བ་དང་། །ཤུལ་ན་ལུས་པའི་བུ་དྲུག་ལ། །བསྟན་འཛིན་གྱི་རེ་བཞེད་མ་མཆིས་ཏེ། །མདོ་སྡེ་བཞིན་དུ་བརྩེ་བས་སྐྱོངས། །བུའི་མྱ་ངན་སངས་སོ་བདག་མེད་མ། །པཎ་ཆེན་ནཱ་རོའི་ལུང་བསྟན་ལྟར། །ཁོ་བོ་བུ་སློབ་བརྒྱུད་བཅས་རྣམས། །ཟླ་བ་ཡར་གྱི་ངོ་བཞིན་དུ། །གོང་ནས་གོང་དུ་འཕེལ་རྒྱས་པས། །བཀའ་བརྒྱུད་ཀྱི་བསྟན་པ་དར་རྒྱས་འབྱུང་། །བསྟན་དང་འགྲོ་བའི་དོན་ཆེན་གྲུབ། །ཉམས་དགའ་ཡོ་སྐྱིད་དོ་བདག་མེད་མ། །བུའི་མྱ་ངན་སངས་སོ་བདག་མེད་མ། །ཞེས་པའི་མགུར་གསུངས་པས། ཡུམ་བདག་མེད་མ་ལ་སོགས་པ་ཀུན་གྱིས་ཐུགས་ཁྲལ་སངས་ཤིང་ཐུགས་དམ་ལ་བོགས་ཐོན་པར་གྱུར་ཏོ།། །།
༄། །བསྟན་པ་ལ་དར་རྒྱས་འབྱུང་བར་ལུང་བསྟན་ནས་གདམས་ངག་དང་བྱིན་རླབས་ཀྱི་རྟེན་ཞལ་གདམས་དང་བཅས་ཏེ་གནང་ཚུལ།
གཉིས་པ་བསྟན་པ་ལ་དར་རྒྱས་འབྱུང་བར་ལུང་བསྟན་ནས་གདམས་ངག་བྱིན་རླབས་ཀྱི་རྟེན་ཞལ་གདམས་དང་བཅས་པ་གནང་ཚུལ་ནི། གྲྭ་པ་བུ་སློབ་ཀུན་འཛོམས་ནས་སྲས་ཀྱི་དུས་མཆོད་ཅིག་བགྱིས་པའི་ཚོགས་གྲལ་དུ་བླ་མ་ལ་སློབ་མ་བུ་ཆེན་རྣམས་ཀྱིས་ཞུས་པ། བླ་མ་རིན་པོ་ཆེ། སྲས་དུས་གསུམ་གྱི་སངས་རྒྱས་ལྟ་བུ་དེ་ནི་བདག་ཅག་སེམས་ཅན་རྣམས་ཀྱི་བསོད་ནམས་ཀྱིས་མ་ཐུབ། 
2-3-105b
བླ་མ་རང་ནི་སྐུ་ན་བགྲེས་གདའ་བས། ད་བཀའ་བརྒྱུད་ཀྱི་བསྟན་པ་རིན་པོ་ཆེ་ཇི་ལྟར་དར་བར་འགྱུར་བ་དང་། བདག་ཅག་སློབ་མ་རྣམས་ལ་གདུལ་བྱ་ཕྲིན་ལས་ཇི་ལྟར་འབྱུང་བའི་ལུང་བསྟན་ཅིག་གནང་བར་ཞུ་ཞུས་པས། བླ་མའི་ཞལ་ནས། ང་ནཱ་རོ་པཎ་ཆེན་གྱི་བུ་བརྒྱུད་འདི་རྟེན་འབྲེལ་ལ་མངའ་བརྙེས་པ་ཡིན་ཞིང་། བཀའ་བརྒྱུད་ཀྱི་བསྟན་པ་ལ་པཎ་ཆེན་ནཱ་རོའི་ལུང་བསྟན་བཟང་པོ་ཡང་ཡོད། ཁྱེད་བུ་ཆེན་རྣམས་ཀྱིས་རྨི་ལམ་སྒུགས་ཤོག་ཅིག་གསུངས། དེར་བུ་ཆེན་རྣམས་ཀྱིས་རྨི་ལམ་བཟུང་ནས་བཞུགས་པས། ཀུན་ལ་རྨི་ལམ་བཟང་པོ་འགའ་བྱུང་ནའང་། ལུང་བསྟན་ཕོག་པ་མ་བྱུང་སྟེ། རྗེ་བཙུན་མི་ལ་ལ་ཀ་ཆེན་བཞིའི་རྨི་ལམ་བྱུང་ཚུལ་རྣམས་བླ་མའི་དྲུང་དུ་ཕུལ་བ་འདི་ལྟར་རོ།། །།རྗེ་རྡོ་རྗེ་འཆང་གི་བཀའ་བཞིན་དུ། །མདང་གསུམ་ཉལ་བའི་རྨི་ལམ་ན། །བྱུང་ཚུལ་བླ་མའི་དྲུང་དུ་འབུལ། །སྙན་དར་ཅིག་བདག་ལ་གསན་པར་ཞུ། །འཛམ་གླིང་ཡངས་པའི་བྱང་ཕྱོགས་འདིར། །ལྷུན་སྟུག་གངས་རི་ཆགས་པ་རྨི། །གངས་རྩེ་མོ་དགུང་ལ་རེག་པ་རྨི། །རྩེ་ལ་ཉི་ཟླ་འཁོར་བ་རྨི། །འོད་ཀྱིས་ནམ་མཁའ་གང་བ་རྨི། །རྩ་བས་ས་གཞི་རྒྱས་པ་རྨིས། །ཕྱོགས་བཞིར་ཆུ་རྒྱུན་འབབ་པ་རྨི། །ཆུ་དེས་འགྲོ་ཀུན་ཚིམ་པ་རྨི། །ཆུ་སྣ་རྒྱ་མཚོར་འབབ་པ་རྨི། །མེ་ཏོག་སྣ་ཚོགས་བཀྲ་
2-3-106a
བ་རྨི། །སྤྱིར་གྱི་རྨི་ལམ་དེ་ལྟར་རྨི། །བླ་མ་དུས་གསུམ་སངས་རྒྱས་ལ་ཞུས་པ་ལགས། །སྒོས་ལྷུན་སྟུག་གངས་རི་མཐོན་པོ་དེའི། །ཤར་དུ་ཀ་ཆེན་བཙུགས་པ་རྨི། །ཀ་ཐོག་ཏུ་སེང་ཆེན་འགྱིང་བ་རྨི། །སེང་གཡུ་རལ་མཐའ་ནས་རྒྱས་པ་རྨི། །སྡེར་བཞི་གངས་ལ་བགྲད་པ་རྨི། །སྤྱན་མིག་གྱེན་དུ་གཟིགས་པ་རྨི། །སེང་གངས་དཀར་གྱི་ལྟོངས་སུ་འཕྱོ་བ་རྨི། །བླ་མ་དུས་གསུམ་སངས་རྒྱས་ལ་ཞུས་པ་ལགས། །ལྷོ་རུ་ཀ་ཆེན་བཙུགས་པ་རྨི། །ཀ་ཐོག་ཏུ་སྟག་མོ་ངར་བ་རྨི། །སྟག་གྲ་འཛུམ་མཐའ་ནས་རྒྱས་པ་རྨི། །ཁོང་འཛུམ་ལན་གསུམ་བྱས་པ་རྨི། །སྡེར་བཞི་ནགས་ལ་བགྲད་པ་རྨི། །སྤྱན་མིག་གྱེན་དུ་གཟིགས་པ་རྨི། །སྟག་ནགས་ཀྱི་གསེབ་ལ་འཕྱོ་བ་རྨི། །ནགས་ཐང་ཤིང་རྒྱུད་དུ་འབྲེལ་བ་རྨི། །བླ་མ་དུས་གསུམ་སངས་རྒྱས་ལ་ཞུས་པ་ལགས། །ནུབ་ཏུ་ཀ་ཆེན་བཙུགས་པ་རྨི། །ཀ་ཐོག་ཏུ་ཁྱུང་ཆེན་ལྡིང་བ་རྨི། །ཁྱུང་གཤོག་སྒྲོ་མཐའ་ནས་རྒྱས་པ་རྨི། །ཁྱུང་རྭ་གནམ་དུ་གཟིངས་པ་རྨི། །སྤྱན་མིག་གྱེན་དུ་གཟིགས་པ་རྨི། །ཁྱུང་ནམ་མཁའི་མཐོངས་ལ་འཕུར་བ་རྨི། །བླ་མ་དུས་གསུམ་སངས་རྒྱས་ལ་ཞུས་པ་ལགས། །བྱང་དུ་ཀ་ཆེན་བཙུགས་
2-3-106b
པ་རྨི། །ཀ་ཐོག་ཏུ་རྒོད་པོ་ལྡིང་བ་རྨི། །རྒོད་རྩེ་སྒྲོ་མཐའ་ནས་རྒྱས་པ་རྨི། །རྒོད་ཚང་བྲག་ལ་བཅས་པ་རྨི། །རྒོད་དེ་ལ་བུ་ཅིག་བྱུང་བ་རྨི། །བྱ་ཕྲན་གྱི་ནམ་མཁའ་གང་བ་རྨི། །སྤྱན་མིག་གྱེན་དུ་གཟིགས་པ་རྨི། །རྒོད་ནམ་མཁའི་མཐོངས་ལ་འཕུར་བ་རྨི། །བླ་མ་དུས་གསུམ་སངས་རྒྱས་ལ་ཞུས་པ་ལགས། །དེ་ལྟར་རྨི་བའི་རྟེན་འབྲེལ་གྱིས། །བཟང་བའི་དགེ་ལྟས་ཡིན་ནམ་སྙམ། །བདག་ནི་ཉམས་དགའ་ཤེས་པ་སྤྲོ། །ངོ་སྤྲོད་ལུང་བསྟན་གནང་དུ་གསོལ། །ཞེས་ཞུས་པས། བླ་མ་ཤིན་ཏུ་མཉེས་ཏེ། རྨི་ལམ་བཟང་འདུག་གསུངས། ཡུམ་བདག་མེད་མ་ཚོགས་ཀྱི་འཁོར་ལོ་བཟང་པོ་གཅིག་གི་གྲབས་གྱིས་གསུངས། དེར་ཡུམ་གྱིས་ཡོ་བྱད་རྣམས་འཛོམ་པ་དང་། སློབ་མ་བུ་ཆེན་རྣམས་བསགས་ནས་ཚོགས་འཁོར་བཟང་པོ་ཅིག་མཛད་པའི་གྲལ་དུ་བླ་མའི་ཞལ་ནས། མི་ལ་རྡོ་རྗེ་རྒྱལ་མཚན་ལ་རྨི་ལམ་བཟང་པོ་འདི་འདྲ་བྱུང་འདུག་པ་ངོ་མཚར་ཆེ་ཨང་གསུང་པ་ལ། བུ་ཆེན་རྣམས་ཀྱིས་རྨི་ལམ་དེ་དག་གི་བརྡ་དོན་བཀྲོལ་ནས་ལུང་བསྟན་གནང་བར་ཞུ་ཞུས་པས། སྐྱེས་མཆོག་སྒྲ་སྒྱུར་ཆེན་པོས་བུ་སློབ་རྣམས་ལ་བརྡ་སྤྲོ་རྒྱལ་པོའི་སྐད་ལ་དྲངས་ཏེ། བསྟན་པ་ལ་དར་རྒྱས་འབྱུང་བ་
2-3-107a
མ་འོངས་ལུང་བསྟན། རྨི་ལམ་ཀ་བཞི་བརྡ་འགྲོལ་གྱི་མགུར་ཆེན་འདི་གསུངས་སོ།། །།རྗེ་དུས་གསུམ་སངས་རྒྱས་འགྲོ་བའི་མགོན། །པཎ་ཆེན་ནཱ་རོའི་ཞབས་ལ་འདུད། །འདིར་བཞུགས་གདན་གང་བུ་སློབ་ཀུན། །རྨི་ལམ་བརྡ་ལས་བྱུང་བ་ཡི། །ངོ་མཚར་མ་འོངས་ལུང་བསྟན་འདི། །ཕ་རྒན་ང་ཡི་བཤད་ཀྱིས་ཉོན། །འཛམ་གླིང་བྱང་ཕྱོགས་ས་སྟེངས་དེ། །བོད་ན་དར་བའི་ཐུབ་བསྟན་ཡིན། །དེ་སྟེངས་གངས་རི་ཆགས་པ་དེ། །ཕ་རྒན་མར་པ་ལོ་ཙྪ་(ལོཙྪ་)དང་། །བཀའ་བརྒྱུད་ཡོངས་ཀྱི་བསྟན་པ་ཡིན། །གངས་རྩེ་མོ་དགུང་ལ་རེག་པ་དེ། །ལྟ་བ་འགྲན་ཟླ་མེད་པ་ཡིན། །རྩེ་ལ་ཉི་ཟླ་འཁོར་བ་དེ། །སྒོམ་པ་འོད་གསལ་མཁྱེན་བརྩེ་ཡིན། །འོད་ཀྱིས་ནམ་མཁའ་གང་བ་དེ། །ཐུགས་རྗེས་མ་རིག་མུན་སེལ་ཡིན། །རྩ་བས་ས་གཞི་ཁྱབ་པ་དེ། །ཕྲིན་ལས་ཀྱི་ས་གཞི་ཁྱབ་པ་ཡིན། །ཕྱོགས་བཞིར་ཆུ་རྒྱུན་འབབ་པ་དེ། །སྨིན་གྲོལ་དབང་བཞིའི་གདམས་ངག་ཡིན། །ཆུ་དེས་འགྲོ་ཀུན་ཚིམ་པ་དེ། །གདུལ་བྱ་སྨིན་ཅིང་གྲོལ་བ་ཡིན། །ཆུ་སྣ་རྒྱ་མཚོར་འབབ་པ་དེ། །འོད་གསལ་མ་བུ་མཇལ་བ་ཡིན། །མེ་ཏོག་སྣ་ཚོགས་བཀྲ་བ་དེ། །འབྲས་བུ་སྐྱོན་བྲལ་ཉམས་མྱོང་ཡིན། །སྤྱིར་
2-3-107b
རྨི་ལམ་མི་ངན་རྨི་ལམ་བཟང་། །འདིར་ཚོགས་གྲྭ་པ་བུ་སློབ་ཀུན། །སྒོས་ལྷུན་སྟུག་གངས་རི་མཐོན་པོ་དེའི། །ཤར་དུ་ཀ་ཆེན་བཙུགས་པ་དེ། །དོལ་གྱི་དབང་སྟོན་ཚུར་ངེ་ཡིན། །ཀ་ཐོག་ཏུ་སེང་ཆེན་འགྱིང་བ་དེ། །ཁོང་མི་གཞི་སེང་དང་འདྲ་བ་ཡིན། །སེང་གཡུ་རལ་མཐའ་ནས་རྒྱས་པ་དེ། །སྙན་བརྒྱུད་ཀྱི་གདམས་ངག་ཐེབས་པ་ཡིན། །སྡེར་བཞི་གངས་ལ་བགྲད་པ་དེ། །ཚད་མེད་བཞི་དང་ལྡན་པ་ཡིན། །སྤྱན་མིག་གྱེན་དུ་གཟིགས་པ་དེ། །འཁོར་བ་ལ་ཕྱི་ཕྱག་འཚལ་བ་ཡིན། །སེང་གངས་དཀར་ལྟོངས་སུ་འཕྱོ་བ་དེ། །ཐར་པའི་གླིང་དུ་གཤེགས་པ་ཡིན། །ཤར་རྨི་ལམ་མི་ངན་རྨི་ལམ་བཟང་། །འདིར་ཚོགས་གྲྭ་པ་བུ་སློབ་ཀུན། །ལྷོ་རུ་ཀ་ཆེན་བཙུགས་པ་དེ། །གཞུང་གི་རྔོག་སྟོན་ཆོས་རྡོར་ཡིན། །ཀ་ཐོག་ཏུ་སྟག་མོ་ངར་བ་དེ། །ཁོ་མི་གཞི་སྟག་དང་འདྲ་བ་ཡིན། །སྟག་གྲ་འཛུམ་མཐའ་ནས་རྒྱས་པ་དེ། །སྙན་བརྒྱུད་ཀྱི་གདམས་ངག་ཐེབས་པ་ཡིན། །ཁོང་འཛུམ་ལན་གསུམ་བྱས་པ་དེ། །སྐུ་གསུམ་རང་ངོ་འཕྲོད་པ་ཡིན། །སྡེར་བཞི་ནགས་ལ་བགྲད་པ་དེ། །ཕྲིན་ལས་རྣམ་བཞི་གྲུབ་པ་ཡིན། །སྤྱན་མིག་གྱེན་དུ་གཟིགས་པ་དེ། །འཁོར་བ་ལ་ཕྱི་ཕྱག་འཚལ་བ་ཡིན། །
2-3-108a
སྟག་ནགས་ཀྱི་གསེབ་ཏུ་འཕྱོ་བ་དེ། །ཐར་པའི་གླིང་དུ་གཤེགས་པ་ཡིན། །ཐང་ཤིང་རྒྱུད་དུ་འབེལ་(འབྲེལ་)བ་དེ། །བུ་ཚ་བོས་བརྒྱུད་པ་ཟིན་པ་ཡིན། །ལྷོ་རྨི་ལམ་མི་ངན་རྨི་ལམ་བཟང་། །འདིར་ཚོགས་གྲྭ་པ་བུ་སློབ་ཀུན། །ནུབ་ཏུ་ཀ་ཆེན་བཙུགས་པ་དེ། །གཙག་རོང་གི་མེས་སྟོན་ཚོན་པོ་ཡིན། །ཀ་ཐོག་ཏུ་ཁྱུང་ཆེན་ལྡིང་བ་དེ། །ཁོ་མི་གཞི་ཁྱུང་དང་འདྲ་བ་ཡིན། །ཁྱུང་གཤོག་སྒྲོ་མཐའ་ནས་རྒྱས་པ་དེ། །སྙན་བརྒྱུད་ཀྱི་གདམས་ངག་ཐེབས་པ་ཡིན། །ཁྱུང་རྭ་གནམ་དུ་གཟིངས་པ་དེ། །ལྟ་སྒོམ་གྱི་གོལ་ས་ཆོད་པ་ཡིན། །སྤྱན་མིག་གྱེན་དུ་གཟིགས་པ་དེ། །འཁོར་བ་ལ་ཕྱི་ཕྱག་འཚལ་བ་ཡིན། །ཁྱུང་ནམ་མཁའི་ལྟོངས་ལ་འཕུལ་བ་དེ། །ཐར་པའི་གླིང་དུ་གཤེགས་པ་ཡིན། །ནུབ་རྨི་ལམ་མི་ངན་རྨི་ལམ་བཟང་། །འདིར་ཚོགས་གྲྭ་པ་བུ་སློབ་ཀུན། །བྱང་དུ་ཀ་ཆེན་བཙུགས་པ་དེ། །གུང་ཐང་གི་མི་ལ་རས་པ་ཡིན། །ཀ་ཐོག་ཏུ་རྒོད་པོ་ལྡིང་བ་དེ། །ཁོང་མི་གཞི་རྒོད་དང་འདྲ་བ་ཡིན། །རྒོད་རྩེ་སྒྲོ་མཐའ་ནས་རྒྱས་པ་དེ། །སྙན་བརྒྱུད་ཀྱི་གདམས་ངག་ཐེབས་པ་ཡིན། །རྒོད་ཚང་བྲག་ལ་བཅས་པ་དེ། །ཚེ་སྲོག་བྲག་ལས་སྲ་བ་ཡིན། །རྒོད་དེ་ལ་བུ་གཅིག་
2-3-108b
བྱུང་བ་དེ། །འགྲན་གྱི་དོ་མེད་གཅིག་འོང་བ་ཡིན། །བྱ་ཕྲན་གྱིས་ནམ་མཁའ་གང་བ་དེ། །བཀའ་བརྒྱུད་ཀྱི་བསྟན་པ་དར་བ་ཡིན། །སྤྱན་མིག་གྱེན་དུ་གཟིགས་པ་དེ། །འཁོར་བ་ལ་ཕྱི་ཕྱག་འཚལ་བ་ཡིན། །རྒོད་ནམ་མཁའི་མཐོངས་སུ་འཕུར་བ་དེ། །ཐར་པའི་གླིང་དུ་གཤེགས་པ་ཡིན། །བྱང་རྨི་ལམ་མི་ངན་རྨི་ལམ་བཟང་། །ཁྱེད་འདིར་འཚོགས་རྣམས་ལ་བཤད་པ་ཡིན། །ང་ཕ་རྒན་གྱི་བྱ་བ་བྱས་ཤིང་ཚར། །ད་ཁྱེད་བུ་སློབ་ཀྱི་དུས་ལ་བབ་ནས་གདའ། །ང་མི་རྒན་གྱི་ཁ་ལ་གཏད་ཡོད་ན། །ཕྱིས་སྒྲུབ་བརྒྱུད་ཀྱི་བསྟན་པ་དར་ནས་འོང་། །ཞེས་གསུངས་པས། ཚོགས་པ་ཀུན་དགའ་སྤྲོ་དཔག་ཏུ་མེད་པ་ཐོབ་བོ། །དེ་ནས་བླ་མས་བུ་ཆེན་རྣམས་ལ་ཆོས་དང་གདམས་ངག་གི་དཀོར་མཛོད་རྣམས་ཁ་ཕྱེ་སྟེ། ཉིན་འཆད་ཅིང་མཚན་སྒོམ་དུ་བཅུག་ནས། ཀུན་ཐུགས་དམ་དམར་བར་ཡོད་པའི་ཚེ། སྐབས་སྐབས་སུ་བུ་སློབ་རྣམས་ཀྱིས་ཚོགས་དང་འབུལ་བ་བྱེད་པ་ལས། མེས་སྟོན་ཕྱི་ནས་སླེབ་པས་ཚོགས་བཤམས་ཏེ། འབུལ་བ་བར་པ་བགྱིས་པའི་ཚོགས་གྲམ་དུ། མར་(མེས་)སྟོན་གྱིས། བླ་མ་ལགས། སྲས་སངས་རྒྱས་ལྟ་བུ་དེ་བདག་ཅག་རྣམས་ཀྱི་བསོད་ནམས་ཀྱིས་མ་ཐུབ་
2-3-109a
རུང་། བླ་མ་རང་ཉི་ཟླ་ལྟ་བུ་ལ། བླ་མ་རྔོག་པས་དབུ་མཛད་ཐུགས་སྲས་བུ་ཆེན་རྒྱུ་སྐར་ལྟ་བུས་བསྐོར་ནས། གསང་སྔགས་ཀྱི་བསྟན་པ་ཉིན་མོར་བགྱིད་པ་ཡང་ངོ་མཚར་ཆེན་པོ་ལགས་པས། དོ་ནུབ་གྱི་ཚོགས་གྲལ་འདིར་བླ་མ་རང་གི་མཛད་པ། བདག་ཅག་རྣམས་ཀྱི་མིག་རྐྱེན་ལ་ཕན་པའི་མགུར་ཞིག་ཐུགས་ལ་འདོགས་པར་ཞུ་ཞེས་ཞུས་པས། རྗེ་མར་པས། མེས་སྟོན་ཆོས་ལ་བཀའ་ཤིན་ཏུ་དོག་པར་མཁྱེན་ནས། དེ་ལ་དགོངས་པའི་མགུར་འདི་གསུངས་སོ།། །།རྗེ་བླ་མ་དང་མི་བསྐྱོད་ཐ་དད་མེད། །སྤྱི་གཙུག་རྒྱན་དུ་བཞུགས་སུ་གསོལ། །དུས་དེ་རིང་རྒྱུད་བཤད་ཚོགས་གྲལ་དུ། །ང་མར་སྟོན་ཆོས་ཀྱི་བློ་གྲོས་འདི། །དགོས་པའི་ལོ་རྒྱུས་གླུ་རུ་ལེན། །ཡུལ་རྣ་བས་ཐོས་པའི་གཙང་དུ་ཕྱིན། །དཔལ་མྱུ་གུ་ལུང་གི་དགོན་པ་རུ། །གསང་སྔགས་ཆོས་ཀྱི་མུ་གེ་ལ། །སེམས་ཡི་དྭགས་བྱེད་ཅིང་ལོ་གསུམ་བསྡད། །ལར་མི་ཚེ་སྟོང་སྐྱེལ་བྱས་པ་འདྲ། །ལྷོ་བལ་ཕྱོགས་སུ་འགྲོ་བར་བསེམ། །ཆོས་སྐོམ་ཆུས་དཀོན་པའི་སྡུག་ཉམས་ཀྱིས། །ལན་ཅིག་ཤེས་པའི་དུས་བྱུང་ན། །འདོད་པའི་མི་ལ་སྦྱིན་དགོས་བསམ། །ཆོས་དཀའ་ལས་
2-3-109b
སྲོག་དང་དོ་བདོས་པའི། །ཟབ་མོའི་གདམས་ངག་ནུས་པར་ཕངས། །མེས་སྟོན་དང་རྔོག་སྟོན་མ་གཏོགས་པ། །ཁོང་གཞན་ལ་གཞུང་བཤད་བྱས་པ་མེད། །ཆོས་འདོད་པ་རྣམས་ལ་བཤོད་ཅིག་བྱས། །ནོར་འབུལ་བ་ཅན་གྱི་སློབ་མས་ཀྱང་། །བླ་མ་ལ་བཀའ་རྒྱ་བཏབ་པ་མེད། །ནོར་ཅི་ཡང་མེད་པའི་མཐུ་ཆེན་དང་། །ཞབས་ཏོག་ཅན་གྱི་རྔོག་སྟོན་ལ། །གདམས་ངག་ལ་དམ་ལྷོད་མ་བྱས་པས། །དམ་ཆོས་ཚུལ་བཞིན་བསྒྲུབ་པ་གྱིས། །མི་ང་ཡིས་དཀའ་ལས་འདི་ཙམ་བྱས། །ནོར་ཆུད་ཟོས་ཅན་དུ་མ་སོང་བ། །ལག་ཏུ་གསེར་སྲང་བརྒྱ་ཅུ་འཁྱེར། །རྟེན་ཁྱད་པར་ཅན་ལ་མཆོད་པ་ཕུལ། །བླ་མ་རྣམས་ལ་འབུལ་བ་བགྱིས། །གནས་ཁྱད་པར་ཅན་དུ་ཚོགས་གཏོར་བྱས། །བུ་ཁྱེད་ཀྱིས་བྱས་པའི་ཞབས་ཏོག་ལ། །དྲིན་ལན་དམ་ཆོས་དཔག་མེད་སྦྱིན། །ཆོས་ཀྱི་ཞོ་ཤ་ཉམས་སུ་ལོང་། །འགྲོ་བ་གཞན་ལ་ཅི་ཕན་མཛོད། །ཅེས་གསུངས་པས། མེ་སྟོན་ངེས་ཤེས་འདྲོངས་ཏེ། ཐུགས་བསྐྱེད་ཆེན་པོ་བྱུང་ངོ་། །དེ་ནས་རྗེ་མར་པས་བདག་མེད་མའི་ཟབ་དབང་གཅིག་མཛད་པའི་ནུབ་མོ་ཐུགས་དགོངས་ལ་བུ་སློབ་འདི་རྣམས་ལ། ཁྱད་པར་དུ་ཆོས་གང་ལ་གང་གི་བཀའ་བབས་པས་ཕྲིན་ལས་ཡོང་བ་དེ་དང་དེ་ལ་དེ་སྟེར་
2-3-110a
དགོས་པས། ནང་པར་ཐོ་རངས་ཀྱི་རྟེན་འབྲེལ་བརྟག་པར་བྱ་དགོངས་ནས། ཐོ་རངས་འོད་གསལ་གྱི་ངང་ནས། བུ་ཆེན་རྣམས་ལ་གཟིགས་པས། གཞུང་གི་རྔོག་སྟོན་ཆོས་རྡོར་གྱི་རྒྱུད་འགྲེལ་འགའ་ལ་བཤར་སྦྱང་མཛད། དོལ་གྱི་ཚུར་(མཚུར་)སྟོན་དབང་ངེས་འཕོ་བ་སྒོམ། གཙང་རོང་གི་མེས་སྟོན་ཚོན་པོས་འོད་གསལ་སྒོམ། རྗེ་བཙུན་མི་ལས་གཏུམ་མོ་སྒོམ་པ་གཟིགས་པས། ཆོས་སོ་སོའི་བཀའ་བབས་དང་ཕྲིན་ལས་གང་ཡོད་མཁྱེན་ཏེ། བླ་མ་རྔོག་པ་ལ། མཐའ་དྲུག་ཚུལ་བཞིའི་སྒོ་ནས་རྒྱུད་བཤད་ཐབས་ཀྱི་མན་ངག་མུ་ཏིག་སྟར་ལ་བརྒྱུས་པ་ལྟ་བུ་ཞིག་ཡོད་པ་དེ་དང་། ནཱ་རོའི་རྒྱན་དྲུག་ཐུགས་དམ་པདྨ་རཱ་ག དགང་གཟར་དགང་བླུགས། རྒྱ་འགྲེལ་གྱི་ཕྱག་དཔེ་དང་བཅས་པ་གནང་ནས་བཤད་པའི་སྒོ་ནས་འགྲོ་དོན་གྱིས་ཤིག་གསུངས། དོལ་གྱི་ཚུར་སྟོན་དབང་ངེ་ལ་འཕོ་བ་རྒྱ་མཐོངས་ཁ་བྱེ་བ་ལ་བྱ་འཕུར་བ་ལྟ་བུ་ཅིག་ཡོད་པ་དེ་དང་། ནཱ་རོའི་དབུ་ལོ། ཕྱག་སེན། བདུད་རྩི་རིལ་བུ། རིགས་ལྔའི་དབུ་རྒྱན་རྣམས་གནང་སྟེ། འཕོ་བ་སྦྱོངས་ཤིག་གསུང་། གཙང་རོང་གི་མེས་སྟོན་ཚོམ་པོ་ལ་འོད་གསལ་མུན་ནང་དུ་མར་མེ་སྦར་བ་ལྟ་བུ་ཞིག་ཡོད་པ་དེ་དང་། ནཱ་
2-3-110b
རོའི་རྡོ་རྗེ་དྲིལ་བུ། ཌཱ་མ་རུ། ཉ་ཕྱིས་ཀྱི་ཀ་པཱ་ལ་རྣམས་གནང་ནས། བར་དོ་ཆོད་ཅིག་གསུངས། རྗེ་བཙུན་མི་ལ་ལ་གཏུམ་མོའི་ཁྱད་ཆོས་ཤིང་བཤགས་(གཤགས་)ལ་མེ་སྦར་བ་ལྟ་བུ་དང་། མཻ་ཏྲི་པའི་དབུ་ཞྭ། ནཱ་རོའི་ན་བཟའ་རྣམས་གནང་ནས། གནས་གཡའ་ཁྲོད་དང་། གངས་ཁྲོད་འགྲིམས་ལ་ལྟ་སྒོམ་ཉམས་སུ་ལོངས་ཤིག་གསུངས། དེ་ནས་གྲྭ་པ་ཀུན་འཛོམ་པའི་ཚོགས་འཁོར་གཅིག་མཛད་པའི་གྲལ་དུ་ངས་ཁྱེད་རྣམས་ལ་རྟེན་འབྲེལ་དང་མཐུན་པའི་གདམས་ངག་བྱིན་པ་བཞིན་སློབ་བརྒྱུད་རྣམས་ལ་ཡང་གཙོ་བོར་རང་རང་གི་གདམས་ངག་གིས་ཕན་ཐོགས་དང་ཕྲིན་ལས་རྒྱ་ཆེར་འབྱུང་བ་ཡིན་ནོ། །ད་མདོ་སྡེ་འབུམ་ནི་མེད། ངའི་བཀའ་བརྒྱུད་ཀྱི་ཕ་རབས་ཀྱི་གདམས་ངག་དང་བྱིན་རླབས་ཀྱི་བརྒྱུད་པ་ཁྱེད་རྣམས་ལ་གཏད་པ་ཡིན་པས་འབུངས་ཤིག །འགྲོ་དོན་འཕེལ་བར་ཡོང་ངོ་གསུངས། དེའི་རྗེས་སུ་མེས་སྟོན་གྱིས་འབུལ་བ་གསུམ་པ་བགྱིས་པའི་ཚོགས་གྲལ་དུ་མེས་སྟོན་གྱིས་བླ་མ་ལགས། དེ་རིང་བདག་ལ་ཐུགས་བརྩེ་བས་དགོངས་ཏེ། པཎ་ཆེན་ནཱ་རོ་པའི་ཐུགས་བཞེད། རྗེ་རང་གི་ཐུགས་ཉམས་ལ་འཁྲུངས་པ། ལྟ་བ་གཏན་ལ་ཕེབས་པའི་མགུར་ཞིག་
2-3-111a
གསུང་བར་ཞུ་ཞུས་པས། མེས་སྟོན་ཆོས་ལ་བཀའ་དོག་པར་འདུག་དགོངས་པ་ཐུགས་ལ་ནར་མར་ཡོད་པའི་སྟོབས་ཀྱིས། བླ་མའི་ཞལ་ནས། ངས་ཀྱང་ཁྱོད་འདོད་པའི་གླུ་ལེན། ཁྱོད་ཀྱིས་ཀྱང་ང་ལ་ནོར་ལོངས་སྤྱོད་ཀྱི་འབུལ་བ་དང་། རང་རེའི་ཆོས་ཀྱི་ཕྱག་ལེན་ཉམས་ལེན་ལ་དོ་གལ་ཆེན་པོ་བྱས་པས་རྒྱ་ཆེ་ལ་ངེས་པ་ཁོང་དུ་ཆུད་པ་ལ་མགུ། གདམས་ངག་ལ་བཀའ་དོག་པོ་རང་འདི་མ་བྱེད་པར། དད་ཅན་གྱི་གང་ཟག་ཆོས་ཆུད་མི་གསོན་པ་རྣམས་ལ་དབང་གདམས་ངག་ལ་ཡོངས་སུ་ཆུག་ཅིག་གསུངས། མེས་སྟོན་རང་གི་འདོད་ཞུས་དང་། བཀའ་ཡོངས་སུ་གཏོང་བ་ལ་ཆེད་དུ་གཏད་པའི་མགུར་འདི་གསུངས་སོ།། །།རྗེ་བདེ་བའི་དབང་ཕྱུག་འགྲོ་བའི་མགོན། །སྤྲུལ་སྐུ་ཟུང་འཇུག་ཧེ་རུ་ཀ །གར་དགུའི་ཉམས་ལེན་བདེ་སྟོང་དང་། །ཞལ་སྦྱོར་ལྷན་ཅིག་སྐྱེས་ལ་འདུད། །བརྡ་མཐོང་ཙམ་གྱིས་དོན་རྟོགས་ཤིང་། །ཟུར་གྱིས་གོ་བའི་གང་ཟག་ལ། །ཐོས་པ་ཙམ་གྱིས་གྲོལ་བར་གྱུར། །ཐ་སྙད་ཚིག་གིས་མི་མཚོན་པ། །ཟག་མེད་དོན་གྱི་ཡེ་ཤེས་སྟེར། །བསྐྱོད་པ་བདེ་བའི་སྐད་ཅིག་ལ། །སྡུག་བསྔལ་མེད་པ་དེ་ལྟ་བུར། །ཟག་བཅས་ཡིད་འདི་
2-3-111b
མི་ཆེས་པས། །བདེ་སྟོང་ཏིང་ངེ་འཛིན་གྱི་རྒྱུན། །རྟོག་པ་བྲལ་བའི་སེམས་ལ་བཞོག(ཞོག །)སངས་རྒྱས་ལྟ་བུའི་བླ་མའི་གསུང་། །ཡང་བརྒྱུད་པ་གཞན་ནས་འདི་སྐད་གསུངས། །མཚན་ཉིད་ལྡན་པའི་རིག་མ་ལ། །སྒྱུ་རྩལ་གོམས་པར་གྱུར་པ་ཡིས། །སྐྱེས་བུ་བྱ་ལ་མདའ་རྩེ་བཞིན། །གོམས་པ་རྒྱུད་ལ་རྟག་བརྟེན་ལ། །ཇི་ལྟར་ཞན་པའི་བག་ཆགས་འབྱུང་། །གདོད་ནས་དག་པའི་སེམས་རྒྱུད་འདི། །གློ་བུར་རྐྱེན་གྱིས་མ་བསླད་ན། །ནམ་མཁའ་བཞིན་དུ་འདུས་མ་བྱས། །ཕྱིན་ཅི་མ་ལོག་གནས་ལུགས་ཡིན། །ཡིད་ལ་བྱ་རྒྱུ་རྡུལ་དང་བྲལ། །བཟུང་དུ་རྡུལ་ཙམ་མི་དམིགས་ཀྱང་། །མན་ངག་རྒྱུད་ལ་གོམས་པ་ཡིས། །ཚེ་ཡི་འདུ་བྱེད་གཏོང་བའི་ཚེ། །ཕ་རོལ་ཕྱིན་པའི་དབྱིངས་སུ་ཐིམ། །དེ་ལ་སྐྱེ་བ་ཡོད་མ་ཡིན། །ནམ་མཁའ་ལྟ་བུའི་རང་སེམས་དེ། །ན་བུན་རྟོག་པས་མ་བསླད་ཅིག །རྗེ་ནཱ་རོ་པཎ་ཆེན་འདི་སྐད་གསུངས། །ཆོས་ཚུལ་བཞིན་ཉམས་སུ་ལེན་པ་ལ། །སྙུག་དོང་བཅུག་པའི་སྦྲུལ་བཞིན་དུ། །རྩོལ་བ་བྲལ་བའི་ལུས་མི་འགུལ། །ཡིད་ལ་ཆགས་པའི་མྱ་ངན་རྣམས། །གནད་ལ་ཕོག་པའི་ཟུག་རྔུ་ལྟར། །བྱ་བ་བཏང་བའི་སེམས་མི་ཡོངས། །སེམས་གཉུག་མའི་རང་བཞིན་གདོད་ནས་སྟོང་། །ཐོ་
2-3-112a
བས་དངོས་པོ་འཇོམས་པ་བཞིན། །མཐོང་དང་རེག་དང་དྲན་པས་གྲོལ། །དོན་འདི་ལ་ལེགས་པར་གོ་བར་མཛོད། །འདི་ཕྱག་རྒྱ་ཆེན་པོའི་སྒོམ་དབྱངས་ཡིན། །དམ་ཆོས་གཞན་ལ་ཕན་གྱུར་ན། །ཤོ་སྦར་མ་བསྡམས་མེས་སྟོན་པ། །སྐལ་བར་ལྡན་པའི་གང་ཟག་ལ། །སྦ་བར་མི་བྱ་མན་ངག་བྱིན། །ཅེས་གསུངས་སོ། །དེ་ནས་བུ་ཆེན་རྣམས་སོ་སོ་ཐ་དད་ཀྱི་གདན་སར་ཕེབས་པ་ལས། རྗེ་བཙུན་མི་ལ་ལ་ཞག་ཤས་སྡོད་གསུང་པ་ལྟར་བཞུགས་པས་རྗེ་མར་པ་ལ་ཐུགས་སྲས་སྐལ་ལྡན་གྱི་བུ་སློབ་ཇི་སྙེད་ཡོད་པ་རྣམས་ལ་སྙན་བརྒྱུད་ཀྱི་གདམས་ངག་མ་གནང་བར། ནཱ་རོའི་ལུང་བསྟན་ལྟར་རྗེ་བཙུན་མི་ལ་ལ་བདེ་མཆོག་མཁའ་འགྲོ་སྙན་བརྒྱུད་ཀྱི་དབང་གདམས་ངག་ཆ་ལག་དང་བཅས་རྫོགས་པར་གནང་ཞིང་། གཞན་ཡང་སྙན་བརྒྱུད་ཀྱི་ཆེ་བརྗོད་སོགས་ཞལ་གདམས་མང་དུ་གནང་ནས་མགུར་འདི་གསུངས་སོ།། །།བརྒྱུད་པ་ཀུན་ལ་ཡོད་མོད་ཀྱི། །མཁའ་འགྲོ་ཡོད་ན་ཡོད་པ་ཡིན། །མེས་པོ་ཀུན་ལ་ཡོད་མོད་ཀྱི། །ཏཻ་ལོ་ཡོད་ན་ཡོད་པ་ཡིན། །བླ་མ་ཀུན་ལ་ཡོད་མོད་ཀྱི། །ནཱ་རོ་ཡོད་ན་ཡོད་པ་ཡིན། །གདམས་ངག་ཀུན་ལ་ཡོད་མོད་ཀྱི། །སྙན་བརྒྱུད་ཡོད་ན་ཡོད་པ་ཡིན། །བསྒོམས་ཏེ་སངས་རྒྱས་ཀུན་ལ་
2-3-112b
ཡོད། །མ་བསྒོམས་རྒྱ་ན་རྒྱ་བ་ཡིན། །ཅེས་(ཞེས་)གསུངས་པས། རྗེ་བཙུན་མི་ལས། རང་རེའི་བརྒྱུད་པ་དང་གདམས་ངག་རྣམས་ལ། རྒྱ་བོད་ཀུན་ན་སྙན་གྲགས་ཆེ་བ་གཞིར་བཞག་ཅིང་། དེའི་སྟོབས་ཀྱིས་བོད་ན་ནི་སྙན་གྲགས་བརྒྱུད་པ་གོང་མ་རྣམས་དང་ཁྱད་མེད་པ་འདི་ཀ་ཡིན། རྗེ་རང་གིས་བླ་མ་རྣམས་ལ་མོས་གུས་ཀྱིས་གདུང་ཤུགས་དང་མཛད་འཕྲིན་འདིས་བླ་མ་རིན་པོ་ཆེ་ལ་རྒྱ་གར་ན་ཡང་སྙན་པར་གྲགས་པ་འདྲ་ལགས་ཞུས་པས། བླ་མའི་ཞལ་ནས། ངའི་བརྒྱུད་པ་དང་གདམས་ངག་ལ་རྒྱ་གར་ན་སྙན་གྲགས་ཆེ་བ་ལྟ་ཅི་སྨོས། ཁྱོད་ཟེར་བ་བཞིན་ཁོ་བོ་རང་ལ་ཡང་བླ་མ་ལ་མོས་གུས་ཆེ་བར་གྲགས། དེ་མི་གྲགས་དོན་གནད་འདི་དག་གིས་རང་དབང་མི་འདུག་གསུངས་མགུར་འདི་གསུངས་སོ།། །།ངའི་བརྒྱུད་པ་སྙན་པར་མི་གྲགས་རྒྱུ། །མཁའ་འགྲོ་ཆོས་ཀྱི་སྤྱན་ལྡན་ཡིན། །མོས་པ་སྙན་པར་མི་གྲགས་རྒྱུ། །ཏེ་(ཏཻ་)ལོ་སངས་རྒྱས་ཉག་གཅིག་ཡིན། །བླ་མ་སྙན་པར་མི་གྲགས་རྒྱུ། །ནཱ་རོ་ཆོས་ཀྱི་སྒྲོན་མེ་ཡིན། །མི་ང་རང་སྙན་པར་མི་གྲགས་རྒྱུ། །ནཱ་རོའི་ཐུགས་ཀྱི་སྲས་གཅིག་ཡིན། །གདམས་ངག་སྙན་པར་མི་གྲགས་རྒྱུ། །སྙན་བརྒྱུད་ཡིད་བཞིན་ནོར་བུ་འདི། །གཞན་ལ་མེད་པའི་ཁྱད་ཆོས་ཡིན། །ཅེས་གསུངས་
2-3-113a
པས། རྗེ་བཙུན་མི་ལས། གཞན་ལ་མེད་པའི་ཁྱད་ཆོས་སྙན་བརྒྱུད་ཐོབ་པས། རྗེ་བཙུན་མར་པའི་གདམས་པ་རྣམས་བུམ་པ་གང་བྱོའི་ཚུལ་དུ་བྱུང་བས་ཐུགས་ཚིམ་ཞིང་། དེ་འབྲས་ཀྱིས་བོད་གངས་ཅན་གྱི་ཁྲོད་འདིར་སངས་རྒྱས་ཀྱི་བསྟན་པའི་ཉི་མ་ཤར་བས་འགྲོ་བ་ཀུན་གྱི་མ་རིག་པའི་མུན་པ་བསལ་ནས་ཡེ་ཤེས་སྣང་བས་ཉིན་མོར་བགྱིས་པ་ལགས་སོ།། །།
༄། །འགྲོ་ཀུན་དང་བ་འདྲེན་ཕྱིར་བཀོད་པ་སྐུའི་རྫུ་འཕྲུལ་བསྟན་ཚུལ།
གསུམ་པ་འགྲོ་ཀུན་དང་བ་འདྲེན་ཕྱིར་བཀོད་པ་སྐུའི་རྫུ་འཕྲུལ་བསྟན་ཚུལ་ནི། རྗེ་བཙུན་མི་ལ་བླ་མའི་དྲུང་ནས་འབྱོན་དུས་བླ་མའི་སྐུ་ལྷ་སྐུ་དུ་མ་དང་། འབྱུང་བཞི་དང་། ཅི་ཡང་མི་སྣང་བ་དང་། འཇའ་ཚོན་དང་འོད་དུ་སྣང་བ་ལ་སོགས་ཏེ་རྫུ་འཕྲུལ་སྣ་ཚོགས་བསྟན་ནས་མཐོང་བས་ཡིད་ཆེས་སམ་གསུང་། མཐོང་ལགས། ཡིད་མི་ཆེས་པའི་རང་དབང་མི་གདའ་བས། བདག་རང་ཡང་བསྒོམས་ནས་འདི་འདྲ་བྱེད་དགོས་སྙམ་པ་བྱུང་ལགས། ཞུས་པས། བུ་དེ་ཡིན་ད་འགྲོ་ན་ཡང་སོང་ཞིག་གསུངས་ནས། རྗེ་བཙུན་མི་ལས་འཁྲུངས་ཡུལ་དུ་བྱོན་པར་གདའ། དེའི་རྗེས་སུ་མར་པ་མགོ་ལེགས་ལ་སོགས་པའི་བུ་སློབ་འགའ་དང་འགས་བླ་མའི་སྐུ་དགྱེས་པ་རྡོ་རྗེ། འཁོར་ལོ་བདེ་མཆོག གསང་བ་འདུས་པ། རྡོ་
2-3-113b
རྗེ་ཕག་མོ་སོགས་སུ་མཐོང་བ་མང་པོ་རང་བྱུང་བ་ལ། ཇི་ལྟར་ལགས་ཞུས་པས། དེ་ལྟར་ཀ་ཡིན་ཡོང་གསུངས། བསྐྱར་ནས་ཇི་ལྟར་ལགས་པ་གསུང་དུ་གསོལ་ཅེས་གསོལ་བ་བཏབ་པས། ང་ཡི་དམ་གྱི་བསྐྱེད་རིམ་གསལ་བདོ་བ་དང་། ཁྱེད་རང་རྣམས་ལ་དག་སྣང་ཤར་བ་གཉིས་དུས་མཚུངས་སུ་བྱུང་བ་ཡིན་གསུངས། ཡང་ལ་ལས་རྗེ་བཙུན་མར་པའི་གཟིམས་མལ་དང་། གཞན་ཡང་གང་བཞུགས་སར་སྐུ་དངོས་མ་མཐོང་བར་གསེར་གྱི་སྒྲོམ་བུ་འོད་འཚེར་བ་དང་། ལ་ལས་ཆུ་དྭངས་མེ་འཁྱིལ་བ། ལ་ལས་མེ་འབར་བ། ལ་ལས་འཇའ་ཚོན། ལ་ལས་ཅི་ཡང་མི་སྣང་བ། ལ་ལས་འོད་འཁྱིལ་ལེ་བ་སོགས་མཐོང་སྣང་མི་གཅིག་པ་སྣ་ཚོགས་བྱུང་ཚེ་ཇི་ལྟར་ལགས་ཞུས་པས། ཁྱེད་རྣམས་ལ་རྨི་ལམ་དུ་དེ་འདྲ་བྱུང་ན་སུ་ལ་འདྲི་གསུངས། དེ་ཡང་རྗེ་རང་ལ་ཞུ་བས་གསུང་དགོས་ཞུས་པས། འོ་ན་ངའི་འབྱུང་བ་ལྔའི་རྩ་ཐིག་རླུང་གསུམ་རྣམས་དྭངས་མར་གྱུར་ཏེ་རང་གནས་སུ་བསྟན་པ་དང་། ཁྱེད་རང་རྣམས་སྣང་བ་དག་པ་དུས་མཚུངས་པའི་མཐོང་སྣང་ཡིན་གསུངས་མགུར་འདི་གསུངས་སོ།། །།གནས་པ་རྩ་ལ་གཡོ་བ་རླུང་། །བཀོད་པ་བྱང་ཆུབ་སེམས་ཀྱི་རྟ། །རོ་སྙོམས་ལྕག་གིས་
2-3-114a
ཡོངས་བསྐུལ་ནས། །འོད་གསལ་འགྲོ་འོང་མེད་པར་རྒྱུག །སྐལ་ལྡན་སྐྱེས་བུས་སྣ་ཚོགས་མཐོང་། །ཞེས་གསུངས་སོ། །གཞན་ཡང་སྐྱེ་བ་འདིའི་གོང་ན་སྟག་ལ་ཞོན་ནས་ནགས་དང་། དུར་ཁྲོད་ཉུལ་བ་ཞིག་དྲན་བྱུང་། ད་གྲོང་འཇུག་གཅིག་ནས་གཅིག་ཏུ་ཞུགས་པས། འཆི་བའི་མིང་ཡོད་ལ་མེད་ཞིག་འོང་བ་འདུག་སྟེ། དཔལ་ནཱ་རོ་པའི་བཀའ་ལ་ངའི་འགྲོ་དོན་ཨུ་རྒྱན་མཁའ་སྤྱོད་ཆེ་བས་ཤོག་གསུངས་པ་ལྟར་འགྲོ་གསུངས། འདས་མ་འོངས་ཐོགས་མེད་དུ་མཁྱེན་པ་དང་། གཟིམས་ཁང་ནང་ནས་ཕྱིར་འབྱོན་པ་དང་། ཕྱི་ནས་ནང་དུ་འབྱོན་པ་ལ་སྐས་དང་སྒོ་ལ་འབྱོན་མི་དགོས་པར་གང་འདོད་ལ་ཐོགས་རྡུགས་མེད་པར་བྱོན་པས། སྲས་དཔལ་འོད་ན་རེ། རང་རེའི་ཕ་ཇོ་རྩིག་པ་དང་སྒོ་ཡིས་ཀྱང་མི་ཐུབ་པས། བསྲུང་དགོས་བྱུང་ན་གང་གིས་ཀྱང་མི་ཐུབ་པར་འདུག་གསུངས་པ་ལྟར། སྣང་བ་ལ་ཐོགས་རྡུགས་མེད་པ་ལ་སོགས་ཏེ། ཟད་པར་ཟིལ་གནོན་གྱི་ཐུགས་དམ་མངོན་དུ་གྱུར་པས། རྟགས་དང་རྫུ་འཕྲུལ་དཔག་ཏུ་མེད་པ་བསྟན་པའི་མཐར། ཡུམ་བདག་མེད་མ་འོད་དུ་ཞུ་ནས་རྗེ་མར་པའི་ཐུགས་ཀར་ཐིམ་པར་གྱུར་ཏོ།། །།
༄། །བསྟན་པ་དང་སེམས་ཅན་གྱི་དོན་མཛད་ནས་གཟུགས་སྐུ་ཆོས་དབྱིངས་སུ་ཐིམ་ཚུལ།
ལྔ་པ་བསྟན་པ་དང་སེམས་ཅན་གྱི་དོན་མཛད་
2-3-114b
ནས་གཟུགས་སྐུ་ཆོས་དབྱིངས་སུ་ཐིམ་ཚུལ་ནི། སྐུ་ཚེ་ཧྲིལ་པོར་བསྟན་པ་དང་སེམས་ཅན་གྱི་དོན་ཁོ་ན་མཛད་རྗེས། དགུང་ལོ་བརྒྱད་ཅུ་རྩ་བརྒྱད་བྱ་ལོ་རྟའི་ཟླ་བའི་ཚེས་བཅོ་ལྔའི་ཉི་མ་རྩེ་ཤར་ལ་བསྙུང་གཞི་མེད་ཅིང་། ཐུགས་སྤྲོ་བའི་ཉམས་དང་ལྡན་པ་ལས། ནམ་མཁའ་ལ་འཇའི་གུར་ཕུབ། མེ་ཏོག་སྣ་ཚོགས་ཀྱི་ཆར་འབབ་ཅིང་། རོལ་མོ་ཡིད་འཕྲོག་པ་སྣ་ཚོགས་ཀྱི་སྒྲ་དང་། དྲི་བཟང་དཔག་མེད་འཐུལ་བའི་ཚེ། ཞལ་འཛུམ་བག་དང་བཅས་པའི་མུ་ལ། སྤྱན་ཆབ་བསིལ་ཞིང་ཐལ་མོ་སྦྱར་ནས། སྤྱན་བཙུམས། དབུ་གུག་གུག་ཡན་ལག་བདུན་པ་མཛད་ཅིང་འདུག་དུས། མར་པ་མགོ་ལེགས་ཀྱིས་ཅི་ལགས་ཞུས་པས། མཆོད་པ་བཟང་པོ་ཤོམས་ཤིག །དཔལ་ནཱ་རོ་པ་དཔའ་བོ་མཁའ་འགྲོའི་ཚོགས་དཔག་ཏུ་མེད་པས་བསྐོར་ནས། ཞལ་བཞེས་ལྟར་ཁོ་བོ་བསུ་བ་ལ་ཕེབས་བྱུང་། ད་ནི་ཕྱག་ཕྱི་བྱས་དག་པ་མཁའ་སྤྱོད་ལ་འགྲོ་གསུངས་མཉམ་པར་བཞག་པའི་ངང་ལ་བཞུགས་ཤིང་། མར་པ་མགོ་ལེགས་ལ་སོགས་པའི་གྲྭ་པ་རྣམས་ཀྱིས་མཆོད་པ་དཔག་ཏུ་མེད་པ་བཤམས་ནས་ཕུལ་བའི་ཚེ། མེ་ཏོག་གི་ཆར། རོལ་མོའི་སྒྲ་ལ་སོགས་པ་རྣམས་སྔར་བས་ཀྱང་ཆེ་
2-3-115a
བ་དང་བཅས་གཤེགས་པ་ལགས་སོ། །དེ་ལྟར་སྤྱིར་སངས་རྒྱས་བསྟན་པའི་ཉི་མ། སྒོས་གངས་ཅན་ཁྲོད་ཀྱི་མུན་སེལ། གསང་སྔགས་བསྟན་པའི་སྲོག་ཤིང་། རྗེ་བཙུན་མར་པ་ལོ་ཙཱ་(ལོཙྪ་)དེ་ཉིད་སྐྱེ་བ་སྔོན་ནས་བྱང་ཆུབ་སེམས་དཔའ་སེམས་དཔའ་ཆེན་པོའི་རྣམ་འཕྲུལ་ཡིན་པ་དང་། མཚན་ལྡན་གྱི་བླ་མ་དམ་པ་རྣམས་ཀྱི་བཀའ་དྲིན་གྱིས་ཡེ་ཤེས་ཀྱི་དཔའ་བོ་མཁའ་འགྲོ་རྣམས་ལས་གསང་སྔགས་ཀྱི་དབང་གདམས་པ་རྣམས་ཐོབ། ནང་འོད་གསལ་གྱི་རྩལ་འབྱོངས་ཤིང་རླུང་སེམས་ལ་རང་དབང་ཐོབ་པས། གྲོང་འཇུག་དང་རྫུ་འཕྲུལ། མངོན་པར་མཁྱེན་པ་ལ་སོགས་པའི་ཡོན་ཏན་དཔག་མེད་མངོན་གྱུར་དུ་མངའ་ཡང་། སྦས་པའི་ཚུལ་དུ་བཞུགས་ནས། ཕྱི་རོལ་ཐ་མལ་པ་རྣམས་དང་སྣང་བ་མཐུན་པའི་ཚུལ་དུ། འདོད་པའི་ཡོན་ཏན་ལྔ་དང་། འཇིག་རྟེན་ཆོས་བརྒྱད་ལ་དགྱེས་བཞིན་རོལ་བའི་རྣམ་པའི་སྒོ་ནས། སྣོད་ལྡན་གྱི་གང་ཟག་མང་པོའི་དོན་མཛད་པ་དེ་རྒྱལ་བའི་ཡུམ་རྒྱས་པ་ལས། བྱང་ཆུབ་སེམས་དཔའ་འགའ་ཞིག་ལ་ནི་ཕ་དང་མ་དགོས་ལ། ཆུང་མ་མི་དགོས་པ་ཡོད་དོ། །བྱང་ཆུབ་སེམས་དཔའ་འགའ་ཞིག་ལ་ནི་ཕ་མ་དང་ཆུང་མ་དགོས་ལ། བུ་དང་བུ་
2-3-115b
མོ་མི་དགོས་པ་ཡོད་དོ། །བྱང་ཆུབ་སེམས་དཔའ་འགའ་ཞིག་ལ་ནི་ཕ་མ་དང་། ཆུང་མ་དང་། བུ་དང་བུ་མོ་དང་། འཁོར་ལ་སོགས་པའི་འདོད་ཡོན་ཐམས་ཅད་དགོས་པ་ཡོད་དོ། །ཞེས་གསུངས་པའི་དོན་ཕྱི་མ་དང་མཐུན་པ་དང་། གཞན་ཡང་བྱང་ཆུབ་སེམས་དཔའ་འཕགས་པ་ཆོས་འཕགས་དང་། རྟག་ཏུ་ངུ་དང་མཛད་སྤྱོད་མཐུན་པའི་སྒོ་ནས་སེམས་ཅན་གྱི་དོན་མཛད་པ་ལགས་སོ། །ཡང་རྒྱུད་སངས་རྒྱས་མཉམ་སྦྱོར་གྱི་ལེའུ་བདུན་པ་ལས། བུ་མོ་ཤིན་ཏུ་རྒྱན་པའམ། །དེ་བཞིན་ཆུང་མ་སྡུག་པ་དང་། །ཕུལ་ནས་རིན་གྱིས་བསླུ་བ་ནི། །སངས་རྒྱས་བྱང་ཆུབ་མཆོག་གི་ཡོན། །རིན་ཆེན་དག་གིས་ཕུལ་ནས་སུ། །སླར་ཡང་རིན་གྱིས་བསླུ་བ་ནི། །རྡོ་རྗེ་འཛིན་པས་སྦྱོར་བ་ཡི། །ཡོན་དེ་ཡོན་གྱི་མཆོག་ཡིན་ནོ། །ཞེས་གསུངས་པ་དང་མཐུན་པར་ཡོན་ཕུལ་ཞིང་བཞེས་པའི་སྒོ་ནས། སེམས་ཅན་གྱི་དོན་མཛད་པས་སྒྲུབ་བརྒྱུད་རྟོགས་པའི་བསྟན་པ་ནམ་མཁའི་མཐའ་དང་མཉམ་པ་བགྱིས་པ་ལགས་སོ། །རྗེ་མར་པ་དེ་ཉིད་ཀྱི་ཡོངས་སུ་གྲགས་ཤིང་བཀའ་དྲིན་ཆེ་བའི་བླ་མ་བཅུ་གསུམ་ནི། མཁས་གྲུབ་ནཱ་རོ་པཎ་ཆེན། རྒྱལ་སྲས་མཻ་ཏྲི་པ། དཔལ་ཞི་བ་བཟང་པོ། ཡེ་ཤེས་སྙིང་པོ། རྣལ་འབྱོར་མ་རུས་
2-3-116a
པའི་རྒྱན་ཅན། ཀ་སོ་རི་པ་དང་། རི་རི་པ་སྟེ་སིང་གྷ་གླིང་པ་སྐུ་མཆེད། ཛེ་ཏཱ་རི་པ། ཀུ་སུ་ལུ་ཆ་བ། པྲ་ཛྙཱ་རཀྵི་ཏ། སྤྱི་ཐེར་བ་དང་། པེན་ཏ་བ་སྟེ་བལ་པོ་སྐུ་མཆེད། ཇོ་བོ་རྗེ་ཨ་ཏི་ཤ་རྣམས་ལགས་སོ། །ཐུགས་ལས་འཁྲུངས་པའི་སྲས་བདུན་ནི། དར་མ་མདོ་སྡེ། དར་མ་བསམ་གཏན། ཆོས་དཔལ། མར་ལེབ། དཔལ་འོད། གྲགས་འོད། བྱ་རིག་འཁོར་ལོ་རྣམས་སོ། །ཐུགས་ལས་འཁྲུངས་པའི་ཡོངས་གྲགས་ཀྱི་བུ་ཆེན་བཞི་ནི། ཀ་བཞི་བརྡ་བཀྲོལ་ལྟར་ཡིན་ལ། ལས་ཅན་གྱི་སློབ་མ་བཞི་ནི། གཙང་གྱེར་ཕུའི་ཀློག་སྐྱ་ཆེན་པོ། འཕན་ཡུལ་གྱི་ཉ་མ་དཔལ་མོ། འདམ་སྙིང་དྲུང་གི་མར་པ་མགོ་ལེགས། ལྷོ་ལ་ཡག་གི་བ་རང་ལྦ་བ་ཅན་རྣམས་ལགས་སོ། །རྗེ་སྒྲ་སྒྱུར་ཆེན་པོ་དེ་ཉིད་ཀྱི་གཟུགས་སྐུ་ཆོས་དབྱིངས་སུ་ཐིམ་རྗེས་ཀུན་སངས་རྒྱས་སུ་ཡིད་ཆེས་ནས། དབུ་ལོ། ཕྱག་སེན། ན་བཟའ་ལ་སོགས་པའི་དུམ་བུ་ལ་ཡང་ཡོན་ཆེན་པོ་མང་དག་འབུལ་མཁན་བྱུང་བ་ལ་བརྟེན། སྐུ་གདུང་ཡིད་བཞིན་ནོར་བུ་མ་བཞུ་བར་དར་ཟབ་ཀྱིས་དྲིལ་ནས་འགྲོ་བའི་དོན་དུ་བཞུགས་སུ་གསོལ་བ་ལ། སྲས་དཔལ་འོད་ལ་སོགས་པ་རྣམས་ཀྱིས་སྐུ་ཤ་གདུང་དང་བཅས་པ་གནང་ནས་ཡོན་
2-3-116b
བླངས་པ་ལས། ཞལ་ལྐོའི་འཕན་ཡུལ་གྱི་དགོན་པ་ཞིག་ཏུ་ཕེབས་པ། བླ་མ་རྔོག་པས་གསན་ཏེ་མ་བཟོད་པར། སྲས་རྣམས་ལ་འབུལ་བ་ཆེན་པོ་འབུལ། གདུང་འདིར་གནང་དགོས་གསུངས་པས། འོ་ན་འབུལ་བའི་གཙོ་བོར་ཕ་ཇོ་རང་ལ། ནཱ་རོ་པས་གནང་བའི་ཐུགས་དམ་པདྨ་རཱ་ག་དགོས་གསུང་པ་ལྟར། ཐུགས་དམ་པདྨ་རཱ་གས་གཙོ་བྱས་པའི་ལོངས་སྤྱོད་དཔག་ཏུ་མེད་པ་ཕུལ་ནས། གདུང་གཞུང་དུ་སྤྱན་དྲངས་ཏེ། གདུང་རྟེན་གྱི་ནང་དུ་བླ་མ་རྔོག་པའི་རྟེན་གྱི་གཙོ་བོར་བཞུགས་པ་ལགས་སོ།། །།དེ་ལྟར་རྗེ་བཙུན་མར་སྟོན་ཆོས་ཀྱི་བློ་གྲོས་ཀྱི་རྣམ་པར་ཐར་པ་མཐོང་བ་དོན་ལྡན་འདི་ཉིད། རྗེ་བཙུན་མི་ལ་དང་མར་པ་མགོ་ལེགས་གཉིས་ཀྱིས། ངན་རྫོང་སྟོན་པ་ལ་ཞི་བ་རྒྱས་ཞལ་ནས་སྙན་དུ་བརྒྱུད་པ་དང་། རྗེ་བཙུན་མི་ལས་རས་ཆུང་པ་ལ་ཡང་གནང་བས། རས་ཆུང་པ་དང་ངན་རྫོང་སྟོན་པ་བྱང་ཆུབ་རྒྱལ་པོ་གཉིས་བཀའ་བགྲོས་ནས་བསྒྲིགས་པའི་རྣམ་ཐར་ཕྱི་མོའི་གཙོ་བོར་བཞུགས་པ་ལས། བླ་མ་རྔོག་པ། ཚུར་སྟོན། མེས་སྟོན་རྣམས་ཀྱིས་ཞལ་ནས་བྱུང་བའི་ཡིག་ཆ་ལ་སོགས་རྣམ་ཐར་དག་འཛོམ་པའི་ནང་ནས། སྐྱེ་འགྲོ་དང་བའི་མིག་རྐྱེན་མཆོག་ཏུ་གྱུར་པས། དོན་ལ་སྲིད་ཞིའི་
2-3-117a
དགོས་འདོད་འབྱུང་བ་རིན་པོ་ཆེ་བཻ་ཌཱུ་ཪྱའི་(བེེཌཱུརྱའི་)ཕྲེང་བ་རྣམས་ཀྱི་ཐུགས་རྗེའི་མིག་ལ་ལྷག་བསམ་གྱི་ལུང་ཚིག་སྡེབ་སྦྱོར་ལེགས་པར་བརྒྱུད་ནས་རྣམ་མཁྱེན་སངས་རྒྱས་ཐོབ་པའི་རྒྱན་འདོད་རྣམས་ཀྱི་ཡིད་འཕྲོག་པར་བྱེད་པའི་རིན་ཆེན་རྒྱན་གྱི་ཕྲེང་བ་འདི་ཉིད། དུར་ཁྲོད་ཉུལ་བའི་རྣལ་འབྱོར་པ་ཁྲག་འཐུང་རྒྱལ་པོས། དབང་ཕྱུག་མི་ལ་རས་པ་མངོན་པར་རྫོགས་པར་སངས་རྒྱས་པའི་གནས་མཆོག་ཆུ་དབར་སྤྲུལ་སྐུའི་ཕོ་བྲང་དུ་ཡི་གེར་བཀོད་པའི་ཡི་གེ་པ་ནི་ཤྲི་ལོ་པཎ་པ་འཇམ་དཔལ་ཆོས་ལྷའོ།། །།གྲུབ་པའི་མཆོག་ཏུ་མཚན་གྱི་ཡི་གེ་ཡང་། །སྲིད་དང་ཞི་བའི་ཁོངས་ན་རབ་འབར་བ། །ཧེ་རུ་ཀ་དངོས་མར་སྟོན་ལོ་ཙྪ་(ལོཙྪ་)བ། །བྱང་ཆུབ་བར་དུ་གཙུག་གི་རྒྱན་གཅིག་ཉིད། ༡ །གང་དེའི་སྔོན་སྨོན་དུས་སུ་བབ་པ་ལས། །རྡོ་རྗེ་ཐེག་པའི་བཅུད་ཀྱི་ཡང་བཅུད་ནི། །གངས་ཅན་འདི་ན་འདྲེན་པར་བྱེད་པའི་མཐུ། །མཁས་དང་གྲུབ་པའི་ཡོན་ཏན་ཡོངས་རྫོགས་པས། ༢ །བཀའ་བཞི་བརྒྱུད་པའི་མན་ངག་སྙིང་པོའི་བཅུད། །བླ་མེད་རོ་ལྡན་མྱོང་ལས་མཐོང་ཆོས་དེར། །གསང་བ་མཆོག་གི་གོ་འཕང་བརྙེས་པ་ལས། །གྲུབ་པའི་སྒྲུབ་བརྒྱུད་འབུམ་ཕྲག་མང་པོ་བརྡོལ། ༣ །དེ་
2-3-117b
ཕྱིར་རྣམ་པར་ཐར་པའི་ཡི་གེའི་གདངས། །ཆ་ཙམ་རྣ་བར་སོན་ཡང་གང་གིས་སྔོན། །བསོད་ནམས་ཡེ་ཤེས་ཚོགས་གཉིས་རྒྱ་ཆེན་པོ། །སངས་རྒྱས་མང་པོའི་སྤྱན་སྔར་བསགས་པར་ཤེས། ༤ །གང་གི་ཡིད་ལ་གཞན་ན་ཆེས་དཀོན་པའི། །འདི་ཡི་དོན་བཟང་རོ་བཅུད་མྱོང་བ་དང་། །ལུས་ཀྱི་བ་སྤུ་ལྡང་བར་འགྱུར་བ་དེའི། །སྙིང་ལ་རྒྱལ་ཀུན་བྱིན་རླབས་དུས་གཅིག་འཇུག ༥ །དེས་ན་འདི་ཡི་ཡི་གེ་ཕྱི་མོ་ནི། །ཚེ་རབས་རིགས་གཟུགས་དབང་ཕྱུག་ཤེས་རབ་སོགས། །རྨད་བྱུང་ཡོན་ཏན་དཔལ་གྱིས་བརྗིད་པ་ཡི། །དལ་འབྱོར་རྟེན་ལ་སྙིང་པོ་ལྷུར་ལེན་པ། ༦ །གང་དེས་ལྷག་བསམ་དགེ་བསྐུལ་གྱིས་དྲངས་པའི། །ཡོན་སྦྱོར་དད་གཏོང་མཆོག་ལ་གོམས་པ་ཡི། །གྲུ་མོ་ཚོང་དཔོན་པདྨ་དགྲ་འདུལ་གྱིས། །གཏན་ལ་(པ་)མེད་པའི་སྙིང་སྟོབས་ཡང་དག་བསྐྱེད། ༧ །བྲིས་རྐོས་བྱེད་པོ་ཀརྨ་བསམ་གྲུབ་དང་། །ཚེ་རིང་ལ་སོགས་སོར་མོའི་འདུ་བྱེད་ལས། །བསྐྲུན་པའི་སྐྱེ་རྒུའི་མཆོད་སྡོང་གཅིག་པུ་པ། །ལེགས་བྱས་བླ་ན་མེད་པ་འདི་ཉིད་གྲུབ། ༨ །དགེ་བས་གཏོང་དང་ལས་ཀྱིས་འབྲེལ་པ་གཙོས། །མཁའ་མཐས་གཏུགས་པའི་མར་གྱུར་སེམས་ཅན་ཀུན། །སྡུལ་(སྡུག་)བསྔལ་རྒྱ་མཚོའི་འཁོར་བ་ཕྱིར་བསྙིལ་ཏེ། །ཐར་པ་
2-3-118a
མཆོག་ལ་མྱུར་དུ་གནས་པར་ཤོག ༩ །སྐྱེ་བའི་ཕྲེང་བར་འཁོར་ལོ་བཞི་ལྡན་པའི། །ལུས་མཆོག་ལྷ་ལས་ལྷག་པ་ཐོབ་པ་ནི། །དགེ་མཛད་བླ་མའི་རྣམ་རོལ་ལས་བྱུང་བའི། །མཚན་ལྡན་བཤེས་གཉེན་དམ་པས་རྗེས་བཟུང་ནས། ༡༠ །རྒྱུ་དང་འབྲས་བུའི་ཐེག་ཆེན་དམ་ཆོས་ལ། །ངོམ་པ་མེད་པར་སྤྱོད་ཅིང་གནས་སྐབས་སུ། །བྱང་ཆུབ་སེམས་དང་དྲི་མེད་ཤེས་རབ་དང་། །ཚུལ་གནས་བསྒོམ་པའི་རྩེ་མོར་ཕྱིན་པ་ལས། ༡༡ །གཉུག་མའི་ཡེ་ཤེས་ལྷན་ཅིག་སྐྱེས་པ་ནི། །བསལ་བཞག་མེད་པ་མངོན་སུམ་མཐོང་པ་ལས། །ཟུང་འཇུག་འབྲས་བུའི་ཧེ་རུ་ཀ་དཔལ་ཆེ། །མར་སྟོན་ཆོས་རྗེའི་གོ་འཕང་ཐོབ་པར་ཤོག ༡༢ །དེ་ལས་མཁའ་དང་སྲིད་པ་ཇི་སྲིད་བར། །སྐུ་དང་ཡེ་ཤེས་རྣམ་པ་ཐམས་ཅད་པས། །འགྲོ་ལ་གནས་སྐབས་མཐར་ཐུག་མ་ལུས་པར། །ཕན་པ་བླ་མེད་བྱེད་པ་ཉིད་གྱུར་ཅིག །༡༣ [ཅེས་པའང་རྗེ་མངའ་བདག་ཆེན་པོའི་རྣམ་ཐར་སྤར་དུ་བསྒྲུབས་པ་ལ་ཤིན་ཏུ་རྗེས་སུ་ཡི་རང་བའི་སྒོ་ནས་སྤར་བྱང་སྨོན་ཚིག་དང་བཅས་པ་འདི་ནི་མགོན་པོ་གང་གི་སྒྲུབ་བརྒྱུད་ཀྱི་རྗེས་སུ་ཞུགས་ཤིང་རྗེས་སུ་སྒྲུབ་པ་ཀརྨ་ངག་དབང་ཡོན་ཏན་རྒྱ་མཚོ་བློ་གྲོས་མཐའ་ཡས་པའི་སྡེས་མདོ་སྨད་རྫོང་གསར་བཀྲ་ཤིས་ལྷ་རྩེའི་ཆོས་གྲྭ་ཆེན་པོར་[ཅེས་པའང་རྗེ་མངའ་བདག་ཆེན་པོའི་རྣམ་ཐར་སྤར་དུ་བསྒྲུབས་པ་ལ་ཤིན་ཏུ་རྗེས་སུ་ཡི་རང་བའི་སྒོ་ནས་སྤར་བྱང་སྨོན་ཚིག་དང་བཅས་པ་འདི་ནི་མགོན་པོ་གང་གི་སྒྲུབ་བརྒྱུད་ཀྱི་རྗེས་སུ་ཞུགས་ཤིང་རྗེས་སུ་སྒྲུབ་པ་ཀརྨ་ངག་དབང་ཡོན་ཏན་རྒྱ་མཚོ་བློ་གྲོས་མཐའ་ཡས་པའི་སྡེས་མདོ་སྨད་རྫོང་གསར་བཀྲ་ཤིས་ལྷ་རྩེའི་ཆོས་གྲྭ་ཆེན་པོར་
2-3-118b
སྦྱར་བ་དགེ་ལེགས་འཕེལ།]སྦྱར་བ་དགེ་ལེགས་འཕེལ།] །རྗེ་བཙུན་མར་མི་དྭགས་གསུམ་གྱི་རྣམ་མགུར་གསོལ་འདེབས་བཅས་ཀྱི་སྤར་གཞི་རྣམས་བསྟན་རྒྱས་གླིང་དུ་བཞུགས།། །།སརྦ་མངྒ་ལཾ།། །།
